¶ 1 NAE gaohi e Nebukanesa koe tu‘i ha mea fakatātā koula, aia nae teau ma uofulu ae haga o hono maoluga, bea ko hono māukubu koe haga e hogofulu ma ua; naa ne fokotuu ia i he toafa o Tula i he vahe fonua o Babilone.

2 Bea nae fekau e Nebukanesa, ke fakataha ae houeiki hau moe gaahi bule, moe gaahi eiki tau, moe gaahi houeiki, moe kau bule koloa, moe kau tagata fakamatala fono, moe kau fakamāu, bea moe kau bule kotoabe oe gaahi fonua, ke nau ha‘u ki he fakatabu‘i oe mea fakatātā aia nae fokotuu e he tu‘i ko Nebukanesa.

3 Koia nae fakataha ai ae houeiki ha‘u, moe gaahi bule, moe gaahi eiki tau, moe houeiki moe kau bule koloa, moe kau fakamatala fono, moe kau fakamāu, bea moe kau bule oe gaahi fonua, ki he fakatabu‘i oe mea fakatātā aia nae fokotuu e he tu‘i ko Nebukanesa; bea naa nau tuu i he ao oe mea fakatātā aia nae fokotuu e Nebukanesa.

4 Bea nae kalaga malohi ae tagata fekau; Oku fekau kiate kimoutolu, ae kakai moe gaahi buleaga moe kakai i he lea kehekehe;

5 Oka mou ka fanogo ki he le‘o oe koaneti, moe fagufagu, ae haabe moe sakibute, ae saliteli moe lali, moe gaahi mea hiva kehekehe kotoabe, te mou bunou hifo, mo hu ki he mea fakatātā aia kuo fokotuu e he tu‘i ko Nebukanesa;

6 Bea koia e ikai bunou mo hu, e li ia i he feituulaa koia ki he loto afi vela kakaha.

7 Koia i he feituula koia, i he fanogo ae kakai kotoabe ki he le‘o oe koaneti moe fagufagu, ae haabe, moe sakibute, ae saliteli, bea moe gaahi mea hiva kehekehe kotoabe, nae bunou hifo o hu ae kakai kotoabe, ae gaahi buleaga, bea moe gaahi lea, ki he mea fakatātā koula aia nae fokotuu e he tu‘i ko Nebukanesa.

¶ 8 Bea i he aho koia nae unuunu atu ha niihi oe kau Kalitia, o talatalaaki‘i ae kau Jiu.

9 Naa nau lea ki he tu‘i ko Nebukanesa o behe, E tu‘i, ke ke moui o taegata.

10 Ko koe, e tu‘i, kuo ke fai fono, koeuhi koe tagata kotoabe aia e fanogo ki he le‘o oe koaneti, moe fagufagu, ae haabe, moe sakibute, ae saliteli, moe lali, moe mea hiva kehekehe ke ne bunou hifo o hu ki he mea fakatātā koula:

11 Bea koia e ikai tomabee o hu, e li ia ki he loto afi vela kakaha.

12 Oku ai ae kau Jiu niihi, aia kuo ke fokotuu ke bule ki he gaahi gaue i he botu o Babilone, ko Seteleki, mo Mesake, mo Abeteniko; koe kau tagata ni, e tu‘i, kuo nau tae tokaga kiate koe; oku ikai te nau tauhi‘i ho gaahi otua, be hu ki he mea fakatātā koula, aia kuo ke fokotuu.

¶ 13 Koia nae fekau e Nebukanesa i he ene houhau mo ene tubutamaki ke omi a Seteleki, mo Mesake, mo Abeteniko. Koia naa nau omi ae kau tagata ni ki he ao oe tu‘i.

14 Bea ne lea a Nebukanesa, o beheage kiate kinautolu, Oku mooni, e Seteleki, mo Mesake, mo Abeteniko, oku ikai te mou tauhi‘i a hoku gaahi otua, be hu ki he mea fakatātā koula aia kuou fokotuu?

15 Koeni, kabau te mou tali oka mou ka fanogo ki he le‘o oe koaneti, moe fagufagu, ae haabe, moe sakibute, ae saliteli, moe lali, moe gaahi mea hiva kehekehe kotoabe, bea te mou bunou o hu ki he mea fakatātā aia kuou gaohi; behe e lelei: bea kabau e ikai te mou hu, e li akimoutolu i he feituulaa koia, ki he loto afi vela kakahā; bea kohai ae otua koia te ne fakahaofi akimoutolu mei hoku nima?

16 Bea nae tali e Seteleki, mo Mesake, mo Abeteniko, o behe ki he tu‘i, E Nebukanesa, oku ikai te mau toe fifili be koeha haa mau tali kiate koe i he mea ni.

17 Kabau oku behe, oku malohi a ho mau Otua, aia oku mau tauhi ke fakahaofi akimautolu mei he afi vela kakaha, bea te ne fakahaofi akimautolu mei ho nima, e tu‘i.

18 Bea kabau e ikai, ke ke ilo be e tu‘i, e ikai te mau tauhi‘i ho gaahi otua, be hu ki he mea fakatātā koula aia kuo ke fokotuu.

19 Koia nae fonu ai a Nebukanesa i he houhau, bea nae kehe ae aga o hono fofoga kia Seteleki, mo Mesake, mo Abeteniko, koia naa ne lea o fekau ke nau tafu ae afi ke liuga fitu hake ene vela i he ene faa vela.

20 Bea ne fekau ki he kau tagata malohi hake i he ene kogakau ke ha‘i a Seteleki, mo Mesake, mo Abeteniko, bea li akinautolu ki he afi vela kakaha.

21 Koia nae ha‘i ae kau tagata ni mo ho nau gaahi kofu tua, mo ho nau gaahi kofu loto, mo ho nau gaahi tatā, bea nae li akinautolu ki he loto afi vela kakaha.

22 Bea koe mea i he fekau ae tu‘i ke fai ke tootoo, bea mo ene vela aubito ae afi, nae tamate‘i e he ulo oe afi ae kau tagata koia nae hiki hake a Seteleki, mo Mesake, mo Abeteniko.

23 Bea nae to hifo ae kau tagata e toko tolu ni, ko Seteleki, mo Mesake, mo Abeteniko, ki he loto afi vela kakaha.

24 Bea nae ofo ae tu‘i ko Nebukanesa, bea ne tuu hake fakavave, mo ne lea o behe, ki he kau tagata tokoni i he bule, Ikai naa tau li ae kau tagata e toko tolu kuo ha‘i ki he loto afi? Bea naa nau lea o behe ki he tu‘i, Oku mooni, e tu‘i.

25 Bea nae lea ae tu‘i o beheage kiate kinautolu, Vakai, oku ou mamata ki he kau tagata e toko fa, oku ataatā, bea oku nau eveeva i he loto afi, bea oku ikai ha kovi kiate kinautolu, bea koe aga o hono toko fa, oku hage ia koe Alo oe Otua.

¶ 26 Bea nae unuunu atu a Nebukanesa o ofi ki he mataba ki he afi vela kakaha, o ne lea o behe, E Seteleki, mo Mesake, mo Abeteniko, akimoutolu ae kau tamaioeiki ae Otua maoluga, mou hu mai bea ha‘u ki heni. Bea nae hu mai a Seteleki, mo Mesake, mo Abeteniko, mei he loto afi.

27 Bea nae mamata e he houeiki hau, moe gaahi bule, moe gaahi eiki tau, moe kau mātua ae tu‘i, i he e nau fakataha, ki he kau tagata ni, aia nae ikai ke malohi ae afi ki ho nau jino, bea nae ikai mahunuhunu ha tuoni louulu e taha i ho nau ulu, bea nae ikai ke fakakehe ho nau kofu, bea nae ikai ke hoko ae nanamu oe afi kiate kinautolu.

28 Bea nae lea a Nebukanesa o behe, Oku monuia ae Otua o Seteleki, mo Mesake, mo Abeteniko, aia kuo fekau a ene agelo, bea kuo ne fakahaofi eue kau tamaioeiki nae falala kiate ia, bea kuo nau liliu ae lea ae tu‘i, o fakahaofi a ho nau jino, koeuhi ke oua naa nau tauhi, be hu ki ha otua, ka ko ho nau Otua be.

29 Koia oku ou fokotuu ae fono, iloga ha kakai, be ha buleaga, be ha lea, oku lea kovi ki he Otua o Seteleki, mo Mesake, mo Abeteniko, e tuutuu fakaikiiki akinautolu, bea e gaohi ho nau gaahi fale koe tuuga otoota: koeuhi oku ikai mo ha Otua e faa fakahaofi o hage koeni.

30 Bea nae hakeaki‘i e he tu‘i a Seteleki, mo Mesake, mo Abeteniko, i he fonua o Babilone.