¶ 1 BEA koe kau tuu ki mua i he gaahi tamai eni, bea koe tohi hokohoko eni okinautolu naa mau alu hake mo au mei Babilone, i he bule a Atakisekisi koe tu‘i.

2 I he gaahi foha o Finiasi; ko Kesomi: i he gaahi foha o Itania, ko Taniela: i he gaahi foha o Tevita; ko Hatusi.

3 I he gaahi foha o Sikania, i he gaahi foha o Falosi, ko Sakalia: bea nae lau mo ia i he hokohoko oe kau tagata koe toko teau ma nimagofulu.

4 I he gaahi foha o Behati‐moabe; ko Ilionei koe foha o Selaia, bea nae iate ia ae kau tagata e toko uageau.

5 I he gaahi foha o Sikania; koe foha o Jaesieli, bea nae iate ia ae kau tagata e toko tolugeau.

6 I he gaahi foha o Atini foki; ko Ebeti koe foha o Jonatani, bea nae iate ia ae kau tagata e toko nimagofulu.

7 Bea i he gaahi foha o Ilami; ko Jisaia koe tama o Atalia, bea nae iate ia ae kau tagata e toko fitugofulu.

8 Bea i he gaahi foha o Sifatia; ko Sebatia koe foha o Mikaeli, bea nae iate ia ae kau tagata e toko valugofulu.

9 I he gaahi foha o Joabe: ko Obataia koe foha o Jehieli, bea nae iate ia ae kau tagata e toko uageau ma hogofulu ma valu.

10 Bea i he gaahi foha o Silomiti; koe foha o Josifia, bea nae iate ia ae kau tagata e toko teau ma onogofulu.

11 Bea i he gaahi foha o Bebai, ko Sakalia koe foha o Bebai, bea nae iate ia ae kau tagata e toko uofulu ma toko valu.

12 Bea i he gaahi foha o Asikati; ko Johanani koe foha o Hakatani, bea nae iate ia ae kau tagata e toko teau ma hogofulu.

13 Bea i he gaahi foha ki mui o Atonikami, aia ko ho nau higoa eni, ko Ilifileti, ko Jieli, mo Simaia, bea nae iate kinautolu ae kau tagata e toko tolugofulu.

14 I he gaahi foha foki o Bikivai: ko Utei, mo Sabuti, bea nae iate kinaua ae kau tagata e toko fitugofulu.

¶ 15 Bea naaku fakakatoa fakataha akinautolu i he vaitafe aia oku tafe ki Aheva; bea naa mau nofo ai i he gaahi fale fehikitaki i he aho e tolu: bea neu vakai ae kakai, moe kau taulaeiki, bea neu ilo nae ikai ha niihi i he gaahi foha o Livai.

16 Bea neu fekau ke ha‘u a Eliesa, mo Elieli, mo Simaia, bea mo Elinatani, bea mo Jalibe, bea mo Elinatani, bea mo Natani, bea mo Sakalia, bea mo Mesulami, koe kau tagata tuu ki mua; bea mo Joialibe, bea mo Elinatani, koe kau tagata loto boto.

17 Bea neu fekau akinautolu ke ave eku fekau kia Ito koe eiki i he botu ko Kasifia, bea neu tala kiate kinautolu aia te nau lea aki kia Ito, bea ki hono gaahi kaiga koe kakai Netenimi, i he botu ko Kasifia, koeuhi ke nau omi kiate kimautolu ae kau taulaeiki ki he fale o ho tau Otua.

18 Bea i he kau lelei ae nima o ho tau Otua iate kitautolu naa nau omi ha tagata loto boto ma amautolu, i he gaahi foha o Mali, koe foha o Livai, koe foha o Isileli; mo Selibea, mo hono gaahi foha mo hono gaahi kaiga, koe toko hogofulu ma valu:

19 Bea ko Hasabea, bea fakataha moia a Jisaia i he gaahi foha o Melali, ko hono gaahi kaiga mo ho nau gaahi foha, koe toko uofulu;

20 Bea oe kau Netenimi foki, aia nae fakanofo e Tevita moe houeiki ki he gaue oe kau Livai, koe Netenimi e toko uageau ma uofulu: nae lau akinautolu kotoabe i ho nau higoa.

¶ 21 Bea neu fanogonogo ae aukai i ai, i he vee vaitafe ko Aheva, koeuhi ke mau tautea akimautolu i he ao o ho mau Otua, ke kumi iate ia ae hala totonu kiate kimautolu, bea ma ae mau fānau iki, bea ki he e mau mea kotoabe.

22 He naaku ma o ikai faa kole ki he tu‘i ha kau tau moe kau tagata heka hose ke tokoni akimautolu telia ae gaahi fili i he hala: koeuhi naa mau lea ki he tu‘i, o behe, Koe nima o ho mau Otua oku iate kinautolu kotoabe oku kumi kiate ia ke nau lelei ai; ka ko ene malohi mo ene houhau e tuu kiate kinautolu kotoabe oku liaki ia.

23 Koia naa mau aukai ai bea kole ki ho mau Otua koeuhi koe mea ni: bea naa ne talia lelei akimautolu.

¶ 24 Bea neu fili ae toko hogofulu ma toko ua oe kau tuu ki mua oe kau taulaeiki, ko Selibea, mo Hasabea, mo ho na kaiga e toko hogofulu,

25 Bea naaku fakatatau ae siliva kiate kinautolu, moe koula, moe gaahi ibu, io ae mea foaki oe fale o ho tau Otua, aia nae atu e he tu‘i, mo ene kau fakakaukau, bea mo Isileli kotoabe nae i ai:

26 Io, naaku fakatatau ki ho nau nima ae taleniti siliva e onogeau moe nimagofulu, moe gaahi ibu siliva koe taleniti e teau, bea i he koula koe taleniti e teau;

27 Moe ibu luoluo koula foki e uofulu, oe talami e taha afe: moe ibu e ua oe kaba lelei, o tatau moe koula hono maogooga.

28 Bea neu behe kiate kinautolu, Oku maonioni akimoutolu kia Jihova; oku maonioni moe gaahi ibu foki; bea koe siliva moe koula koe mea atu loto lelei be ia kia Jihova koe Otua oe tau gaahi tamai.

29 Koia mou leohi, mo tauhi ia, kae oua ke toe fakatatau ia i he ao oe kau taulaeiki lahi moe kau Livai, moe kau tuu ki mua oe gaahi mātua o Isileli i Jelusalema, i he gaahi botu fale oe fale o Jihova.

30 Bea nae behe be ae ma‘u e he kau taulaeiki moe kau Livai hono mamafa oe siliva, moe koula, moe gaahi ibu ke omi ia ki Jelusalema ki he fale o ho tau Otua.

¶ 31 Bea naa mau toki hiki mei he vaitafe o Aheva i hono hogofulu ma ua oe aho oe uluaki mahina, ke alu ki Jelusalema: bea nae iateki mautolu ae nima o ho mau Otua, bea naa ne taukabo‘i akimautolu mei he nima oe fili, bea mo kinautolu nae toitoi‘i akimautolu i he hala.

32 Bea naa mau hoko ki Jelusalema, bea nofo ki ai i he aho e tolu.

¶ 33 Bea koeni i hono fa oe aho nae fakatatau ai ae siliva, moe koula, moe gaahi ibu, i he fale o ho tau Otua i he nima o Milemoti koe foha o Ulia koe taulaeiki: bea nae iate ia a Eliesa koe foha o Finiasi; bea nae iate kinaua a Josabati koe foha o Jesua, mo Noatia koe foha o Binui, koe kau Livai;

34 Nae lau ae mamafa oe mea taki taha kotoabe: bea nae tohi hono mamafa kotoabe i he aho koia.

35 Bea koe gaahi fānau foki akinautolu nae fetuku ke bobula, aia kuo ha‘u mei he e nau nofo bobula, naa nau atu ae gaahi feilaulau tutu ki he Otua o Isileli, koe faga bulu e hogofulu ma ua ma a Isileli kotoabe, moe sibi tagata e hivagofulu ma ono, koe faga lami e fitugofulu ma fitu, koe faga koji tagata e hogofulu ma ua koe feilaulau koeuhi koe agahala: koe mea ni kotoabe koe feilaulau tutu kia Jihova.

¶ 36 Bea naa nau atu ae gaahi fekau ae tu‘i ki he kau talafekau ae tu‘i moe kau bule fonua i he kauvai ni oe vaitafe: bea naa nau tokoni ki he kakai, moe fale oe Otua.