Mokuna 4.
1. A olelo aku la Au, ka Haku ke Akua, ia Mose, i ka i ana: O kela Satana, ka mea au i kauoha aku ai iloko o ka inoa o Kaʻu Hanaukahi, oia ka mea hookahi mai kinohi mai, a hoea mai la oia imua Oʻu, i ka i ana, Aia hoi—eia no au, e hoouna aku iaʻu, a owau aku ana Kau keiki, a e hoolapanai au i na kanaka a pau, i nalowale ole ai hookahi uhane, a e hana io no au ia mea; no ia mea, e haawi mai iaʻu i Kou hanohano.
2. Aka, aia hoi, olelo mai la Kaʻu Keiki Punahele Iaʻu, oia hoi, Kaʻu Hiwahiwa a Mea i Wae ia mai kinohi mai—E ka Makua, o Kou makemake ke hana ia, Nou ka nani a mau loa aku.
3. No ia mea, no ke kipi kue ana o kela Satana Iaʻu, a imi iho la e hoopau ae i ka mana koho o ke kanaka, ka mea Aʻu, a ka Haku ke Akua, i haawi ai ia ia; a imi hoi e haawi no hoi Au i Koʻu mana iho ia ia; ma o ka mana la o Kaʻu Hanaukahi, kauoha aku la Au e kiola ia oia i lalo;
4. A lilo iho la oia i Satana, he oiaio, o ke diabolo, ka makua o na wahahee a pau, e hoopunipuni a e hoomakapo i na kanaka, a e alakai pio aku ia lakou e like me kona makemake, he oiaio, o na mea a pau e hoolohe ole ana i Koʻu leo.
5. A ano ua oi aku ka maalea o ka nahesa i ko na holoholona a pau o ke kula, Aʻu, a ka Haku, i hana ai.
6. A hookomo iho la o Satana i mea iloko o ka naau o ka nahesa, (oiai ua nui na mea ana i alakai aku ai ma hope ona,) a imi iho la oia e hoopunipuni aku ia Ewa, no ka mea, ua ike ole oia la i ka manao o ke Akua, no ia mea, imi aku la oia e hoopau ae i ko ke ao nei.
7. A olelo mai la oia i ka wahine: He oiaio, ua olelo mai anei ke Akua—Mai ai olua i ko na laau a pau o ka mahinaai? (A olelo ae la oia ma o ka waha la o ka nahesa.)
8. A i aku la ka wahine i ka nahesa: He hiki no ia maua ke ai i ka hua o na laau o ke kihapai nei;
9. Aka, no ka hua o ka laau au e ike aku nei iwaena konu o ke kihapai, ua olelo mai ke Akua—Mai ai olua ia mea, aole hoi e hoopa aku ia, o make olua.
10. A i mai la ka nahesa i ka wahine: Aole e make io ana olua;
11. No ka mea, ke ike nei ke Akua, i ka la a olua e ai ai ia mea, e hookaakaa ia ko olua mau maka, a e lilo ana olua me he mau Akua la, e ike ana i ka pono a me ka hewa.
12. A ike aku la ka wahine, he ono ko ia laau i mea ai, a i mea oluolu i na maka, a i laau i makemake ia e hoonaauao ai ia ia, lalau aku la oia i ka hua o ia laau, a ai iho la, a haawi aku la na kana kane me ia, a ai iho la no oia.
13. A ua hookaakaa ia ae la na maka o laua a elua, a ike iho la laua ua kohana laua. A kui iho la laua i na lau fiku a paa i mau papalu no laua iho.
14. A lohe ae la laua i ka leo o ka Haku ke Akua, ia laua e holoholo ana iloko o ke kihapai, i ka wa malu o ka la; a hele aku la o Adamu a me kana wahine e pee mai ke alo aku o ka Haku ke Akua mawaena o na laau o ke kihapai.
15. A kahea aku la Au, ka Haku ke Akua, ia Adamu, a i aku la ia ia: I hea oe e hele nei?
16. A i mai la ia: Lohe ae la au i Kou leo iloko o ke kihapai, a ua makau no au, no ka mea, ike iho la au ua kohana au, a pee iho la au.
17. A olelo aku la Au, ka Haku ke Akua, ia Adamu: Nawai i hai mai ia oe ua kohana oe? Ua ai anei oe i ko ka laau Aʻu i kauoha aku ai ia oe aole oe e ai, ina pela e make io no oe?
18. A olelo mai la ke kanaka: Na ka wahine Au i haawi mai ai naʻu a kauoha mai la e noho pu oia me aʻu, nana i haawi mai iaʻu i ka hua o ka laau a ai iho la au.
19. A olelo aku la Au, ka Haku ke Akua, i ka wahine: Heaha keia mea au i hana ai? A i mai la ka wahine: Hoopunipuni mai la ka nahesa iaʻu a ai iho la au.
20. A olelo aku la Au, ka Haku ke Akua, i ka nahesa: No kau hana ana i keia mea e oi aku ana kou hoino ia i ko na holoholona laka a pau, a i ko na holoholona a pau o ke kula; ma kou alo e kolo ai oe, a o ka lepo kau e ai ai i na la a pau o kou ola ana;
21. A e waiho no Au i ka inaina mawaena ou a me ka wahine, mawaena o kau hua a me kana hua; a e paopao iho oia i kou poo, a e pakuikui oe i kona kuekue wawae.
22. A i ka wahine, olelo aku la Au, ka Haku ke Akua: E hoonui loa aku ana Au i kou ehaeha a me kou hapai ana. Iloko o ke kaumaha e hanau mai ai oe i na keiki, a o kou makemake aku aia i kau kane, a nana e hoomalu maluna ou.
23. A ia Adamu, olelo aku la Au, ka Haku ke Akua: Mamuli o kou hoolohe ana i ka leo o kau wahine, a ua ai i ka hua o ka laau ka mea Aʻu i kauoha aku ia oe, i ka i ana—Mai ai oe ia mea, e hoino ia ka aina nou; iloko o ke kaumaha oe e ai ai i kana a pau na la o kou ola ana.
24. E hookupu mai no hoi ia i na kakalaioa a me na puakala nau, a e ai oe i ka launahele o ke kula.
25. Ma ka hou o kou lae e ai oe i ka ai, a hiki i kou wa e hoi hou aku ai i ka lepo—no ka mea, e make io ana oe—no ka mea, mailaila mai oe i lawe ia mai ai: no ka mea, he lepo no oe, a i ka lepo oe e hoi hou aku ai.
26. A kapa aku la o Adamu i ka inoa o kana wahine o Ewa, no ka mea, oia ka makuahine o na kanaka a pau e ola ana; a pela i kapa ai Au, ka Haku ke Akua, i ka mua o na wahine a pau, a he lehulehu lakou.
27. No Adamu, a no kana wahine no hoi, i hana ai Au, ka Haku ke Akua, i mau aahu ili, a hoaahu aku la ia laua.
28. A olelo aku la Au, ka Haku ke Akua, i Kaʻu Hanaukahi: Aia hoi, ua lilo iho la ke kanaka a like me kakou, e ike ana i ka pono a me ka hewa; a ano o o aku oia i kona lima a lalau no hoi i ko ka laau o ke ola, a ai a ola mau loa,
29. Nolaila, e kipaku aku Au, ka Haku ke Akua, ia ia mai ke Kihapai o Edena aku, e mahi i ka aina, kahi ona i lawe ia mai ai;
30. No ka mea, e like me Aʻu, ka Haku ke Akua, e ola nei, pela no i hiki ole ai i Kaʻu mau olelo ke lilo i mea ole, no ka mea, e like me ia mau mea e puka aku ai mailoko aku o Kuu waha, e hooko ia lakou e pono ai.
31. Pela Au i kipaku aku ai i ke kanaka, a hoonoho aku la Au, ma ka hikina o ke Kihapai o Edena, i kerubima a me ka pahi wakawaka, e ka ana i o a ia nei, i malama ia ai ka laau o ke ola.
32. (A o keia na olelo Aʻu i olelo aku ai i Kaʻu kauwa ia Mose, a he oiaio lakou e like me Koʻu makemake; a ua olelo aku la Au ia mau mea ia oe, e malama oe a mai hoike aku ia mau mea i kekahi kanaka, a hiki i Kaʻu kauoha ana aku ia oe, koe wale no i ka poe e manaoio mai ana.) Amene.