1. Ua loaa iaʻu, ia Aberahama, ka Urima a me ka Tumima, na mea a ka Haku koʻu Akua i haawi mai ai iaʻu ma Ura o ko Kaledea;

2. A ike aku la au i na hoku, he nunui loa lakou, a ua kokoke loa aku kekahi o lakou i ka nohoalii o ke Akua; a he lehulehu no na hoku nunui i kokoke aku ia mea;

3. A olelo mai la ka Haku iaʻu: O keia na mea e hoomalu ana; a o Koloba ka inoa o ka mea nui loa, mamuli o kona kokoke mai Iaʻu, no ka mea, Owau no ka Haku, kou Akua: Ua hoonoho Au i keia hoku e hoomalu i na hoku a pau o ka papa hookahi e like la me kena kahi au e ku nei.

4. A olelo mai la ka Haku iaʻu, ma ka Urima a me ke Tumima, o ko Koloba ano mamuli no ia o ko ka Haku, e ku i kona mau manawa a me kona mau kau ma kona kaa ana; hookahi kaa ana apuni he la ia i ka Haku, mamuli o ke ano o Kona helu ana, he hookahi tausani makahiki ia i kulike ai me ka manawa i koho ia no kahi au e ku nei. O keia ka helu ana o ko ka Haku manawa e kulike ana i ko Koloba helu ana.

5. A olelo mai la ka Haku iaʻu: O ka hoku-hele ka mea he malamalama i uuku iho, nana e alii ai i ka po, i uuku iho malalo o ko ka mea e nohoalii ana ma ke ao, ua oi ae, a i ole, nui ae ia mamua o ka hoku-hele kahi au e ku nei, ma ke ano o ke ana ana, no ka mea, he lohi iho kona kaa ana; he pono keia, no ka mea, ke ku nei ia maluna ae o ka honua kahi au e ku nei, nolaila, ma ka helu ana i kona manawa, aole he nui ka heluna o kona mau la, a me na malama, a me na makahiki.

6. A olelo mai la ka Haku iaʻu: Ano, e Aberahama, ke ku nei keia mau mea oiaio elua, aia hoi, ke ike nei kou mau maka ia mea; ua haawi ia ia oe e hoomaopopo i na manawa o ko ka helu ana, a me ka manawa i hoopaa ia, ae, ka manawa i hoopaa ia no ka honua kahi au e ku nei, a me ka manawa i hoopaa ia no ka malamalama i oi ae, ka mea i hoonoho ia e alii ae ma ke ao, a me ka manawa i hoopaa ia no ka malamalama uuku iho, ka mea i hoonoho ia e alii ai ma ka po.

7. Ano, o ka manawa i hoopaa ia no ka malamalama uuku iho he manawa loihi aku ia ma kona ana ia ana, mamua o ke ana ia ana o ka manawa o ka honua kahi au e ku nei.

8. A ma kahi i ku ai keia mau mea oiaio a elua, aia no kekahi mea oiaio hou aku maluna ae o laua, oia hoi, aia no he hoku-hele okoa ae nona ke ana ia ana o ka manawa i oi aku ka loihi;

9. A pela iho la e loaa ai ke ana ana i ka manawa o kekahi hoku-hele maluna ae o kekahi, a hiki i kou hookokoke ana aku io Koloba la, a o ua Koloba la mamuli no ia o ke ana ana a ko ka Haku manawa; a o ua Koloba la ka mea i hoonohonoho ia ma kahi kokoke i ka nohoalii o ke Akua, e hoomalu i kela mau hoku-hele a pau o ka papa hookahi me ko ka hoku-hele kahi au e ku nei.

10. A ua haawi ia ia ia oe e hoomaopopo i ka manawa i hoopaa ia no na hoku a pau i hoonohonoho ia e hoopuka mai i ka malamalama, a hiki i kou kokoke ana mai i ka nohoalii o ke Akua.

11. Pela iho la au, o Aberahama, i kamailio ai me ke Akua, he maka no he maka, e like me kekahi kanaka e kamailio ai me kekahi; a hai mai la Oia iaʻu i na hana a Kona mau lima i hana ai;

12. A olelo mai la Oia iaʻu: E Kuu keiki, e Kuu keiki, (a ua hohola ia Kona lima,) aia hoi, e hoike aku ana Au i keia mau mea a pau ia oe. A kau mai la Oia i Kona lima maluna o koʻu mau maka, a ike aku la au i na mea a Kona mau lima i hana ai, a he lehulehu lakou; a hoomahuahua ia ae la lakou imua o koʻu mau maka, a aole e hiki iaʻu ke ike aku i ka hopena o ia mau mea.

13. A olelo mai la Oia iaʻu: O Sineha keia, oia hoi ka la. A olelo mai la Oia iaʻu: Kokoba, oia hoi he hoku. A olelo mai la Oia iaʻu: Olia, oia hoi ka mahina. A olelo mai la Oia iaʻu: Kokaubima, o ka manao o ia, na hoku, a i ole, o na malamalama nunui a pau iloko o ke aouli o ka lani.

14. He manawa ia o ka po ka wa a ka Haku i olelo mai ai i keia mau olelo iaʻu: E hoomahuahua aku no Au ia oe, a me kau hua mahope ou, e like me ua mau mea la; a ina e hiki ia oe ke helu i ka nui o ke one, pela auanei ka heluna o kau mau hua.

15. A olelo mai la ka Haku iaʻu: E Aberahama, ke hoike nei Au i keia mau mea ia oe mamua o kou komo ana aku iloko o Aigupita, i hoolaha aku ai oe i keia mau olelo a pau.

16. Ina e ku ana kekahi mau mea elua, o kekahi maluna ae o kekahi, aia no he mau mea i nui aku maluna ae o laua; nolaila, o Koloba ka mea nui loa mawaena o na Kokaubima a pau au i ike ai, no ka mea, oia kai kokoke loa mai Iaʻu.

17. Ano, ina aia kekahi mau mea elua, o kekahi maluna ae o kekahi, a o ka mahina maluna ae o ka honua, alaila, aia paha kekahi hoku-hele, a i ole, hoku paha e ku ana maluna ae ona; a aole kekahi mea a ka Haku kou Akua i noonoo ai iloko o kona naau e hana, ke ole Oia e hana aku ia mea.

18. Aka nae, hana iho la Oia i ka hoku nui ae; e like hoi penei, ina aia elua mau uhane, a ua oi ae ka naauao o kekahi mamua o kekahi, eia nae aole hoomaka ana o keia mau uhane elua, oiai no nae ua oi ae ka naauao o kekahi mamua o kekahi; ola iho la no laua mamua, aole auanei he hopena no laua, e ola aku ana laua mahope aku, no ka mea, he ginolama no laua, a i ole, he mau loa.

19. A i mai la ka Haku iaʻu: Ke ku nei keia mau mea oiaio elua, aia he elua mau uhane, a ua oi aku ka naauao o kekahi mamua o kekahi; aia hoi kekahi oi ae ka naauao mamua o laua; Owau ka Haku kou Akua, ua oi ae Koʻu naauao mamua o lakou a pau.

20. Hoouna mai la ka Haku kou Akua i Kona anela e hoopakele ia oe mai na lima mai o ke kahuna o Elekana.

21. Ke noho nei au iwaena o lakou a pau; nolaila, ua iho mai nei Au, ano, i ou la, e haawi aku ia oe i na hana a Koʻu lima i hana ai, ma ia mau mea la i pakela aku ai Koʻu naauao mamua o lakou a pau, no ka mea, ke hoomalu nei Au iloko o na lani maluna ae, a ma ka honua ma lalo iho, me ka naauao a me ka noonoo akahele a pau, a maluna o na ike a pau a kou mau maka i ike ai mai kinohi mai; i kinohi, iho mai la Au iwaena o na ike a pau au i ike ai.

22. Ano, ua hoike mai la ka Haku iaʻu, ia Aberahama, i na ike i hoonohonoho ia mamua aku o ke ao nei; a iwaena o ua mau mea nei a pau he lehulehu o lakou i kiekie ke kulana a he mea nui hoi;

23. A ike iho la ke Akua i ua mau uhane nei, a ua maikai lakou, ku iho la Ia iwaena o lakou, a i iho la Ia: O keia poe Kaʻu e hoolilo i poe hoomalu Noʻu; no ka mea, e ku ana Oia iwaena o ka poe uhane, a ike no Oia ua maikai lakou; a olelo mai la Oia iaʻu: E Aberahama, o oe no kekahi o lakou; ua koho ia oe mamua o kou hanau ia ana.

24. A e ku ana kekahi malaila iwaena o lakou i like aku me ke Akua, a i ae la Oia i ka poe me ia: E iho kakou i lalo, no ka mea, aia he wahi kaawale malaila, a e lawe kakou i kekahi o keia mau mea paa, a e hana kakou i kekahi honua, maluna olaila e noho ai keia poe;

25. A e hoao kakou ia lakou ma ia mea, e ike ia ai ina paha e hana lakou i na mea a pau a ka Haku ko lakou Akua e kauoha ai ia lakou;

26. A o ka poe e malama ana i ko lakou mahele mua o ke ola ana e hoomahuahua ia; a o ka poe e malama ole ana i ko lakou mahele mua o ke ola ana, aole e loaa ia lakou ka nani iloko o ke aupuni hookahi me ka poe e malama ana i ko lakou mahele mua o ke ola ana; a o ka poe e malama ana i ko lakou mahele elua o ke ola ana, e pakui hou ia mai ka nani maluna o ko lakou mau poo no ka wa mau loa a mau loa.

27. A i mai la ka Haku: Owai la Kaʻu e hoouna ai? A pane mai la kekahi i like me ke Keiki a ke Kanaka: Eia no Au, e hoouna Iaʻu. A pane mai la kekahi hou ae i ka i ana: Eia no au, e hoouna iaʻu. A olelo mai la ka Haku: E hoouna aku Au i ka mua.

28. Huhu iho la ka lua, a malama ole i kona mahele mua o ke ola ana; a ma ia la, he nui ka poe i hahai aku ma hope ona.