1 Ao ngai, Aberaam, iai irou te Urim ao Tammim, are e a tia n anganai te Uea ae Atuau, i Ura ae abaia I-Kareria;

2 Ao I noori itoi, bwa a bon rangi ni bubura, ao teuana mai buakoia bon te kabanea ni kaan nakon kaintokanuean te Atua; ao a boni mwaiti aika bubura ake a kaan i rarikina;

3 Ao te Uea e taku nakoiu: Aikai ake a taua mwiia; ao aran are bubura bon Korobo, ibukina bwa e bon kaan ma ngai, bwa Ngai bon te Uea ae Atuam: I a tia ni katea aio bwa e na taua mwiia ni kabane akekei ake bon titebo aia karinan ma ane ko tei i aona.

4 Ao te Uea e taku nakoiu, man te Urim ao Tammim, bwa Korobo e boraoi aron waakina ma te Uea, ni kaineti ma ana tai nako ma taina ni kaineti ma minominona; bwa teuana minona bon teuana te bong iroun te Uea, n aron baireana irouna, are bon teuana te nga te ririki ni kaineti ma te tai are baireaki ibukin ane ko tei iai. Aio bon bairean ana tai te Uea, ni kaineti ma bairean Korobo.

5 Ao te Uea e taku nakoiu: Te buraneti are e uarereke riki otana, e uarereke riki nakon are e na taua taekan te ngaina, ao te tairiki, e korakora riki ke e bubura riki nakon ane ko tei i aona n aron baireana, bwa kakamwakurina ni karinanna e karaurau riki; e bon riai aei ibukina bwa e tei i etan te aonaba are ko tei iai, ngaia are bairean ana tai e bon karako riki n aron mwaitin ana bong, ao ana namwakaina, ao ana ririki.

6 Ao te Uea e taku nakoiu: Ngkai, Aberaam, bon iai uoua koaua aikai, nooria, matam a nooria, ko anganaki bwa ko na atai bairean taian tai, ao te tai are rineaki, eng, te tai are rineaki ibukin te aonaba are ko tei i aona, ao te tai are rineaki ibukin te oota are korakora riki are rineaki bwa e na taua taekan te ngaina, ao te tai are rineaki ibukin te oota are karako riki are e rineaki bwa e na taua taekan te tairiki.

7 Ngkai te tai ae rineaki ibukin te oota are karako riki e bon anaanau riki taina ni kaineti ma baireana nakon bairean te tai ibukin te aonaba are ko tei i aona.

8 Ao ike iai iai uoua koaua aikai, e na iai te koaua riki teuana i aoia, are, e na iai teuana riki te buraneti are bairean taina e na anaanau riki.

9 Ao ngaia are e na iai bairean tain te buraneti teuana i aon riki are teuana, ni karokoa ko roko i Korobo, Korobo are bon kaineti baireana ma ana tai te Uea; Korobo are tei ni kaan nakon kaintokanuean te Atua, bwa e na tautaeka i aoia ni kabane buraneti ake bon kaain te karinan ae titebo ma are ko tei i aona.

10 Ao e anaganaki nakoim bwa ko na ata te tai are rineaki ibukin itoi ni kabane ake a rineaki bwa ana anga te oota, ni karokoa ko a kaan ma kaintokanuean te Atua.

11 Ngaia are ngai, Aberaam, I taetae ma te Uea, ni itara mata, n aron te aomata ae taetae ma temanna; ao e tuangai mwakuri ake a karaoaki ni baina;

12 Ao e taku nakoiu: Natiu, natiu (ao baina e aroraki nako), nooria N na kaotii nakoim baikai ni kabane. Ao e katoka baina i aon matau, ao I noori bwaai ake a karaoaki ni baina, ake a mwaiti; ao a rikirake mwaitia imatau, ao I aikoa kona n noora tokina.

13 Ao e taku nakoiu: Aio bon Tineaa, are bon taai. Ao e taku nakoiu: Kokobo, are bon te itoi. Ao e taku nakoiu: Orea, are bon namwakaina. Ao e taku nakoiu: Kokoubim, are nanona taian itoi, ke ni kabane oota aika korakora, ake a mena i annang i karawa.

14 Ao e bon tairiki ngke e taekini taeka aikai te Uea nakoiu: N na kamwaitiko, ao am kariki ake imwiim, n ai aron baikai; ao ngkana ko kona ni wareka mwaitin te tano, bon anne mwaitin am kariki.

15 Ao te Uea e taku nakoiu: Aberaam, I kaoti baikai nakoim i mwaain ae ko nako Aikubita, bwa ko aonga n taekini ni kabane taeka aikai.

16 Ngkana iai uoua bwaai, ao iai teuana ae rietata nakon are teuana, e na iai bwaai aika rietata riki i aoia; ngaia are Korobo bon te kabanea n korakora i buakoia ni kabane Kokoubim ake ko a tia n noori, ibukina bwa bon te kabanea ni kaan nakoiu.

17 Ngkai, ngkana iai uoua bwaai, teuana ae rietata nakon are teuana, ao namwakaina e rietata nakon te aonaba, ngkanne e kona ni iai te buraneti ke te itoi ae mena i etana; ao akea te bwai ae na baireia te Uea ae Atuam i nanona bwa e na karaoia ma ti are e na bon karaoia.

18 E ngae n anne e karaoa te itoi ae korakora riki; n ai arona naba, ngkana iai uoman tamnei, ao temanna e rabakau riki nakon are temanna, ma tamnei aika uoman aikai, e ngae ngke temanna e rabakau riki nakon are temanna, akea moaia; boni iai ngaia mai mwaaina, a na bon akea tokiia, ana maiu rimwi, bwa a bon gnolaum, ke akea tokiia.

19 Ao te Uea e taku nakoiu: Boni iai uoua koaua aikai, bwa boni iai uoman tamnei, temanna e rabakau riki nakon are temanna; e na iai temanna riki ae rabakau riki nakoia; Ngai te Uea ae Atuam, I rabakau riki nakoia ni kabane.

20 Te Uea ae Atuam e kanakoa ana anera bwa e na kamaiuko man baia ana ibonga Erekana.

21 I maeka i buakoia ni kabaneia; Ngaia are, Ngai ngkai I a ruo nakoim bwa N na taekini nakoim mwakuri ake a tia ni karaoi baiu, are mai iai wanawanau e rianako nakoia ni kabaneia, bwa I tautaeka i karawa i eta, ao n te aonaba inano, n te wanawana ao te iango raoi ni kabane, i aoia ni kabane rabakau ake e a tia n nooria matam man te moan tai; I ruo ni moanakin te tai i buakoia ni kabane rabakau ake ko a tia n noori.

22 Ngkai te Uea e a tia ni kaotia nakoiu, ae Aberaam, rabakau ake a barongaaki i mwaain rikin te aonaba; ao i buakoia aikai ni kabane a boni mwaiti ake a rine ao a kakannato.

23 Ao te Atua e nooriia tamnei aikai bwa a raoiroi, ao e tei i buakoia, ao e taku: Naakai N na karikiia bwa au taan tautaeka; bwa e tei i buakoia nakekei ake bon tamnei, ao e nooria bwa a bon raoiroi; ao e taku nakoiu: Aberaam, ngkoe bon temanna mai i buakoia; ko a kaman rineaki i mwain bungiakim.

24 Ao iai temanna ae tei i buakoia ae ai aron te Atua, ao e taku nakoia naake a raonna: Ti na nako n ruo, bwa iai te mwaawa ikekei, ao ti na uoti bwaai aikai, ao ti na karaoa te aonaba are a na kona ni maeka i aona naakai.

25 Ao ti na kataiia ma ngkai, n nooria ngkana a na karaoi bwaai ni kabane are e na tuangiia te Uea ae Atuaia.

26 Ao naake a kawakini moan maekaia a na karakaaki aroia; ao naake aki kawakini moan maekaia a na aki karekea te mimitong n te abanuea naba anne ma naake a kawakina moan maekaia; ao naake a kawakina kauouan maekaia a na mwaiti riki mimitong i aon atuuia n aki totoki.

27 Ao te Uea e taku: Antai ae N na kanakoa? Ao temanna e kaeka n ai aron Natin te Aomata: Aio Ngai, kanakoai. Ao temanna riki e kaeka ao e taku: Aio Ngai, kanakoai. Ao te Uea e taku: N na kanakoa te moan.

28 Ao te kauoman e bon un, ao e aki kawakina moan maekana; ao, n te bong arei, a mwaiti aika iria.