¶ 1 BEA i he fai o oji ae gaahi mea ni, nae ha‘u ai ae gaahi houeiki kiate au, o behe, Oku heeki vahevahe akinautolu e he kakai o Isileli, moe kau taulaeiki, moe kau Livai, mei he kakai oe gaahi fonua, i he fai o fakatatau ki he e nau gaahi agakovi, io, oe kakai Kenani, moe kakai Heti, moe kakai Belesi, moe kakai Jebusi, moe kakai Amoni, moe kakai Amoli.

2 He kuo nau omi ho nau gaahi ofefine mo onautolu, bea mo ho nau gaahi foha: koia kuo fakafehako aki akinautolu e he hako maonioni moe kakai oe gaahi fonua koia: io, kuo kau lahi ae nima oe houeiki moe gaahi bule i he mea hala ni.

3 Bea i he eku fanogo ki he mea ni, naaku hae hoku kofu mo hoku bulubulu, beau fuji hoku gaahi fulufulu‘i ulu mei hoku ulu, bea mo eku kava, beau nofo ki lalo o tafuua.

4 Bea nae katoa kiate au akinautolu taki taha kotoabe nae tetetete ki he gaahi folofola ae Otua o Isileli, koe mea i he talagataa okinautolu nae fetuku fakabobula: beau nofo tafuua be o a‘u ki he feilaulau fakaefiafi.

¶ 5 Bea i he feilaulau fakaefiafi neu tuu hake mei he eku māfajia; beau hae hoku kofu mo hoku bulubulu, beau tuulutui i hoku tui, beau mafao atu hoku nima kia Jihova ko hoku Otua,

6 Bea naaku behe, E hoku Otua, oku ou ma bea kula hoku mata ke hiki hake hoku mata kiate koe, e hoku Otua: he kuo tubu o lahi hake e mau gaahi hia i oluga ki ho mau ulu, bea koe mau fai hala kuo tubu hake ki he gaahi lagi.

7 Talu mei he gaahi aho oe mau gaahi tamai kuo mau moua i he hala lahi o a‘u ki he aho ni; bea koe mea i he e mau gaahi hia, nae tukuage ai akimautolu, mo ho mau gaahi tu‘i, mo ho mau gaahi taulaeiki, ki he nima oe gaahi tu‘i oe gaahi fonua, ki he heleta, bea ki he bobula, bea ki he maumau, bea ki be bubutuu oe mata, o hage i he aho ni.

8 Bea koeni kuo fakaha ae ofa kiate kimautolu i he kuoga jii mei a Jihova ko ho mau Otua, ke tuku kiate kimautolu ha toega  kakai, ke hoa, bea ke tuku kiate kimautolu ae fa‘o i hono botu maonioni, koeuhi ke fakamāma ho mau mata e ho mau Otua, bea foaki kiate kimautolu ae fakaakeake jii i ho mau nofo bobula.

9 He koe kau tagata hoboate akimautolu; ka nae ikai liaki akimautolu e ho mau Otua i he e mau nofo bobula, ka kuo fakahoko ae ofa kiate kimautolu i he ao oe gaahi tu‘i o Beasia, ke tuku kiate kimautolu ae fakaakeake, ke fokotuu ae fale o ho mau Otua, bea ke fakafoou hono gaahi botu maumau bea ke foaki kiate kimautolu ae a maka i Juta bea i Jelusalema.

10 Bea koeni, E ho mau Otua, koeha te mau lea  aki hili ae mea ni kotoabe? he kuo mau liaki hoo gaahi fekau,

11 Aia naa ke fekau i hoo kau tamaioeiki koe kau balofita, o behe, Koe fonua oku mou alu ke ma‘u, koe fonua tae maa ia i he gaahi agauli oe kakai oe gaahi fonua, moe nau gaahi agakovi, aia kuo nau fakafonu aki ia mei hono botu e taha ki hono botu e taha i he e nau aga tae maa;

12 Bea koeni, oua naa mou foaki ho mou gaahi ofefine ki ho nau gaahi foha, bea oua naa mou too ho nau gaahi ofefine mo ho mou gaahi foha, bea oua naa mou kumi ki he e nau melino be ki he e nau koloa o taegata: koeuhi ke mou malohi, bea kai ae lelei oe fonua, bea tuku ia koe abitofia ki hoo mou fānau ke taegata.

13 Bea hili ae mea kotoabe kuo to kiate kimautolu i he e mau gaahi gaue kovi, bea i he e mau hala lahi, he ko koe ko ho mau Otua kuo jii hifo hao tautea akimautolu kae lahi e mau gaahi hia, bea kuo ke tuku kiate kimautolu ae gaahi fakamoui behe ni;

14 He te mau toe liaki hoo gaahi fekau, bea hoko o fakataha akimautolu moe kakai oe gaahi agakovi ni? bea ikai te ke houhau ai kiate kimautolu ke oua ke fakaauha akimautolu, bea e ikai ha niihi e toe, be ha mea ke hao ai?

15 E Jihova koe Otua o Isileli, oku ke maonioni koe: he oku mau kei nofo hao be, o hage koe aho ni: vakai, oku mau i ho ao i he e mau gaahi agahala: he oku ikai te mau faa tuu i ho ao koeuhi koe mea ni.