1. Na olelo a ke Akua, Ana i olelo mai ai ia Mose ma ka wa i lawe ia aku ai o Mose iluna o kekahi mauna kiekie loa,

2. A ike aku la oia i ke Akua, he maka no he maka, a kamailio pu oia me Ia, a maluna o Mose ka nani o ke Akua; nolaila i hiki ai ia Mose ke ku imua o Kona alo.

3. A olelo aku la ke Akua ia Mose, i ka i ana: Aia hoi, Owau no ka Haku ke Akua Mana Loa, a o Hopena Ole Koʻu inoa; no ka mea, aohe Oʻu hoomaka ana o na la, aole hoi he hopena o na makahiki; a, aole anei keia he hopena ole?

4. A, aia hoi, ooe Kaʻu keiki; no ia mea, e nana, a e hoike aku no Au ia oe i ka hana a Koʻu mau lima; aka, aole a pau loa, no ka mea, aole hopena o Kaʻu mau hana, a pela no hoi Kaʻu mau olelo, no ka mea, aole lakou e oki ana.

5. No ia mea, aole he kanaka e hiki ke ike i Kaʻu mau hana a pau, ke ole oia e ike i Kuu nani a pau; a, aole he kanaka e hiki ke ike i Kuu nani a pau, a noho mahope aku ma ka io maluna o ka honua.

6. A he hana Kaʻu nau, e Mose, Kaʻu keiki; a he ano like oe me Kaʻu Hanaukahi; a o Kaʻu Hanaukahi ka Hoola i keia wa ano a e mau aku ana hoi, no ka mea, ua piha Oia i ka lokomaikai a me ka oiaio; aka, aole he Akua mawaho ae Oʻu, a eia no me Aʻu na mea a pau, no ka mea, ke ike nei Au ia mau mea a pau.

7. A ano, aia hoi, o keia mea hookahi Kaʻu e hoike aku nei ia oe, e Mose, Kaʻu keiki; no ka mea, eia oe iloko o ke ao nei, a ano ke hoike aku nei Au ia mea ia oe.

8. A eia kekahi, nana aku la o Mose, a ike aku la i ka honua kahi ona i hana ia mai ai; a ike aku la o Mose i ka honua a me na welau ona, a me na keiki a pau a kanaka e ola ana a i hana ia hoi; a no ia mau mea, ua kahaha a pahaohao nui oia.

9. A nalohia aku la ke Akua mai a Mose aku, a kau ole iho la Kona nani maluna iho o Mose; a ua waiho ia iho la o Mose oia wale no. A oiai ua waiho ia iho ai oia wale no, hina iho la oia i ka honua.

10. A eia kekahi, no ke kowa o na hora he nui mamua o ka loaa hou ana mai ia Mose kona ikaika maoli e like la me ko ke kanaka; a olelo iho la oia ia ia iho: Ano, no keia kumu, ke ike nei au he mea ole ke kanaka, ka mea hoi aʻu i manao mua ole ai.

11. Aka, i keia wa ano ua ike koʻu mau maka i ke Akua; aka, aole o koʻu mau maka ma ke kino, aka, o koʻu mau maka ma ka uhane, no ka mea, he mea hiki ole i koʻu mau maka ma ke kino ke nana aku a ike; no ka mea, ina pela iho la, ina ua mae wale au a make imua o Kona alo; aka, aia Kona nani maluna oʻu; a ike aku la au i Kona maka, no ka mea, ua hoopahaohao ia au imua Ona.

12. A eia kekahi, ia Mose i olelo ae ai i keia mau olelo, aia hoi, hele mai la o Satana e hoowalewale ana ia ia, i ka i ana: E Mose, ke keiki a ke kanaka, e hoomana mai iaʻu.

13. A eia kekahi, nana aku la o Mose maluna o Satana, a i aku la: Owai la oe? No ka mea, aia hoi, he keiki wau na ke Akua, ma ke ano like o Kana Keiki Hanaukahi; a, auhea kou nani, i hoomana aku ai au ia oe?

14. No ka mea, aia hoi, aole i hiki iaʻu ke nana aku i ke Akua, ke ole e kau mai Kona nani maluna oʻu, a ua hooikaika ia au imua Ona. Aka, ua hiki iaʻu ke nana aku maluna ou ma keia kino kanaka maoli. Aole anei pela io no?

15. E hoomaikai ia ka inoa o kuu Akua, no ka mea, aole i haalele loa mai Kona Uhane iaʻu, a, auhea la hoi kou nani, no ka mea, he pouli wale ia iaʻu? A ua hiki iaʻu ke hoomaopopo mawaena ou a me ke Akua; no ka mea, ua i mai ke Akua iaʻu: E hoomana i ke Akua, no ka mea, Oia wale no kau e malama aku ai.

16. E hele pela oe, e Satana; mai hoopunipuni mai oe iaʻu; no ka mea, olelo mai la ke Akua iaʻu: He ano like oe me Kaʻu Hanaukahi.

17. A haawi mai la no hoi Oia iaʻu i na kauoha i ka wa Ana i kahea mai ai iaʻu mailoko o ka laalaau e a ana i ke ahi, i ka i ana: E hea aku i ke Akua ma ka inoa o Kaʻu Hanaukahi, a e hoomana mai Iaʻu.

18. A eia hou, olelo aku la o Mose: Aole loa au e hooki i ke kahea ana aku i ke Akua, he mau mea e ae kaʻu e ninau aku ai ia Ia: no ka mea, ua kau mai Kona nani maluna oʻu, no ia mea ua hiki iaʻu ke hoomaopopo mawaena Ona a me oe. E hele pela oe, e Satana.

19. A ano, ma ka wa a Mose i olelo ae ai i keia mau olelo, hooho ae la o Satana me ka leo nui, a hehi iho la maluna o ka honua me ka inaina, a kauoha mai la, i ka i ana: Owau no ka Hanaukahi, e hoomana mai iaʻu.

20. A eia kekahi, hoomaka iho la o Mose e makau nui loa; a i kona hoomaka ana e makau, ike aku la ia i ka awahia o gehena. Aka nae, kahea aku la oia i ke Akua, a loaa mai la ia ia ka ikaika, a kauoha iho la oia, i ka i ana: E hele pela oe mai oʻu aku nei, e Satana, no ka mea, o keia Akua hookahi wale no kaʻu e hoomana aku ai, Oia no ke Akua o ka nani.

21. A ano, hoomaka iho la o Satana e haalulu, a naueue ae la ka honua; a loaa mai la ia Mose ka ikaika, a kahea aku la i ke Akua, i ka i ana: Ma ka inoa o ka Hanaukahi, e hele pela oe, e Satana.

22. A eia kekahi, hooho ae la o Satana me ka leo nui, me ka uwe ana, me ke kanikau ana, a me ka uwi ana o na niho; a hele aku la oia mailaila aku, he oiaio, mai ke alo aku o Mose, aole oia i ike hou aku ia ia.

23. Ano, hooiaio mai la o Mose i keia mea; aka, mamuli o ka hewa, aole i loaa ia mea mawaena o na keiki a kanaka.

24. A eia kekahi, i ka wa a Satana i hele aku ai mai ke alo aku o Mose, leha ae la o Mose i kona mau maka i ka lani, no ka mea, ua piha hoi i ka Uhane Hemolele, ka mea e hoike ana no ka Makua a me ke Keiki;

25. A i ke kahea ana i ka inoa o ke Akua, ike hou aku la oia i Kona nani, no ka mea, aia no ia maluna iho ona; a lohe aku la oia i kekahi leo, e i mai ana: Pomaikai oe, e Mose, no ka mea, ua koho aku Au, ka Mea Mana Loa ia oe, a e hooikaika ia oe a oi aku mamua o na wai he nui; no ka mea, e hoolohe mai no lakou i kau kauoha, me he mea la ooe no ke Akua.

26. A, aia hoi, Owau pu no me oe, he oiaio, a hiki hoi i ka hopena o kou mau la; no ka mea, e hoopakele auanei oe i Koʻu poe kanaka mailoko mai o ka noho luhi ana, he oiaio, i ka Iseraela Koʻu poe i koho ia.

27. A eia kekahi, oiai ka leo e olelo ana, alawa ae la o Mose i kona mau maka a ike ae la i ka honua, ae, he oiaio, ia mea holookoa; aole loa he hunahuna ona ana i ike ole aku ai, e hoomaopopo ana ia mea ma o ka Uhane la o ke Akua.

28. A ike ae la no hoi oia i ka poe kanaka olaila, a, aole loa he uhane ana i ike ole ai; a ike lea oia ia lakou ma o ka Uhane la o ke Akua; a he lehulehu loa ko lakou heluna, he oiaio, e like me ke one ma kahakai i pau ole i ka helu ia.

29. A ike aku la oia i na aina he nui; a ua kapa ia kela a me keia aina, he honua, a he poe kanaka maluna iho o ka ili ona.

30. A eia kekahi, kahea aku la o Mose i ke Akua, i ka i ana: Ke noi aku nei au ia Oe, e hai mai iaʻu, no ke aha la keia mau mea me neia, a ma o ke aha la Oe i hana ai ia mau mea?

31. A aia hoi, aia ka nani o ka Haku maluna iho o Mose, no ia mea, ku no o Mose imua o ke alo o ke Akua, a kamailio pu me Ia he maka no he maka. A i mai la ka Haku ke Akua ia Mose: No Koʻu manaopaa iho i hana ai Au i keia mau mea. Eia ka naauao, a ke noho nei ia iloko Oʻu.

32. A ma o ka olelo la o Kuu mana, i hana ai Au ia mau mea, Oia no Kaʻu Keiki Hanaukahi, ka Mea i piha i ka lokomaikai a me ka oiaio.

33. A o na honua i pau ole i ka helu ia Kaʻu i hana ai; a ua hana iho la no hoi Au ia lakou no Koʻu manao-paa iho; a ma o ke Keiki la i hana ai Au ia lakou, Oia hoi Kaʻu Hanaukahi.

34. A o ke kanaka mua o na kanaka a pau Kaʻu i kapa aku ai o Adamu, oia hoi, he lehulehu.

35. Aka, o ka mooolelo wale no o keia honua, a me na kanaka ona, Kaʻu e haawi aku ai ia oe. No ka mea, aia hoi, he nui na honua i lilo aku ma o ka olelo la o Kuu mana. A he nui no e ku nei ano, a hiki ole lakou ke helu ia e ke kanaka; aka, ua helu ia na mea a pau e Aʻu, no ka mea, Noʻu lakou a ua ike Au ia lakou.

36. A eia kekahi, olelo aku la o Mose i ka Haku, i ka i ana: E aloha mai i Kau kauwa nei, e ke Akua, a e hai mai iaʻu no na mea e pili ana i keia honua a me kona poe kanaka, a me ko na lani no hoi, alaila, e oluolu no Kau kauwa nei.

37. A olelo mai la ka Haku ke Akua ia Mose, i ka i ana: O na lani, he lehulehu lakou, a aole e hiki lakou ke helu ia e ke kanaka; aka, ua helu ia lakou e Aʻu, no ka mea, Noʻu no lakou.

38. A e like hoi me ka lilo ana aku o kekahi honua a me na lani ona, pela no kekahi e hiki mai ai; a aole hopena o Kaʻu mau hana, aole hoi o Kaʻu mau olelo.

39. No ka mea, aia hoi, o keia Kaʻu hana a me Koʻu nani—e lawe mai i ka palaho ole ana a me ke ola mau loa o ke kanaka.

40. A ano, e Mose, Kaʻu keiki, e olelo aku ana Au ia oe e pili ana i keia honua kahi au e ku nei; a e kakau no oe i na mea Aʻu e olelo ai.

41. A i ka la e manao ai na keiki a kanaka he ole Kaʻu mau olelo, a lawe aku he nui o lakou mailoko aku o ka buke au e kakau ai, aia hoi, e hoala mai no Au i kekahi e like me oe; a e loaa hou ia mau mea mawaena o na keiki a kanaka—mawaena o na kanaka a pau e manaoio mai ana.

42. Ua hai ia keia mau olelo ia Mose ma ka mauna, o ka inoa ona, aole e ike ia ana ia mawaena o na keiki a kanaka. A ano, ua hai ia aku la ia mau mea ia oe. Mai hoike aku ia mau mea i kekahi, koe wale no i ka poe e manaoio mai ana. He oiaio, pela io no. Amene.