1 Im āindein Jenaaj kamōje lan̄ ko im laļ, im aolep men otemjej kobbaer.

2 Im Anij ro rekar ba ilubwiljier make: Ilo iien eo kein kajiljilimjuon Jenaaj kōjjem̧ļo̧k ad jerbal, eo me Jekar pepe kake; im Jenaaj kakkije ilo iien eo kein kajiljilimjuon jān aolep jerbal ko Ad me Jekar pepe kake.

3 Im Anij ro rekar bōjrak ilo iien eo kein kajiljilimjuon, kōnke ilo iien eo kein kajiljilimjuon ren kakkije jān aolep jerbal ko aer ko me er (Anij ro) rekar pepe ilubwiljier n̄an eje; im kokwōjarjar e. Im āindein kar jem̧ļo̧k ko aer ilo iien eo ke rekar pepe ilubwiljier make n̄an eje lan̄ ko im laļ.

4 Im Anij ro raar wanlaļļo̧k im eje epepen kein an lan̄ ko im an laļ, ke rekar eje ilo raan eo Anij ro rekar eje laļ im lan̄ ko,

5 Ekkar n̄an aolep men ko me rekar ba kake mennin eddek otemjeļo̧k in meļaaj m̧okta jān an kar pād ilo bwidej, im mar otemjeļo̧k m̧okta jān an kar eddek; bwe Anij ro rekar jab kōm̧m̧an bwe en wōt ioon laļ ke rekar kapilōk n̄an kōm̧m̧ani, im kar jan̄in eje armej n̄an katōke bwidej eo.

6 A eaar wanlōn̄ļo̧k juon m̧ōto̧ jān laļ, im wōt-dikdiki aolepān mejān bwidej eo.

7 Im Anij ro rekar eje armej jān būn̄aln̄al in laļ, im kar bōk jetōb eo an (meļeļein, jetōb eo an armej), im likūti ilo e; im uukļo̧k ilo bo̧tin menwan mour, im armej eaar erom juon rimour.

8 Im Anij ro rekar kalbwin juon jikin kallib, iturear ilo Iden, im ijo rekar likūt em̧m̧aan eo, eo jetōb eo an rekar likūt ilo ānbwin eo rekar eje.

9 Im jān bwidej eo Anij ro rekar kōm̧m̧an bwe wōjke otemjeļo̧k ren eddek ko rem̧m̧an n̄an lale im n̄an m̧ōn̄ā; im wōjke in mour, barāinwōt, ilo ilubwiljin jikin kallib eo, im wōjke eo in jeļā kōn em̧m̧an im nana.

10 Ekar wōr juon reba ej to̧o̧rļo̧k jān Iden, n̄a wōt-dikdiki jikin kallib eo, im jān ijo eaar ajejļo̧k im erom emān bar ko.

11 Im Anij ro raar bōk em̧m̧aan eo im likūt e ilo Jikin Kallib in Iden, n̄an kōkōm̧anm̧an e im n̄an kōjparok e.

12 Im Anij ro rekar jiron̄ em̧m̧aan eo, im ba: Jān wōjke otemjeļo̧k ilo jikin kallib eo kwo maron̄ anemkwōj im m̧ōn̄ā,

13 A jān wōjke in jeļā kōn em̧m̧an im nana, kwōn jab m̧ōn̄ā jān e, bwe ilo iien eo kwōj m̧ōn̄ā ie, kwo naaj lukkuun mej. Kiiō N̄a, Ebream, iaar lo bwe ekar ilo̧kan iien eo an Irooj, eo iaar ilo̧kan iien eo an Kolob; bwe ilo tōre eo Anij ro rejjan̄in kar jitōn̄e n̄an Ebream an watwat kōn iien.

14 Im Anij ro rekar ba: Jen kōm̧m̧ane juon rejetan em̧m̧aan eo, bwe ej jab em̧m̧an bwe em̧m̧aan eo en make ian, kōn menin Jenaaj eje juon rejetan.

15 Im Anij ro rekar kōm̧m̧an bwe kiki em̧wilaļ en bun̄leplep ioon Adam; im eaar kiki, im rekar bōk juon di ko diin katin, im kiili kanniōk eo ilo ijo jikin;

16 Im jān diin kat eo Anij ro rekar bōk jān em̧m̧aan eo, rekar ejaake kōrā eo, im bōktok lio n̄an ļeo.

17 Im Adam eaar ba: En̄in kiiō diin di ko diiū, im kanniōk in kanniōkū; kiiō e naaj ņa etan Kōrā, kōnke kar bōk e jān em̧m̧aan;

18 Kōn menin ļeo enaaj likūt jemān im jinen, im naaj eddāp n̄an lio pāleen, im renaaj juon wōt kanniōk.

19 Im rekar jim̧or keelwaan, ļeo im lio pāleen, im rekar jab jook.

20 Im jān bwidej eo Anij ro rekar eje mennin mour otemjeļo̧k in meļaaj eo, im bao otemjeļo̧k in mejatoto, im bōktok er n̄an Adam n̄an lale ta enaaj kūr er; im jabdewōt men eo Adam ej kūr mennin mour otemjeļo̧k, āneo ej āt eo etan.

21 Im Adam eaar leļo̧k āt ko etan kattle otemjeļo̧k, n̄an bao ko in mejatoto, n̄an mennin mour otemjeļo̧k in meļaaj, im n̄an Adam, ekar wōr juon rejetan n̄an e.