1. Alaila, olelo mai la ka Haku: E iho kakou ilalo. A iho iho la lakou ilalo i kinohi, a hoonohonoho iho la lakou, oia hoi na Akua, a hana hoi i na lani a me ka honua.

2. A aole kekahi mea maluna o ka honua mahope o kona hana ia ana, a ua neoneo, no ka mea, aole lakou i hana i kekahi mea, koe wale no ka honua; a e nohoalii ana ka pouli maluna o ka hohonu, a hoopunana iho la ka Uhane o na Akua maluna o ka ili o na wai.

3. A i iho la lakou (na Akua): I malamalama, a malamalama ae la.

4. A hoomaopopo iho la lakou (na Akua) i ka malamalama, no ka mea, ua olinolino no ia; a hookaawale ae la lakou i ka malamalama, a i ole, hana iho la i mea e hookaawale ia ai ia, mai ka pouli ae.

5. A kapa aku la na Akua i ka malamalama ke Ao, a o ka pouli ka lakou i kapa aku ai o ka Po. A eia kekahi, mai ke ahiahi a i ke kakahiaka ka lakou i kapa aku ai he po; a mai ke kakahiaka a i ke ahiahi, ka lakou i kapa aku ai he ao; o keia ka mua, a i ole, ka hoomaka ana, o ka mea a lakou i kapa aku ai o ke ao a me ka po.

6. I iho la no hoi na Akua: I wahi kowa iwaena o na wai, a e hookaawale no ia i na wai mai na wai mai.

7. A kauoha ae la na Akua i wahi kowa; a pela i hookaawale ia ai na wai malalo iho o ke kowa mai na wai mai maluna ae o ke kowa; a pela io no, oia hoi e like me ka lakou i kauoha ai.

8. A kapa aku la na Akua i ke kowa ka Lani. Eia kekahi, mai ke ahiahi a i ke kakahiaka ka lakou i kapa aku ai he po; a eia kekahi, mai ke kakahiaka a i ke ahiahi oia ka lakou i kapa aku ai he ao; a o keia ka lua o ka manawa a lakou i kapa aku ai o ka po a me ke ao.

9. A kauoha ae la na Akua, i ka i ana: E houluulu i na wai malalo iho o ka lani i kahi hookahi, a e puka maloo mai ka aina; a pela no ia e like me ka lakou i kauoha ai;

10. A kapa aku la na Akua i ka aina maloo, o ka honua; a o ka hui pu ana o na wai, oia ka lakou i kapa aku ai o na wai nui; ike iho la na Akua, ua hoolohe ia lakou.

11. I iho la na Akua: E hoomakaukau kakou i ka honua e hooulu mai i ka mauu; o ka launahele e hoohua ana i na anoano; o ka laau-hua e hoohua ana i ka hua, mamuli o kona ano, a o kona anoano ma ona iho e hoohua mai i kona ano iho maluna o ka honua; a pela io no e like me ka lakou i kauoha ai.

12. Kukulu iho la na Akua i ka honua e hooulu mai i ka mauu mai kona anoano ponoi mai, a e hooulu mai ka launahele i ka launahele mai kona anoano ponoi mai, e hoohua ana i ka anoano mamuli o kona ano iho; a e hooulu mai ka honua i ka laau mai kona anoano ponoi mai, e hoohua ana i ka hua, nona ka anoano i hiki ke hoohua mai ia ano hookahi wale no iloko ona iho, mamuli o kona ano iho; a ike iho la na Akua ua hoolohe ia lakou.

13. A eia kekahi, helu iho la lakou i na la; mai ke ahiahi a i ke kakahiaka ka lakou i kapa aku ai he po; a eia kekahi, mai ke kakahiaka a i ke ahiahi ka lakou i kapa aku ai he ao, a o ke kolu ia o ka manawa.

14. Hoonohonoho iho la na Akua i na malamalama ma kahi akea o ka lani, a hoohana iho la ia lakou e hookaawale i ke ao mai ka po mai; a hoonohonoho iho la ia lakou e lilo i mau hoailona, a i mau kau, a i mau la, a i mau makahiki;

15. A hoonohonoho iho la ia lakou e lilo i mau malamalama iloko o kahi akea o ka lani e hoomalamalama mai maluna o ka honua: a pela io no ia.

16. Hoonohonoho iho la na Akua i na malamalama nui elua, o ka malamalama oi ae e alii ai ma ke ao, a o ka malamalama uuku iho e alii ai ma ka po; a hoonohonoho pu hoi lakou i na hoku me ka malamalama uuku iho;

17. A hoonoho aku la na Akua ia mau mea ma kahi akea o na lani e hoomalamalama mai maluna o ka honua, a e alii ai maluna o ke ao a maluna o ka po, a e hookaawale i ka malamalama mai ka pouli mai.

18. A kiai aku la na Akua i ua mau mea la a lakou i kauoha ai a hiki i ko lakou hoolohe ana.

19. A eia kekahi, mai ke ahiahi a i ke kakahiaka he po ia; a eia kekahi, mai ke kakahiaka a i ke ahiahi, he ao ia; a o ka ha ia o ka manawa.

20. I iho la na Akua: E hoomakaukau kakou i na wai e hoohua nui mai i na mea holo me ke ola iloko o lakou; a me na manu, i lele ai lakou maluna ae o ka honua iloko o kahi akea o ka lani.

21. A hoomakaukau iho la na Akua i na wai i hiki ai ia lakou ke hoohua mai i na kohola nunui, a me kela a me keia mea ola e holo ana, na mea a na wai e hoohua nui mai ai mamuli o ko lakou ano iho: a me na manu eheu a pau ma ko lakou ano. A ike iho la na Akua e hoolohe ia ana lakou, a ua maikai hoi ka lakou hoolala ana.

22. I iho la na Akua: E hoopomaikai kakou i keia mau mea, a e kena aku ia lakou e hoohua mai a e hoomahuahua aku, a e hoopiha i na wai iloko o na kai, a i ole, na wai nui; a e kena i na manu e hoomahuahua aku maluna o ka honua.

23. A eia kekahi, mai ke ahiahi a i ke kakahiaka ka lakou i kapa aku ai he po; a eia kekahi, mai ke kakahiaka a i ke ahiahi ka lakou i kapa aku ai he ao; a o ka lima ia o ka manawa.

24. A hoomakaukau iho la na Akua i ka honua e hoohua mai i ka mea ola mamuli o kona ano iho, na holoholona laka a me na mea kolo, a me na holoholona o ka honua mamuli o ko lakou ano; a pela io no ia, e like me ka lakou i olelo ai.

25. A hoonohonoho iho la na Akua i ka honua e hoohua mai i na holoholona hihiu mamuli o ko lakou ano, a me na holoholona laka mamuli o ko lakou ano, a me kela a me keia mea e kolo ana maluna o ka honua mamuli o kona ano; a ike iho la na Akua e hoolohe ana lakou la.

26. A kuka iho la na Akua mawaena o lakou iho, a i iho la: E iho kakou i lalo a e hana i ke kanaka ma ko kakou ano iho, mamuli o ke ano like me kakou; a e haawi kakou ia lakou i ka mana e noho hoomalu maluna o na ia o ke kai, a maluna o na manu o ka lewa, a maluna o na holoholona laka, a maluna o ko ka honua a pau, a maluna o kela a me keia mea kolo e kolo ana maluna o ka honua.

27. Nolaila, iho iho la na Akua i lalo e hana i ke kanaka ma ko lakou ano iho, ma ke ano o na Akua e hana ai lakou ia ia, he kane a he wahine, e hana ai lakou ia laua.

28. I iho la na Akua: E hoopomaikai kakou ia laua. I iho la na Akua: E kauoha kakou ia laua e hoohua mai, a e hoomahuahua, a e hoopiha i ka honua, a e lanakila maluna ona, a e noho hoomalu maluna o na ia o ke kai, a maluna o na manu o ka lewa, a maluna o na mea ola a pau e holo ana maluna o ka honua.

29. A olelo iho la na Akua: Aia hoi, e haawi aku ana kakou na laua i kela a me keia launahele e hoohua ana i ka anoano, e puka mai ana maluna o ka ili a pau o ka honua, a me kela a me keia laau e hoohua ana i ka hua maluna iho ona; he oiaio, o ka hua o ka laau e hoohua ana i ka anoano, ia laua e haawi ai kakou ia mea; e lilo ia i ai na laua.

30. A i kela a me keia holoholona o ka honua, a i kela a me keia manu o ka lewa, a i kela a me keia mea e kolo ana maluna o ka honua, aia hoi, e haawi aku kakou ia lakou i ke ola, a e haawi aku no hoi kakou ia lakou i kela a me keia launahele uliuli i mea ai, a pela iho la e hoonohonoho ia ai keia mau mea a pau.

31. A i iho la na Akua: E hana kakou i kela a me keia mea a kakou i olelo ai, a e hoonohonoho ia lakou; a aia hoi, e hoolohe loa mai ana lakou. A eia kekahi, mai ke ahiahi a i ke kakahiaka ka lakou i kapa ai he po; a eia kekahi, mai ke kakahiaka a i ke ahiahi ka lakou i kapa ai he ao; a helu iho la lakou i ke ono o ka manawa.