¶ 1 FANOGO ki he lea, akimoutolu koe faga bulu a Besani, oku i he gaahi mouga o Samelia, akimoutolu oku fakamalohi‘i ae majiva, bea oku taomia ai ae baea, akimoutolu oku mou behe ki ho nau gaahi eiki, Omi, ka mau inu.

2 Kuo fuakava ki he ene maonioni e Jihova koe Otua, o behe, Vakai, e hoko ae gaahi aho kiate kimoutolu aia e ave kimoutolu aki ae gaahi mātau, bea mo ho mou hako aki ae mātau ika.

3 Bea te mou alu kitua i he gaahi ava, ae faga bulu kotoabe ki he mea oku i hono ao, bea te mou li akinautolu ki he fale fakaeieiki, oku behe e Jihova.

¶ 4 Ha‘u ki Beteli, bea fai hala; ki Kilikali, bea fakalahi ae talagataa; bea omi hoo mou gaahi feilaulau i he bogibogi kotoabe, mo hoo mou fatogia lotu hili ae ta‘u e tolu;

5 Bea hifo aki ae feilaulau fakafetai moe mea fakatabu, bea malaga aki mo fakaha ae gaahi hifo mataataata: he oku mou manako ai, e fānau a Isileli, oku behe e Jihova koe Otua.

6 Bea naaku tuku ae nifo maa kiate kimoutolu i ho mou gaahi kolo kotoabe, bea moe majiva ma i ho mou gaahi botu kotoabe: ka nae ikai te mou tafoki kiate au, oku behe e Jihova.

7 Bea naaku taofi foki ae uha meiate kimoutolu, i he kei toe ae mahina e tolu ki he ututa‘u: bea naaku behe ke uha ki he kolo e taha, kae ikai ke uha ki he kolo e taha: nae uha ki he botu e taha, bea koe botu nae ikai ke uha ki ai ne mae ia.

8 Bea nae fonoga ae kolo e ua be tolu ki he kolo e taha, ke inu vai; ka nae ikai te nau fiu: ka nae ikai te mou tafoki kiate au, oku behe e Jihova.

9 Kuo ta‘i akimoutolu aki ae mae moe mahunu: i he tubu a hoo mou goue, moe goue vaine, moe akau koe fiki moe olive, nae kai ia e he unufe maumau: ka nae ikai te mou tafoki kiate au, oku behe e Jihova.

10 Kuo fekau kiate kimoutolu ae mahaki lahi o hage ko Ijibite: kuo tamate‘i hoo mou kau talavou aki ae heleta, bea kuo ave hoo mou faga hose: bea kuou gaohi ke hoko ae namukū oe nofoaga o ho mou kau tau ki ho mou ava‘i ihu: ka nae ikai te mou tafoki kiate au, oku behe e Jihova.

11 Kuou fulihi hoo mou niihi, hage nae fulihi e he Otua a Sotoma mo Komola, bea naa mou hage koe botubotu‘i afi kuo hamuji mei he vela: ka nae ikai te mou tafoki kiate au, oku behe e Jihova.

12 Koia, e behe be a eku fai kiate koe, e Isileli: bea koeuhi teu fai eni kiate koe, teuteu ke feiloaki mo ho Otua, e Isileli.

13 Koeuhi, vakai, koia ia nae gaohi ae gaahi mouga, bea ne fakatubu ae matagi, bea oku ne fakaha ki he tagata, be koeha ene mahalo, oku ne gaohi ae bogibogi koe bouli, bea oku ne malaki ae gaahi botu maoluga o mamani, Ko Jihova, koe Otua oe gaahi kau tau a hono huafa.