¶ 1 BEA nae toki fai ai e Talaiasi ha fono, bea nae kumi i he fale oe gaahi tohi aia nae hili ai ae gaahi koloa o Babilone.

2 Bea nae ilo i Akimita, i he fale lahi aia oku i he fonua ko Mitia, ae takaiga  tohi, bea nae i ai ae tohi nae behe:

3 I hono tolu ta‘u o Kolesi koe tu‘i, nae fai e Kolesi koe tu‘i ae fono ki he fale oe Otua i Jelusalema, Tuku ke laga ae fale, koe botu naa nau fai ai ae gaahi feilaulau, bea ke ai hono gaahi tuuga oia ke malohi: ko hono maoluga oia koe haga e teau ma uofulu, mo hono māukubu oia koe haga e teau ma uofulu;

4 Moe otu e tolu oe fuu maka lahi, moe otu e taha oe akau foou; bea ke atu hono totogi ki ai mei he fale oe tu‘i;

5 Bea koe gaahi ibu koula moe siliva oe fale oe Otua, aia nae too o ave e Nebukanesa mei he fale tabu aia oku i Jelusalema, o fetuku ki Babilone, ke toe atu, bea toe ave ki he fale tabu aia oku i Jelusalema, ke taki taha ki hono botu, bea tuku ia ki he fale oe Otua.

6 Bea koeni, E Tatinei, koe bule i he kauvai e taha oe vaitafe, mo Sita‐bosinei, mo ho mou kaumea koe kau Afasatikai, aia oku itua i he vaitafe, ke mou fakamamao moe botu koia:

7 Tuku ai be ae gaue oe fale ni oe Otua; tuku ae bule oe kakai Jiu moe kau mātua oe kakai Jiu ke nau laga ae fale ni oe Otua i hono botu.

8 Bea koeuhi oku ou fai ae fono ni ki he mea te mou fai ki he kau mātua oe gaahi Jiu ni i he laga ae fale ni oe Otua: ke mou fai leva o atu ae totogi ki he kau tagata ni, mei he gaahi mea ae tu‘i, io ae mea tukuhau i he tua vaitafe, o fai ai be, ke oua naa fakatuai akinautolu.

9 Bea koia oku nau majiva ai, be koe faga bulu mui, moe faga sibi tagata, moe faga lami, ma ae gaahi feilaulau tutu ki he Otua oe lagi, koe uite, moe masima, moe uaine, moe lolo, o fakatatau ki he tuutuuni ae kau taulaeiki aia oku i Jelusalema, tuku ke atu ia kiate kinautolu i he aho hokohoko be, bea oua naa liaki.

10 Koeuhi ke nau atu ae gaahi feilaulau namu kakala ki he Otua oe lagi bea hufia ae moui ae tu‘i, mo hono gaahi foha.

11 Bea kuou fai ae fono foki, koeuhi koia te ne fakakehe ae lea ni, ke too ae gaahi akau mei hono fale, bea ke fokotuu ia, bea tuku ke tautau ia ke ai: bea tuku ke gaohi hono fale i he mea ni, koe fale vao.

12 Bea koe Otua aia nae bule ke nofo ki ai hono huafa, ke fakaauha eia ae gaahi tu‘i moe kakai, aia te nau ai ho nau nima ke fakakehe, be ke maumau ae fale ni oe Otua aia oku i Jelusalema. Ko au Talaiasi kuou fai ae fono ni: tuku ke fai ia ke fakatootoo.

¶ 13 Bea nae fai vave e Tatinei, koe bule i he botu kauvai ni oe vaitafe, mo Sita‐bosinei, mo ho nau kaumea, o fakatatau ki he mea aia nae fekau e Talaiasi koe tu‘i.

14 Bea nae laga e he kau mātua oe kakai Jiu, bea naa nau monuia, koe mea i he akonaki a Hakeai koe balofita mo Sakalia koe foha o Ito. Bea naa nau laga ia ke oji, o fakatatau ki he fekau ae Otua o Isileli, bea fakatatau ki he fekau a Kolesi, mo Talaiasi, mo Atakisekisi koe tu‘i o Beasia.

15 Bea nae fakaoji ae fale ni i hono tolu oe aho oe mahina ko Atali i hono ono oe ta‘u oe bule a Talaiasi koe tu‘i.

¶ 16 Bea koe fānau a Isileli, koe kau taulaeiki, moe kau Livai, bea mo kinautolu nae toe i he fānau ae fakabobula, naa nau fai hono fakatabu‘i oe fale oe Otua i he fiefia lahi,

17 Bea nae atu i he fakatabu‘i oe fale ni oe Otua ae faga bulu e teau, moe sibi tagata e uageau, moe faga lami e fageau; bea koe feilaulau i he agahala ma a Isileli kotoabe, koe koji tagata e hogofulu ma ua, o fakatatau ki hono lau oe faahiga o Isileli.

18 Bea naa nau fokotuu ae kau taulaeiki i ho nau lakaga, moe kau Livai i ho nau hokoaga, i he gaue ae Otua, aia oku i Jelusalema; o hage koia kuo tohi i he tohi a Mosese.

19 Bea nae fai ae katoaga oe Laka‐atu e he fānau ae fakabobula i hono aho hogofulu ma fa oe mahina.

20 He nae fakamaa fakataha akinautolu e he kau taulaeiki moe kau Livai, nae maa akinautolu kotoabe, mo nau tamate‘i ae Laka‐atu ma ae fānau kotoabe oe fakabobula, bea ma a ho nau kaiga koe kau taulaeiki, bea ma anautolu.

21 Bea koe fanau a Isileli, aia nae toe ha‘u mei he fakabobula, bea mo kinautolu kotoabe nae vahe akinautolu ke kau kiate kinautolu mei he gaahi uli kovi oe hiteni oe fonua, ke kumi kia Jihova koe Otua o Isileli, naa nau kai ai,

22 O nau fai ae katoaga oe ma tae fakalevani i he aho e fitu i he fiefia lahi: he nae fakafiefia‘i akinautolu e Jihova, o ne fakatafoki ae loto oe tu‘i o Asilia kiate kinautolu, ke fakamalohi ho nau nima i he gaue oe fale oe Otua, koe Otua o Isileli.