Na Kumu Manaoio
o ka Ekalesia o Iesu Kristo o ka Poe Hoano o na La Hope nei.

1. Ke manaoio nei makou i ke Akua ka Makua mau loa a i Kana Keiki o Iesu Kristo a i ka Uhane Hemolele.

2. Ke manaoio nei makou e hoopai ia o kanaka no ko lakou mau hewa iho, aole no ka Adamu lawehala ana.

3. Ke manaoio nei makou ma o ka make ana la o Kristo e hoola ia ai na kanaka a pau, ke malama lakou i na kanawai a me na lawelawe-paa o ka Euanelio.

4. Ke manaoio nei makou o keia na kumu-paa a me na lawelawe-paa mua o ka Euanelio: Akahi, ka Manaoio iloko o ka Haku o Iesu Kristo; Alua, ka Mihi; Akolu, ka Bapetizo ana, oia hoi, ke kanu ia ana iloko o ka wai no ke kala ia ana o na hala; Aha, ke kau ana o na lima no ka Haawina o ka Uhane Hemolele.

5. Ke manaoio nei makou, e kahea ia ke kanaka e ke Akua, e pono ai, ma ka wanana a me ke kau ana o na lima, ma o ka mea la i loaa ka mana, i hiki ai ia ia ke hai i ka Euanelio a e lawelawe ma kana mau hana a pau.

6. Ke manaoio nei makou iloko o na oihana i hoonohonoho ia iloko o ka Ekalesia Kahiko, penei: Na Luna Olelo, na Kaula, na Kahu Ekalesia, na Kumu, na Kahuna, a pela aku.

7. Ke manaoio nei makou iloko o ka haawina o na olelo e, ka wanana, na hoike ana, na hihio, ka hoola ana, ka hoomaopopo ana i na olelo e, a pela aku.

8. Ke manaoio nei makou o ka Baibala ka olelo a ke Akua, oia hoi, na mea a pau i unuhi pololei ia, ke manaoio nei no hoi makou, o ka Buke a Moramona, ka olelo a ke Akua no ia.

9. Ke manaoio nei makou ma na mea a pau a ke Akua i hoike mai ai, a ma na mea a pau Ana e hoike mai nei i keia wa, a ke manaoio nei no hoi makou, ua nui wale na mea ano nui a hohonu Ana e hoike mai ai auanei e pili ana i ke Aupuni o ke Akua.

10. Ke manaoio nei makou iloko o ka houluulu maoli ana o ka Poe Iseraela, a i ka hoi hou ana mai o na Ohana he Umi; e kukulu ia auanei o Ziona ma keia aina, o Amerika, e noho alii maoli no o Iesu Kristo ma ka honua nei; a e hana hou ia ka honua me ka loaa ana o kona nani Paradaiso.

11. Ke manaoio nei makou he kuleana maoli ko makou e hoomana aku i ke Akua Mana Loa e like me ke kuhikuhi ana a ko makou mau naau, a oia hoi ke kuleana o na poe kanaka e ae a pau.

12. Ke manaoio nei makou he mea pono ke noho malalo iho o na Alii, na Peresidena, na Lunahoomalu a me na Lunakanawai me ka malama ana a me ka hooko ana i ke kanawai.

13. Ke manaoio nei makou he pono ke noho me ka pololei, me ka oiaio, me ka maemae, me ka lokomaikai, me ka moekolohe ole a me ka hana maikai ana aku i na kanaka a pau. He oiaio, ke malama nei makou i ka olelo a Paulo, “Ua manaoio i na mea a pau, ua manaolana i na mea a pau,” ua hoomanawanui makou iloko o na mea he nui wale, a ke lana nei ko makou manao e hiki no ia makou ke hoomanawanui aku i na mea a pau. Ke imi nei makou i ka pono maoli, ka maemae, ka oiaio, a me na mea a pau i ku i ka pono.