Joseph Smith—Matthew

1 Na mese hom dɛ, ofitsi sesei dze kɔ hom runnhu me na wobohu dɛ emi nye nyia nkɔnhyɛfo no kyerɛɛw noho nsɛm no, akɛpem dɛ hom bɛse dɛ: Nhyira nye nyia ɔnam Ewuradze ne dzin mu reba no, wɔ ɔsor nsuwusiw mu, na abɔfo krɔnkrɔn nyinara kã noho. Afei n’esuafo no nyaa ntseasee dɛ ɔbɛba asaase do bio, ekyir no a wɔahyɛ no enyimnyam na wɔahyɛ no ahenkyɛw wɔ Nyankopɔn n’abanyimfa hɔ no.

2 Na Jesus fiir edzi, na ofii temple no mu kɔree; na n’esuafo no baa ne nkyɛn dɛ woribetsie no, wɔsee no dɛ: Owura, kyerɛ hɛn dza ɔfa temple no n’adan no ho, dɛ mbrɛ ekãa dɛ—wobodwuruw egu famu, na woegyaa no efituo ama hom.

3 Na Jesus see hɔn dɛ: Ana hom nnhu ndzɛmba yinom nyina, na hom nntse ase? Nokwar mese hom dɛ, wonnkegya ɔbo kor a ɔda kor do wɔ temple yi do a wonnkodwuruw egu famu.

4 Na Jesus gyaa hɔn hɔ, na ɔkɔr Ngo Bepɔw no do. Na ber a ɔko Ngo Bepɔw no do no, esuafo no baa ne nkyɛn kokoa mu, bɛsee no dɛ: Kyerɛ hɛn aber a dɛm ndzɛmba yinom a akã a ɔfa temple no na Jewfo hɔn ɔsɛɛ ho no bɛyɛ hɔ; na wo mbae nye wiadze n’ewiei ho asɛnkyerɛdze bɛyɛ dɛn, anaadɛ emumuyɛfo hɔn nsɛɛe a ɔyɛ wiadze n’ewiei no?

5 Na Jesus buae, na ɔsee hɔn dɛ: Hom nhwɛ yie amma obi aanndaadaa hom;

6 Na dodowara bɛba wɔ me dzin mu, ase dɛ—Emi nye Christ—na wɔbɛdaadaa pii;

7 Nkyii wobeyi hom ama ma wɔatsetsee hom, na woeku hom, na aman nyina bɛtan hom wɔ me dzin ntsi;

8 Na nkyii ɔbɔto dodowara fintsidua, na wobeyiyi hɔnho ama, na wɔatentan hɔnho;

9 Na nkɔnhyɛfo atorfo pii bɔsoɛr na wɔadaadaa dodowara;

10 Na osiandɛ emumuyɛ bɔdɔɔ sõ ntsi, dodowara hɔn dɔ bɛyɛ nwin;

11 Mbom nyia obetsim ekodu ewiei no, ɔno na wɔbɛgye no nkwa.

12 Dɛm ntsi, sɛ hom, hu amamfoyɛ ekyiwadze no a Daniel nkɔnhyɛnyi no kãa ho asɛm no a ɔfa Jerusalem ne nsɛɛe ho no a, hom ngyina krɔnkrɔn bea hɔ; nyia ɔkenkan no wɔmma ɔntse ase.

13 Afei wɔmma hɔn a wɔwɔ Judea nguan nkɔ mbepɔw do;

14 Wɔmma nyia ɔwɔ dan etsifi nguan, na mma ɔnnsan mmbɛfa biribiara mmfi ne fie;

15 Eso mma nyia ɔwɔ haban mu nnsan n’ekyir mmbɛfa ne tam;

16 Na hɔn a wɔafa efur, nye hɔn a wɔma enumfo wɔ da no mu no ndue;

17 Dɛm ntsi, hom nsɔr mma Ewuradze amma hom enguan ammba awɔwber mu anaa ahomgyeda;

18 Dɛm aber no, ahohiahia kɛse bɛba Jewfo, nye hɔn a wɔwɔ Jerusalem no do, dza Nyankopɔn nnsomaa mma bi mmbaa Israel do da, ofitsi hɔn ahenman n’ahyɛse dze bodu aber yi; dabida, eso ɔronnsoma mma ɔmmba Israel do bio da.

19 Ndzɛmba nyinara a aba hɔn do no yɛ awerɛhow a ɔbɛba hɔn do no n’ahyɛse.

20 Na gyedɛ wotwa nda no do tsia, annyɛ dɛm a honam biara nnkenya nkwa; mbom hɔn a wɔapamu eyi hɔn no ntsi, dɛ mbrɛ ahyɛmudzi no tse no ntsi, wobotwa dɛm nda no do tsia.

21 Hwɛ makã dɛm ndzɛmba yinom a ɔfa Jewfo no ho akyerɛ hom; na bio, dɛm nda no mu ahohiahia a ɔbɛba Jerusalem do n’ekyir no, sɛ obi se hom dɛ, Hwɛ Christ no wɔ ha, anaaso ɔwɔ hɔ no a, mma hom nngye nndzi;

22 Na dɛm nda no mu Christ atorfo nye nkɔnhyɛfo atorfo bɔsoɛr na wɔakyerɛ nsɛnkyerɛdze akɛse nye ahobowdze, ma sɛ ɔbɛyɛ a mpamufo no mpo wɔaadaadaa hɔn, hɔn a wɔapamu eyi hɔn dɛ mbrɛ ahyɛmudzi no tse no.

23 Hwɛ, mekã dɛm ndzɛmba yinom kyerɛ hom osian mpamufo no ntsi; na hom bɛtse akõkoekõ, nye akosɛm nkã; hom nhwɛ mma ɔnnhaw hom, na dza makã akyerɛ hom nyina otwar dɛ ɔba; mbom nna ewiei no nnyaa nndurii.

24 Hwɛ, makã akyerɛ hom dada;

25 Dɛm ntsi, sɛ wɔse hom dɛ: Hwɛ, ɔwɔ sar no do a; mma hom nnkɔ: Hwɛ, ɔwɔ nsumaa bea a; mma hom nngye nndzi;

26 Na dɛ mbrɛ anapa kan fi boka, na ɔhyerɛn mpo kɔ anee, na ɔkata asaase nyina do no, dɛmara na Nyimpa Ba no ne mbae no so bɛyɛ.

27 Na afei, mekã hom abɛbusɛm bi. Hwɛ, beebiara mbrɛ fun wɔ no, hɔ na nkɔr boaboa hɔn ano; dɛmara so na wɔbɔboaboa m’apamufo hɔn ano efi asaase ne mfɛndzanan nyina mu.

28 Na wɔbɛtse akõkoekõ, nye akosɛm nkã.

29 Hwɛ mekasa osian hɔn a mapamu eyi hɔn no ntsi; osiandɛ ɔman bɔsoɛr ɔman do, na ahenman asoɛr ahenman do; na ɔkɔm nye atsetsee, nye asaase wosow bɛba mbeambea.

30 Na bio, osiandɛ emumuyɛ bɔdɔɔ sõ ntsi nyimpa hɔn dɔ bɛyɛ nwin; mbom nyia wonnkedzi no do konyim no, ɔno na wɔbɛgye no nkwa.

31 Na bio, Ahenman ho Asɛmpa yi wɔbɛkã wɔ wiadze nyina mu dze edzi dase akyerɛ aman nyinara, na nkyii ewiei no bɛba, anaadɛ emumuyɛfo no hɔn nsɛɛe no;

32 Na bio, amamfoyɛ ekyiwadze no a Daniel nkɔnhyɛnyi no kãa ho asɛm no bɛhyɛ mã.

33 Na ntsɛmara nda no mu ahohiahia no ekyir no, ewia bɛhyɛ sum, na bosoom nnkɛma ne kan, na nworaba fi sor bɔtotɔ, na sor etum bɔwosow.

34 Nokwar, mese hom dɛ, ebusuasantsen yi a wɔbɛda ndzɛmba yinom edzi wɔ mu no nnkotwa mu akɔ kodu dɛ dza makã akyerɛ hom nyinara bɛhyɛ mã.

35 Ɔwɔ mu dɛ nda no bɛba a ɔsor nye asaase botwa mu akɔ; eso me nsɛm nnkotwa mu akɔ, mbom ne nyinara bɛhyɛ mã.

36 Na, dɛ mbrɛ makã dada no, dɛm nda no mu ahohiahia no ekyir no, na ɔsorsor etum bɔwosow no, nkyii na Nyimpa Ba no n’asɛnkyerɛdze bopue wɔ sor, na afei asaase do ebusuakuw nyinara botwa ewuoo; na wobohu Nyimpa Ba no dɛ ɔdze tum na enyimnyam kɛse reba wɔ sor nsuwusiw mu;

37 Na nyia ɔma m’asɛm som no bo no, wɔnnkɛdaadaa no, osiandɛ Nyimpa Ba no bɛba, na ɔdze totorobɛnto a ne ndze sõ bɔsoma n’abɔfoe no dɛ wondzi ne kan, na wɔabɔboaboa ne mpamufo no a wɔaka no efi mframa anan no mu, efi sor n’ewiei kor dze ekesi kor so.

38 Afei hom nsũa adɔmbadua ho bɛ no—Sɛ n’abaw yɛ momon, na ɔhyɛ ase dɛ oriyi ahaban a, hom nyim dɛ ɔhyewber abɛn.

39 Dɛmara so na hɔn a mapamu eyi no, ber a wobohu ndzɛmba yinom no, wobohu dɛ abɛn, edu abowano mpo.

40 Mbom ɔfa da no nye dɔn no obiara nnyim; oho, nnyɛ Nyankopɔn a ɔwɔ sor n’abɔfoe, mbom m’Egya nko.

41 Mbom dɛ mbrɛ Noah ne nda no mu no yɛe no, dɛmara so na ɔbɛyɛ wɔ Nyimpa Ba ne mbae no;

42 Na dɛmara na ɔbɛyɛ hɔn, dɛ mbrɛ nda no a odzi nsuyirii no kan no; da no ansaana Noah kɛhɛɛn hɛn-adaka no mu no nna woridzidzi na wɔronom, wɔrowarwar na wɔrema awar.

43 Nna wonnyim araa dze kodur dɛ nsuyirii no bae, bɛfaa hɔn nyinara kɔree; mbrɛ Nyimpa Ba ne mbae no bɛyɛ ara nye no.

44 Nna dza wɔakyerɛw no bɛhyɛ mã dɛ, nda a odzi ekyir no mu no nyimpa beenu wɔ haban mu a wɔbɛfa baako na woegya baako;

45 Beenu bɛyam wɔ ewuyambo do a, wɔbɛfa baako na woegya baako;

46 Na dza mekã kyerɛ kor no, mekã kyerɛ nyimpa nyinara; dɛm ntsi hom nweɔn, osiandɛ hom nnyim dɔn kor a hom Ewuradze bɛba.

47 Mbom hom nhu iyi dɛ, sɛ ofiwura no nyim dɔn kor a owifo no bɛba a, nkyɛ ɔweɔnee, na ɔamma woemmbobubu ne dan, enndua mu, mbom nkyɛ ɔyɛɛ krado.

48 Dɛm ntsi hom so hom nyɛ krado, osiandɛ dɔn a hom nnsusu mu na Nyimpa Ba no reba.

49 Woana, mbɔ, nye akowaa nokwafo na nyansafo a no wura dze no esi ne fikuw do, dɛ ɔmma hɔn edziban wɔ ber a ɔsɛ mu?

50 Nhyira akã dɛm akowaa no a, sɛ no wura ba a, obohu no dɛ ɔreyɛ dɛm; na nokwar mese hom dɛ, ɔdze no besi n’adze a ɔwɔ nyinara do.

51 Mbom sɛ dɛm akowaa bɔn no se wɔ n’akoma mu dɛ: Mo wura rikyim ne mbae,

52 Na ɔhyɛ ase bobɔ no mfɛfo-nkowaa no, na ɔnye asabokwafo dzidzi na ɔnom,

53 Akowaa no wura bɛba da a n’enyi nnda no kwan, ɔnye dɔn a onnyim mu.

54 Na obotwa no mu esinesin, na ɔama ɔnye enyidosomkyerɛfo edzi afora; na hɔ na osu nye asetwɛr wɔ.

55 Na dɛm na emumuyɛfo hɔn ewiei bɛyɛ, dɛ mbrɛ Moses no nkɔnhyɛ se: Wobotwa hɔn akyen efi nkorɔfo no mu; mbom wiadze n’ewiei no nnyae nndurii, mbom ɔbɛba ntsɛmara.