1. A pela i pau ai ka lani a me ka honua i ka hana ia, a me ka lehulehu a pau o lakou.

2. A i ka hiku o ka la hooki iho la Au, ke Akua, i Kaʻu hana, a me na mea a pau Aʻu i hana ai; a hoomaha ae la Au ma ka hiku o ka la mai Kaʻu hana a pau, a o na mea a pau Aʻu i hana ai ua pau i ka hana ia, a ike aku la Au, ke Akua, ua maikai lakou;

3. A hoopomaikai aku la Au, ke Akua, i ka hiku o ka la a hoano ia; no ka mea, ma ia la ua hoomaha Au mai Kaʻu hana a pau Aʻu, a ke Akua, i hookumu a hana iho ai.

4. A ano, aia hoi, ke olelo aku nei Au ia oe, o keia na hanauna o ka lani a me ka honua, i ka wa o lakou i hana ia ai, i ka la Aʻu, a ka Haku, ke Akua, i hana ai i ka lani a me ka honua.

5. A o kela a me keia mea ulu o ke kula i ka wa aole ia ma ka honua, a o kela a me keia launahele o ke kula mamua o kona ulu ana. No ka mea, hana iho la Au, ka Haku ke Akua, i na mea a pau Aʻu i olelo ai, ma ke ano uhane, mamua o ko lakou ku ana ma ke ano o ko ka honua maluna o ka ili o ka honua. No ka mea, aole hoohaule Au, ka Haku ke Akua, i ka ua maluna o ka ili o ka honua. A ua hana Au, ka Haku ke Akua, i na keiki a pau a kanaka; aole nae he kanaka e mahi i ka aina; no ka mea, ma ka lani i hana ai Au ia lakou; a aole hoi he mea io maluna o ka honua, aole hoi iloko o ka wai, aole hoi iloko o ka lewa;

6. Aka, olelo aku la Au, ka Haku ke Akua, a pii ae la kekahi ohu mai ka honua ae, a hoopulu i ka ili a pau o ka honua.

7. A hana iho la Au, ka Haku ke Akua, i ke kanaka mai ka lepo mai o ka honua, a ha iho la iloko o kona mau puka ihu i ka hanu o ke ola; a lilo ae la ke kanaka i kino ola me ka uhane, ka mea io mua maluna iho o ka honua, ke kanaka mua no hoi; aka nae, ua hookumu e ia na mea a pau mamua; aka, ma ke ano uhane i hookumu ia ai lakou a hana ia e like me Kaʻu olelo.

8. A kanu iho la Au, ka Haku ke Akua, i mahinaai ma ka aoao hikina iloko o Edena, a i laila Au i hoonoho ai i ke kanaka Aʻu i hana ai.

9. A mailoko mai o ka honua i hooulu ai Au, ka Haku ke Akua, i kela a me keia laau, ma ke ano o ko ka honua, na mea i oluolu i na maka o kanaka; a ua hiki i ke kanaka ke nana aku ia mea. A lilo ae la no hoi ia i kino ola me ka uhane. No ka mea, he mea uhane ia i ka la Aʻu i hookumu ai ia; no ka mea, e noho iho la ia iloko o ke ao Aʻu, ke Akua, i hookumu ai ia, he oiaio, na mea a pau Aʻu i hoomakaukau ai no ka pono o ke kanaka; a ike aku la ke kanaka he kupono ia no ka ai ana. A kanu iho la no hoi Au, ka Haku ke Akua, i ka laau o ke ola iwaena konu o ke kihapai, a o ka laau hoi i ikea ka pono a me ka hewa.

10. A hana iho la Au, ka Haku ke Akua, i kekahi muliwai e kahe mailoko aku o Edena, e hoopulu i ke kihapai; a mailaila aku ua mahele ia, a lilo iho la i mau mana eha.

11. A kapa aku la Au, ka Haku ke Akua, i ka inoa o ka mua, Pisona, e hoopuni ana ia i ka aina a pau o Havila, kahi Aʻu, ka Haku ke Akua, i hana ai i ke gula a nui;

12. A he maikai ke gula o ia aina, a ilaila ka deliuma a me ka pohaku onika.

13. A o ka inoa o ka lua o ka muliwai ua kapa ia o Gihona; ka mea hookahi e hoopuni ana i ka aina a pau o Aitiopa.

14. A o ka inoa o ke kolu o ka muliwai o Hidekela; ka mea e kahe ana i ka hikina o Asuria. A o ka ha o ka muliwai oia no ka Euperate.

15. A lawe aku la Au, ka Haku ke Akua, i ke kanaka, a hoonoho iho la ia ia iloko o ke Kihapai o Edena, e mahi, a e malama ia wahi.

16. A kauoha ae la Au, ka Haku ke Akua, i ke kanaka, i ka i ana: E ai wale oe i ko kela a me keia laau o ke kihapai;

17. Aka, o ko ka laau i ikea ai ka pono a me ka hewa, mai ai iho oe ia mea, aka nae, e koho oe nou iho, no ka mea, ua haawi ia aku ia ia oe; aka, e hoomaopopo ke papa nei Au ia mea, no ka mea, i ka la au e ai ai ia mea e make io no oe.

18. A olelo aku la Au, ka Haku ke Akua, i Kaʻu Hanaukahi, aole ia he pono ke noho ke kanaka oia wale no; no ia mea, e hana no Au i kokoolua nona.

19. A noloko mai o ka lepo i hana ai Au, ka Haku ke Akua, i kela a me keia holoholona o ke kula, a me kela a me keia manu o ka lewa; a kauoha ae la e hele mai lakou io Adamu la, i ike ia ai na inoa a Adamu e kapa aku ai ia lakou; a he mau kino ola me ka uhane lakou no hoi, no ka mea, ha iho la Au, ke Akua, i ka hanu ola iloko o lakou, a kauoha ae la o na inoa a Adamu e kapa aku ai i kela a me keia mea ola, oia iho la ka inoa o ia mea.

20. A kapa aku la o Adamu i na inoa no na holoholona laka a pau, a no na manu o ka lewa, a no na holoholona o ke kula; aka, no Adamu, aole i loaa i kokoolua nona.

21. A hookau aku la Au, ka Haku ke Akua, i ka hiamoe nui maluna iho o Adamu, a hiamoe iho la ia, a unuhi ae la Au i kekahi iwi aoao ona a hoopili iho la i ka io ma kona wahi;

22. A o ka iwi aoao Aʻu, a ka Haku ke Akua, i unuhi ai mailoko mai o ke kanaka, hana iho la Au i wahine, a lawe ae la ia ia i ke kanaka.

23. A i aku la o Adamu: Ke ike nei au ano, oia nei ka iwi o koʻu mau iwi, a me ka io o koʻu io; a e kapa ia oia o Wahine, no ka mea, ua unuhi ia ae la oia mailoko ae o ke kane.

24. No keia mea, e haalele aku ke kanaka i kona makuakane a me kona makuahine, a e hoopili aku i kana wahine; a e lilo laua i io hookahi.

25. Ua kohana laua a elua, ke kane a me kana wahine, a aole i hilahila.