1. Mamuli o na olelo he lehulehu i hoolaha ia e na kanaka manao ino a hakuepa, e pili ana i ke ala ana mai a me ka holomua o Ka Ekalesia o Iesu Kristo o ka Poe Hoano o na La Hope nei, o ua mau mea la a pau ua hoolala ia e ka poe nana i haku, e kue i kona kulana ma ke ano he Ekalesia a me kona holomua ana iloko o ke ao nei—ua koi ia mai au e kakau i keia mooolelo, e hoopololei i ka manao o ka lehulehu, a e haawi i na mea oiaio i ka poe a pau e imi ana i ka oiaio, e like me ka hoea ana mai o ia mau mea, e pili ana i ka Ekalesia a me aʻu pu hoi, e like me ka nui o ia mau mea oiaio i loaa iaʻu.

2. Iloko o keia mooolelo e hoike aku ana au i na mea ano nui like ole e pili ana i keia Ekalesia, me ka oiaio a me ka pono, e like me lakou i hoea mai ai, a i ole ia, e like me lakou e ku nei i keia wa, oiai ka walu keia o ka makahiki mai ke kukulu ia ana o ka Ekalesia.

3. Ua hanau ia au iloko o ka makahiki o ko kakou Haku, hookahi tausani ewalu haneri me elima, ma ka la 23 o Dekemaba, iloko o ke kaona o Sarona, Kalana o Winesoa, Mokuaina o Veremona. I koʻu wa he umi makahiki, a i ole, kokoke paha ilaila, haalele iho la koʻu makuakane, o Iosepa Kamika, makua, i ka mokuaina o Veremona, a nee aku la i Palamaira, Kalana o Onaterio, (i keia wa, o Weine,) ma ka mokuaina o Nu Ioka. Eha makahiki paha mahope mai o ka hiki ana aku o koʻu makuakane i Palamaira, nee aku la oia me kona ohana i Manekeka, iloko o ia kalana hookahi, oia hoi o Onaterio.

4. He umikumamakahi poe iloko o kona ohana, no lakou na inoa—o koʻu makuakane o Iosepa Kamika; koʻu makuahine o Luke Kamika (nona ka inoa o Maka, mamua aku o kona mare ana, he kaikamahine na Solomona Maka;) koʻu mau hoahanau o Alavina, (ka mea i make ma Novemaba, la 19, M. H. 1823, i ka iwakalua-kumamaono o kona mau makahiki,) o Hailama, owau, o Samuela Harisona, o Wiliama, o Dona Kalosa; a me koʻu mau kaikuahine, o Soporonia, Katelina, a me Luke.

5. I kekahi wa iloko o ka lua o ka makahiki mahope iho o ko makou nee ana mai i Manekeka, ua ulu ae kekahi mea hoopihoihoi ano e iloko o kahi a makou e noho ana, maluna o ke kumumanao o ka hoomana. Ua hoomaka ia mea iwaena o ka poe Mekokika, aka, laha laula koke aku la ia iwaena o na aoao hoomana a pau ma ia wahi o ka aina. He oiaio, me he mea la ua hoeueu ko ia mahele holookoa o ka aina mamuli o ia mea, a he lehulehu o na kanaka i hoohuihui ae ia lakou iho me na aoao hoomana like ole, ka mea nana i hoala mai i ka haunaele a me ka mokuahana ana he nui mawaena o na kanaka, e hea ana kekahi poe, “Ea, eia maanei!” a o kekahi poe e ae, “Ea, aia ma o!” E paio ana kekahi poe no ka hoomana Mekokika, o kekahi no ka hoomana Kalavina, a o kekahi no ka hoomana Bapetite.

6. No ka mea, me ka nana ole i ka nui o ke aloha a ka poe i hoohuli ia i keia mau hoomana like ole i hoike mai ai ma ka wa o ko lakou hoohuli ia ana mai, a me ka ikaika o ka manao i hoike ia mai e na kahunapule like ole, ka poe hooikaika ma ka hoala ana a hoonee ana imua i keia kulana ano e o ka manao pili hoomana, i mea e hoohuli ia ai ka poe a pau, peia lakou i kapa aku ai ia mea, e komo aku lakou iloko o ka hoomana a lakou i makemake ai—eia nae, i ka wa a ka poe i hoohuli ia i hele pakahi aku ai, o kekahi poe i kekahi aoao, a o kekahi poe i kekahi aoao okoa aku, ua ike ia o ka mea i manao ia he mau manao ohohia mawaena o na kahunapule a me ka poe i hoohuli ia, ua oi aku ka hookohukohu mamua o ka mea oiaio; no ka mea, ulu mai la kekahi haunaele nui a me na manao kuee mahope mai, e paio kue ana ke kahunapule i ke kahunapule, a me ka mea i hoohuli ia i ka mea i hoohuli ia; nolaila, o ko lakou mau manao ohohia a pau kekahi no kekahi, ina paha ua loaa ia lakou ia mea, ua nalowale loa iloko o ka paio olelo ana a me ka hookuekue ana e pili ana no na manao hoakaka.

7. O ka umikumamalima ia o koʻu mau makahiki ia manawa. Ua hoohuli ia ka ohana o koʻu makuakane i ka hoomana Kalavina, a he eha o lakou i komo aku iloko o ia ekalesia, oia hoi—o koʻu makuahine o Luke; koʻu mau hoahanau o Hailama a me Samuela Harisona; a me kuu kaikuahine o Soporonia.

8. Iloko o keia wa o ka pioloke nui, ua hoala ia mai ka manao iloko o koʻu naau i ka noonoo nui ana a me ka pihoihoi nui; aka, oiai ua kaumaha kuu naau, a he nui ka wa i ehaeha ai, eia nae, kukaawale au mai keia mau aoao mai a pau, hele pinepine no nae au i ko lakou mau halawai like ole e like me ka hiki. Iloko o ke au o ka manawa huli iki aku la koʻu naau i ka hoomana Mekokika, a ano iini iho la au e hoohui ia aku me lakou; aka, mamuli o ka nui loa o ka haunaele a me ka paio ana mawaena o na aoao hoomana like ole, ua hiki ole i kekahi kanaka e like me aʻu ka opiopio, a i kamaaina ole hoi me kanaka a me na mea like ole, ke hooholo-paa owai la ka i pololei a owai ka i hewa.

9. I kekahi mau manawa ua pihoihoi loa koʻu naau, mamuli o ka nui loa a me ka palena ole o ka walaau a me ka haunaele. Ua kue loa ka poe Kalavina i ka poe Bapetite a me ka poe Mekokika, a ua hoohana i na mana a pau o ka noonoo akahele ana, a i ole, o ke ao maalea a hoopunipuni e hooiaio i ko lakou nei kuhihewa, oia hoi, ma ka hana ana i na mea e manao ai kanaka ua kuhihewa lakou. Ma kekahi aoao hoi ua like no ka hooikaika o ka poe Bapetite a me ka poe Mekokika ma ka hoao ana e kukulu paa i ko lakou mau loina, a e hoohiolo i na loina e ae a pau.

10. Iwaena o keia paio ana ma na olelo a me ka haunaele o na manao, ua olelo pinepine au iaʻu iho: Heaha ka mea pono e hana ia? Owai la o keia mau aoao a pau ka i pololei; a i ole, ua lalau pu anei lakou a pau? Ina ua pololei kekahi o lakou, o ka aoao hea la ia, a pehea la e maopopo ai au ia mea?

11. Oiai au e hooikaika ana malalo o keia mau pilikia nui i ulu mai mamuli o na paio ana a keia mau aoao o ka poe hoomana, ma kekahi la iaʻu e heluhelu ana i ka Episetole a Iakobo, mokuna ekahi a ma ka pauku elima, penei ka heluhelu ana: “Ina i nele kekahi o oukou i ka naauao, e noi aku oia i ke Akua, i ka mea i haawi lokomaikai mai no na mea a pau, me ka hoino ole mai, a e haawi ia mai no ia nona.”

12. Aole i kekahi manawa i komo ai kekahi pauku o ka Palapala Hemolele iloko o ka naau o ke kanaka me ka oi ae o ka mana mamua o ua pauku nei i komo ai iloko o koʻu naau ia wa. Me he mea la ua komo mai ia me ka ikaika nui iloko o kela me keia wahi o kuu naau. Nalu iho la au i kela a me keia manawa maluna o ia mea me ka hoomaopopo ana ina he nele kekahi kanaka i ka naauao mai ke Akua mai, owau no ia; no ka mea, aole i maopopo iaʻu ka mea e hana ai, a ke ole e loaa iaʻu ka naauao a oi ae mamua o ka mea i loaa iaʻu ia wa, aole loa e maopopo ana iaʻu; no ka mea, mamuli o ka like ole loa o ka hoomaopopo ana o na kumuao hoomana o na aoao like ole i na pauku hookahi no o ka Palapala Hemolele, i nalowale loa ai ka hilinai ana e hooponopono ia keia ninau ma ka ui ana aku i ka Baibala.

13. Mahope mai, hooholo iho la au e noho au iloko o ka pouli a me ka haunaele e pono ai, a i ole, e hana au e like me ka Iakobo e kuhikuhi nei, oia hoi, e noi aku i ke Akua. Mahope mai, paa iho la kuu manao “e noi aku i ke Akua,” me ka manao ina ua haawi mai Oia i ka naauao i ka poe i nele i ka naauao, a e haawi lokomaikai me ka hoino ole mai, e hoao no au.

14. Nolaila, i kulike ai me keia, oia hoi kuu manaopaa e noi aku i ke Akua, hele aku la au iloko o ka ululaau e hooko ia manao. Ma ke kakahiaka ia o kekahi la nani a kalae, iloko o na la mua o ke kupulau o ka makahiki 1820. O ka mua loa ia o kaʻu hana ana pela ma kuu wa e ola ana, no ka mea, iloko o koʻu mau iini nui a pau, a hiki ia wa, aole au i hoao e pule ma ka leo.

15. Mahope iho o koʻu hele ana aku i kahi aʻu i hoolala mua ai e hele, me ka nana ana ma o a maanei a puni iaʻu, a me ka ike ana ua mehameha au, kukuli iho la au a hoomaka aku la e hoike i na makemake a pau o kuu naau i ke Akua. Aole i liuliu kaʻu hana ana pela, ua puliki paa koke ia iho la au e kekahi mana, a hoopio loa mai ia iaʻu, a loaa ka mana kamahao maluna oʻu, a hoopaa iho la i kuu elelo i hiki ole iaʻu ke olelo ae. Hoopuni mai la ka pouli aaki iaʻu, a i koʻu hoomaopopo iho no kekahi wa, me he la ua hoopaa ia au e anai koke ia.

16. Aka, ma ka hoao ana me kuu ikaika a pau e hea aku i ke Akua e hoopakele iaʻu mailoko mai o ka mana o keia enemi i puliki paa mai ai iaʻu, a ma ia minuke no, iaʻu e aneane ana e nalohia iloko o ka manao-poho, a e haawi pio iaʻu iho i ka anai ia ana—aole i kekahi anai ia ana i manao wale ia, aka, i ka mana o kekahi mea kino maoli mai ke ao i ike ole ia, nona ka mana kupanaha aʻu i ike ole ai mamua iloko o kekahi mea ola—iloko o ia minuke o ka hopohopo nui, ike aku la au i kekahi kia malamalama maluna pono ae o kuu poo, a ua oi ka olinolino mamua o ko ka la, a iho malie mai la ia a kau mai la maluna oʻu.

17. I ka manawa no o ka ikea ana mai o ia mea, ike iho la au ua hoopakele ia au mai ka enemi mai e puliki paa ana iaʻu. I ka wa i kau mai ai ka malamalama maluna oʻu, ike aku la au i elua mau mea kino kanaka, e ku ana maluna ae oʻu ma ka lewa, no laua ka olinolino a me ka nani i hiki ole ke hoakaka ia. Olelo mai la kekahi o laua iaʻu, ma ka hea ana mai iaʻu ma kuu inoa, a olelo mai la, me ke kuhikuhi ana i kekahi—O Kaʻu Keiki punahele keia, e hoolohe ia Ia!

18. O koʻu kumu no ka hele ana e ninau i ka Haku, oia keia, i ike ai au o ka aoao hea la o na hoomana a pau ka i pololei, i hiki iaʻu ke hoomaopopo o ka aoao hea la kaʻu e komo ai. Nolaila, i koʻu hiki ana ke hana noʻu iho, a hiki hoi ke olelo aku, ninau koke aku la au i na mea kino e ku ana maluna ae oʻu iloko o ka malamalama, o ka aoao hea la o na hoomana a pau ka i pololei—a o ka aoao hea la kaʻu e komo ai.

19. Ua pane ia mai la au aole au e komo i kekahi o lakou, no ka mea, ua huhewa lakou a pau; a o ka mea i kamailio mai iaʻu ka i olelo mai, o ka lakou mau loina a pau he mea hoopailua ia imua o Kona maka; ua haumia kela poe hookohukohu hoomana a pau; “ke hookokoke mai nei lakou Iaʻu me ko lakou mau lehelehe, aka, ua mamao loa ko lakou mau naau mai Oʻu aku; ke ao nei lakou i na kauoha a kanaka me he la he mau loina oiaio ia, e hookohukohu ana i ke ano o ko ke Akua, aka, hoole nae lakou i ka mana o ia mea.”

20. Papa hou mai la Oia iaʻu aole e komo aku i kekahi o lakou; a he nui hou ae na mea Ana i olelo mai ai iaʻu, na mea i hiki ole iaʻu ke kakau i keia manawa. A i ka hoi ana mai o koʻu kulana maa mau, ike iho la au e moe ana au i luna ke alo, e nana ana i ka lani.

21. He mau la kakaikahi mahope iho o ka loaa ana iaʻu o keia hihio, halawai iho la au me kekahi o na kahunapule Mekokika, he mea hooikaika loa iloko o ka pioloke ana no na mea pili hoomana i hai mua ia ae nei; a oiai e kamailio pu ana me ia maluna o ke kumumanao o ka hoomana, hoakaka aku la au no ka hihio i loaa iaʻu. Ua kahaha loa au no ka mea ana i hana ai; nana mai la oia maluna o kaʻu mau olelo aole me he la he mea liilii wale no, aka, me ka hoowahawaha loa, me ka i ana, na ka diabolo mai ia mau mea a pau, aole loaa kekahi mau mea e like me na hihio a me na hoikeana i keia mau la; ua pau ia mau mea a pau me na Aposetolo, a aole loa e loaa hou ana ia mau mea.

22. Ike koke iho la nae au mamuli o koʻu hai ana i keia mooolelo he nui loa na manao i ulu mai e kue ana iaʻu mawaena o ka poe kaena hoomana, a oia ke kumu no ka hoomaau nui ia ana mai, a mahuahua mai la ia mea; oiai he wahi keiki haahaa wale no au mawaena o na makahiki he umikumamaha a me umikumamalima, a o ke kulana o koʻu nohona he mea ia e hoolilo i kekahi keiki i mea i manao ole ia ma ko ke ao nei, aka nae, nana mai la na kanaka hanohano iaʻu a lawa no ka hoalaala ana i ka manao o ka lehulehu e kue mai iaʻu, a e hookumu i kekahi hoomaau ino ana mai; a he mea maa mau keia mawaena o na hoomana a pau—ua hui lakou a pau e hoomaau mai iaʻu.

23. Ua hoala ia ka noonoo nui ana iloko oʻu ia wa, a ma na manawa he lehulehu mai ia wa mai, no ke kupanaha o ka manao ia ana o kekahi keiki o umikumamaha mau makahiki a keu iki, he keiki hoi i koi ia e imi i ka pono o keia noho ana ma kana hana lima ma kela a me keia la, i mea i lawa ke koikoi e ume mai i ka noonoo o ka poe koikoi iloko o na aoao hoomana kaulana o ia wa, a i mea hoi e hoala iloko o lakou i ka uhane o ka hoomaau a me ka hoino awahia loa. He kupanaha paha, aole paha, aka, he oiaio no ia, a he pinepine na manawa i lilo ai ia i kumu noʻu e kaumaha nui ai.

24. Aka nae, he mea oiaio no ua ike au i kekahi hihio. Ua noonoo au mahope mai o ia wa, he ano like no au me Paulo, i ka wa ona i kupale ai nona iho imua o ke Alii Ageripa, a hahai ai i ka hihio i loaa ia ia i ka wa ana i ike ai i kekahi malamalama, a lohe hoi i kekahi leo; aka, he kakaikahi ka poe i manaoio ia ia; olelo aku la kekahi poe ua hoopunipuni oia, a olelo kekahi poe e ae ua olalau oia; a ua hoohenehene ia a hoino ia aku oia. Aka, aole i hiki i keia mau mea a pau ke hoohiolo i ka oiaio o kana hihio. Ua ike oia i kekahi hihio, ua maopopo ia ia ua ike oia, a aole e hiki i ka hoomaau ana a pau malalo iho o ka lani ke hoololi ae ia i mea okoa ae; a ina paha e hoomaau aku lakou ia ia a hiki i kona make ana, eia nae, hoomaopopo iho la no ia, a e hoomaopopo ana a hiki i kona hanu hope loa, ua ikemaka oia i kekahi malamalama a lohe pu hoi i kekahi leo e olelo mai ana ia ia, a aole e hiki i ko ke ao nei a pau ke hoololi ae i kona noonoo a me kona manao.

25. Pela no me aʻu. Ua ikemaka maoli au i kekahi malamalama, a iwaena o ia malamalama ike aku la au i elua mea kino kanaka, a ua olelo io mai no laua iaʻu; a oiai ua inaina ia a hoomaau ia mai au no ka olelo ana ua ike au i kekahi hihio, eia nae, he oiaio no ia; a oiai lakou e hoomaau ana iaʻu, e hoino ana iaʻu, a e olelo wahahee ana i na mea ino o kela a me keia ano e kue iaʻu, no ka olelo ana pela, ua alakai ia au e olelo iho iloko o kuu naau: No ke aha la e hoomaau mai iaʻu no ka hai ana i ka oiaio? Ua ikemaka maoli au i kekahi hihio, a owai la au e hiki ke kue aku i ke Akua, a i ole, no ke aha la ko ke ao nei i makemake ai iaʻu e hoole i ka mea aʻu i ikemaka maoli ai? No ka mea, ua ikemaka au i kekahi hihio; ua hoomaopopo au ia mea, a ua hoomaopopo no au ua ike ke Akua ia mea, a aole e hiki iaʻu ke hoole ia mea, aole hoi e aa e hana pela; oiai, ua ike au ma o ka hana ana la pela e hoonaukiuki ana au i ke Akua, a e kaa ma lalo o ka hoahewa ia.

26. I keia wa ua loaa iaʻu ka hooia ma kuu naau, oia hoi, ma ka mea e pili ana i na aoao hoomana o ke ao nei; aole ia he hana naʻu e komo aku iloko o kekahi o lakou, aka, e hoomau aku e like me kaʻu i hana ai ia wa a kuhikuhi hou ia mai au. Ua ike au ua pololei ka olelo hoike a Iakobo, oia hoi, ua hiki i ke kanaka i nele i ka naauao ke noi aku i ke Akua, a e loaa no, a aole e hoino ia mai.

27. Hoomau aku la au i ka lawelawe ana i kaʻu mau hana maa mau a hiki i ka la 21 o Sepatemaba, M. H. 1823, iloko o ia wa a pau e ehaeha ana i na hoomaau ikaika loa mai na kanaka mai a pau o na kulana like ole, ka poe haipule a me ka poe haipule ole, no ka mea, hoomau aku la no au i ka hooia ana ua ike au i kekahi hihio.

28. Iloko o ke kowa o ka manawa mawaena o ka wa i loaa ai iaʻu ka hihio a me ka makahiki 1823—oiai ua papa ia mai aole e komo aku iloko o kekahi o na aoao hoomana o ia mau la, a oiai he opiopio au a i hoomaau ia e ka poe he pono ke lilo i mau hoaloha noʻu a hana oluolu mai iaʻu, a ina i manao lakou ua alakai hewa ia au, e hoao e hoohuli mai iaʻu ma ke ano kupono a aloha hoi,—ua waiho wale ia au imua o na hoowalewale o na ano a pau; a, oiai, e launa ana me ka poe like ole a pau, ua haule pinepine au iloko o na kuhihewa lapuwale, a hoike ae la i ka nawaliwali o ka wa opio, a me na kina o ko ke kanaka; a ke kaumaha nei au i ka olelo ana ae, oia na mea nana i alakai iaʻu iloko o na hoowalewale like ole, na mea hoonaukiuki imua o na maka o ke Akua.

29. Mamuli o keia mau mea, ua hoahewa pinepine au iaʻu iho no koʻu nawaliwali a me na kinaunau; a ma ke ahiahi o ka la 21 o Sepatemaba i olelo ia maluna ae, mahope iho o koʻu hoi ana aku i koʻu moe no ia po, hoomaka iho la au e pule a e noi haahaa i ke Akua Mana Loa, no ke kala ana mai i koʻu mau hewa a me na mea lapuwale a pau, a no kekahi hoikeana no hoi iaʻu, i hiki ai iaʻu ke hoomaopopo i koʻu ano a me koʻu kulana imua ona; no ka mea, he hilinai piha koʻu i ka loaa ana mai o kekahi hoikeana mailuna mai, no ka mea, ua loaa iaʻu kekahi mamua aku.

30. Oiai au e kahea ana i ke Akua, ike iho la au i kekahi malamalama e poha ana iloko o koʻu keena a hoomahuahua ae la ia a hiki i ka malamalama ana o ke keena a oi aku i ko ke awakea, a ia wa koke no ku mai la kekahi mea kino kanaka ma ka aoao o kuu wahi moe, e ku ana iloko o ka lewa, no ka mea, aole i pa kona mau wawae i ka papahele.

31. Ua hoaahu ia oia me kekahi lole hooluelue aiai nani loa. He aiai ia i oi loa aku mamua o kekahi mea ano honua aʻu i ike ai; a aole no hoi oʻu manaoio e hiki ke hana ia kekahi mea o ka honua nona ka nanaina aiai a alohilohi hoi e like me ia. Ua olohelohe kona mau lima a hiki maluna iki ae o ka pulima; pela no hoi, ua olohelohe kona mau kapuai a me kona mau wawae a hiki maluna iki ae o na puupuu wawae. Waiho wale no hoi kona poo a me kona ai. Ua hiki no iaʻu ke ike aku aole ona kapa e ae o keia lole hooluelue wale no, oiai ua hamama ia, a i hiki iaʻu ke ike aku i kona umauma.

32. Aole wale i aiai loa kona lole, aka, ua nani kona kino holookoa a hiki ole ke hoakaka ia, a o kona helehelena, he like io ia me ka uwila. Ua malamalama loa ke keena, aka, aole nae i alohilohi loa e like me kahi e hoopuni kokoke mai ana i kona kino. I ka wa mua aʻu i nana aku ai maluna ona, ua makau no au; aka, haalele koke iho la ka makau iaʻu.

33. Hea mai la oia iaʻu ma koʻu inoa, a olelo mai la iaʻu he elele oia i hoouna ia iaʻu mai ke alo mai o ke Akua, a o Moroni kona inoa, he hana ka ke Akua naʻu e hana aku ai; a e hoomanao ia auanei koʻu inoa no ka pono a me ka hewa mawaena o na lahuikanaka, na ohana, a me na olelo a pau, a i ole, e olelo ia ana ia no ka maikai a no ka ino mawaena o na kanaka a pau.

34. Olelo mai la oia aia kekahi buke i huna ia, i palapala ia maluna o na papa gula, e hoike ana i ka mooolelo o ka poe kanaka e noho ana ma keia aina mamua, a me kahi o lakou i puka mai ai. Olelo pu mai no hoi oia aia iloko olaila ka piha ana o ka Euanelio mau loa, me ia i haawi ia ai e ka Hoola i ka poe o ka wa kahiko;

35. Aia no hoi elua pohaku iloko o na pio kala—a o keia mau pohaku i hoopaa ia i kekahi pale-umauma, oia na mea i kapa ia ka Urima a me Tumima—i waiho pu ia me na papa; a o ka poe i loaa a hoohana aku i keia mau pohaku, o lakou ka “poe ike” o ka wa kahiko, a i ole, o ka wa mamua; a ua hoomakaukau ke Akua ia mau mea no ka unuhi ana i ka buke.

36. Mahope iho o kona hahai ana mai i keia mau mea iaʻu, hoomaka mai la oia e hai mai i na wanana o ke Kauoha Kahiko. Hai mua mai la oia i kekahi hapa o ka mokuna ekolu o Malaki, a hai pu mai la no hoi oia i ka mokuna eha, oia hoi, ka hope o ia wanana hookahi no, me kekahi loli iki nae mai ka mea i paa ma ko kakou mau Baibala. Ma kahi o ka hai ana mai i ka pauku mua e like me ia i paa iloko o ka kakou mau buke, ua hai mai la oia ia penei:

37. No ka mea, aia hoi, e hiki mai ana ka la e a ana me he imu la, a o ka poe haakei a pau, ae, a me ka poe hana ino a pau, e a ana me he okumukumu mauu la; no ka mea, na ka poe e hele mai ana e puhi aku ia lakou i ke ahi, wahi a ka Haku o na lehulehu a e waiho ole ia i aa no lakou, aole hoi lala.

38. A eia hou, hai mai la oia i ka pauku elima, penei: Aia hoi, e hoike aku ana Au i ka Oihanakahuna ia oukou, ma ka lima o Elaika ke Kaula, mamua o ka hiki ana mai o ka la nui a weliweli o ka Haku.

39. Hai mai la no hoi oia i ka pauku ma lalo iho ma ke ano okoa: A e kanu auanei ia iloko o ka naau o na keiki i na olelo hoopomaikai i haawi ia ai i na makua, a e huli ka naau o na keiki i ko lakou mau makua; ina aole pela, ina ua anai loa ia ka honua i Kona hiki ana mai.

40. Me keia mau pauku, ua hai pu mai la oia i ka mokuna umikumamakahi o Isaia, me ka i ana mai, ua kokoke mai ia e hooko ia; hai pu mai la no hoi oia i ka mokuna ekolu o Oihana, na pauku iwakalua-kumamalua a me iwakalua-kumamakolu, e like me ia e paa nei iloko o ka kakou Kauoha Hou. Olelo mai la oia o kela Kaula o Kristo no ia; aka, aole i hiki mai ka la no ka poe hoolohe ole i kona leo e oki ia ai maiwaena aku o na kanaka, aka, e hiki koke mai ana ia.

41. Hai mai la no hoi oia i ka mokuna elua o Ioela, mai ka pauku iwakalua-kumamawalu a hiki i ka hopena. Olelo mai la no hoi oia aole i hooko ia keia ia wa, aka, e hooko koke ia ana no. A olelo hou mai la no hoi oia e hiki koke mai ana ka piha ana o ko na Genetile. He nui na pauku e ae o ka Palapala Hemolele ana i hai mai ai, a haawi mai no hoi i na wehewehe ana he nui i hiki ole ke olelo ia maanei.

42. Hai hou mai la oia iaʻu, i ka wa e loaa ai iaʻu o ua mau papa la ana i olelo mai ai—no ka mea, o ka wa e loaa ai o ua mau papa la aole i hoea mai ia wa—aole au e hoike ia mau mea i kekahi kanaka; aole hoi ka pale-umauma me ka Urima a me Tumina; i ka poe wale no aʻu e kauoha ia mai ai e hoike ia mau mea; ina hoike ae au e anai ia ana au. A oiai oia e kamailio ana me aʻu e pili ana i na papa, wehea mai la ka hihio i kou hoomaopopo ana a hiki iaʻu ke ike aku i kahi o na papa i waiho ia ai, a no ka ike lea a moakaka loa ua hoomaopopo hou no au i ua wahi la i kuu wa i hele ai ilaila.

43. Mahope iho o keia hoikeana, ike iho la au i ka malamalama iloko o ka lumi e hoomaka ana e houluulu ae ma kahi kokoke i ke kino o ka mea nana i olelo mai ai iaʻu, a hoomau aku la ia mea pela a hiki i ka pouli hou ana o ka lumi, koe wale no ma kahi e hoopuni koke mai ana ia ia, a me he mea la, ike koke aku la au i kekahi auwaha e hamama ana a hiki i ka lani, a pii aku la oia a hiki i kona nalowale loa ana, a waiho ia iho la no ka lumi e like me ia mamua aku o ka hoea ana mai o keia malamalama ano lani.

44. Moe iho la au e noonoo nui ana no ke kupanaha o keia mea au i ike ai, a e haohao nui ana no na mea i hai ia mai iaʻu e keia elele kupanaha; a iwaena o koʻu nalu ana, ike koke iho la au ua hoomaka mai la koʻu lumi e hoomalamalama hou ia, a me he mea la, iloko o hookahi minuke, ku hou mai la ua elele lani nei ma ka aoao o kuu wahi moe.

45. Hoomaka mai la oia, a hai hou mai la i na mea hookahi no ana i hai mai ai ma kona hele mua ana mai, me ka loli ole iki; a i ka pau ana, hoike mai la oia iaʻu no na hoopai koikoi e hiki mai ana maluna o ka honua, me na hooneoneo nui ana ma o ka wi, ka pahikaua, a me ke ahulau; a e hiki mai ana keia mau hoopai ehaeha maluna o ka honua iloko o keia hanauna. A pau keia mau mea i ka hai ia, pii hou aku la ia e like me kana i pii ai mamua.

46. I keia wa, mamuli o ke kuhohonu loa o ke komo ana o keia mau mea iloko o koʻu noonoo, ua holo aku ka hiamoe mai koʻu mau maka aku, a waiho iho la au me ka piha o ke kahaha no na mea aʻu i ike a i lohe ai. Aka, he mea e koʻu puiwa i ka wa aʻu i ike hou aku ai i ua elele hookahi nei ma hai o kuu wahi moe, a lohe no hoi ia ia e kuekaa ana, a i ole, hai hou ana iaʻu i na mea e like me mamua; a pakui mai la oia he olelo ao iaʻu, ma ka hai ana mai iaʻu e hoao ana o Satana e hoowalewale iaʻu, (mamuli o ke kulana ilihune o ka ohana o koʻu makuakane,) e loaa na papa gula i mea e waiwai ai. O keia kana i papa mai ai iaʻu i ka i ana aole he mea pono iaʻu e noonoo no kekahi mea e ae, ma ka loaa ana o na papa gula, o ka hoonani wale no i ke Akua, a aole hoi he mea pono e alakai ia e kekahi manao e mawaho ae o ke kukulu ana i Kona aupuni; ina aole pela aole e loaa ia mau mea iaʻu.

47. Mahope iho o keia hiki ekolu ana mai, pii hou aku la oia i ka lani e like me mamua, a waiho hou ia iho la au e nalu nui no ke kupanaha o na mea aʻu i ike iho ai; a mahope koke iho o ka pii ana o ka elele lani mai oʻu aku no ka ekolu o ka manawa, ooo mai la ka moa, a ike iho la au ke hookokoke mai la ke ao, nolaila ua hoohala ia ka po holookoa i ka maua mau kamailio ana.

48. Mahope koke iho, ala ae la au mai koʻu wahi moe ae, a, e like me ka mea maa mau, hele aku la i na hana e pono ai no ka la, aka, i ka hoao ana e hana e like me na wa e ae, ike iho la au ua emi loa koʻu ikaika a hiki ole loa iaʻu ke hana. Ike mai la koʻu makuakane, ka mea e hana pu ana me aʻu, ua ano e ia au, a olelo mai la iaʻu e hoi i kauhale. Hoomaka aku la au me ka manao e hoi i ka hale; aka, i koʻu hoao ana e aʻe maluna o ka pa mai ka mahinaai aku, kahi a maua e hana ana, ua pau loa iho la koʻu ikaika, a hina wale iho la au i ka honua, a no kekahi wa ua hoomaopopo ole au i kekahi mea.

49. O ka mea mua aʻu e hoomanao nei oia kekahi leo e olelo mai ana iaʻu, e kahea mai ana iaʻu ma koʻu inoa. Nana ae la au iluna a ike ae la i ua elele hookahi nei e ku ana maluna ae o kuu poo, a ua hoopuni ia e ka malamalama e like me mamua. Alaila, hahai hou mai la oia iaʻu i na mea a pau ana i hahai mai ai iaʻu i ka po mamua iho, a kauoha mai la iaʻu e hele i kuu makuakane a e hai aku ia ia no ka hihio a me na kauoha i loaa mai ai iaʻu.

50. Hoolohe aku la au, a hoi hou aku la i koʻu makuakane ma ka waena, a hoike aku i na mea a pau ia ia. Pane mai la oia iaʻu, no ke Akua mai ia, a olelo mai la iaʻu e hele a e hana e like me ka mea i kauoha ia mai e ka elele. Haalele aku la au i ka waena, a hele aku la i kahi a ka elele i hai mai ai iaʻu, e waiho ana na papa; a mamuli o ka moakaka o ka hihio aʻu i ike ai e pili ana ia mea, ua hoomaopopo iho la au i ua wahi la i ka minuke oʻu i hiki aku ai i laila.

51. Ma kahi kokoke i ke kauhale o Manakeka, Kalana o Onaterio, Nu Ioka, e ku ana kekahi puu ano nunui, a o kahi kiekie loa hoi ia ma ia wahi. Ma ka aoao komohana o keia puu, a malalo iki iho o ka piko, e waiho ana na papa iloko o kekahi pahu pohaku ma kahi a lakou i waiho ia ai, malalo iho o kekahi pohaku nui. He manoanoa keia pohaku a he ohu ma ka aoao maluna, a he lahilahi ma na kae, nolaila, ua ike ia kona piko maluna ae o ka lepo, aka, ua uhi ia kona kae a puni i ka lepo.

52. Mahope iho o ke kope ana i ka lepo, kii aku la au i une, a hookomo aku la ia mea malalo o ke kae o ka pohaku, a me ka hooikaika iki, uneune ae la ia pohaku iluna. Kiei iho la au iloko, a malaila au i ike io ai i na papa, ka Urima a me Tumima, a me ka pale-umauma, e like me ka ka elele i hai mai ai. Ua hana ia ka pahu, kahi i waiho ia ai ua mau mea la, ma ka hookuikui pu ana i na pohaku me kekahi ano puna hoopipili. Ilalo loa o ka pahu e waiho ana elua pohaku, mai kekahi aoao a i kekahi aoao, a maluna o keia mau pohaku e waiho ana na papa, a me na mea e ae me ia mau mea.

53. Hoao iho la au e lawe ae ia mau mea, aka, ua papa ia mai e ka elele, a ua hai hou ia mai la aole i hiki mai ka wa no ka hoopuka ana ia mau mea, a aole hoi ia e hiki mai ana a hala ae na makahiki eha mai ia wa aku; aka, olelo mai la oia iaʻu e hele aku au ilaila hookahi makahiki mai ia wa aku, a e hui oia malaila me aʻu, a e hoomau au i ka hana ana pela e pono ai, a hiki mai ka wa e loaa ai na papa.

54. No ia mea, e like me aʻu i kauoha ia mai ai, hele aku la au i ka pau ana o kela a me keia makahiki, a i kela a me keia manawa, ua loaa iaʻu ia elele hookahi malaila, a loaa mai la no hoi na ao ana a me ka naauao mai ia ia mai ma kela a me keia o ka maua mau kamakamailio ana, e pili ana i ka ka Haku mea e hana aku ai, a o ke ano hea e hookele ia ai kona aupuni ma na la hope.

55. Oiai he nele koʻu makuakane i ka waiwai o ko keia ao, e hana makou me ko makou mau lima e pono ai, no ka uku la kekahi manawa, a ma na ano e ae hoi e like me ka hiki ia makou ke loaa ka hana. I kekahi wa hana makou ma kauhale, a i kekahi wa ma kahi e aku, a mamuli o ka hana mau ana ua loaa ia makou ka lawa kupono no ka noho oluolu ana.

56. Iloko o ka makahiki 1823, kau mai la kekahi popilikia nui maluna o ka ohana o koʻu makuakane, mamuli o ka make ana o koʻu kaikuaana mua loa, oia o Alavina. Ma ka mahina o Okatoba, 1825, noho hana aku la au malalo o kekahi keonimana elemakule nona ka inoa o Iosia Satola, e noho ana ma ke Kalana o Kenaneko, Mokuaina o Nu Ioka. Ua lohe mahui oia no kekahi lua kala i eli ia e ka poe Paniolo, ma Hamone, Kalana o Sasekuehana, Mokuaina o Penesilevenia; a mamua aku o koʻu noho hana ana me ia, ua eli no hoi oia i loaa ai ka lua kala, ina paha he mea hiki. Mahope iho o koʻu noho ana aku me ia, lawe aku la oia iaʻu me kona mau paahana e ae, e eli no ia lua kala, a malaila au i hana ai aneane hookahi mahina me ka lanakila ole ma ka makou hana, a mahope ae mai la ka elemakule i kaʻu koi ana e hooki i ka eli ana no ia mea. A no ua mea la i laha nui aku ai ka olelo he kanaka eli kala au.

57. Iloko o ka wa aʻu i noho hana ai pela, noho au me Isaaka Hale, ma ia wahi ae la no; malaila au i ike mua ai i kaʻu wahine, (kana kaikamahine,) ia Ema Hale. Ma ka la 18 o Ianuari, 1827, ua mare ia maua, oiai au e noho hana ana me Mr. Satola.

58. Mamuli o koʻu hai mau ana ua ike au i kekahi hihio ua mau no ka hahai ana o ka hoomaau iaʻu, a ua kue loa ka ohana o ka makuakane o kaʻu wahine i ko maua mare ana. Nolaila, ua kau mai ke koikoi maluna oʻu o ka lawe ana aku ia ia i kekahi wahi okoa; nolaila, hele aku la maua a mare ia ma ka hale o Lunakanawai Tabila, ma Beniberigi Hema, Kalana o Kenaneko, Nu Ioka. Mahope koke iho o kuu mare ana, haalele iho la au ia Mr. Satola, a hoi aku la i kahi o kuu makuakane, a mahiai iho la me ia ia kau.

59. A hala kekahi wa hiki mai la ka manawa e loaa mai ai na papa, ka Urima a me Tumima, a me ka pale-umauma. Ma ka la 22 o Sepatemaba, 1827, a oiai ua hele aku i kahi i waiho ia ai ua mau mea la, ma ka hopena o hookahi makahiki hou e like me ka mea maa mau, haawi mai la kela elele lani hookahi no i ua mau mea la iaʻu, me keia olelo-ao: maluna oʻu ke koikoi no ka malama pono ana ia mau mea; ina e lawe ia ana ua mau mea nei mamuli o koʻu malama pono ole, a i ole, mamuli paha o koʻu hoohemahema, e oki ia no au; aka, ina e hoohana au i koʻu ikaika a pau e malama ia mau mea a hiki i kona (ka elele) kii ana mai ia mau mea, e malama ia no lakou.

60. Ua ike koke no au i ke kumu no ka loaa ana mai iaʻu o keia mau ao koikoi e malama pono ia mau mea, a me ke kumu i olelo mai ai ka elele, i ka wa e pau ai iaʻu i ka hana ia, ka mea i makemake ia mai koʻu lima aku, e kii mai ana oia i ua mau mea la. No ka mea, mahope koke iho o ka ike ia ana ua loaa iaʻu ia mau mea, ua hoohana ia na ikaika nui loa e lawe ia mau mea mai aʻu aku. Ua hana ia kela a me keia hana maalea i hiki ke hana ia no ia mea. Mahuahua mai la ka awahia a me ka ehaeha o ka hoomaau ana a oi aku i ko ka wa mua, a he lehulehu ka poe i makaala mau e kaili ia mau mea mai aʻu aku, ina paha he mea hiki. Aka, mamuli o ka naauao o ke Akua, waiho palekana ia mau mea iloko o kuu mau lima, a hiki i ka pau pono ana iaʻu, ma o ua mau mea la, o na mea i makemake ia mai koʻu lima aku. I ka wa a ka elele i kii mai ai i ua mau mea la, e like me na mea i hoolala ia, haawi aku la au ia mau mea ia ia; a aia no lakou iloko o kona malu a hiki i keia la, oia hoi, ka la elua o Mei, M. H. 1838.

61. Aka nae, mau aku la ka pioloke ana, a ua hoohana ia ka lono me kona mau elelo he tausani i ka hoolaha ana i na mea wahahee e pili ana i ka ohana o koʻu makuakane, a me aʻu no hoi. Ina e hai aku au i hookahi hapa tausani o ia mau mea, e piha ana na buke he nui. Eia nae, no ka lilo ana o ka hoomaau ana i mea hiki ole ke hoomanawanui ia he mea ia noʻu e pono ai e haalele ia Manekeka, a hele aku la me kaʻu wahine i ke Kalana o Sasekuehana, iloko o ka Mokuaina o Penesilevenia. Oiai e hoomakaukau ana no ka hele ana aku,—a oiai he ilihune loa a he koikoi loa ka hoomaau ia ana maluna o maua, ke nana aku aole e hiki mai ana ia maua he kulana okoa ae,—iwaena o ko maua mau popilikia, loaa iho la ia maua he hoaloha iloko o kekahi keonimana nona ka inoa o Makini Hailaki, ka mea i hele mai io maua la a haawi mai la iaʻu he kanalima dala, e kokua ia maua ma ka maua huakai. He kupa o Mr. Hailaki no ke taona o Palamaira, Kalana o Weine, iloko o ka Mokuaina o Nu Ioka, a he kanaka mahiai i hilinai nui ia oia.

62. Mamuli o keia kokua i ka wa kupono ua hiki iaʻu ke hoea aku i koʻu pahuhopu ma Penesilevenia; a mahope koke iho o koʻu hiki ana aku ilaila, hoomaka iho la au e kope i na kahakaha mai na papa mai. Kope iho la au he heluna nui o lakou, a mamuli o ka Urima a me Tumima unuhi iho la au i kekahi o lakou, a ua hana au ia mea mawaena o ka wa aʻu i hiki mai ai ma ka hale o ka makuakane o kaʻu wahine, i ka malama o Dekemaba, a me ka malama o Feberuari mahope mai.

63. Iloko o keia malama o Feberuari, hele mai la o ua Makini Hailaki la, i hai ia maluna ae nei, loaa ia ia na kahakaha ana aʻu i kope ai mai na papa mai, a hele aku i ke kulanakauhale o Nu Ioka me ua mau mea nei. No na mea i hana ia e pili ana ia ia a me na kahakaha ana, ke kuhikuhi nei au i kona mooolelo iho no ia mau mea, e like me kona hahai ana ia mau mea iaʻu i kona wa i hoi mai ai, a penei no ia:

64. Hele aku la au i ke kulanakauhale o Nu Ioka, a hoike aku i na kahakaha ana i unuhi ia, me ka unuhina hoi o ia mea ia Polopeka Kale Anetona oia kekahi kanaka i kaulana no kona naauao ma na mea i palapala ia. Hai mai la o Polopeka Anetona ua pololei ka unuhina a oi aku ka pololei mamua o kekahi ana i ike ai mamua i unuhi ia mai ka olelo Aigupita mai. Alaila, hoike aku la au ia ia i na kahakaha i unuhi ole ia, a olelo mai oia, he olelo Aigupita, Kaledeka, Asuria, a Arabaka lakou; a olelo hoi oia he mau kahakaha pololei ia mau mea. Haawi mai la oia i kekahi palapala hooia, e hooia mai ana i ka poe o Palamaira he mau kahakaha oiaio lakou, a ua pololei hoi ka unuhina o na mea i unuhi ia. Hookomo iho la au i ka palapala hooia iloko o koʻu pakeke, a iaʻu e haalele ana i ka hale, kahea mai la o Mr. Anetona iaʻu e hoi hou, a ninau mai la iaʻu pehea la i maopopo ai i ke kanaka opiopio aia na papa gula ma kahi ana i loaa ai ia mau mea. Pane ae la au ua hoike mai kekahi anela o ke Akua ia mea ia ia.

65. Alaila, olelo mai la oia iaʻu, “E nana hou paha au i kela palapala hooia.” Nolaila, unuhi ae la au ia mea mailoko ae o koʻu pakeke a haawi aku ia mea ia ia, a hoohaehae oia ia mea, me ka olelo ana, aole kekahi mea e like me ka lawelawe ana o na anela i keia wa, a ina e lawe au i na papa ia ia e unuhi oia ia mau mea. Hai aku au ia ia ua sila ia kekahi hapa o na papa a ua papa ia au aole e lawe mai ia mau mea. Pane mai la oia, “Aole e hiki iaʻu ke heluhelu i ka buke i sila ia.” Haalele aku la au ia ia a hele aku la i o Kauka Mikela la, a nana i apono mai i na mea a pau a Polopeka Anetona i olelo mai ai, e pili ana i na kahakaha a me ka unuhina pu.

· · · · · · ·

66. Ma ka la 5 o Aperila, 1829, hiki mai la o Oliva Kaudare i koʻu hale, aole au i ike ia ia a hiki mai ia wa. Hai mai la oia iaʻu, oiai e ao kula ana oia ma kahi kokoke i kahi o koʻu makuakane e noho ana, a oiai o koʻu makuakane kekahi e hoouna ana i na keiki i ke kula, hele aku oia i ka hale o koʻu makuakane a noho pu no kekahi wa, a oiai oia malaila ua hoikeike mai ka ohana ia ia i na mea e pili ana i ka loaa ana mai o na papa iaʻu, a no ia mea, i hele mai ai oia e ninaninau iaʻu.

67. Elua la mahope iho o ka hiki ana mai o Mr. Kaudare (oia hoi ka la 7 o Aperila), hoomaka iho la au e unuhi i ka Buke a Moramona, a hoomaka no hoi oia e kakau naʻu.

· · · · · · ·

68. Hoomau aku la no maua i ka hana o ka unuhi ana, a i kekahi la iloko o ka mahina mahope iho (Mei, 1829), hele aku la maua ma kekahi la iloko o ka ululaau e pule ai, a e ninau i ke Akua no ka mea e pili ana i ka bapetizo ana no ke kala ia ana o na hala, ka mea i loaa ia maua i olelo ia iloko o ka unuhina o na papa. Oiai maua e hana ana pela, e pule ana a e kahea ana i ka Haku, iho mai la kekahi elele mai ka lani mai maloko o kekahi ao o ka malamalama, a me ke kau ana i kona mau lima maluna iho o maua, hoolilo iho la oia ia maua, me ka olelo ana:

69. “Maluna iho o olua, kuu mau hoa-kauwa, ma ka inoa o ka Mesia, ke hooili aku nei au i ka Oihanakahuna o Aarona, ka mea e paa ana i na ki o ka lawelawe ana o na anela, a me ka Euanelio o ka mihi, a o ka bapetizo ma ka hooluu ana no ke kala ia ana o na hala; a aole loa e lawe hou ia aku keia mai ka honua aku, a hiki i ka wa a na keiki a Levi e mohai hou aku ai i mohai i ka Haku me ka pono.”

70. Olelo mai la oia aole i loaa i keia Oihanakahuna o Aarona ka mana o ke kau ana i na lima no ka haawina o ka Uhane Hemolele, aka, e hooili ia mai ana ia maluna o maua mahope aku; a kauoha mai la oia ia maua e hele a e bapetizo ia, a haawi mai la i na kuhikuhi ana ia maua, oia hoi, naʻu e bapetizo ia Oliva Kaudare, a mahope nana e bapetizo mai iaʻu.

71. Nolaila, hele aku la maua a bapetizo ia iho la. Bapetizo au ia ia mamua, a mahope bapetizo oia iaʻu,—a mahope o ia, kau iho la au i koʻu mau lima maluna o kona poo a hoolilo iho la ia ia i ka Oihanakahuna o Aarona, a mahope iho, kau iho la oia i kona mau lima maluna oʻu a hoolilo iho la iaʻu no ia Oihanakahuna hookahi no—no ka mea, pela maua i kauoha ia mai ai.*

72. Olelo mai la ka elele i hele mai ai e ike ia maua ma keia wa, a hooili mai i keia Oihanakahuna maluna o maua, o Ioane kona inoa, ka mea hookahi no i kapa ia o Ioane Bapetite ma ke Kauoha Hou, a ua hana oia malalo o ke kuhikuhi ana o Petero, Iakobo a me Ioane, ka poe e paa ana i na ki o ka Oihanakahuna a Melekizedeka, oia ka Oihanakahuna, wahi ana, e hooili ia mai ana maluna o maua i ka wa kupono, a e kapa ia au o ka Lunakahiko mua o ka Ekalesia, a oia (o Oliva Kaudare), ka lua. Ma ka la 15 o Mei, M. H. 1829, i hoolilo ia ai maua ma lalo o ka lima o keia elele, a bapetizo ia hoi.

73. I ka wa no a maua i pii mai ai mailoko mai o ka wai mahope o ko maua bapetizo ia ana, loaa mai la ia maua na hoopomaikai nui a nani mai ko maua Makua Lani mai. Mahope koke iho o koʻu bapetizo ana ia Oliva Kaudare kau mai la ka Uhane Hemolele maluna ona, a ku ae la ia a wanana mai la i na mea he nui e hooko koke ia ana. A eia hou, mahope koke iho o koʻu bapetizo ia ana e ia, loaa iho la no hoi iaʻu ka uhane o ka wanana, a i koʻu ku ana, wanana ae la au e pili ana i ke ala ana mai o keia Ekalesia, a me na mea e ae he nui i pili i ka Ekalesia, a me keia hanauna o na keiki a kanaka. Ua piha maua me ka Uhane Hemolele, a ua hauoli iloko o ke Akua o ko maua hoola ia ana.

74. Oiai ua hoomalamalama ia ae la ko maua mau naau, hoomaka iho la e moakaka na Palapala Hemolele i ko maua mau hoomaopopo ana, a e hoike ia ia maua ke ano oiaio a me ka manao maoli o na pauku pohihihi loa iloko olaila, me ka moakaka i hiki ole ke loaa ia maua mamua aku, a i noonoo ole ia mamua. Ma ia wa nae noho hamau iho la maua e pono ai, aole e hoike i na mea e pili ana i ka loaa ana o ka Oihanakahuna ia maua, a me ko maua bapetizo ia ana, mamuli o ka uhane o ka hoomaau ana i hoike ae ia ia iho ia wa ma ia wahi.

75. Ua hooweliweli ia maua me ka olelo e pepehi ia ana maua e ka poe uluaoa mai kekahi wa a i kekahi wa; a o keia no hoi, e ka poe kaena hoomana. A ua hoohuli ia ae ko lakou makemake e pepehi ia maua mamuli wale no o ka mana o ka ohana o ka makuakane o kaʻu wahine, (malalo o ka malu o ke Akua,) ka poe hoi i lilo mai i poe oluolu loa iaʻu, a i kue loa i na puulu hoohaunaele, a ua ae oluolu mai iaʻu e hoomau i ka hana o ka unuhi ana me ke akeakea ole ia; a nolaila, haawi mai la a olelopaa hoi e haawi mai ana ia maua i ka hoopakele ana mai na hana kue kanawai mai a pau e like me ka hiki ia lakou.