1. A hoolohe aku la o Adamu i ka leo o ke Akua, a kahea aku la i kana mau keikikane e mihi.

2. A ike hou aku la o Adamu i kana wahine, a hanau mai la oia he keikikane, a kapa aku la oia la i kona inoa o Seta. A hoonani aku la o Adamu i ka inoa o ke Akua; no ka mea, olelo ae la ia: Ua koho mai la ke Akua noʻu i kekahi hua hou, ma kahi o Abela, ka mea a Kaina i pepehi ai a make.

3. A hoike mai la ke Akua ia Ia iho ia Seta, a aole oia i kipi, aka, alana aku la i mohai kupono, e like me ka kona kaikuaana, o Abela. A hanau mai la no hoi nana he keikikane, a kapa aku la i kona inoa o Enosa.

4. Alaila, hoomaka aku la keia poe kanaka e kahea i ka inoa o ka Haku, a hoopomaikai mai la ka Haku ia lakou;

5. A ua malama ia kekahi buke hoomanao, a ua hoopaa ia iloko olaila ma ka olelo a Adamu, no ka mea, ua haawi ia i ka poe a pau e kahea ana i ke Akua e kakau ma o ka uhane la o ka hoikeana;

6. A ma o lakou la i ao ia ai ka lakou mau keiki i ka heluhelu a me ke kakau, oiai ua loaa he olelo i pololei a hoohepahepa ole ia.

7. Ano, o keia Oihanakahuna hookahi no, ka mea i kinohi, oia no auanei ma ka hopena o ke ao nei.

8. Ano, olelo mai la o Adamu i keia wanana, i kona uluhia ia ana e ka Uhane Hemolele, a ua malama ia kekahi mookuauhau o na keiki a ke Akua. A o keia ka buke o na hanauna o Adamu, i ka i ana: Ma ka la a ke Akua i hana ai i ke kanaka, ma ke ano like o ke Akua i hana ai Ia ia ia;

9. Ma ke ano o Kona kino ponoi, hana iho la Ia ia laua, he kane a he wahine, a hoopomaikai aku la ia laua, a hea aku la i ko laua inoa o Adamu, ma ka la o laua i hana ia ai a lilo iho la i mau kino ola me ka uhane ma ka aina maluna o ke keehina wawae o ke Akua.

10. A ola iho la o Adamu he hookahi haneri a me kanakolu mau makahiki, a loaa he keikikane ma ke ano like loa me ia, mamuli o kona ano ponoi, a hea aku la i kona inoa o Seta.

11. A o na la o Adamu, mahope iho o ka loaa ana ia ia o Seta, he ewalu haneri mau makahiki, a ua loaa ia ia na keikikane a me na kaikamahine he nui;

12. A o na la a pau o Adamu i ola ai he eiwa haneri me kanakolu mau makahiki, a make iho la oia.

13. Ola iho la o Seta he hookahi haneri me elima mau makahiki, a loaa o Enosa, a wanana i kona mau la a pau, a ao aku la i kana keiki, ia Enosa, i na aoao o ke Akua; no ia mea, wanana no hoi o Enosa.

14. A ola iho la o Seta mahope iho o ka loaa ana o Enosa ia ia, he ewalu haneri me ehiku mau makahiki, a loaa na keikikane a me na kaikamahine he nui.

15. A he nui na keiki a kanaka maluna o ka ili a pau o ka aina. A ia mau la ua nui ko Satana mana mawaena o kanaka, a ua nui kona huhu iloko o ko lakou mau naau; a mai ia manawa mai hiki mai la na kaua a me ka hookahe koko ana; a o ka lima o ke kanaka e kue ana no ia i kona hoahanau ponoi, ma ka pepehi ana a make, mamuli o na hana malu, e imi ana i ka mana.

16. O na la a pau o Seta he eiwa haneri a me umikumamalua mau makahiki, a make iho la ia.

17. A ola o Enosa he kanaiwa mau makahiki, a loaa o Kainana. A puka mai la mai ka aina mai, i kapa ia o Sulona, o Enosa a me ke koena o na kanaka o ke Akua, a noho iho la ma ka aina i olelo mua ia, ka mea ana i kapa ai ma ka inoa o kana keiki ponoi, ka mea ana i kapa ai o Kainana.

18. A ola iho la o Enosa, mahope iho o ka loaa ana o Kainana, he ewalu haneri me umikumamalima mau makahiki, a loaa na keikikane a me na kaikamahine he nui. A o na la a pau o Enosa he eiwa haneri me elima makahiki, a make iho la ia.

19. He kanahiku na makahiki o ko Kainana ola ana, a hanau mai la o Mahalaleela nana; a ola iho la o Kainana mahope iho o ko Mahalaleela hanau ia ana mai he ewalu haneri me kanaha mau makahiki, a nana mai na keikikane a me na kaikamahine. A o na la a pau o Kainana he eiwa haneri me umi makahiki, a make iho la ia.

20. He kanaono-kumamalima na makahiki o ko Mahalaleela ola ana a hanau mai la o Iareda nana; a ola iho la o Mahalaleela mahope iho o ka hanau ia ana o Iareda, he ewalu haneri a me kanakolu mau makahiki, a nana mai na keikikane a me na kaikamahine. A o na la a pau o Mahalaleela he ewalu haneri me kanaiwa-kumamalima mau makahiki, a make iho la ia.

21. He hookahi haneri me kanaono-kumamalua na makahiki o ko Iareda ola ana, a hanau ia mai la o Enoka nana; a ola o Iareda mahope iho o ka hanau ia ana o Enoka, he ewalu haneri mau makahiki, a hanau mai la na keikikane a me na kaikamahine nana. A ao aku la o Iareda ia Enoka i na aoao a pau o ke Akua.

22. A o keia ka mookuauhau o na keikikane a Adamu, oia hoi ke keiki a ke Akua, ka mea hoi a ke Akua ponoi i kamailio pu ai.

23. A he poe haiolelo lakou i ka pono, a olelo aku a wanana a kahea i na kanaka a pau, ma na wahi a pau, e mihi; a ua ao ia ka manaoio i na keiki a kanaka.

24. A eia kekahi, o na la a pau o ko Iareda ola ana he eiwa haneri me kanaono-kumamalua makahiki, a make iho la ia.

25. A he kanaono-kumamalima mau makahiki o Enoka, a hanau ia mai la, o Metusala nana.

26. A eia kekahi, kaahele ae la o Enoka ma ka aina, mawaena o kanaka; a i kona kaahele ana, iho mai la ka Uhane o ke Akua mai ka lani mai, a noho iho la maluna ona.

27. A lohe aku la ia i kekahi leo mai ka lani mai, e i ana: E Enoka, e Kaʻu keiki, e wanana aku i keia poe kanaka, a e olelo aku ia lakou—E mihi, no ka mea, penei wahi a ka Haku: Ua huhu Au i keia poe kanaka, a ua hoaa ia Koʻu inaina weliweli ia lakou; no ka mea, ua lilo ko lakou mau naau i paakiki, a o ko lakou mau pepeiao ua kuli maoli i ka hoolohe ana, a o ko lakou mau maka aole hiki ke ike aku a mamao;

28. A no keia mau hanauna he nui, mai ka la Aʻu i hana ai ia lakou, ko lakou hele auwana ana, a ua hoole Iaʻu, a ua imi i ka lakou mau ao ana iho iloko o ka pouli; a iloko o ka lakou mau hana hoopailua ponoi lakou i hoolala ai i ka pepehi kanaka, a aole i malama i na kauoha, ka mea Aʻu i haawi aku ai i ko lakou kupuna o Adamu.

29. No ia mea, ua hoohiki mua lakou ia lakou iho, a ma o ka lakou olelo hoohiki, ua lawe mai lakou i ka make maluna o lakou iho; a ua hoomakaukau Au i Gehena no lakou, ina e mihi ole lakou;

30. A he olelo kuahaua keia Aʻu i hoolaha aku ai i ka hoomaka ana o ke ao nei, mai kona hookumu ia ana, a mai Koʻu waha ponoi aku ia, a ma o na waha la o Kaʻu mau kauwa, kou mau kupuna, i kuahaua aku ai Au ia mea, oia hoi e like me ia e hoolaha ia ai i ke ao nei a hiki i na welelau ona.

31. A i ko Enoka lohe ana i keia mau olelo, kulou iho la ia i ka honua, imua o ka Haku, a olelo aku la imua o ka Haku, i ka i ana: No ke aha la i oluolu ia ai au imua o Kou alo, oiai he wahi keiki wale no au, a ke inaina nei na kanaka a pau iaʻu; no ka mea, he ulolohi au ma ke kamailio ana; no ke aha au i lilo ai i kauwa Nau?

32. A olelo mai la ka Haku ia Enoka: E hele a hana e like me Kaʻu i kauoha ai ia oe, a aole he kanaka nana oe e hoeha. E oaka ae i kou waha, a e piha auanei ia, a e haawi no Au ia oe i ka olelo ana, no ka mea, aia na io a pau iloko o Koʻu mau lima a e hana no Au e like me Kaʻu i manao ai he pono.

33. E olelo aku i keia poe kanaka: E koho oukou i keia la e hookauwa aku na ka Haku ke Akua, ka Mea nana oukou i hana.

34. Aia hoi, ke kau nei Koʻu Uhane maluna ou, no ia mea, e hoapono no Au i kau mau olelo a pau; a e holo no na mauna imua ou, a e huli ae na muliwai mai ko lakou ala maa mau ae; a e noho oe iloko Oʻu, a Owau iloko ou; nolaila, e hele pu me Aʻu.

35. A olelo aku la ka Haku ia Enoka, a i aku la ia ia: E poni i kou mau maka me ka palolo, a e holoi ae, a e ike no oe. A hana aku la ia pela.

36. A ike aku la ia i na uhane a ke Akua i hana ai; a ike aku la no hoi ia i na mea i ike ole ia e na maka maoli; a mai ia manawa mai i laha aku ai ka olelo ma ka aina: Ua hoala ae ka Haku he mea ike no Kona poe kanaka.

37. A eia kekahi, hele aku la o Enoka ma ka aina, mawaena o na kanaka, e ku ana maluna o na puu a me na wahi kiekie, a kahea aku la me ka leo nui, e hoike kue ana i ka lakou mau hana; a ua naukiuki na kanaka a pau nona.

38. A holo mai la lakou e lohe ia ia, ma na wahi kiekie, me ka olelo ana aku i ka poe malama halelewa: E kakali oukou maanei a e malama i na halelewa, oiai makou e hele ana io la e nana i ka mea ike, no ka mea ke wanana nei ia, a eia kekahi mea ano e iloko nei o ka aina; ua hoea mai kekahi kanaka hihiu iwaena o kakou.

39. A eia kekahi, i ko lakou lohe ana ia ia aole i kau aku kekahi kanaka i na lima maluna iho ona; no ka mea, kau mai la ka makau maluna o ka poe a pau i lohe ia ia; no ka mea, hele pu iho la ia me ke Akua.

40. A hele mai la kekahi kanaka i ona la, nona ka inoa o Mahaia, a olelo mai la ia ia: E hai mai ia makou me ka moakaka owai la oe, a no hea mai oe i hele mai ai?

41. A olelo aku la oia ia lakou: Ua puka mai au mai ka aina mai o Kainana, ka aina o Koʻu mau kupuna, he aina o ka pono a hiki i keia la. A ao mai la koʻu makuakane iaʻu iloko o na aoao a pau o ke Akua.

42. A eia kekahi, i koʻu hele ana mai ka aina mai o Kainana, ma ke kai ma ka hikina, ike aku la au i kekahi hihio; aia hoi, ike aku la au i na lani, a kamailio mai la ka Haku me aʻu, a haawi mai la iaʻu i kauoha; nolaila, no keia kumu e hooko ai i ke kauoha, au e olelo aku nei i keia mau olelo.

43. A hoomau aku la o Enoka i kana haiolelo, i ka i ana: O ka Haku i kamailio pu ai me aʻu, oia hookahi no ke Akua o ka lani, a Oia no koʻu Akua, a me ko oukou Akua, a o oukou koʻu poe hoahanau, a no ke aha la oukou e ao nei ia oukou iho, a hoole i ke Akua o ka lani?

44. O na lani Nana i hana; o ka honua Kona keehina wawae; a o ke kumu o ia mea Nona no. Aia hoi, Nana ia i hookumu, a he lehulehu o na kanaka Kana i lawe mai ai a hoonoho maluna o ka ili o ia mea.

45. A ua hiki mai ka make maluna o ko kakou mau kupuna; eia nae ua hoomaopopo no kakou ia lakou, a aole e hiki ke hoole, a he oiaio, ua hoomaopopo kakou i ka mua o na mea a pau, oia hoi o Adamu.

46. No ka mea, he buke hoomanao ka kakou i kakau ai mawaena o kakou, i kulike me ke ana i haawi ia mai e ka manamanalima o ke Akua; a ua haawi ia mai ia iloko o ka kakou olelo ponoi.

47. A i ka Enoka hoopuka ana aku i na olelo a ke Akua, haalulu iho la na kanaka, a ua hiki ole ke ku aku imua o kona alo.

48. A olelo mai la oia ia lakou: Mamuli o ko Adamu haule ana, ke ola nei kakou; a ma kona haule ana i hoea mai ai ka make; a ua hoolilo ia kakou i poe loaa pu o ka ehaeha a me ka popilikia.

49. Aia hoi, ua hele mai nei o Satana mawaena o na keiki a kanaka, a ke hoowalewale nei ia lakou e hoomana aku ia ia; a ua lilo na kanaka i poe o ko ke kino, i kuko ino, a i ano diabolo, a ua hookaawale ia mai ke alo aku o ke Akua.

50. Aka, ua hoike mai ke Akua i ko kakou poe kupuna he mea ia e pono ai e mihi na kanaka a pau.

51. A hea mai la Oia i ko kakou makua ia Adamu, ma Kona leo ponoi, i ka i ana: Owau no ke Akua; Naʻu no i hana i ka honua nei, a me na kanaka mamua o ko lakou ola ana ma ka io.

52. A i mai la no hoi Oia ia ia: Ina e haliu mai oe Iaʻu nei, a e hoolohe mai i Koʻu leo, a e manaoio, a e mihi i kau mau hana hewa a pau, a e bapetizo ia, he oiaio, iloko o ka wai, iloko o ka inoa o Kaʻu Keiki Hanaukahi, ka Mea i piha i ke aloha a me ka oiaio, oia hoi o Iesu Kristo, ka inoa hookahi wale no e haawi ia aku ana malalo o ka lani, ma ona la e hiki mai ai ka hoola ia ana i na keiki a kanaka, e loaa auanei ia oe ka haawina o ka Uhane Hemolele, e noi ana i na mea a pau ma Kona inoa, a o kela a me keia mea au e nonoi ai e haawi ia aku no ia ia oe.

53. A olelo aku la ko kakou makua o Adamu i ka Haku, i ka i ana: No ke aha la e mihi ai na kanaka a e bapetizo ia iloko o ka wai? A i mai la ka Haku ia Adamu: Aia hoi, ua kala aku Au ia oe i kau lawehala ana iloko o ke Kihapai o Edena.

54. Nolaila, i laha mai ai ka olelo ana ma o a ma o mawaena o kanaka, ua panai aku ke Keiki a ke Akua no ka hewa mua, no ia mea e hiki ole ai i na hewa o na makua ke hoopai ia maluna o na poo o na keiki, no ka mea, he poe hemolele lakou mai ka hookumu ia ana o ke ao nei.

55. A olelo mai la ka Haku ia Adamu, i ka i ana: Oiai ua hanau ia mai kau poe keiki iloko o ka hewa, pela no i ka wa e hoomaka ai lakou e ulu ae, kupu ae ka hewa iloko o ko lakou mau naau, a hoao lakou i ka awaawa, i hoomaopopo ai lakou i ka waiwai o ka maikai.

56. A ua haawi ia aku ia lakou e hoomaopopo i ka pono mai ka hewa ae; no ia mea he poe agena lakou no lakou iho, a ua haawi aku au ia oe he kanawai a he kauoha hou aku.

57. Nolaila, e ao ia mea i kau poe keiki, e mihi na kanaka a pau ma na wahi a pau e pono ai, a i ole, aole loa e loaa ia lakou ke aupuni o ke Akua, no ka mea, aole e hiki i kekahi mea haumia ke noho malaila, a i ole, e noho imua o Kona alo; no ka mea, ma ka olelo a Adamu, ke Kanaka o ka Hemolele Kona inoa, a o ka inoa o Kana Hanaukahi oia ke Keiki a ke Kanaka, oia hoi o Iesu Kristo, he Lunakanawai pono, ka mea e hiki mai ana i ka waenakonu o ka manawa.

58. Nolaila, ke haawi aku nei Au i kekahi kauoha ia oe, e ao nui aku i keia mau mea i kau poe keiki, i ka i ana:

59. Mamuli o ka hana hewa ana i hiki mai ai ka haule ana, a o ua haule ana la ka i lawe mai ai i ka make, a oiai ua hanau ia mai oukou iloko o ke ao nei ma ka wai, a me ke koko, a me ka uhane, ka mea Aʻu i hana ai, a pela i lilo mai ai i uhane me ke kino ola mai ka lepo mai, pela no hoi auanei oukou e hanau hou ia ai iloko o ke aupuni o ka lani e pono ai, ma ka wai a ma ka Uhane, a e hoomaemae ia ma ke koko, oia hoi ke koko o Kaʻu Hanaukahi; i hoomaemae ia ai oukou mai na hewa a pau mai, a e hauoli i ka olelo o ke ola mau loa iloko o ke ao nei, a me ke ola mau loa iloko o ke ao e hiki mai ana, oia hoi ka nani palaho ole;

60. No ka mea, ma o ka wai la i malama ai oukou i ke kauoha; ma o ka Uhane la oukou i hoapono ia ai, a ma o ke koko la oukou i hoomaemae ia ai;

61. No ia mea ua haawi ia aku ia e noho iloko o oukou; ka hoike o ka lani; ke Kokua; na mea maluhia o ka nani palaho ole; ka oiaio o na mea a pau; ka mea nana e hoeueu i na mea a pau, ka mea nana i haawi mai i ke ola i na mea a pau; ka mea i ike i na mea a pau, a ia ia ka mana a pau, i ku i ka naauao, ke aloha, ka oiaio, ke kaulike, a me ka hoopai.

62. A ano, aia hoi, ke olelo aku nei Au ia oe: O keia ka mea i hoolala ia no ka hoola ana i na kanaka a pau, ma o ke koko la o Kaʻu Hanaukahi, ka Mea e hiki mai ana i ka waenakonu o ka manawa.

63. A aia hoi, he mea like ko na mea a pau, a ua hookumu a hana ia na mea a pau e hoike Noʻu, oia hoi, na mea o ka honua nei a me na mea o ka uhane pu; na mea iloko o na lani iluna, a me na mea maluna o ka honua, a me na mea iloko o ka honua, a me na mea malalo o ka honua, maluna a malalo no hoi: ke hoike nei na mea a pau Noʻu.

64. A eia kekahi, i ka wa i pau ai o ka ka Haku kamailio ana me Adamu, ko kakou kupuna, hea aku la o Adamu i ka Haku, a lawe ia aku la oia e ka Uhane o ka Haku, a lawe ia aku la oia ilalo iloko o ka wai, a ua hoomoe ia malalo o ka wai, a lawe ia mai la mailoko mai o ka wai.

65. A pela iho la oia i bapetizo ia ai, a kau mai la ka Uhane o ke Akua maluna ona, a pela oia i hanau ia ai ma ka Uhane a hoalaala ia kona uhane.

66. Lohe ae la ia i kekahi leo mailoko mai o ka lani, e i ana: Ua bapetizo ia oe me ke ahi, a me ka Uhane Hemolele. O keia ka hoike a ka Makua a me ke Keiki, mai keia wa aku a mau loa;

67. A mamuli oe o ke ano o ka mea aohe ona hoomaka ana o na la, aohe hoi he hopena o na makahiki, mai ka mau loa a i ka mau loa.

68. Aia hoi, o oe kekahi iloko Oʻu, he keiki na ke Akua; a pela e hiki ai ke lilo mai na kanaka a pau i poe keiki Naʻu. Amene.