Ka Buke a Aberahama.

1. Oiai ma ka aina o ko Kaledea, ma kahi noho o koʻu makuakane, ike iho la au, o Aberahama, he mea pono e loaa noʻu he wahi okoa aku e noho ai;

2. A, i koʻu hoomaopopo ana aia he hauoli a me ka maluhia a me ka maha i oi ae noʻu, imi iho la au i na hoopomaikai a na kupuna, a me ke kuleana oʻu e pono ai ke hoolilo ia mai, no ka lawelawe ana ia mau mea; a oiai he mea hahai no hoi au mahope o ka pono, e iini nui ana hoi e lilo i mea i loaa ka ike nui, a i mea hahai i oi ae no ka pono, a e loaa ka ike i oi ae, a e lilo i makuakane no na lahuikanaka he nui, i keikialii no ka maluhia, a e iini ana e loaa na ao ana, a e malama i na kauoha a ke Akua, lilo iho la au i hooilina ku i ke kanawai, he Kahuna Kiekie, e paa ana i ke kuleana i loaa i na kupuna.

3. Ua hooili ia mai ia maluna oʻu mai na kupuna mai; ua ili mai ia mai na kupuna mai, mai ka hoomaka ana o ka manawa, he oiaio, mai kinohi mai, a i ole, mamua aku o ka hookumu ia ana o ka honua, a hiki i keia manawa ano, oia hoi, ke kuleana o ka hanau-mua, maluna o ke kanaka mua, oia o Adamu, ko kakou makuakane mua, a ma o na kupuna la a hiki mai iaʻu nei.

4. Imi iho la au i koʻu hoolilo ia ana i ka Oihanakahuna i kulike me ka ke Akua i koho ai no na kupuna e pili ana i na mamo.

5. Oiai ua huli ae koʻu mau kupuna mai ko lakou kulana hoopono ae, a mai na kauoha hemolele hoi a ka Haku ko lakou Akua i haawi mai ai ia lakou, a i ka hoomana ana i na akua o ka poe pegana, ua hoole loa lakou i ka maliu ana mai i koʻu leo;

6. No ka mea, ua hoopaakiki ia ko lakou mau naau e hana i ka ino, a ua huli holookoa ia aku i ke akua o Elekana, a i ke akua o Libana, a me ke akua o Mamakara, a me ke akua o Korasa, a me ke akua o Parao, ke alii o Aigupita;

7. Nolaila, hoohuli ae la lakou i ko lakou mau naau a i na mohai ana a ka poe pegana, ma ka alana ana i ka lakou poe keiki i ko lakou mau akua kii mumule, a aole i maliu mai i koʻu leo, aka, hoao iho la e lawe i koʻu ola ma o ka lima la o ke kahuna o Elekana. O ke kahuna o Elekana, oia no hoi ke kahuna o Parao.

8. Ano, ia wa he hana maa mau i ke kahuna o Parao, ke alii o Aigupita, e alana aku maluna o ke kuahu i kukulu ia ma ka aina o Kaledea, i na kane, na wahine a me na keiki, i mohai imua o keia mau akua ano e.

9. A eia kekahi, alana aku la ke kahuna i kekahi mohai imua o ke akua o Parao, a imua no hoi o ke akua o Sagareela, oia hoi, ma ke ano o ko Aigupita poe. A o ke akua o Sagareela, oia no ka la.

10. Ua alana aku no hoi ke kahuna o Parao i kekahi keiki, i mohai hoomaikai, maluna o ke kuahu e ku ana ma ka puu i kapa ia ka Puu o Potipara, ma ke poo o ke kula o Olisema.

11. Ano, ua alana aku keia kahuna maluna o keia kuahu, i ka wa hookahi, i ekolu mau wahine puupaa, oia hoi na kaikamahine a Onita, kekahi o na mamo mai ka puhaka pololei mai o Hama. Ua mohai ia keia poe wahine puupaa mamuli o ko lakou maemae; aole lakou i ae e kulou i lalo a e hoomana i na akua kii laau a pohaku paha, nolaila, ua pepehi ia lakou maluna o keia kuahu, a ua hana ia hoi ia mamuli o ke ano o ko Aigupita poe.

12. A eia kekahi, lawelawe mai la na kahuna me ka lima ikaika maluna oʻu, i hiki ai no hoi ia lakou ke pepehi mai iaʻu a make, e like me ka lakou i hana ai i kela mau wahine puupaa maluna o keia kuahu; a i mea e hiki ai ia oukou ke loaa ka ike e pili ana i keia kuahu, e kuhikuhi aku au ia oukou i ke kii ma ka hoomaka ana o keia mooolelo.

13. Ua hana ia ia e like la me ke ano o ka punee me ia i loaa mawaena o ka poe Kaledea, a e ku ana hoi imua o na akua o Elekana, o Libana, o Mamakara, o Korasa, a me kekahi akua no hoi i like me ko Parao, ke alii o Aigupita.

14. A i loaa ai ia oukou ka hoomaopopo ana i keia mau akua, ua hoike aku au ia oukou i ko lakou ano, ma na kii ma ka hoomaka ana o keia mooolelo, a o ke ano o ua mau kii la ua kapa ia e ka poe Kaledea, he Ralinosa, oia hoi he olelo i kahakaha ia.

15. A i ko lakou kau ana mai i ko lakou mau lima maluna oʻu, i mea e hiki ai ia lakou ke alana aku iaʻu a lawe aku i kuu ola, aia hoi, hookiekie aku la au i koʻu leo i ka Haku koʻu Akua, a maliu mai la ka Haku a hoolohe hoi, a hoopiha mai la Oia iaʻu me ke akaku o ka Mea Mana Loa, a ku mai la he anela mai Kona alo mai, ma kahi kokoke iaʻu, a wehe koke iho la i na kaula oʻu i hoopaa ia ai;

16. A pae mai la Kona leo iaʻu: E Aberahama, e Aberahama, o Iehova Koʻu inoa, a ua lohe Au ia oe, a ua iho mai nei e hoopakele ia oe, a e lawe aku ia oe mai ka hale aku o kou makuakane, a mai kou mau pilikoko aku a pau, a iloko o kekahi aina e au i ike ole ai.

17. A mamuli keia o ko lakou hoohuli ana i ko lakou mau naau mai Aʻu aku, e hoomana i ke akua o Elekana, a me ke akua o Libana, a me ke akua o Mamakara, a me ke akua o Korasa, a me ke akua o Parao, ke alii o Aigupita; nolaila, ua iho mai nei Au e hoopai ia lakou, a e luku i ka mea i hookiekie i kona lima e kue mai ia oe, e Aberahama, Kuu keiki, a e lawe i kou ola.

18. Aia hoi, e kai aku no Au ia oe me Kuu lima, a e lawe no Au ia oe, e hookau i Kuu inoa maluna ou, oia hoi ka Oihanakahuna a kou makuakane, a maluna auanei ou Koʻu mana.

19. E like me ia me Noa, pela no auanei ia me oe; aka, mamuli o kau hana iloko o ka Oihanakahuna e ike ia ai Koʻu inoa iloko o ke ao nei no ka wa mau loa, no ka mea, Owau no kou Akua.

20. Aia hoi, o ka Puu o Potipara, aia no ia ma ka aina o Ura, ma Kaledea. Hoohiolo iho la ka Haku i ke kuahu o Elekana, a me ko na akua o ka aina, a hoopau loa iho la ia mau mea, e hahau mai la i ke kahuna a make iho la ia; a he nui ke kumakena ana ma Kaledea, a ma ka hale alii no hoi o Parao; a o ka manao o ka huaolelo Parao, he alii mamuli o ke koko alii no ia.

21. Ano he mamo keia alii o Aigupita mai ka puhaka mai o Hama, a iloko nohoi ona ke koko o ko Kanaana poe ma ka hanau ana.

22. Mai keia kuamoo mai i ulu mai ai ka poe Aigupita a pau, a pela i hoomau ia ai ke koko o ko Kanaana poe iloko o ka aina.

23. Ua ike mua ia ka aina o Aigupita e kekahi wahine, oia hoi ke kaikamahine a Hama, a me ke kaikamahine a Aigupitusa, oia hoi o Aigupita ma ka olelo a ko Kaledea, a o ka manao o ia huaolelo ka mea i papa ia no ia.

24. I ka wa a keia wahine i ike ai i ka aina, aia no ka aina malalo o ka wai, a mahope mai hoonoho iho la oia i kana mau keikikane malaila; a pela iho la i ulu mai ai mai a Hama mai, kela lahuikanaka ma ona la e mau nei ka hoino iloko o ka aina.

25. Ano ua kukulu ia ke aupuni mua o Aigupita e Parao, ke keiki hiapo a Aigupitusa, ke kaikamahine a Hama, a he ano like ia me ke aupuni o Hama, oia hoi he aupuni o ko na makualii.

26. Oiai he kanaka pono o Parao, kukulu iho oia i kona aupuni a hoomalu hoi i kona poe kanaka me ka naauao a me ka pono i kona mau la a pau, e imi ikaika ana e hoohalikelike me ke ano i kukulu ia ai e na kupuna iloko o na hanauna mua, iloko o na la o ka nohoalii mua ana o na makualii, oia hoi ke au o ka nohoalii ana o Adamu, a o Noa hoi, kona [ko Hama] makuakane, ka mea nana i hoopomaikai ia ia me na pomaikai o ka honua, a me na pomaikai o ka naauao, aka, hoino ia ia ma na mea e pili ana i ka Oihanakahuna.

27. Ano oiai o Parao no ka lalani mai i hiki ole ai ke loaa ia ia ke kuleana i ka Oihanakahuna, oiai no nae e koi hauoli ana na Parao ia mea mai a Noa mai, ma o Hama la, nolaila ua alakai ia aku la koʻu makuakane mamuli o ko lakou hoomanakii;

28. Aka, e hoao ana au ma keia hope aku, e hoike maopopo lea aku i ka mookuauhau e hoi hope ana mai aʻu aku a i ka hookumu ia ana o ke ao nei, no ka mea, ua loaa mai iloko o koʻu lima na mooolelo, na mea aʻu e paa nei a hiki mai i keia manawa.

29. Ano, mahope iho o ka hahau ia ana o ke kahuna o Elekana a make, hiki mai la ka hooko ia ana o kela mau mea i olelo ia mai iaʻu e pili ana i ka aina o Kaledea, e hiki mai ana he wi iloko o ka aina.

30. A i kulike me ia olelo, pahola iho la kekahi wi iloko o ka aina holookoa o Kaledea, a ua hoehaeha loa ia koʻu makuakane mamuli o ka wi, a mihi iho la oia no ka ino ana i manao ai e hana mai iaʻu, e lawe i kuu ola.

31. Aka, ua hookoe mai la ka Haku, koʻu Akua, iloko o koʻu mau lima ponoi, i na mookuauhau o na kupuna, oia hoi na makualii, e pili ana i ke kuleana i ka Oihanakahuna; nolaila, o ka ike e pili ana i ka hookumu ia ana o ke ao nei, a me na hoku-hele hoi, a me na hoku, e like me lakou i hoike ia ai i na kupuna, kaʻu i malama ai a hiki i keia la, a e hoao ana au e kakau i kekahi o keia mau mea maloko o keia mooolelo no ka pomaikai o kaʻu mau mamo e hiki mai ana mahope oʻu.