1. A eia kekahi, mahope iho o Koʻu, ko ka Haku ke Akua, kipaku ana ia laua i waho, hoomaka iho la o Adamu e mahi i ka honua, a e hoomalu maluna o na holoholona a pau o ke kula, a e ai i kana ai ma ka hou o kona lae, e like me Aʻu, a ka Haku, i kauoha aku ai ia ia. A hana pu no hoi o Ewa, kana wahine, me ia.

2. A ike aku la o Adamu i kana wahine, a hanau mai la oia nana he mau keikikane a he mau kaikamahine, a hoomaka aku la lakou e hoomahuahua a hoopiha i ka honua.

3. A mai ia manawa mai, hoomaka ae la na keikikane a me na kaikamahine a Adamu e mahelehele papalua ma ka aina, a e mahi i ka aina, a e malama i na pua holoholona, a loaa no hoi ia lakou na keikikane a me na kaikamahine.

4. A kahea aku la o Adamu a me Ewa, kana wahine, i ka inoa o ka Haku, a lohe aku la laua i ka leo o ka Haku mai kahi mai o ke Kihapai o Edena, e olelo mai ana ia laua, aole nae laua i ike aku ia Ia; no ka mea, ua hookaawale ia laua mawaho mai Kona alo aku.

5. A haawi aku la Oia ia laua i na kauoha e hoomana laua i ka Haku, ko laua Akua, a e kaumaha i na hanaumua o ko laua mau pua holoholona, i mohai i ka Haku. A hoolohe aku la o Adamu i na kauoha a ka Haku.

6. A mahope mai o na la he nui hoea mai la kekahi anela o ka Haku ia Adamu, me ka olelo ana: No ke aha la oe e kaumaha nei i na mohai i ka Haku? A olelo aku la o Adamu ia ia: Aole au i ike, koe wale no ua kauoha mai ka Haku iaʻu.

7. Alaila, olelo mai la ka anela i ka i ana: He kumuhoohalike keia mea o ka mohai ia ana o ka Hanaukahi a ka Makua, ka Mea i piha me ka lokomaikai a me ka oiaio.

8. No ia mea, e hana oe i na mea a pau au e hana ai ma ka inoa o ke Keiki, a e mihi oe, a e kahea aku i ke Akua iloko o ka inoa o ke Keiki no ka wa mau loa.

9. A ma kela la, kau mai la maluna o Adamu ka Uhane Hemolele, ka Mea e hoike ana no ka Makua a me ke Keiki, e i ana: Owau ke Keiki Hanaukahi a ka Makua mai kinohi mai, mai keia wa aku a mau loa, a oiai ua haule oe ua hiki nae ia oe ke hoolapanai ia, a pela na kanaka a pau, oia hoi, e like me ka nui e makemake ana.

10. A i kela la hoomaikai o Adamu i ke Akua a ua uluhia ia, a hoomaka mai la e wanana e pili ana i na ohana a pau o ka honua, i ka i ana: E hoomaikai ia ka inoa o ke Akua, no ka mea, mamuli o kaʻu hana hewa ana i hookaakaa ia ai koʻu mau maka, a ma keia ola ana e loaa auanei iaʻu ka hauoli, a ma ka io e ike hou au i ke Akua.

11. A lohe ae la o Ewa, kana wahine, i keia mau mea a pau a ua hauoli oia, i ka i ana: Ina aole no ka kaua hana hewa ana, ina aole i loaa kekahi hua na kaua, a aole i hoomaopopo i ka pono a me ka hewa, a me ka olioli o ko kaua hoolapanai ia ana, a me ke ola mau loa, ka mea a ke Akua e haawi ai i ka poe hoolohe a pau.

12. A hoomaikai aku la o Adamu a me Ewa i ka inoa o ke Akua, a hoike aku la laua i na mea a pau i ka laua mau keikikane a me ka laua mau kaikamahine.

13. A hele mai la o Satana mawaena o lakou, me ka olelo ana: He keiki no hoi au na ke Akua, a kauoha mai la oia ia lakou, i ka i ana: Mai manaoio ia mea, a aole lakou i manaoio ia mea, a ua oi aku ko lakou aloha ia Satana mamua o ke Akua. A hoomaka mai la na kanaka mai ia manawa mai e lilo i ko ke kino, a kuko hewa, a ano diabolo.

14. A kahea mai la ka Haku ke Akua i na kanaka ma na wahi a pau, ma o ka Uhane Hemolele la, a kauoha mai la ia lakou e mihi lakou e pono ai;

15. A o ka poe a pau e manaoio ana i ke Keiki a mihi i ko lakou mau hewa, e hoola ia lakou; a o ka poe a pau e manaoio ole ana a mihi ole, e hoahewa ia lakou; a puka aku la na olelo mai ka waha aku o ke Akua ma kekahi olelo paa loa; no ia mea, e hooko ia ia mau olelo e pono ai.

16. A aole i hooki iki o Adamu a me Ewa, kana wahine, i ke kahea ana i ke Akua. A ike aku la o Adamu ia Ewa, kana wahine, a hapai iho la ia a hanau mai la ia Kaina, a olelo mai la: Ua loaa iaʻu he kanaka mai ka Haku mai, no ia mea, aole paha oia e hoole ana i Kana mau olelo. Aka, aia hoi, hoolohe ole o Kaina, me ka olelo ana: Owai la ka Haku, i ike ai au ia Ia?

17. A hapai hou iho la ia a hanau mai la i kona muli, o Abela. A hoolohe no o Abela i ka leo o ka Haku. A he mea malama hipa o Abela, aka, o Kaina he kanaka oia e mahi ana i ka aina.

18. A aloha ae la o Kaina ia Satana a oi aku mamua o ke Akua. A kauoha aku la o Satana ia ia, i ka olelo ana: E hana oe i mohai i ka Haku.

19. A eia kekahi, iloko o ke au o ka manawa lawe mai la o Kaina i na hua o ka lepo i mohai i ka Haku.

20. A o Abela, lawe mai la no hoi oia i kekahi o na hanaumua o kona pua hipa a me kekahi o ka momona o ia mea. A maliu mai la ka Haku ia Abela, a i kana mohai;

21. Aka ia Kaina, a i kana mohai, aole ona maliu mai. Ano, ua ike o Satana i keia, a he mea oluolu ia ia ia. A huhu loa iho la o Kaina, a kulou iho la kona maka ilalo.

22. A olelo mai la ka Haku ia Kaina: No ke aha oe i huhu ai? No ke aha i kulou ai kou maka?

23. Ina e hana maikai oe, e apono ia oe. A ina aole oe e hana maikai e waiho la ka hewa ma ka ipuka, a ke makemake nei o Satana e loaa oe; a ke ole oe e hoolohe i Kaʻu mau kauoha, e haawi no Au ia oe, a e loaa ia oe e like me kana i makemake ai. A e noho hoomalu oe maluna ona;

24. No ka mea, mai keia manawa aku, e lilo auanei oe i makuakane o kona mau wahahee; e kapa ia oe o ka Make mau loa, no ka mea, mamua aku no hoi oe o ke ao nei.

25. A e olelo ia i ka wa e hiki mai ana—Ua loaa mai keia mau hana hoopailua mai a Kaina mai; no ka mea, ua hoole oia i ka olelo ao oi ae i loaa mai ke Akua mai; a he hoino keia Aʻu e hookau aku ai maluna ou, ke ole oe e mihi.

26. A ua huhu loa o Kaina, a aole i hoolohe hou aku i ka leo o ka Haku, aole hoi ia Abela, i kona kaikaina, ka mea e hele ana me ka hemolele imua o ka Haku.

27. A uwe aku la o Adamu a me kana wahine imua o ka Haku, mamuli o Kaina a me kona mau hoahanau.

28. A eia kekahi, lawe ae la o Kaina i kekahi kaikamahine a kona hoahanau i wahine mare nana, a ua oi aku ko laua aloha ia Satana mamua o ke Akua.

29. A olelo aku la o Satana ia Kaina: E hoohiki mai oe iaʻu ma kou kaniai, a ina e hai aku oe ia mea e make ana oe; a e hoohiki kou mau hoahanau ma ko lakou mau poo, a ma ke Akua ola, aole e hai aku lakou ia mea; no ka mea, ina e hai aku lakou ia mea, e make io no lakou; a o ke kumu o keia i ike ole ai kou makuakane ia mea; a i keia la e haawi aku ai au i kou kaikaina, ia Abela, iloko o kou mau lima.

30. A hoohiki aku la o Satana ia Kaina e hana no oia e like me kana mau kauoha. A ua hana ia keia mau mea a pau ma kahi malu.

31. A olelo aku la o Kaina: He oiaio o Mahana no au, ka luna o keia mea huna nui, i pepehi ai au a loaa ka waiwai. No ia mea, ua kapa ia o Kaina ka Luna Mahana, a kaena iho la oia iloko o kana hana hewa ana.

32. A hele aku o Kaina iloko o ke kula, a kamailio aku la o Kaina me Abela, kona kaikaina. A eia kekahi, oiai laua ma ke kula, ala ae la o Kaina e kue ia Abela, kona kaikaina, a pepehi aku la ia ia a make.

33. A kaena iho la o Kaina iloko o ka mea ana i hana ai, i ka i ana: Ua kuokoa au; e lilo io ana na pua hipa o koʻu kaikaina iloko o koʻu mau lima.

34. A olelo mai la ka Haku ia Kaina: Aia ihea o Abela, kou kaikaina? A olelo aku la oia: Aole au i ike. Owau anei ka mea e malama i koʻu kaikaina?

35. A olelo mai la ka Haku: Heaha kau i hana ai? Ke kahea mai nei ka leo o ke koko o kou kaikaina Iaʻu mai ka lepo mai.

36. A ano e hoino ia no oe mai ka lepo mai ka mea i wehe ae i kona waha e hookipa aku i ke koko o kou kaikaina mai kou lima aku.

37. I kou wa e mahi ai i ka aina aole loa ia e hoohua mai ana i kona ikaika nou mai keia manawa aku. E lilo ana oe i kanaka aea a i kuewa wale maluna o ka honua.

38. A olelo aku la o Kaina i ka Haku: Na Satana i hoowalewale mai iaʻu mamuli o na pua hipa a koʻu kaikaina. A ua huhu no hoi au; no Kou apono ana i kana mohai, a aole hoi i kaʻu; ua oi aku koʻu hoopai mamua o ka hiki iaʻu ke auamo.

39. Aia hoi, ua hookuke mai Oe iaʻu iwaho i keia la mai ke alo aku o ka Haku, a mai Kou alo mai e huna ia ai au; a e lilo ana au i kanaka aea a i kuewa maluna o ka honua; a e hiki mai auanei keia, o ka mea e loaa mai ana au e pepehi ana oia iaʻu a make, mamuli o koʻu mau hewa, no ka mea, aole i huna ia keia mau mea mai ka Haku mai.

40. A olelo aku la Au ka Haku ia ia: O ka mea e pepehi ana ia oe a make, e kau no ka hoopai papahiku maluna ona. A kau aku la Au ka Haku i kekahi hoailona maluna o Kaina, o loaa auanei ia i kekahi mea a pepehi aku ia ia a make.

41. A ua hookaawale ia aku o Kaina mai ke alo aku o ka Haku, a noho iho la ma ka aina o Noda, ma ka hikina o Edena, me kana wahine a me kekahi mau hoahanau ona he nui.

42. A ike aku la o Kaina i kana wahine, a hapai ae la oia, a hanau mai la ia Enoka, a loaa iho la no hoi ia ia na keikikane a me na kaikamahine he nui. A kukulu iho la oia i kulanakauhale, a kapa aku la i ka inoa o ua kulanakauhale la mamuli o ka inoa o kana keikikane, o Enoka.

43. A hanau mai la na Enoka o Irada, a me kekahi mau keikikane a mau kaikamahine e ae. A na Irada mai o Mahuiaela, a me kekahi mau keikikane a mau kaikamahine e ae. A na Mahuiaela mai o Matusaela, a me kekahi mau keikikane a mau kaikamahine e ae. A na Matusaela mai o Lameka.

44. A lawe ae la o Lameka i elua mau wahine nana; o ka inoa o kekahi o Ada, a o ka inoa o kekahi o Zila.

45. A hanau mai la o Ada ia Iabala; oia ka makua o ka poe e noho la iloko o na halelewa, a he poe lakou e malama ana i na holoholona laka; a o ka inoa o kona hoahanau o Iubala ia, oia ka makuakane o ka poe a pau e hookani ana i ka hapa a me ka ogana.

46. A o Zila, hanau mai no hoi oia ia Tubala Kaina, he kumu ao oia o na paahana a pau i akamai ma ka hana ana i na mea keleawe a me na mea hao. A o ke kaikamahine o Tubala Kaina ua kapa ia o Naama.

47. A olelo aku o Lameka i kana mau wahine, ia Ada a me Zila: E hoolohe mai i koʻu leo, e na wahine a Lameka, e maliu mai i kaʻu olelo, no ka mea, ua pepehi au i kekahi kanaka a ua walania au, a i ke kanaka opio a ua ehaeha au.

48. Ina e pahiku ia ka hoopai no Kaina, he oiaio, e pakanahiku ia me ehiku ia Lameka;

49. No ka mea, ua komo o Lameka iloko o kekahi berita me Satana, mamuli o ke ano a Kaina i hana ai, a ma o ia mea la i lilo ai ia i Luna Mahana, ka luna o kela mea huna nui ka mea i hoohiki ia aku ia Kaina e Satana; a mamuli o ka ike ana o Irada, ke keiki a Enoka, i ka lakou mea huna, hoomaka aku oia e hoike ia mea i na keikikane a Adamu;

50. No ia mea, mamuli o ka huhu, pepehi aku la o Lameka ia ia a make, aole nae e like me ko Kaina i kona kaikaina, ia Abela, i loaa ai ka waiwai, aka, pepehi aku la oia ia ia no ka hoohiki.

51. No ka mea, mai na la mai o Kaina, aia no kekahi hui malu, a o ka lakou mau hana aia no ia iloko o ka pouli, a ua ike lakou, kela a me keia kanaka, i kona hoahanau.

52. No ia mea, hoino mai la ka Haku ia Lameka, a me ko kona hale, a me ka poe a pau i berita pu ai me Satana; no ka mea, aole lakou i malama i na kauoha a ke Akua, a he mea hoonaukiuki ia i ke Akua, a aole Oia i kokua mai ia lakou, a he mau mea hoopailua ka lakou mau hana, a hoomaka ae la e laha aku mawaena o na keikikane a pau a kanaka.

53. A ua loaa ia mawaena o na keikikane a kanaka, a mawaena o na kaikamahine a kanaka, aole ia mau mea i hai ia, no ka mea, ua hai o Lameka ia mea huna i kana mau wahine, a kipi ae la laua ia ia, a hai aku la i keia mau mea i ke akea, me ke aloha ole;

54. No ia mea, ua hoowahawaha ia o Lameka, a kipaku ia i waho, a aole hele hou mai mawaena o na keiki a kanaka, o make iho la oia.

55. A pela na hana o ka pouli i hoomaka ai e lanakila mawaena o na keiki a pau a kanaka.

56. A hoino iho la ke Akua i ka honua me kekahi hoino nui, a ua huhu i ka poe hana hewa, a me na keiki a pau a kanaka Ana i hana ai;

57. No ka mea, aole lakou i hoolohe i Kona leo, aole no hoi i manaoio i Kana Keiki Hanaukahi, he oiaio, i ka Mea Ana i hai mai ai e hele mai ana i ka waenakonu o ka manawa, ka Mea i hoomakaukau ia mamua o ka hookumu ia ana o ke ao nei.

58. A pela i hoomaka ai ka hai ia ana o ka Euanelio mai kinohi mai, ma ka hai ia ana e na anela hemolele i hoouna ia mai mai ke alo mai o ke Akua, a ma Kona leo ponoi, a ma ka haawina o ka Uhane Hemolele.

59. A pela i hoopaa ia ai na mea a pau ia Adamu, ma kekahi lawelawepaa hemolele, a i hai ia ai ka Euanelio, a hoouna ia ka olelo kuahaua, e mau ana ia ma ke ao nei, a hiki i kona hopena; a pela iho la ia. Amene.