Mokuna 7.
1. A eia kekahi, hoomau aku la o Enoka i kana haiolelo, i ka i ana: Aia hoi, ua ao mai ko kakou kupuna, o Adamu, i keia mau mea, a he nui ka poe i manaoio a lilo i mau keiki na ke Akua, a he nui ka poe i manaoio ole, a ua make iloko o ko lakou mau hewa, a ke nana aku nei me ka makau, iloko o ka ehaeha, no ka ukiuki wela o ka inaina o ke Akua e ninini ia mai ai maluna o lakou.
2. A mai ia manawa mai hoomaka aku la o Enoka e wanana, e i ana i na kanaka: Iaʻu e hele ana, a ku maluna o kahi Mahuia, a hea aku la i ka Haku, poha mai la he leo mai ka lani mai, e i ana—E huli oe, a e pii oe maluna o ka mauna Simeona.
3. A eia kekahi, huli ae la au a pii aku la maluna o ka mauna; a i koʻu ku ana maluna o ka mauna, ike aku la au i ka lani i hamama, a ua hoaahu ia au me ka nani;
4. A ike aku la au i ka Haku; a ku mai la Ia imua o koʻu alo, a kamailio pu mai la Oia me aʻu, e like la me kekahi kanaka e kamailio ana i kekahi, he maka no he maka; a olelo mai la Ia iaʻu: E nana, a e hoike aku no Au ia oe i ke ao nei no ke kowa o na hanauna he nui.
5. A eia kekahi, ike aku la au ma ke awawa o Suma i kekahi poe kanaka he nui e noho ana iloko o na halelewa, oia hoi ka poe kanaka o Suma.
6. A eia hou, olelo mai la ka Haku iaʻu: E nana; a nana aku la au i ka akau, a ike aku la au i na kanaka o Kanaana e noho ana iloko o na halelewa.
7. A olelo mai la ka Haku iaʻu: E wanana; a wanana aku la au, i ka i ana: Aia hoi ka poe kanaka o Kanaana, he lehulehu, e hele aku ana lakou me ka makaukau no ke kaua aku i ka poe kanaka o Suma, a e luku aku ana ia lakou i anai loa ia ai lakou; a e mahele ka poe kanaka o Kanaana ia lakou iho iloko o ka aina, a e kuanea ana ka aina a e hoohua ole hoi, a aole poe kanaka e ae e noho malaila, o ka poe kanaka o Kanaana wale no;
8. No ka mea, aia hoi, e hoino ka Haku i ka aina me ka wela nui, a o kona kuanea ana e mau loa aku no ia; a kau mai la ka eleele maluna o na keiki a pau o Kanaana, a hoowahawaha ia lakou mawaena o na kanaka a pau.
9. A eia kekahi, olelo mai la ka Haku iaʻu: E nana; a nana aku la au, a ike aku la au i ka aina o Sarona, a me ka aina o Enoka, a me ka aina o Omenera a me ka aina o Heni, a me ka aina o Sema, a me ka aina o Hanera, a me ka aina o Hananiha, a me na kanaka a pau o ia mau wahi;
10. A olelo mai la ka Haku iaʻu: E hele aku i keia poe kanaka, a e olelo aku ia lakou—E mihi, o puka mai auanei Au a hahau ia lakou me ka hoino ana, a make lakou.
11. A haawi mai la Ia iaʻu i kekahi kauoha e bapetizo au iloko o ka inoa o ka Makua, a o ke Keiki, ka mea i piha me ka lokomaikai a me ka oiaio, a o ka Uhane Hemolele, ka mea e hoike ana no ka Makua a me ke Keiki.
12. A eia kekahi, hoomau aku la o Enoka i ke kahea ana i na kanaka a pau, e mihi, koe ka poe kanaka o Kanaana;
13. A no ka nui loa o ka manaoio o Enoka, i alakai ai ia i ka poe kanaka o ke Akua, a hele mai la ko lakou poe enemi e kaua ia lakou; a olelo aku la ia i ka olelo a ka Haku, a haalulu ka honua, a nee aku na mauna, he oiaio e like me kana kauoha; a ua hoohuli ia na wai o na muliwai mai ko lakou alahele ae; a ua lohe ia ka uwo ana o na liona mai loko mai o ka waonahele; a makau loa na lahui kanaka a pau, no ka ikaika loa o ka olelo a Enoka, a no ka nui o ka mana o ka olelo ana a ke Akua i haawi ai ia ia.
14. A puka mai la no hoi he aina mailoko mai o ka hohonu o ke kai, a no ka nui loa o ka makau o na enemi o na kanaka o ke Akua, auhee aku la lakou a ku ma kahi mamao loa a hele aku iluna o ka aina i pii mai ai mai ka hohonu mai o ke kai.
15. A ku mamao aku no hoi ka poe nunui loa o ka aina; a pahola aku la he hoino maluna o ka poe a pau i kaua kue i ke Akua;
16. A mai ia manawa aku aia no na kaua a me ka hookahe koko ana mawaena o lakou; aka, hele mai la ka Haku a noho pu me Kona poe kanaka, a noho lakou iloko o ka pono.
17. Kau mai ka makau i ka Haku maluna o na lahui kanaka a pau, no ka nui o ka nani o ka Haku, ka mea maluna o Kona poe kanaka. A hoopomaikai ka Haku i ka aina, a hoopomaikai ia lakou maluna o na mauna, a maluna o na wahi kiekie, a ulumahiehie hoi.
18. A kapa aku la ka Haku i Kona poe kanaka o Ziona, no ka mea, he hookahi lakou ma ka naau a he hookahi ma ka noonoo, a noho iloko o ka pono; a aole he poe ilihune mawaena o lakou.
19. A hoomau aku la o Enoka i kana hai ana i ka pono i ka poe kanaka o ke Akua. A hiki mai la keia i kona mau la, kukulu ae la ia i kekahi kulanakauhale i kapa ia ke Kulanakauhale o ka Hemolele, oia hoi o Ziona.
20. A eia kekahi, kamailio pu iho la o Enoka me ka Haku; a olelo aku la ia i ka Haku: He oiaio, e noho no o Ziona iloko o ka palekana no ka wa mau loa. Aka, olelo aku la ka Haku ia Enoka: Ua hoopomaikai Au ia Ziona, aka, o ke koena iho o kanaka Kaʻu i hoino ai.
21. A eia kekahi, hoike aku la ka Haku ia Enoka i ka poe kanaka a pau o ka honua; a ike aku la oia, a aia hoi, i ke au o ka manawa ua lawe ia aku o Ziona i ka lani. A olelo aku la ka Haku ia Enoka: E nana i Koʻu wahi e noho ai no ka wa mau loa.
22. A ike aku la no hoi o Enoka i ke koena iho o kanaka, oia hoi, na keiki a Adamu; a he poe huikau lakou o na hua a pau a Adamu, koe ka hua a Kaina, no ka mea, he eleele ka hua a Kaina, a aole o lakou wahi mawaena o lakou la.
23. A ma hope o ko Ziona lawe ia ana aku i ka lani, ike aku la o Enoka, a aia hoi, aia na lahui kanaka a pau o ka honua imua ona;
24. A hoea mai la he hanauna maluna o ka hanauna; a ma kahi kiekie o Enoka a ua hapai ia iluna, oia hoi, i ka poli o ka Makua, a me ke Keiki a ke Kanaka; a aia hoi, aia ka mana o Satana maluna o ka ili a pau o ka honua.
25. A ike aku la ia i na anela e iho mai ana mai loko mai o ka lani; a lohe aku la ia he leo nui e i ana: Auwe, popilikia i na kanaka o ka honua.
26. A ike aku la ia ia Satana; a e paa ana oia i kekahi kaulahao nui ma kona lima, a ua uhi pu ia ka ili a pau o ka honua me ka pouli; a nana ae la oia iluna a akaaka iho la, a hauoli kona poe anela.
27. A ike aku la o Enoka i na anela e iho mai ana mai loko mai o ka lani, e hoike ana no ka Makua a me ke Keiki; a kau mai la ka Uhane Hemolele maluna o na mea he nui, a kaili ia ae la lakou iluna iloko o Ziona e na mana o ka lani.
28. A eia kekahi, nana mai la ke Akua o ka lani maluna o ke koena o na kanaka, a uwe iho la Ia; a hoike mai la o Enoka no ia mea, i ka i ana: No ke aha i uwe ai na lani, a hookahe mai i ko lakou waimaka me he ua la maluna o na mauna?
29. A olelo aku la o Enoka i ka Haku: No ke aha la i hiki ai ia Oe ke uwe, oiai he hemolele Oe, a mai ka mau loa a i ka mau loa?
30. A ina he mea hiki i ke kanaka ke helu i na hunahuna o ka honua, he oiaio, he mau miliona o na honua e like me keia, aole ia he hoomaka ana o ka heluna o na mea Au i hana ai; a ua hohola ia Kou mau pale paku; aka, aia no nae Oe malaila, a aia no malaila Kou poli; a he kaulike no hoi Oe; a he aloha a oluolu Oe no ka wa mau loa;
31. A ua lawe aku Oe ia Ziona i Kou poli ponoi, mai Kau mau mea a pau i hana ai, mai ka wa mau loa a i ka wa mau loa; aole kekahi mea e ae e noho ana iloko o Kou nohoalii, koe wale no ka maluhia, ka pono, a me ka oiaio; a e hele aku no ke aloha imua o Kou alo a aole ona hopena; a pehea la i hiki ai ia Oe ke uwe?
32. Olelo mai la ka Haku ia Enoka: E nana i keia kou mau hoahanau; o lakou ka hana a Koʻu mau lima ponoi, a ua haawi aku Au ia lakou i ko lakou ike, i ka la Aʻu i hana ai ia lakou; a maloko o ke Kihapai o Edena, i haawi aku ai Au i ke kanaka i kona mana kuokoa;
33. A olelo aku la Au i kou mau hoahanau, a haawi aku la no hoi i na kauoha e aloha lakou kekahi i kekahi, a e koho lakou Iaʻu, ko lakou Makua; aka aia hoi, aole o lakou aloha, a ua inaina lakou i ko lakou koko ponoi;
34. A ua hoaa ia ke ahi o Koʻu inaina e kue ia lakou; a iloko o Koʻu huhu wela e hoouna aku ai Au i na waikahe maluna o lakou, no ka mea, ua hoaa ia Koʻu huhu weliweli e kue ia lakou.
35. Aia hoi, Owau ke Akua, ke Kanaka o ka Hemolele Koʻu inoa; ke Kanaka o ka Olelo-ao Koʻu inoa; a o Hopena Ole a me Mau Loa Koʻu inoa no hoi.
36. No ia mea, he hiki Iaʻu ke o aku i Koʻu mau lima a paa i na hana a pau Aʻu i hana ai; a he hiki no hoi i Koʻu mau maka ke ike iloko o lakou, a mawaena o na hana a pau a Koʻu mau lima aole like ka nui o na hana hewa ana me ia mawaena o kou mau hoahanau.
37. Aka, aia hoi, e kau ana ko lakou mau hewa maluna o na poo o ko lakou mau makua; o Satana auanei ko lakou makua, a o ka ehaeha ko lakou hoopai; a e uwe ana na lani holookoa maluna o lakou, he oiaio, na hana a pau a Koʻu mau lima; no ia mea, aole anei e uwe na lani e pono ai, i ka ike ana e ehaeha aku ana keia poe?
38. Aka, aia hoi, o keia poe a kou mau maka e ike nei e make auanei lakou iloko o na wai-kahe; a aia hoi, e hoopaa no Au ia lakou; ua hoomakaukau Au i halepaahao no lakou.
39. A o ka Mea Aʻu i koho ai, ua noi haahaa mai imua o Koʻu alo. No ia mea, e ehaeha ana Oia no ko lakou mau hewa, ina e mihi lakou ma ka la a Kaʻu Mea i koho ia e hoi mai ai Ioʻu nei, aka e ehaeha ana lakou a hiki mai kela la;
40. Nolaila, no keia e uwe ai na lani, he oiaio, a me na hana a pau a Koʻu mau lima.
41. A eia kekahi, olelo aku la ka Haku ia Enoka, a hai aku la ia Enoka i na hana a pau a na keiki a kanaka; no ia mea, ua maopopo ia Enoka, a nana aku la maluna o ka lakou mau hana hewa, a me ko lakou ehaeha ana, a uwe iho la a o aku la i kona mau lima, a mohala akea ae la kona naau e like me ka wa mau loa; a iini nui kona naau; a naueue ae la ka mau loa a pau.
42. A ike aku la no hoi o Enoka ia Noa, a me kona ohana; a e hoopakele ia ana na mamo a na keiki a pau a Noa ma na mea pili i ko keia ao;
43. No ia mea, ike aku la o Enoka ia Noa e kapili ana i kekahi hale-lana; a maliu oluolu mai la ka Haku maluna o ia mea, a paa ia mea me Kona lima ponoi; aka, maluna o ke koena o ka poe hewa hiki mai la na waikahe a ale ae la ia lakou.
44. A i ko Enoka ike ana i keia, loaa iho la ia ia ke kaumaha o ka uhane, a uwe iho la maluna o kona poe hoahanau, a olelo aku la i na lani: E hoole ana au i ka hooluolu ia; aka, olelo mai la ka Haku ia Enoka: E hapai ae i kou naau, a e olioli, a e nana.
45. A eia kekahi, nana aku la o Enoka, a mai ia Noa aku, ike aku la ia i na ohana a pau o ka honua; a kahea aku la i ka Haku, i ka i ana: I ka wa hea e hiki mai ai ka la o ka Haku? I ka wa hea ke koko o ka Mea Pono e hookahe ia ai, i hoomaemae ia ai ka poe a pau e u ana a e loaa ke ola mau loa?
46. A olelo aku la ka Haku: I ka waenakonu o ka manawa, i na la o ka hana hewa a me ka hoopai.
47. A eia hou, ike aku la o Enoka i ka la o ka hiki ana mai o ke Keiki a ke Kanaka, oia hoi ma ka io; a hauoli ae la kona uhane, i ka i ana: Ua hapai ia ka Mea Pono, a ua pepehi ia ke Keikihipa mai ka hookumu ia ana mai o ka honua; a ma o ka manaoio la, aia au iloko o ka poli o ka Makua, a aia hoi, aia o Ziona me aʻu.
48. A eia kekahi, nana aku la o Enoka maluna o ka honua; a lohe aku la ia i kekahi leo mailoko loa mai ona, i ka i ana: Auwe, auwe no au, ka makuahine o kanaka; ua ehaeha au, ua maluhiluhi, no ka hana hewa a kaʻu poe keiki. I ka wa hea la au e hoomaha ai, a e hoomaemae ia mai ka mea paumaele i puka aku mai oʻu aku nei? I ka wa hea koʻu Mea nana i hana e hoomaemae mai ai iaʻu, i hiki ai iaʻu ke hoomaha, a e noho ai ka pono no kekahi manawa maluna o ka ili oʻu?
49. A i ko Enoka lohe ana i ka uwe ana o ka honua, uwe iho la ia, a kahea aku la i ka Haku, i ka i ana: E ka Haku, aole anei e nana aloha aku Oe i ka honua? Aole anei Oe e hoopomaikai i na keiki a Noa?
50. A eia kekahi, hoomau aku la o Enoka i ke kahea ana i ka Haku, i ka i ana: Ke noi aku nei au ia Oe, e ka Haku, ma ka inoa o Kau Hanaukahi, oia hoi o Iesu Kristo, e aloha aku Oe ia Noa a me kana mau hua, i uhi hou ole ia ai ka honua me na waikahe.
51. A ua hiki ole i ka Haku ke aua; a berita pu mai la Ia me Enoka, a hoohiki mai la ia ia me kekahi olelo hoohiki, e kaohi no Ia i na waikahe; a e kahea no Ia i na keiki a Noa;
52. A hoouna aku la Ia i kekahi olelo kuahaua i hiki ole ke hoololi ia, oia hoi, e loaa mau ana he koena o kana hua mawaena o na lahui kanaka a pau, oiai ka honua e ku ana;
53. A olelo mai la ka Haku: Pomaikai ka mea, ma o kana hua la ka Mesia e hiki mai ai; no ka mea, ua olelo mai Ia—Owau no o Mesia, ke Alii o Ziona, ka Pohaku o ka Lani, ka mea i laula e like me ka wa mau loa; a o ka mea e komo mai ma ka ipuka a pii i luna ma Oʻu nei aole e haule; no ia mea, pomaikai lakou ka poe Aʻu i olelo ai, no ka mea, e hele mai ana lakou me na mele o ka olioli mau loa.
54. A eia kekahi, kahea aku la o Enoka i ka Haku, i ka i ana: I ka wa e hele mai ai ke Keiki a ke Kanaka ma ka io, e hoomaha anei ka honua? Ke noi aku nei au ia Oe, e hoike mai iaʻu i keia mau mea.
55. A olelo mai la ka Haku ia Enoka: E nana; a nana aku la ia a ike aku i ke Keiki a ke Kanaka e kaulia ana maluna o ke kea, mamuli o ke ano o kanaka;
56. A lohe aku la ia i kekahi leo nui; a ua uhi ia na lani; a kaniuhu na hana a pau a ke Akua; a nu aku la ka honua; a nahaha iho la na pohaku; a alahou mai la ka Poe Hoano a ua hoolei ia ma ka lima akau o ke Keiki a ke Kanaka, me na lei o ka nani;
57. A o na uhane iloko o ka halepaahao, puka mai la lakou, a ku ma ka lima akau o ke Akua; a o ke koena, ua hookoe ia iloko o na kaulahao o ka pouli a hiki i ka hookolokolo ana ma ka la nui.
58. A eia hou, uwe iho la o Enoka a kahea aku la i ka Haku, i ka i ana: I ka wa hea e hoomaha ai ka honua?
59. A ike aku la o Enoka i ke Keiki a ke Kanaka e pii ana i ka Makua; a kahea aku la oia i ka Haku, i ka i ana: Aole anei e hele hou mai ana Oe i ka honua nei? Oiai Ooe ke Akua, a ua ike au ia Oe, a ua hoohiki mai Oe iaʻu, a kauoha mai iaʻu e noi au ma ka inoa o Kau Hanaukahi e pono ai; ua hana Oe iaʻu, a haawi mai iaʻu he kuleana i Kou nohoalii, a aole nae ma oʻu wale iho no, aka, ma o Kou lokomaikai ponoi la; no ia mea, ke noi aku nei au ia Oe ina e hele hou ole mai ana Oe i ka honua nei.
60. A olelo mai la ka Haku ia Enoka: E like me Aʻu e ola nei, pela no Au e hele mai ai i na la hope, i na la o ka hana hewa a me ka hoopai, e hooko i ka hoohiki Aʻu i hana ai me oe e pili ana i na keiki a Noa;
61. A e hiki mai ana ka la e hoomaha ai ka honua, aka, mamua o kela la e pouli no na lani, a e uhi no he pale o ka pouli maluna o ka honua; a e naueue na lani, a me ka honua no hoi; a e nui ana ka popilikia mawaena o na keiki a kanaka, aka, e hoopakele no Au i Koʻu poe kanaka;
62. A e hoouna mai no Au i ka pono mai ka lani mai; a o ka oiaio Kaʻu e hoouna mailoko aku o ka honua, e hai i ka olelo hoike no Kaʻu Hanaukahi; Kona alahouana mai mai ka make mai; he oiaio, a me ke alahouana o na kanaka a pau; a o ka pono a me ka oiaio Kaʻu e kahili maluna o ka honua e like la me ka waikahe, e houluulu mai i Kaʻu poe i wae ia mai na kihi eha mai o ka honua, i kahi Aʻu e hoomakaukau ai, he Kulanakauhale Hemolele, i kaei ai Koʻu poe kanaka i ko lakou mau puhaka, a nana aku no ka manawa o Koʻu hiki ana aku; no ka mea, ilaila ana Koʻu hale, a e kapa ia ia o Ziona, he Ierusalema Hou.
63. A olelo aku la ka Haku ia Enoka: Ia wa oe a me kou kulanakauhale e hui ai me lakou ilaila, a e hookipa makou ia lakou iloko o ko makou poli, a e ike no lakou ia makou; a e kau no makou maluna o ko lakou mau ai, a e kau no lakou maluna o ko makou mau ai, a e honi no makou kekahi i kekahi;
64. A ilaila ana Koʻu wahi noho, a o Ziona auanei ia, ka mea e puka mai ana mailoko mai o Kaʻu mau hana a pau Aʻu i hana ai; a no ke kowa o hookahi tausani makahiki e maha ai ka honua.
65. A eia kekahi, ike aku la o Enoka i ka la o ka hiki ana mai o ke Keiki a ke Kanaka, ma na la hope, e noho ma ka honua nei iloko o ka pono no ka wa o hookahi tausani makahiki;
66. Aka, mamua o ia la ike aku la ia i na popilikia he nui mawaena o ka poe hewa; a ike aku la no hoi ia i ke kai, ua kupikipikio ia, a e mauleule ana na naau o na kanaka, e nana aku ana me ka makau no na hoopai o ke Akua Mana Loa, na mea e kau mai ana maluna o ka poe hewa.
67. A hoike aku la ka Haku ia Enoka i na mea a pau, he oiaio, a hiki i ka hopena o ke ao nei; a ike aku la ia i ka la o ka poe pono, ka hora o ko lakou hoolapanai ia ana, a loaa ka piha o ka hauoli;
68. A o na la a pau o Ziona, ma na la o Enoka, he ekolu haneri a me kanaono-kumamalima mau makahiki.
69. A hele pu iho la o Enoka a me kona poe kanaka me ke Akua, a noho Oia iwaena o Ziona; a eia kekahi, aole loaa o Ziona, no ka mea, ua hookipa ae ke Akua ia mea iloko o Kona poli ponoi; a mai ia manawa mai i laha aku ai ka olelo, UA HOLO O ZIONA.