Mokuna 2.
1. A eia kekahi, olelo aku la ka Haku ia Mose, i ka i ana: Aia hoi, ke hoike aku nei Au ia oe e pili ana i keia Lani a me keia Honua; e kakau i na olelo Aʻu e olelo ana. Owau no ka Hoomaka ana a me ka Hopena, ke Akua Mana Loa; ma o Kaʻu Hanaukahi la i hana ai Au i keia mau mea; he oiaio, i kinohou i hana ai Au i ka lani a me ka honua kahi au e ku nei.
2. A aole kino o ka honua a ua ano ole; a kauoha iho la Au i ka pouli a uhi mai la ia maluna o ka ili o ka hohonu; a hoopunana iho la Kuu Uhane maluna o ka ili o ka wai; no ka mea, Owau ke Akua.
3. A olelo aku la Au, ke Akua: I malamalama; a malamalama ae la.
4. A ike aku la Au, ke Akua, i ka malamalama; a ua maikai ua malamalama la. A hookaawale ae la Au, ke Akua, i ka malamalama mai ka pouli ae.
5. A kapa aku la Au, ke Akua, i ka malamalama ke Ao; a o ka pouli, kapa aku la Au ka Po; a hana iho la Au i keia ma o ka olelo la o Kuu mana, a ua hana ia e like me Kaʻu i olelo ai; a o ke ahiahi a me ke kakahiaka, ka la mua ia.
6. A eia hou, olelo aku la Au, ke Akua: I aouli mawaena o ka wai, a pela io no ia, he oiaio, e like me Kaʻu i olelo ai; a olelo aku la Au: E hookaawale ia i na wai mai na wai mai; a ua hana ia no ia.
7. A hana iho la Au, ke Akua, i ke aouli a hookaawale i na wai, he oiaio, i na wai nui malalo iho o ke aouli, mai na wai maluna ae o ke aouli, a pela io no ia e like me Kaʻu i olelo ai.
8. A kapa aku la Au, ke Akua, i ke aouli ka Lani; a o ke ahiahi a me ke kakahiaka, o ka lua ia o ka la.
9. A olelo aku la Au, ke Akua: E hoohui pu ia ka wai malalo iho o ka lani i kahi hookahi, a pela io no ia; a olelo aku la Au, ke Akua: I aina maloo; a pela io ia.
10. A kapa aku la Au, ke Akua, i ka aina maloo ka Honua; a o ka huina o na wai kapa aku la Au ke Kai; a ike aku la Au, ke Akua, i na mea a pau Aʻu i hana ai ua maikai.
11. A olelo aku la Au, ke Akua: E hooulu mai ka honua i ka mauu, i ka launahele e hoohua ana i ka anoano, i ka laau hua e hoohua ana i ka hua, mamuli o kona ano iho, a me ka laau e hoohua ana i ka hua nona ka hua iloko ona iho maluna o ka honua, a pela io no ia e like me Kaʻu i olelo ai.
12. A hooulu mai la ka honua i ka mauu, kela a me keia launahele e hoohua ana i ka anoano mamuli o kona ano iho, a me ka laau e hoohua ana i ka hua, nona ka hua iloko ona iho, mamuli o kona ano iho; a ua ike Au, ke Akua, ua maikai na mea a pau Aʻu i hana ai.
13. A o ke ahiahi a me ke kakahiaka, o ke kolu ia o ka la.
14. A olelo aku la Au, ke Akua: I mau malamalama iloko o ke aouli o ka lani, e hookaawale i ke ao mai ka po ae, a e ku lakou no na hoailona, a no na kau, a no na la, a no na makahiki;
15. A e ku no lakou i mau malamalama iloko o ke aouli o ka lani e haawi mai ana i ka malamalama maluna o ka honua; a pela io no ia.
16. A hana iho la Au, ke Akua, i na malamalama nui elua; o ka malamalama oi ae e nohoalii ai ma ke ao, a o ka malamalama uuku iho, e nohoalii ai ma ka po, a o ka malamalama oi ae, oia ka la, a o ka malamalama uuku iho, oia ka mahina; a o na hoku no hoi, ua hana ia e like me Kaʻu olelo.
17. A hoonoho aku la Au, ke Akua, ia lakou iloko o ke aouli o ka lani e haawi i ka malamalama maluna o ka honua,
18. A na ka la e nohoalii ai maluna o ke ao, a na ka mahina e nohoalii ai maluna o ka po, a e hookaawale i ka malamalama mai ka pouli ae; a ike aku la Au, ke Akua, ua maikai na mea a pau Aʻu i hana ai;
19. A o ke ahiahi a me ke kakahiaka ka ha ia o ka la.
20. A i aku la Au, ke Akua: E hoohua nui mai na wai i ka mea e oni ana i loaa ke ola, a o ka manu i hiki ke lele maluna ae o ka honua iloko o ke aouli akea o ka lani.
21. A hana iho la Au, ke Akua, i na kohola nui, a me kela a me keia mea ola e oni ana, a na wai i hoohua nui mai ai, mamuli o ko lakou ano iho, a me kela a me keia manu eheu mamuli o kona ano iho; a ike aku la Au, ke Akua, ua maikai na mea a pau Aʻu i hana ai.
22. A hoopomaikai aku la Au, ke Akua, ia lakou, i ka i ana: E hoohua, a hoonui, a hoopiha i na wai o ke kai, a na na manu e hoonui ma ka honua;
23. A o ke ahiahi a me ke kakahiaka ka lima ia o ka la.
24. A olelo aku la Au, ke Akua: E hoohua mai ka honua i ka mea ola mamuli o kona ano iho, na holoholona laka, a me na mea e kolo ana, a me na holoholona o ka honua mamuli o ko lakou ano iho, a pela io no ia;
25. A hana iho la Au, ke Akua, i na holoholona o ka honua mamuli o ko lakou ano iho, a me na holoholona laka mamuli o ko lakou ano iho, a o na mea a pau e kolo ana maluna o ka honua, mamuli o kona ano iho; a ike aku la Au, ke Akua, ua maikai ua mau mea nei a pau.
26. A i aku la Au, ke Akua, i Kaʻu Hanaukahi, ka mea me Aʻu mai kinohi mai: E hana Kaua i ke kanaka mamuli o ko Kaua ano iho, ma ka like ana me Kaua iho; a pela io no ia. A i aku la Au, ke Akua: E hoomalu lakou maluna o na ia o ke kai, a me na manu o ka lewa, a maluna o na holoholona laka, a maluna o ka honua a pau, a maluna o kela a me keia mea kolo e kolo ana maluna o ka honua.
27. A hana iho la Au, ke Akua, i ke kanaka ma Koʻu ano iho, ma ke ano o Kaʻu Hanaukahi i hana ai Au ia ia; hana iho la Au ia laua he kane a he wahine.
28. A hoopomaikai aku la Au, ke Akua, ia laua, a olelo aku la ia laua: E hoohua, a e hoonui, a hoopiha i ka honua, a lanakila maluna ona, a e hoomalu maluna o na ia o ke kai, a maluna o na manu o ka lewa, a maluna o kela a me keia mea ola e kolo ana maluna o ka honua.
29. A i aku la Au, ke Akua, i ke kanaka: Aia hoi, ua haawi aku la Au na olua i kela a me keia launahele e hoohua ana i ka anoano, maluna o ka ili o ka honua a pau, a o kela a me keia laau iloko ona ka hua o kekahi laau e hoohua ana i ka anoano; he mea ai ia na olua.
30. A i kela a me keia holoholona o ka honua, a i kela a me keia manu o ka lewa, a i na mea a pau e kolo ana maluna o ka honua, ma loko ona Au i haawi ai i ke ola, e haawi ia kela a me keia launahele maemae i mea ai na lakou; a pela io no ia, e like me Kaʻu i olelo ai.
31. A ike aku la Au, ke Akua, i na mea a pau Aʻu i hana ai, a, aia hoi, ua maikai loa na mea a pau Aʻu i hana ai; a o ke ahiahi a me ke kakahiaka ke ono ia o ka la.