¶ 1 I HE aho koia e fakaava ae matavai ki he fale o Tevita, bea moe kakai o Jelusalema koeuhi koe agahala, bea moe taemaa.

¶ 2 Bea e hoko i he aho koia, oku behe e Jihova oe gaahi kau tau, teu motuhi ae higoa oe gaahi tamabua mei he fonua, bea e ikai toe manatu‘i i ai: bea teu bule ke mole atu mei he fonua ae kau kikite moe laumalie uli.

3 Bea e hoko o behe, kabau e toe kikite ha taha, bea e toki lea kiate ia a ene tamai, bea mo ene fa‘e, aia ne ne tubu ai, o behe, E ikai te ke moui; he oku ke lea loi i he huafa o Jihova: bea ko ene tamai, bea mo ene fa‘e naa ne tubu ai, te na hoka‘i ia ke aji, oka fai eia ae kikite.

4 Bea e hoko o behe i he aho koia, e ma ae kau kikite taki taha i he ene mea ha mai, oka fai eia ene kikite; bea e ikai te nau kofu aki ae kofu oe fulufulu‘i manu ke fai ae kākā:

5 Ka te ne behe, Oku ikai ko ha kikite au, ka koe tagata goue: he nae ako‘i au e ha tagata ke tauhi manu talu eku kei jii.

6 Bea e behe mai e ha taha kiate ia, Koeha ae gaahi lavea ko ena i ho nima? Bea te ne behe eia, Koe gaahi lavea i he eku i he fale o hoku kaiga.

¶ 7 E heleta, ke ke a, ki he eku tauhi, bea ki he tagata koia oku ma kaumea, oku behe e Jihova oe gaahi kau tau: ta‘i ae tauhi, bea e movetevete ae faga sibi: bea teu tafoki atu hoku nima kiate kinautolu oku kei iki.

8 Bea e hoko ia o behe, i he fonua kotoa, oku behe e Jihova, ko hono vahe e ua e motuhi, bea e mate; ka ko hono vahe e taha e tuku ia i ai.

9 Bea teu omi a hono vahe koia e taha i he loto afi, bea teu fakamaa akinautolu o hage ko hono fakamaa oe siliva, bea teu ahiahi‘i akinautolu o hage koe ahiahi‘i oe koula: te nau ui ki hoku huafa, bea teu fanogo kiate kinautolu: Teu behe, ko hoku kakai ia: bea te nau behe ekinautolu, Ke Jihova ko hoku Otua ia.