1. Ano, hoomahuahua loa ae la ka Haku ke Akua i ka wi maluna o ka aina o Ura, a mamuli o ia mea, make iho la koʻu kaikuaana o Harana; aka, mau aku la no ke ola ana o Tera, koʻu makuakane, ma ka aina o Ura o ko Kaledea.

2. A eia kekahi, lawe ae la au, o Aberahama, ia Sarai, i wahine naʻu, a lawe ae la o Nahora, koʻu kaikuaana, ia Mileka i wahine nana, o laua na kaikamahine a Harana.

3. Ano, ua olelo mai ka Haku iaʻu: E Aberahama, e hele oe mai kou aina aku, a mai kou ohana aku, a mai ka hale aku o kou makuakane, i kekahi aina Aʻu e hoike aku ai ia oe.

4. Nolaila, haalele aku la au i ka aina o Ura o ko Kaladea, no ka hele ana i ka aina o Kanaana; a lawe ae la au ia Lota ke keiki a koʻu kaikuaana, a me kana wahine, a me Sarai, kaʻu wahine; a hahai mai la no hoi koʻu makuakane ma hope oʻu, i ka aina a makou i kapa iho ai o Harana.

5. Akakuu mai la ka wi; kakali iho la koʻu makuakane ma Harana a noho iho la malaila, oiai he nui na pu-a holoholona ma Harana; a huli hou aku la koʻu makuakane i kona hoomanakii ana, nolaila, hoomau aku la oia i ka noho ana ma Harana.

6. Aka, pule aku la au, o Aberahama, a me Lota, ke keiki a koʻu kaikuaana, i ka Haku, a ikea mai la ka Haku imua oʻu, a olelo mai la iaʻu: E ku a e lawe ia Lota me oe; no ka mea, ua hooholo au e lawe ia oe mailoko aku o Harana, a e hoolilo ia oe i kahuna haiolelo e lawe i Koʻu inoa iloko o kekahi aina malihini Aʻu e haawi aku ai i kau hua mahope aku ou i hooilina mau loa i ka wa a lakou e hoolohe mai ai i Koʻu leo.

7. No ka mea, Owau ka Haku, kou Akua; ke noho nei Au iloko o ka lani; o ka honua Koʻu keehina wawae; hohola aku no Au i Koʻu lima maluna o ke kai, a hoolohe no ia i Koʻu leo; kauoha no Au i ka makani a me ke ahi e lilo i kaa-kaua Noʻu; olelo aku no Au i na mauna—E nee mai ianei aku—a aia hoi, ua lawe koke ia aku lakou e ka makani puahiohio, iloko o ka wa pokole loa.

8. O Iehova Koʻu inoa, a ua maopopo no Iaʻu ka hopena mai ka hoomaka ana; nolaila, maluna ae auanei ou Koʻu lima.

9. A e hoolilo no Au ia oe i lahuikanaka nui, a e hoopomaikai no Au ia oe a oi ae mamua o ka mea i ana ia, a e hoolilo i kou inoa i mea nui mawaena o na lahuikanaka a pau, a e lilo oe i kumu hoopomaikai no kau hua mahope aku ou, a iloko o ko lakou mau lima e lawe ai lakou i keia hana o ka Oihanakahuna a me keia Oihanakahuna i na lahuikanaka a pau;

10. A e hoopomaikai no Au ia lakou ma o kou inoa la; no ka mea, o ka poe a pau e hookipa ana i keia Euanelio o lakou ke kapa ia mamuli o kou inoa, a e helu ia he mamo nau, a e ala mai ana lakou a hoomaikai ia oe, me he la ooe ko lakou makuakane.

11. A e hoopomaikai no Au i ka poe e hoomaikai ana ia oe, a e hoino i ka poe e hoino ana ia oe; a iloko ou, (oia hoi, iloko o kau Oihanakahuna,) a iloko o kau hua, (oia hoi, kau Oihanakahuna,) no ka mea, ke haawi aku nei Au ia oe i kekahi olelo hoopomaikai e hoomau ia keia kuleana iloko ou a iloko o kau hua mahope ou, (oia hoi, ma ka olelo ana, ka mamo pololei, a i ole, ka hua o ke kino,) e hoopomaikai ia ai na ohana a pau o ka honua, he oiaio, me na pomaikai a ka Euanelio, oia no na pomaikai o ka hoola ia ana, he oiaio, o ke ola mau loa hoi.

12. Ano, mahope iho o ko ka Haku hooki ana i ke kamailio ana mai iaʻu a hookaawale hoi i Kona maka mai oʻu aku, olelo iho la au iloko o kuu naau: Ua imi ikaika Kau kauwa ia Oe; ano, ua loaa Oe iaʻu;

13. Ua hoouna mai Oe i Kou anela e hoopakele iaʻu mai na akua mai o Elekana, a he pono noʻu ke hoolohe i Kou leo, nolaila e hookuu mai i Kau kauwa e ku ae a e hele aku me ka maluhia.

14. Pela iho la au, o Aberahama, i hele aku ai e like me ka ka Haku i olelo mai ai iaʻu, a o Lota pu me aʻu; a he kanaono-kumamalua na makahiki oʻu, o Aberahama, i ka wa oʻu i hele ai mai Harana aku.

15. A lawe ae la au ia Sarai, ka mea aʻu i lawe ai i wahine naʻu, i ka wa oʻu ma Ura i Kaledea, a me Lota, ke keiki a koʻu kaikuaana, a me ko maua waiwai a pau a maua i houluulu ai, a me na kanaka a maua i hoohuli mai ai ma Harana, a hele mai la ma ke ala e hiki ai i ka aina o Kanaana, a noho iho la maloko o na halelewa ia makou e hele ana ma ko makou alahele;

16. Nolaila, o ka mau loa ko makou uhi a me ko makou pohaku a me ko makou hoola ia ana, ia makou e kaahele ana mai Harana mai ma ke ala o Ieresona, e hiki aku ai i ka aina o Kanaana.

17. Ano, kukulu iho la au, o Aberahama, i kuahu ma ka aina o Ieresona, a alana aku la i mohai i ka Haku, a pule aku la i hoohuli ia ae ai ka wi mai ka hale aku o koʻu makuakane, i make ole ai lakou.

18. Hele aku la makou mai Ieresona aku maloko aku o ka aina a hiki i kahi i kapa ia o Sekema; aia no ia ma ka aina palahalaha o More, a ua komo mai la makou ia wa iloko o na palena o ka aina o ko Kanaana poe, a haawi aku la au i mohai malaila, ma kahi palahalaha o ka aina o More, a hea aku la i ka Haku me ka naau akahai, no ka mea, ua hiki e mai la makou iloko o ka aina o ua lahuikanaka hoomanakii la.

19. A ikea mai la ka Haku imua oʻu mamuli o kaʻu mau pule, a olelo mai la iaʻu: I kau hua Au e haawi aku ai i keia aina.

20. Ku ae la au, o Aberahama, mai kahi ae o ke kuahu aʻu i kukulu ai i ka Haku, a hele aku la mai ia wahi aku a i kekahi mauna ma ka hikina aku o Betela, a kukulu iho la i koʻu halelewa malaila, o Betela ma ke komohana, a o Hai ma ka hikina; a malaila i kukulu ai au i kekahi kuahu no ka Haku, a hea hou aku la i ka inoa o ka Haku.

21. Kaahele ae la au, o Aberahama, e hoomau ana ma ka hele ana i ka hema; a ua mau no ka wi iloko o ka aina; hooholo iho la au, o Aberahama, e iho ilalo i Aigupita, a e noho malaila, no ka mea, lilo mai la ka wi i mea hoopilikia loa.

22. A eia kekahi, i ka wa aʻu i kokoke ai e komo aku iloko o Aigupita, olelo mai la ka Haku iaʻu: Aia hoi, he wahine ui loa o Sarai, kau wahine, i ka nana aku;

23. Nolaila, e hiki mai ana keia, i ka wa e ike mai ai ka poe Aigupita ia ia, e olelo ae ana lakou—O kana wahine ia; a e pepehi lakou ia oe a make, aka, e hoopakele ana lakou ia ia; nolaila, e makaala a e hana oe penei:

24. E olelo aku oia i ka poe Aigupita oia kou kaikuahine, a e ola aku kou uhane me ke kino.

25. A eia kekahi, hai aku la au, o Aberahama, ia Sarai, kaʻu wahine, i na mea a pau a ka Haku i olelo mai ai iaʻu—Nolaila, ke noi aku nei au ia oe e olelo aku ia lakou, o oe koʻu kaikuahine, i palekana ai au no kou pono, a i ola ai koʻu uhane me ke kino mamuli ou.