1. No ka mea, ke olelo aku nei Au ia oukou, aole oukou e ike ana Iaʻu mai keia wa aku a hoomaopopo hoi Owau no ia ka mea a na Kaula i palapala ai, a hiki i ko oukou olelo ana: Pomaikai ka mea e hele mai ana ma ka inoa o ka Haku, ma na ao o ka lani, a me na anela hemolele a pau me ia. Alaila, hoomaopopo iho la Kana poe haumana e hiki hou mai ana Oia i ka honua nei, ma hope iho o Kona hoonani ia ana a hoolei ia ana ma ka lima akau o ke Akua.

2. Puka aku la o Iesu i waho, a hele aku la mai ka halelaa aku; a hele mai la Kana mau haumana i Ona la e hoolohe ia ia, me ka olelo ana: E ka Haku, e hoike mai ia makou e pili ana i na hale o ka halelaa, e like me Kau i olelo ai—E hoohiolo ia ana lakou i lalo, a e waiho neoneo ia ana ia oukou.

3. A olelo mai la o Iesu ia lakou: Aole anei oukou i ike i keia mau mea a pau, a aole anei oukou i hoomaopopo ia mau mea? He oiaio Kaʻu e olelo aku nei ia oukou, aole e hookoe ia maanei, maluna o keia halelaa, kekahi pohaku maluna o kekahi i hoohiolo ole ia i lalo.

4. A haalele aku la o Iesu ia lakou, a pii aku la i ka Mauna o Oliveta. A oiai Oia e noho ana maluna o ka Mauna o Oliveta, hele malu mai la na haumana i Ona la, me ka olelo ana: E hai mai ia makou i ka wa hea la e hiki mai ai keia mau mea Au i olelo mai ai e pili ana i ka hoohiolo ia ana o ka halelaa, a me na Iudaio; a heaha la ka hoailona o Kou hiki ana mai, a o ka hopena o ke ao nei, a i ole, ka luku ia ana o ka poe hewa, oia hoi, ka hopena o ke ao nei?

5. A pane aku la o Iesu a i aku la ia lakou: E malama, i ole kekahi kanaka e hoopunipuni mai ia oukou;

6. No ka mea, he nui ka poe e hele mai ana ma Koʻu inoa, e i ana—Owau no o Kristo—a e hoopunipuni i ka poe he nui;

7. Alaila, e haawi aku lakou ia oukou e hoehaeha ia, a e pepehi ia oukou a make, a e inaina ia oukou e na lahuikanaka a pau, no Koʻu inoa;

8. Alaila e nui ana ka poe e hoonaukiuki ia, a e kumakaia kekahi i kekahi;

9. A e ala mai no na kaula wahahee he nui, a e hoopunipuni i ka poe he nui;

10. A mamuli o ka laha nui ana o ka hewa, e maalili ana ke aloha o ka poe he nui;

11. Aka, o ka mea e hoomau ana me ke kupaa a aole i hoopio ia, e hoola ia oia.

12. Nolaila, i ka wa a oukou e ike ai i na mea hoopailua o ka hooneoneo ana i olelo ia e Daniela ke Kaula, e pili ana i ka luku ia ana o Ierusalema, alaila, e ku auanei oukou ma kahi hemolele; o kela a me keia mea e heluhelu ana he pono e hoomaopopo iho oia.

13. Alaila, he pono e holo aku ka poe e noho ana ma Iudea i na mauna;

14. He pono e holo ka mea maluna o ka hale, a mai hoi hou mai e lawe i kekahi mea mailoko aku o kona hale;

15. A aole hoi e hoi hou i hope ka mea ma ka waena e kii i kona mau aahu;

16. Auwe ka poe hapai a me ka poe e hanai waiu ana ia mau la;

17. Nolaila, e pule aku oukou i ka Haku i holo ole ai oukou ma ka wa hooilo, aole hoi ma ka la Sabati;

18. No ka mea, ma ia mau la, e nui ana na popilikia maluna o ka poe Iudaio, a maluna o na kanaka o Ierusalema, o ke ano i hookau ole ia mai mamua maluna o Iseraela, mai ke Akua mai, mai ka hookumu ia ana o ko lakou aupuni alii a hiki i keia manawa; aole, aole loa hoi e hookau hou ia mai maluna o Iseraela.

19. O na mea a pau i kau mai maluna o lakou, o ka hoomaka wale ana no ia o na popilikia e hoea mai ana maluna o lakou.

20. A ke ole e hoopokole ia ua mau la la, aole e hoola ia kekahi o ko lakou io; aka no ka pono o ka poe i wae ia, e kulike i ka berita, e hoopokole ia ana ua mau la la.

21. Aia hoi, o keia mau mea Kaʻu i olelo aku ai ia oukou e pili ana i ka poe Iudaio; a eia hou, mahope iho o na popilikia e hiki mai ana maluna o Ierusalema ma ua mau la la, ina e olelo mai kekahi kanaka ia oukou, Ea, eia maanei o Kristo, a i ole, aia ma o, mai manaoio ia ia;

22. No ka mea, ma ia mau la e ala mai ana no hoi he mau Kristo wahahee, a me na kaula wahahee, a e hoikeike mai i na hoailona nui a me na mea kupanaha, ma ke ano, ina ia he mea hiki, e hoopunipuni lakou i ka poe i wae ia, oia hoi ka poe i wae ia mamuli o ka berita.

23. Aia hoi, ke olelo aku nei Au i keia mau mea ia oukou no ka pono o ka poe i wae ia; a e lohe ana no hoi oukou no na kaua, a me na lono o na kaua; e malama i hoopilikia ole ia oukou, no ka mea, e hooko ia ana na mea a pau Aʻu i hai aku ai ia oukou, e pono ai; aka, aole keia ka hopena.

24. Aia hoi, ua hai aku Au ia oukou mamua;

25. No ia mea, ina e olelo mai lakou ia oukou: Aia hoi, aia oia ma ka waoakua; mai hele aku; Aia hoi, aia oia iloko o na keena malu; mai manaoio ia mea;

26. No ka mea, e like me ka puka ana mai o ka malamalama o ke kakahiaka mai ka hikina mai, a olino aku i ke komohana, a uhi aku i ka honua holookoa, pela auanei no hoi ka hiki ana mai o ke Keiki a ke Kanaka.

27. A ano, ke hoike nei Au i kekahi olelonane ia oukou. Aia hoi, ma kahi e waiho ai o ka heana, malaila no e akoakoa pu ai na aeto; pela auanei Koʻu poe i wae ia e hoakoakoa pu ia ai mai na kukulu eha mai o ka honua.

28. A e lohe ana lakou no na kaua, a me na lono o na kaua.

29. Aia hoi, ke olelo aku nei Au no ka pono o Koʻu poe i wae ia; no ka mea, e ala mai ana kekahi lahuikanaka e kue i kekahi lahuikanaka, a o kekahi aupuni e kue i kekahi aupuni; e hoea mai ana na wi, a me na mai ahulau, a me na olai, ma na wahi like ole.

30. A eia hou, mamuli o ka laha nui ana o ka hewa, e maalili ana ke aloha o ka poe he nui; aka, o ka mea e hoopio ole ia mai, oia ke hoola ia.

31. A eia hou, e hai ia aku keia Euanelio o ke aupuni i ko ka honua a pau, i mea hoike i na lahuikanaka a pau, alaila e hiki mai ka hopena, oia hoi, ka luku ia ana o ka poe hewa;

32. A eia hou, e hooko ia auanei ka hoopailua ana o ka hooneoneo ana i olelo ia e Daniela ke Kaula.

33. A mahope koke iho o ka popilikia o ia mau la, e hoopouli ia ana ka la, a aole e haawi mai ka mahina i kona malamalama, a e helelei na hoku mai ka lani mai, a e hoonaueue ia na mana o ka lani.

34. He oiaio, ke i aku nei Au ia oukou, aole e lilo aku keia hanauna iloko o laila e hoopuka ia mai ai keia mau mea, a hiki i ka hooko ia ana o na mea a pau Aʻu i hai aku ai ia oukou.

35. Oiai e hiki mai ana na la e lilo aku ai ka lani a me ka honua; eia nae aole e lilo aku Kaʻu mau olelo, aka, e hooko ia lakou a pau.

36. A e like me Kaʻu i olelo ai mamua, mahope iho o ka popilikia o ia mau la, a me ka hoonaueue ia ana o na mana o na lani; alaila e ikea mai ka hoailona o ke Keiki a ke Kanaka iloko o ka lani, alaila e kanikau auanei na ohana a pau o ka honua; a e ike aku no lakou i ke Keiki a ke Kanaka e hele mai ana iloko o na ao o ka lani, me ka mana a me ka nani nui;

37. A o kela a me keia mea e hoahu ana i Kaʻu olelo, aole ia e hoopunipuni ia, no ka mea, e hiki mai ana ke Keiki a ke Kanaka, a e hoouna mai ana Oia i Kona mau anela mamua Ona me ke kani nui ana o kekahi pu, a e hoakoakoa pu mai lakou i ke koena o Kona poe i wae ia mai na makani eha mai, mai kekahi welau o ka lani a i kekahi.

38. Ano e ao iho i kekahi olelonane no ka laau fiku—oiai e palupalu ana kona mau lala, a e omamaka mai ana kona mau lau, e hoomaopopo ana oukou ua kokoke mai ke kau mehana;

39. Pela no hoi, o Kuu poe i wae ia, i ka wa a lakou e ike ai i keia mau mea a pau, e hoomaopopo lakou, ua kokoke mai Oia, he oiaio, aia ma na ipuka;

40. Aka, no ia la, a me ka hora, aole mea i ike; aole, aole na anela o ke Akua iloko o ka lani, aka, o Koʻu Makua wale no.

41. Aka, e like me ia i na la o Noa, pela no auanei ia i ka hiki ana mai o ke Keiki a ke Kanaka;

42. No ka mea, e like ana lakou me ia i na la mamua aku o ke kaiakahinalii; no ka mea, e ai ana a e inu ana lakou, e mare ana a e haawi ana no ka mare ana a hiki i ka la a Noa i komo aku ai iloko o ka halelana;

43. Aole lakou i hoomaopopo a hiki mai la ke kaiakahinalii, a lawe aku la ia lakou a pau; pela auanei no hoi ka hiki ana mai a ke Keiki a ke Kanaka.

44. Alaila auanei e hooko ia ai ka mea i palapala ia, oia hoi, ma na la hope, elua mea ma ka waena, e lawe ia kekahi, a e hookoe ia kekahi;

45. Elua mea e wili palaoa ana ma ka wili, e lawe ia kekahi, a e waiho ia kekahi;

46. A o Kaʻu e olelo nei i ka mea hookahi oia Kaʻu e olelo aku nei i na kanaka a pau; nolaila, e kiai, no ka mea, aole oukou i ike i ka hora e hiki mai ai ko oukou Haku.

47. Aka, e hoomaopopo i keia, ina i ike mua ke kanaka nona ka hale i ka wati a ka aihue e hele mai ai, ina, ua kiai oia, a aole hoi e hookuu i kona hale e wawahi ia, aka, ina, ua makaukau oia.

48. Nolaila, e makaukau no hoi oukou, no ka mea, e hiki mai ana ke Keiki a ke Kanaka iloko o ka hora a oukou i manao ole ai.

49. Alaila, owai la ke kauwa kupaa a naauao, ka mea a kona haku i hoolilo ai i mea hoomalu maluna o ko kona hale, e haawi ia lakou i ka ai i ka wa kupono?

50. Pomaikai ia kauwa ka mea e loaa mai ana i kona haku e hana ana pela, i ka wa ona e hiki mai ai; a he oiaio Kaʻu e olelo aku nei ia oukou, e hoolilo kela ia ia i mea hoomalu maluna o kona mau waiwai a pau.

51. Aka, ina e i iho kela kauwa hewa iloko o kona naau: Ke hoopanee nei kuu haku i kona hele ana mai,

52. A e hoomaka oia e hahau i kona mau hoa kauwa, a e ai a inu me ka poe ona,

53. E hiki mai ana ka haku o kela kauwa i ka la ana e kiai ole ai nona, a ma ka hora ana i manao ole ai,

54. A e oki pu ae ia ia a e koho nona i kona mahele me ka poe hookamani; aia auanei ka uwe ana a me ka uwi ana o na niho.

55. A pela e hiki mai ai ka hopena o ka poe hewa, e kulike me ka wanana a Mose, i ka i ana: E oki ia lakou mai waena aku o na kanaka; aka, aole i hiki mai ka hopena o ka honua, aka, ma hope aku.