1 Revelesen blong Jon, wan wokman blong God, we Jisas Kraes i bin givim long hem, blong soemaot long ol wokman blong hem ol samting we bambae oli kam blong hapen i no longtaem; mo hem i sendem enjel blong hem i go long wokman blong hem Jon, blong i talemaot revelesen ia.

2 Jon i testifae long toktok blong God, mo testemoni blong Jisas Kraes, mo long saed blong evri samting we hem i bin luk.

3 Mi blesem olgeta we oli ridim hemia, mo olgeta we oli harem hemia mo oli haremsave ol toktok blong profesi ia, mo oli obei long ol samting we oli stap long ol toktok ia, from se taem we Lod bae i kam, i kam kolosap finis.

4 Hemia nao testemoni blong Jon i go long ol seven wokman we oli stap long ol seven jos long Esia. Gladhat i stap wetem yufala, mo pis i kam long hem we i stap, mo i bin stap, mo bambae i kam yet; hem we i bin sendem wan enjel blong hem i aot long jea blong hem, i kam blong testifae long olgeta we oli ol seven wokman long ol seven jos.

5 From hemia, mi, Jon, we mi fetful witnes, mi testifae long saed blong olgeta samting we enjel i bin talem long mi, mo i bin kam tru long mi tru long Jisas Kraes, fasbon blong olgeta dedman, mo Prins blong ol king blong wol ia.

6 Mo glori long hem we i lavem yumi; we i bin wasem yumi, i karemaot ol sin blong yumi wetem blad blong hem bakegen, mo i mekem yumi ol king mo ol pris blong God, Papa blong hem. Glori mo paoa bae i blong hem, blong oltaem mo oltaem. Amen.

7 From luk, hem i stap insaed long ol klaod long skae, hem i stap kam wetem ol ten blong ol taosen Sent blong hem; oli kam long kingdom; hem i gat glori blong Papa blong hem. Mo evri ae bambae oli luk hem; mo olgeta we oli bin sperem bodi blong hem, mo evri famli blong wol ia bambae oli krae from hem. I olsem, Amen.

8 From se hem i bin talem: “Mi ia, mi Alfa mo Omega, mi mi stat mo mi mi en, mi mi Masta ia we i stap naoia, mo we i bin stap, mo we bae i kam, we Mi Gat Olgeta Paoa.”