Josefa Simici—Maciu

1 Niu sa kaya vei kemudou, ni dou na sega tale ni raici au mai na gauna oqo ka lako yani ka kila ni sai au era sa vola kina na parofita, me yacova ni dou sa kaya: Sa kalougata ko koya sa lako mai ena yaca ni Turaga, ena o ni lomalagi, kei ira kecega na agilosi tabu vata kaya. Era sa qai kila na nona tisaipeli ni na lako tale mai ki vuravura ko koya, io ni sa rawata na lagilagi kei na isala vakatui ena liga imatau ni Kalou.

2 A sa curu yani ko Jisu, ka lako tani mai na valetabu; a ra sa lako mai na nona tisaipeli, me ra rogoci koya, ka ra kaya: Turaga, ni vakamacalataka vei keitou na veika e baleta na valetabu, me vaka ko sa kaya kina—Era na talaraki sobu kecega, ka biu tu vei kemudou ni ra sa lala.

3 A sa kaya vei ira ko Jisu: Dou sa sega ni raica na ka kecega oqo, ka dou sa sega beka ni kila ne? Au sa kaya vakaidina vei kemudou, ena sega tale ni vo eke, ena valetabu oqo, e dua na vatu sa taqa toka ena delana e dua tale ka na sega ni talaraki.

4 A sa biuti ira ko Jisu, ka lako ki na Ulunivanua ni Veiolive. Ia ni sa tiko sobu mai na Ulunivanua ni Veiolive, era sa lako vuni vua na tisaipeli, ka kaya: Ni tukuna mai vei keitou se na yaco ni naica na veika ko ni sa tukuna me baleta na vakarusai ni valetabu, kei ira na Jiu; ia ka cava na ivakatakilakila ni nomuni lako mai, kei na ivakataotioti kei vuravura, se na nodra vakarusai tale ga na dau caka ca, io na ivakataotioti kei vuravura.

5 A sa vosa ko Jisu, ka kaya vei ira: Dou qarauni kemudou vinaka me kakua ni vakacalai kemudou e dua na tamata.

6 Ni na lewe vuqa era na lako mai ka kaya ni ra sa lako mai ena yacaqu, ka kaya—Koi au na Karisito—Ia e lewe vuqa era na vakacalai.

7 Era na qai soli kemudou yani mo dou vakararawataki, ka ra na vakamatei kemudou, ia era na cati kemudou na lewe ni veivanua kecega, ena vuku ni yacaqu.

8 Raica era na lewe vuqa era na tarabe, ka veivakaraitaki vakataki ira, ka ra veicati vakataki ira.

9 Ena lewe vuqa tale ga na parofita vakailasu ena tubu cake mai, ka lewe vuqa era na vakacalai kina.

10 Ia ni sa tubu vakalevu na caka ca, ena batabata mai na nodra loloma na lewe vuqa;

11 Ia ko koya sa tudei tiko ga ka sega ni rawai, ena vakabulai.

12 Ia ni dou sa raica sa yaco na ka vakasisila sa dauveivakarusai a tukuna ko Taniela na parofita, me baleta na vakarusai kei Jerusalemi, mo dou tudei ga ena veivanua tabu; o koya sa wilika me kila sara.

13 Ia me ra dro ki na veiulunivanua ko ira sa tiko mai Jutia.

14 Me dro ga ko koya sa tiko e dela ni vale, ka kakua ni lako sobu me kauta tani e dua na ka mai na nona vale.

15 Me kakua tale ga ni lesu ko koya sa tiko ena were me kauta na nona isulu.

16 Ena ca vei ira sa bukete, kei ira sa vakasucuma na gone ena gauna ko ya!

17 O koya, mo dou masuta na Turaga me kakua ni yaco na gauna ni nomudou dro ena vula i liliwa, se ena siga ni Vakacecegu.

18 Ia ena gauna ko ya, ena levu sara na rarawa vei ira na Jiu, kei ira na lewei Jerusalemi, raica e sa sega mada ni vakayacora vakaoqo na Kalou vei ira na Isireli, mai na itekivu ni nodra matanitu me yacova na gauna oqo; ia ena sega ni vakayacori tale vakakina e muri, vei ira na Isireli.

19 Ia na ka kecega sa yaco vei ira, sa itekivu walega ni veika rarawa era na sota kaya.

20 Ia kevaka sa sega ni vakalekalekataki na gauna ko ya, ena sega na tamata ena bula rawa; ia ena vukudra o ira sa digitaki, me vaka na veiyalayalati, ena vakalekalekataki na gauna ko ya.

21 Raica, na veika au sa tukuna oqo vei kemudou me baleti ira na Jiu; ia kei na dua tale, ni sa oti na siga ni veivakararawataki ko ya vei ira mai Jerusalemi, kevaka e dua na tamata e qai tukuna vei kemudou, Raica, oqo na Karisito, se oya, dou kakua sara ni vakabauti koya;

22 Ni na tubu mai ena veisiga oqori na Karisito vakailasu, kei na parofita vakailasu, ka ra na vakatakila na ivakatakilakila kei na ka veivakurabuitaki lelevu, ka na rawa kina me ra vakacalai ko ira sa digitaki, ko ira era sa digitaki me vaka na veiyalayalati.

23 Raica, au sa tukuna vei kemudou na veika oqo ena vukudra na tamata digitaki; ia dou na rogoca na ivalu kei na irogorogo ni valu; ia mo dou kakua ni kidroa kina, ni sa kilikili me yaco na veika kece au a tukuna vei kemudou; ia e sa bera ga na ivakataotioti.

24 Raica, au sa tukuna oti e liu vei kemudou.

25 Ia, kevaka era sa kaya vei kemudou: Raica, sa tiko ko koya mai na vanua dravuisiga; Dou kakua sara ni lako kina: Raica sa tiko ko koya mai loqi; Dou kakua sara ni vakabauta;

26 Ia me vaka sa cila mai na rarama ni mataka mai na tokalau, ka serau yani ki na ra, ka ubia na vuravura kecega, sa na vakatale ga kina na nona lako mai na Luve ni Tamata.

27 Ia oqo au sa tukuna vei kemudou e dua na italanoa vakaibalebale. Raica na yasana sa koto kina na yago, era na soqoni vata kina na ikeli; era na vakatale ga kina na noqu tamata digitaki ni ra na soqoni vata mai na yasai vuravura e va.

28 Ia era na rogoca na ivalu kei na irogorogo ni valu.

29 Raica au sa vosa ena vukudra na noqu tamata digitaki; ena veibolebolei na veimatanitu, kei na veivanua; ena yaco tale ga na dausiga, kei na mate dauveitauvi, na tavuki ni vanua, ena yasana e vuqa.

30 Kei na dua tale, ni sa tubu vakalevu na ivalavala ca, sa na batabata mai na nodra loloma na tamata; ia ko koya sa tudei tiko ga ka sega ni rawai, ena vakabulai.

31 Kei na dua tale, ena vunautaki mada e vuravura taucoko na Kosipeli oqo ni Matanitu, me ivakadinadina ki na veivanua kecega, sa na qai yaco mai na ivakataotioti, se na nodra vakarusai na tamata dau caka ca.

32 Ia ena qai yaco tale na ka vakasisila sa dau veivakarusai, a tukuna ko Taniela na parofita.

33 Ia ni sa oti mada na gauna rarawa ko ya, ena qai vakabutobutotaki na matanisiga, ia ena sega tale ga ni cila na rarama ni vula, ka na lutu mai lomalagi na veikalokalo, ka na yavalati na veikaukauwa vakalomalagi.

34 Au sa kaya vakaidina vei kemudou, ena sega mada ni se takali yani na itabatamata ka na vakatakilai kina na veika oqo, me yacova ni sa vakayacori taucoko na veika au sa tukuna vei kemudou.

35 E dina, ena yaco mai na siga me takali ko lomalagi kei vuravura, ia na noqu vosa ena sega ni takali, ena yaco kece mada ga.

36 Ia, me vaka au sa tukuna oti, ni sa oti na rarawa ni veisiga ko ya, ka yavalati na veikaukauwa vakalomalagi, ena qai rairai mai na ivakatakilakila ni Luve ni Tamata mai lomalagi; era na tagi na mataqali vakayadua ga e vuravura; ka ra na qai raica na Luve ni Tamata ni sa lako mai ena veio ni lomalagi, ena kaukauwa kei na lagilagi cecere;

37 Ia ko koya sa tugana na noqu vosa, ena sega ni vakacalai, ni na lako mai na Luve ni Tamata, ka na talai ira mai e liu na nona agilosi kei na davui sa rogo levu, ia era na qai vakasoqoni ira vata na vo ni nona tamata digitaki mai na mata ni cagi e va, mai na vu ni lomalagi e dua ka yacova na vu ni lomalagi kadua.

38 Mo dou kila mada na vosa vakatautauvata ni vunilolo—Ni sa qai lavouvou na tabana ka sa tubu na drauna, dou sa kila kina ni sa voleka na vulaikatakata;

39 Sa vakakina, ko ira na noqu digitaki, ni ra sa raica na veika oqo, era sa na kila ni sa voleka ko koya, io mai na mata ni katuba.

40 Ia na siga ko ya, kei na tiki ni auwa, sa sega e dua e kila; e sega sara, e sega ko ira na agilosi ni Kalou mai lomalagi, ia na Tamaqu duadua ga.

41 Ia me vaka na siga i Noa, ena vakatale ga kina na nona lako mai na Luve ni Tamata;

42 Ni na yaco vei ira, me vaka na veisiga ni sa bera na waluvu; me yacova na siga sa vodo kina ki waqa ko Noa era a kana ka gunu, ka vakawati ka veimusumusuki me ra vakawati;

43 A ra sa sega mada ni kila me yacova ni sa yaco mai na waluvu, ka kauti ira kece yani; sa na vakatale ga kina na nona lako mai na Luve ni Tamata.

44 Sa na qai vakayacori kina na veika sa volai, ni na yaco ena veisiga mai muri, raica ena lewe rua sa tiko ena were, ena kau tani e dua, ka biu e dua;

45 Ena lewe rua erau qaqi sila, ena kau tani e dua, ka biu e dua;

46 Ia na ka au sa tukuna vua e dua, au sa tukuna ki na tamata kecega; mo dou vakatawa, ni dou sa sega ni kila na tiki ni siga sa lako mai kina na nomudou Turaga.

47 Ia mo dou kila ga oqo, kevaka e kila na itaukei ni vale na tiki ni bogi ena lako mai kina na daubutako, ena vakatawa ga ka sega ni biuta na nona vale me ravabasuki, io sa na vakarau tu.

48 O koya mo dou qai vakarau talega koi kemudou, ni, ena gauna dou sa sega ni nanuma kina, ena qai lako mai na Luve ni Tamata.

49 Ko cei, na tamata yalodina ka vuku, sa lesia na nona turaga me lewai ira na nona lewe ni vale me solia vei ira na kedra ena kena gauna dodonu?

50 Sa kalougata na tamata ko ya, ni na lako mai na nona turaga ka kunei koya ni sa kitaka vakakina; kau sa kaya vakaidina vei kemudou, ena lesi koya me lewa na nona ka kecega.

51 Ia kevaka ena kaya e lomana na tamata ca ko ya: Sa vakaberaberataka na nona lako mai na noqu turaga,

52 Ia sa vakatekivu kina me yaviti ira na nona itokani, ka sa kana ka gunu vata kei ira na daumateni.

53 Ena lako mai na turaga ni tamata ko ya ena siga sa sega ni vakasaqarai koya kina, kei na tiki ni auwa e sega ni kila kina.

54 Ena qai varo musuka rua, ka vota vua me vakaivotavota vata kei ira na dauveivakaisini; io ena dautagi kina ka vakasequruqurubati.

55 A sa vakaoqo na nodra icavacava na daucaka ca, me vaka na parofisai nei Mosese, ka kaya: Era na muduki tani mai vei ira na tamata; raica e sa bera ga na ivakataotioti kei vuravura, ia ena qai yaco mai.