¶ 1 KOE tu‘i ko Nebukanesa, ki he kakai kotoabe, moe gaahi buleaga, moe gaahi lea, aia oku nofo i mamani fulibe; Ke tubulekina ae melino kiate kimoutolu.

2 Neu behe e lelei ke fakaha ae gaahi fakailoga, moe gaahi mea fakaofo, aia kuo fai e he Otua maoluga kiate au.

3 Oku lahi hono gaahi fakailoga! bea oku malohi ene gaahi mea fakaofo! ko hono buleaga koe buleaga taegata, bea ko ene bule oku mei he toutagata ki he toutagata.

¶ 4 Ko au Nebukanesa, neu mālōlō i hoku fale, bea nae tubu be ae monuia i hoku nofoaga.

5 Naaku miji, bea naaku manavahe ai, bea ko eku gaahi mahalo i hoku mohega, moe gaahi mea ha mai ki hoku ulu, nae fakamamahi kiate au.

6 Koia neu fai fono ke omi ae kau tagata boto kotoabe o Babilone ki hoku ao, koeuhi ke nau fakaha mai kiate au hono uhiga oe miji.

7 Koia nae ha‘u ai ae kau fai mana, ae kau asitolonoma, ae kau Kalitia, bea moe kau kikite; bea neu fakaha ae miji i ho nau ao; ka nae ikai te nau fakaha mai kiate au hono uhiga oia.

8 Bea nae ha‘u fakamui ki hoku ao a Taniela, aia nae higoa ko Belitisasa, o fakatatau moe higoa o hoku otua, bea koia ia oku i ai ae laumalie oe gaahi otua maonioni: bea neu fakaha i hono ao ae miji, o behe,

9 E Belitisasa, koe eiki oe kau fai mea mana, oku ou ilo oku iate koe ae laumalie oe gaahi otua maonioni, bea oku ikai ha mea fufu oku faigataa kiate koe, koia ke ke tala mai ae gaahi mea ha mai i he eku miji, aia kuou mamata ai, mo hono uhiga.

10 Nae behe ae gaahi mea ha mai ki hoku ulu i hoku mohega; neu mamata mo vakai koe akau nae tuu i he lotolotoga o mamani, bea ko hono maoluga nae lahi aubito.

11 Nae tubu ae akau bea nae malohi, bea ko hono maoluga nae a‘u hake ki he lagi, bea nae ha atu ia ki he gaahi gataaga o mamani:

12 Nae matamata lelei hono lau, bea nae lahi hono fua, bea nae i ai ae mea kai ki he gaahi mea kotoabe: nae fakamalumalu i lalo ae faga manu oe goue, bea nae nofo ae faga manu buna oe atā i hono gaahi vaa, bea nae fafaga ae kakai kotoabe mei ai.

13 Bea neu mamata i he mea ha mai ki hoku ulu i hoku mohega, bea vakai, nae alu hifo mei he lagi, ae taha leo, moe toko taha maonioni;

14 Bea nae kalaga le‘o lahi ia, mo ne behe, Ta hifo ae akau, bea tutuu hono gaahi vaa, lulu ke gagana hono lau, mo liaki hono fua, tuku ke hao ae faga manu mei lalo, moe faga manu buna mei hono gaahi vaa.

15 Kae tuku ai be hono tagutugutu i he kelekele mo hano mea takai ukamea moe balasa, i he mohuku laumauiui oe goue; bea tuku ia ke viviku i he hahau oe lagi, bea tuku ke ne inaji fakataha moe faga manu, i he mohuku oe kelekele.

16 Ke liliu hono loto fakatagata, bea tuku kiate ia ae loto oe manu, bea tuku ke oji ha kuoga e fitu mo ene behe.

17 Oku fai ae mea ni i he fono ae kau leo, bea moe eke i he fekau ae kau maonioni: koeuhi ke ilo e he kakai moui oku bule aia oku Maoluga taha be i he buleaga oe tagata, bea oku faiteliha ia ki ha taha e tuku ki ai, bea oku ne hakeaki‘i ki ai ae kakai oku māulalo taha be.

18 Ko au Nebukanesa naaku mamata ki he miji ni. Bea ko koe e Belitisasa ke ke fakaha mai kiate au hono uhiga, he koeuhi oku ikai mafai e he kau tagata boto kotoabe i hoku buleaga ke fakaha kiate au hono uhiga: ka ko koe oku ke mafai; he oku iate koe ae laumalie oe gaahi otua maonioni.

19 Bea nae toki ofo a Taniela, aia nae higoa ko Belitisasa i he feituulaa e taha, bea bubutuu ene fakakaukau. Bea lea ae tu‘i, o ne behe kia Belitisasa, Oua naa ke mamahi i he miji, be i hono uhiga. Bea nae tali e Belitisasa o behe, E hoku eiki, ke iate kinautolu oku fehia kiate koe, ae miji, bea ko hono uhiga ke i ho gaahi fili ia.

20 Koe akau naa ke mamata ai, aia nae tubu, bea nae malohi, aia nae a‘u hake ki he lagi, a hono maoluga, bea nae ha ki mamani fulibe;

21 Bea nae matamatalelei hono lau, bea nae lahi hono fua, bea nae i ai ae mea kai ki he gaahi mea kotoabe, aia nae nofo ae faga manu oe goue, i hono lolo akau, bea ma‘u e he faga manu buna oe atā ho nau nofoaga i hono gaahi vaa.

22 Ko koe ia e tu‘i kuo ke tubu, bea kuo ke hoko o malohi: he kuo ke tubu o maoluga, o a‘u hake ki he lagi, bea mo hoo bule ki he gataaga o mamani.

23 Be koe mea i he mamata ae tu‘i ki he leo moe toko taha maonioni nae alu hifo mei he lagi, o ne behe, Ta hifo ae akau, bea maumau‘i ia: kae tuku hono tefito mo hono gaahi aka i he kelekele, mo hono mea takai ukamea moe balasa, i he mohuku lau mauiui oe goue, bea tuku ke viviku ia i he hahau oe lagi, bea ke ne inaji fakataha moe faga manu oe goue, kae oua ke oji ha kuoga e fitu mo ene behe;

24 Koeni hono uhiga, e tu‘i, bea koeni ae tuutuuni ae Fugani Maoluga, kuo fai ki hoku eiki koe tu‘i:

25 Te nau kabuji koe mei he kakai, bea te ke nofo moe faga manu oe goue, bea te nau bule‘i koe ke kai mohuku o hage koe faga bulu, bea te nau fakaviviku koe aki ae hahau oe lagi, bea te ke behe i he kuoga e fitu, kae oua ke ke ilo oku bule ae Fugani Maoluga i he buleaga oe tagata, bea oku ne foaki ia kiate ia oku ne faiteliha ki ai.

26 Bea koe mea i he fekau ke tuku ae tefito‘i akau, mo hono aka, e mau be ho buleaga kiate koe, oka ke ka ilo oku fai ae bule mei he lagi.

27 Koia, e tu‘i, tuku ke lelei eku tokoni kiate koe, bea motuhi hoo gaahi agahala, ka ke maonioni, bea mo hoo gaahi hia, ka ke fai ofa ki he majiva, hei ilo e tolotologa ai a hoo melino.

¶ 28 Nae hoko ae gaahi mea ni kotoabe ki he tu‘i, ko Nebukanesa.

29 Hili ae mahina e hogofulu ma ua, nae eveeva ia i he fale tubua oe tu‘i o Babilone.

30 Bea lea ae tu‘i o behe, Ikai ko Babilone eni, koe fale oe buleaga aia kuou laga i hoku malohi, bea koeuhi ke ogoogo hoku nāunāu?

31 Lolotoga nae kei i he fofoga oe tu‘i ae lea, nae ogo mai mei he lagi ae le‘o nae behe, E tu‘i ko Nebukanesa, kuo fai ae lea kiate koe; kuo homo meiate koe ae buleaga.

32 Bea te nau kabuji koe mei he kakai; bea te ke nofo moe faga manu oe goue, bea te nau bule‘i koe ke kai mohuku o hage koe faga bulu, bea e oji ae kuoga e fitu mo hoo behe, kae oua ke ke ilo oku bule ae Fugani Maoluga i he buleaga oe tagata, bea oku ne foaki ia kiate ia oku ne faiteliha ki ai.

33 I he feituulaa be koia nae fakamooni ae mea ni kia Nebukanesa: bea nae kabuji ia mei he kakai, bea naa ne kai ae mohuku o hage koe faga bulu, bea nae viviku hono jino i he hahau oe lagi, bea nae tubu hono fulufulu o hage koe fulufulu‘i ikale, bea mo hono geeji nima o hage koe bejibeji oe faga manu buna.

34 Bea hili ae gaahi aho koia, ko au Nebukanesa, neu hiki hake hoku mata ki he lagi, bea nae toe hoko mai kiate au hoku loto, bea neu fakafetai ki he Fugani Maoluga, bea naaku fakamalo mo fakaabaaba kiate ia oku moui taegata, aia oku bule koe bule taegata, bea ko hono buleaga oku mei he toutagata ki he toutagata.

35 Bea oku ne lau ae kakai fulibe o mamani koe mea noabe: bea oku ne fai o fakatatau mo hono finagalo i he kau tau oe lagi, bea ki he kakai o mamani: bea oku ikai ha toko taha e taofi hono nima, be behe kiate ia, koeha oku ke fai?

36 Bea feouga mo ia nae toe hoko mai ae boto kiate au; bea koeuhi ke ogoogolelei ai a hoku buleaga, nae toe hoko mai a hoku nāunāu moe lelei kiate au; bea nae kumi mai kiate au eku gaahi houeiki mo eku kau fakamāu, bea nae toe fokotuu au i hoku buleaga, bea nae tubulekina hoku ogoogolelei.

37 Bea ko au Nebukanesa, oku ou fakafetai mo fakamalo mo fakaabaaba, ki he tu‘i oe lagi, aia oku mooni ene gaahi gaue kotoabe, bea ko ene ulugaaga koe fakamāu: bea oku ne mafai ke fakavaivai‘i akinautolu oku alu fielahi.