1. A o na la a pau o Enoka he eha haneri me kanakolu mau makahiki.

2. A eia kekahi, aole i lawe ia aku o Metusala, ke keiki a Enoka, i hooko ia ai na berita a ka Haku, Ana i hana ai ia Enoka; no ka mea, berita io iho la Oia me Enoka, o Noa auanei kekahi o na hua a kona puhaka.

3. A eia kekahi, wanana mai la o Metusala, mai kona puhaka aku e puka aku ai ko na aupuni a pau o ka honua (ma o Noa la), a lawe iho la oia i kekahi nani nona iho.

4. A loaa mai la he wi nui iloko o ka aina, a hoino iho la ka Haku i ka honua me kekahi hoino ehaeha loa, a he nui o na kanaka olaila i make aku la.

5. A eia kekahi, ola iho la o Metusala hookahi haneri me kanawalu-kumamahiku mau makahiki, a hanau mai la o Lameka nana;

6. A ola iho la o Metusala, ma hope o ka hanau ia ana mai o Lameka nana, ehiku haneri me kanawalu-kumamalua mau makahiki, a hanau mai la nana na keikikane a me na kaikamahine;

7. A o na la a pau o Metusala he eiwa haneri me kanaono-kumamaiwa mau makahiki, a make iho la ia.

8. Ola iho la o Lameka hookahi haneri me kanawalu-kumamalua mau makahiki, a hanau mai la nana he keikikane;

9. Kapa iho la ia i kona inoa o Noa, i ka i ana: E hooluolu mai ana keia keiki ia kakou e pili ana i ka kakou hana a me ka luhi ana o ko kakou mau lima, mamuli o ka aina a ka Haku i hoino ai.

10. Ola iho la o Lameka, mahope o ka hanau ia ana o Noa nana, elima haneri a me kanaiwa-kumamalima mau makahiki, a nana mai na keikikane a me na kaikamahine;

11. O na la a pau o Lameka he ehiku haneri me kanahiku-kumamahiku mau makahiki, a make iho la ia.

12. A he eha haneri me kanalima na makahiki o Noa a hanau mai la o Iapeta nana; he kanaha-kumamalua mau makahiki mahope mai, hanau mai la o Sema nana, na ka wahine, oia hoi ka makuahine o Iapeta, a i ka wa he elima haneri mau makahiki ona, hanau mai la o Hama nana.

13. Maliu aku la o Noa a me kana mau keiki i ka Haku, a hoolohe no hoi, a ua kapa ia lakou o na keiki a ke Akua.

14. A i ka wa i hoomaka ae ai keia poe kanaka e mahuahua maluna o ka ili o ka honua, a hanau mai la na kaikamahine na lakou, ike mai la na keiki a kanaka he ui ia poe kaikamahine, a lawe ae la lakou la ia lakou nei i poe wahine na lakou, he oiaio, e like me ka lakou i makemake ai.

15. Olelo mai la ka Haku ia Noa: Ua kuai aku la na kaikamahine a kau mau keiki ia lakou iho; a, aia hoi, ua hoaa ia Koʻu inaina i na keiki a kanaka, no ka mea, aole lakou e maliu mai i Koʻu leo.

16. Eia kekahi, wanana aku la o Noa, a ao aku la i na mea o ke Akua, he oiaio e like me ia i kinohi.

17. Olelo mai la ka Haku ia Noa: Aole e hooikaika mau ana kou Uhane i ke kanaka, no ka mea, e ike ana oia e make ana na mea io a pau; aka nae, o kona mau la auanei he hookahi haneri me iwakalua mau makahiki; a ina aole e mihi na kanaka e hoouna aku ana Au i na waikahe maluna o lakou.

18. A iloko o ia mau la aia he poe kanaka nunui loa maluna o ka honua, a imi iho la lakou ia Noa e lawe i kona ola; aka, aia no ka Haku me Noa, a aia no ka mana o ka Haku maluna ona.

19. A hooili iho la ka Haku i ka mana maluna o Noa, he ano like me Kona mana iho, a kauoha aku la ia ia e hele aku a e hai i Kona Euanelio i na keiki a kanaka, oia hoi, e like me ia i haawi ia ai ia Enoka.

20. Eia kekahi, kahea aku la o Noa i na keiki a kanaka e mihi lakou e pono ai; aole lakou i maliu mai i kana mau olelo;

21. A mahope no hoi o ko lakou lohe ana ia ia, hele mai la lakou imua ona, me ka olelo ana: Aia hoi, o makou na keiki a ke Akua; aole anei makou i lawe mai i na kaikamahine a kanaka na makou iho? Aole anei makou e ai ana, a e inu ana, a e mare ana, a e haawi ana no ka mare? A ke hanau mai nei ka makou poe wahine i na keiki na makou, a he poe kanaka ikaika lakou, he poe i like me ka poe o ka wa kahiko, he poe kanaka kaulana loa. A aole lakou i maliu mai i na olelo a Noa.

22. Ike iho la ke Akua ua nui loa ae la ka hewa o kanaka ma ka honua; a ua hookiekie ia ae la kela a me keia kanaka iloko o ke koho wale ana a na manao iloko o kona naau, a he ino wale no i na wa a pau.

23. A eia kekahi, hoomau aku la o Noa i kana haiolelo ana i kanaka, i ka i ana: E maliu mai a e hoolohe i kaʻu mau olelo;

24. E manaoio a e mihi i ko oukou mau hewa, a e bapetizo ia iloko o ka inoa o Iesu Kristo, ke Keiki a ke Akua, e like la me ko kakou mau makua, a e loaa ia oukou ka Uhane Hemolele, i hoike ia mai ai ia oukou na mea a pau; a ina e hana ole oukou i keia, e hiki mai ana na waikahe maluna o oukou; aka nae, aole lakou i maliu mai.

25. Mihi iho la o Noa, a ua ehaeha kona naau no ka ke Akua hana ana i ke kanaka maluna o ka honua, a ua kaumaha oia ma ka naau.

26. A olelo mai la ka Haku: E luku ana Au i kanaka Aʻu i hana ai, mai ka ili aku o ka honua, o ke kanaka a me ka holoholona pu, a me na mea kolo, a me na manu o ka lewa; no ka mea, mihi iho la o Noa no Kuu hookumu ana ia mau mea, a me Kaʻu hana ana ia mau mea; a ua hea mai oia Iaʻu; no ka mea, ua imi lakou i kona ola.

27. Pela i loaa ai ia Noa ka oluolu ia imua o na maka o ka Haku; no ka mea, he kanaka pono o Noa, a ua hemolele iloko o kona hanauna; a hele pu iho la oia me ke Akua, a pela hoi kana mau keikikane ekolu, o Sema, Hama, a me Iapeta.

28. Ua haumia ka honua imua o ke Akua a ua piha me ka ino ikaika.

29. A nana mai la ke Akua maluna o ka honua, a, aia hoi, ua haumia ia, no ka mea, ua hoohaumia aku na mea io a pau i ko lakou alahele maluna o ka honua.

30. A olelo mai la ke Akua ia Noa: Ua hiki mai ka hopena o na mea io a pau imua Oʻu, no ka mea, ua piha ka honua i ka ino ikaika, a aia hoi, e luku aku ana Au i na mea io a pau mailuna aku o ka honua.