1. A pela iho la kakou e hoopau pono ai i ka hana ana i na lani a me ka honua a me na lehulehu a pau o lakou.

2. I iho la na Akua mawaena o lakou iho: Ma ka hiku o ka manawa e hoopau ai kakou i ka kakou hana, a kakou i kukakuka ai; a e hoomaha kakou ma ka hiku o ka manawa mai ka kakou mau hana a pau a kakou i kukakuka ai.

3. A hooki iho la na Akua ma ka hiku o ka manawa, no ka mea, ma ka hiku o ka manawa e hoomaha ana lakou mai ka lakou mau hana mai a pau a lakou (na Akua) i kukakuka ai mawaena o lakou iho e hana; a hoolaa iho la ia mea. A pela iho la ka lakou mau olelo hooholo i ka wa a lakou i kukakuka ai mawaena o lakou iho e hana i na lani a me ka honua.

4. A iho mai la na Akua a hana iho la i keia mau mea, na hanauna o ko na lani a me ko ka honua, i ka wa o ia mau mea i hana ia ai ma ka la a na Akua i hana ai i ka honua a me na lani,

5. I kulike ai me na mea a pau a lakou i olelo ai e pili ana i kela a me keia mea ulu o ke kula mamua o kona ulu ana iloko o ka honua, a me kela a me keia launahele o ke kula mamua o kona ulu ana mai; no ka mea, aole i hoohaule na Akua i ka ua maluna o ka honua i ka wa a lakou i kukakuka ai e hana ia mau mea, a aole hoi i hana i ke kanaka nana e mahi i ka aina.

6. Aka, pii ae la kekahi ohu mai ka honua ae a hoopulu iho i ka ili holookoa o ka aina.

7. A hana iho la na Akua i ke kanaka mai ka lepo mai o ka honua, a lawe mai la i kona uhane, (oia hoi, ko ke kanaka uhane,) a hookomo iho la ia mea iloko ona; a ha aku la i ka hanu ola iloko o kona mau pukaihu, a lilo ae la ke kanaka i kino ola me ka uhane.

8. A kanu iho la na Akua i kekahi kihapai, ma ka aoao hikina iloko o Edena, a malaila lakou i hoonoho ai i ke kanaka, nona ka uhane a lakou i hookomo ai iloko o ke kino a lakou i hana ai.

9. A mailoko mai o ka honua i hooulu mai ai na Akua i kela a me keia laau i oluolu i ka maka, a he maikai e ai ia; o ka laau o ke ola no hoi kekahi iwaenakonu o ke kihapai, a me ka laau i ikea ai ka pono a me ka hewa.

10. Aia no kekahi muliwai e kahe ana mailoko aku o Edena, e hoopulu i ke kihapai, a mailaila aku ua mahele ia a lilo ae la i mau mana eha.

11. A lawe ae la na Akua i ke kanaka a hoonoho iho la ia ia iloko o ke Kihapai o Edena, e mahi a e malama ia wahi.

12. A kauoha mai la na Akua i ke kanaka, i ka i ana: E ai wale oe i ko kela a me keia laau o ke kihapai,

13. Aka, o ko ka laau e ikea ai ka pono a me ka hewa, mai ai oe i ko ia mea; no ka mea, i ka wa au e ai ai ia mea, e make io no oe. Ano, ike iho la au, o Aberahama, mamuli keia o ko ka Haku manawa, oia hoi, mamuli o ka manawa o Koloba; no ka mea, ia wa, aole i haawi na Akua ia Adamu, i kona helu manawa ana.

14. I iho la na Akua: E hana kakou i kokoolua no ke kanaka, no ka mea, aole ia he pono ke noho ke kanaka oia wale no, nolaila, e hana kakou i kokoolua nona.

15. A hookau iho la na Akua i ka hiamoe loa maluna o Adamu; a hiamoe iho la ia, a unuhi ae la lakou i kekahi iwiaoao ona, a hoopili ae la i ka io ma kona wahi;

16. A mai ka iwiaoao a na Akua i unuhi ai noloko mai o ke kanaka, hana iho la lakou i wahine, a lawe aku la ia ia i ke kanaka.

17. A olelo ae la o Adamu: O keia ka iwi o kuu mau iwi, a me ka io o kuu io; ano e kapa ia oia, Wahine, no ka mea, ua unuhi ia oia noloko mai o ke kane;

18. Nolaila, e haalele ke kanaka i kona makuakane a me kona makuahine, a e pili aku i kana wahine, a e lilo laua i io hookahi.

19. A ua kohana laua a elua, ke kane a me kana wahine, a aole i hilahila.

20. A mailoko mai o ka lepo i hana ai na Akua i na holoholona a pau o ke kula, a me kela a me keia manu o ka lewa, a lawe mai la ia lakou io Adamu la, i ike ia ai na inoa a Adamu e kapa aku ai ia lakou; a o ka mea a Adamu e kapa aku ai i kela a me keia mea ola, oia iho la ka inoa o ia mea.

21. A haawi aku la o Adamu i na inoa i na holoholona laka a pau, i na manu o ka lewa, i kela a me keia holoholona o ke kula; a no Adamu, ua loaa he kokoolua nona.