Veitikina Digitaki Eso mai na
iVola i Mosese

1 Na vosa ni Kalou, ka a tukuna vei Mosese ena gauna a kau cake kina ki na dua na ulunivanua cecere sara.

2 Ka sa raica na Kalou ena matana votu, ka rau veivosaki kaya, a sa tiko vei Mosese na lagilagi ni Kalou; o koya sa rawa kina vei Mosese me tiko ena kena iserau.

3 Ka sa vosa vei Mosese na Kalou, ka kaya: Raica sai Au na Turaga na Kalou Kaukauwa, na yacaqu ko Tawacava; ni sa sega na Noqu itekitekivu ni veisiga se na icavacava ni veiyabaki; e sega beka ni tawacava oqo?

4 Ia, raica, ko iko na luvequ; ia mo raica mada, kau na vakaraitaka vei iko na cakacaka ni ligaqu; ia e sega ni o koya kece, ni sa sega ni vakaiyalayala na noqu cakacaka, sa vakakina na noqu vosa, ni ra sa sega ni mudu.

5 O koya sa sega kina ni dua na tamata sa raica rawa na noqu cakacaka kecega, vakavo kevaka sa raica na taucoko ni noqu lagilagi; ia sa sega e dua na tamata sa raica rawa na taucoko ni noqu lagilagi, ka me qai vakayago tiko ga e vuravura.

6 Ia i Mosese na luvequ; au na solia vei iko e dua na cakacaka, raica ko sa tautauvata kei koya na noqu Le Duabau ga; ia na noqu Le Duabau ga sai koya na iVakabula; ni sa sinai ena loloma soli wale kei na dina; raica sa sega tale na Kalou koi au ga, niu sa kila ka raica na ka kecega.

7 Ia oqo, raica, au na vakaraitaka vei iko e dua na ka, I Mosese na luvequ, ni ko sa tiko e vuravura, au sa na vakaraitaka vei iko.

8 Ka sa yaco ni sa rai yani ko Mosese, ka raica na vuravura a buli kina; ka sa raica ko Mosese na vuravura kei na kena iyalayala, kei ira kecega na luve ni tamata era sa tiko kina, kei ira era a buli kina; a sa kurabui ka qoroqoro vakalevu kina ko koya ena vukudra.

9 A sa lako tani vei Mosese na iserau ni Kalou, ka sega kina ni tiko kei Mosese na nona lagilagi; ka sa tu ga kina vakataki koya ko Mosese. Ia ni sa tiko duadua ga, sa bale sobu ki na qele.

10 Ka sa yaco ni sa oti mada e vica na auwa sa qai kilai yalona ka kaukauwa tale ko Mosese me vaka e dua na tamata; a sa kaya vakataki koya: Ia ena vuku ni ka oqo au kila kina ni sa ka wale ga na tamata, oqo na ka au a sega sara tu ga ni kila.

11 Ia oqo sa raica vakaidina na Kalou na mataqu; ia e sega ni mataqu vakayago, na mataqu vakayalo ga, ni na sega ni rawa ni raica na mataqu vakayago; ni’u na malai ga ka mate ena kena iserau; ia sa tu vata kei au na nona lagilagi; kau sa raica na kena irairai, niu sa vakamataliataki e matana.

12 Ka sa yaco ni sa cavuta oti na veivosa oqo ko Mosese, raica, sa lako mai ko Setani ka vakatovolei koya, ka kaya: I Mosese na luve ni tamata; mo qaravi au.

13 Ka sa yaco ni sa raici Setani yani ko Mosese ka kaya: Ko cei ko iko? Raica koi au oqo e dua na luve ni Kalou; ka’u sa tautauvata kei koya na nona Le Duabau ga; evei na nomu lagilagi, meu qaravi iko kina?

14 Raica, sa sega ni rawa meu raica na Kalou, vakavo kevaka sa tu vei au na nona lagilagi, kau vakamataliataki e matana. Ia sa rawa vei au meu raici iko ena mataqu vakayago. Vakaevei au lasu li?

15 Me vakarokorokotaki ga na yaca ni noqu Kalou, ni sa sega ni lako tani vakadua sara vei au na Yalona, se evei na nomu lagilagi, ni sa butobuto vei au! Sa rawa me’u kila na kemudrau duidui kei na Kalou; ni sa kaya vakaoqo vei au na Kalou: Mo vakarokoroko vua na Kalou, ia mo qaravi Koya duadua ga.

16 Mo lako tani vei au Setani; kakua ni mai vakatovolei au; raica sa kaya vakaoqo vei au na Kalou: Ko sa tautauvata kei koya na noqu Le Duabau ga.

17 Sa solia talega vei au ko Koya na ivakaro ni sa kacivi au mai na veikau sa kama ka kaya: Mo masuta na Kalou ena yacana na noqu Le Duabau ga, ka qaravi au.

18 Ka sa kaya tale ko Mosese: Au na sega ni guce ena masuta na Kalou; raica sa tu tale eso na ka me’u taroga vua: ni sa tiko vata kei au na nona lagilagi, o koya au sa kila kina na kemu duidui mai vua. Mo lako tani yani Setani.

19 Ia oqo, ni sa cavuta oti ko Mosese na veivosa oqo, sa qolou vakadomoilevu ko Setani, ka karalaki e vuravura, ka veivakaroti, ka kaya: Sai au na Le Duabau Ga, qaravi au.

20 Ka sa yaco ni sa tekivu me rere vakalevu sara ko Mosese; ia ni sa tekivu me rere, sa raica na wiwi kei eli. Ia ni sa masuta tikoga na Kalou sa soli vua na kaukauwa, ka sa vakaroti Setani ka kaya: Mo lako tani vei au, Setani, ni sai koya ga na Kalou oqo au na qarava, ko koya na Kalou ni lagilagi.

21 Ia oqo sa tekivu me sautaninini ko Setani, ka sa sakure ko vuravura; sa rawata ko Mosese na kaukauwa, ka masuta na Kalou, ka kaya: Ena yacai Koya na Le Duabau ga, Setani mo lako tani eke!

22 Ka sa yaco ni sa qoqolou ena domo levu ko Setani, sa tagi, ka tagiyaso ka vakasequruqurubati; a sa lako tani sara mai kea, io mai na iserau kei Mosese, me sega tale ni raici koya.

23 Ia, na veika oqo sa vola tu na kena itukutuku ko Mosese; ia ena vuku ni caka ca sa sega kina ni tu ena kedra maliwa na luve ni tamata.

24 Ka sa yaco ni sa lako tani ko Setani mai na iserau kei Mosese; a sa tacake e matana ki lomalagi ko Mosese, ni sa vakasinaiti ena Yalo Tabu, o koya sa tukuna na Tamada kei na Luvena.

25 Ia ni sa masuta tiko na yaca ni Kalou, sa raica tale na nona lagilagi, ni sa tiko vua; ka sa rogoca e dua na domo, sa kaya: Ko sa kalougata Mosese, niu sa digitaki iko, koi Au, na Kaukauwa, ia ko na kaukauwa cake ka malumalumu na wai e vuqa; ni ra na muria na nomu ivakaro me vaka ni ko iko beka na Kalou.

26 Ia raica, au na tiko vata kei iko, io me yacova ni sa cava na nomu veisiga; ni ko na sereki ira na noqu tamata mai na veivakabobulataki, io ko Isireli na noqu digitaki.

27 Ka sa yaco, ni se vosa tikoga na domo, sa rai yani ko Mosese ka raica na vuravura, io, ena kena taucoko; ka sa sega sara ni dua na tikina lailai mada ga e sega ni raica, ka kila ena Yalo ni Kalou.

28 Ka sa raici ira taucoko talega na lewena, ka sega sara e dua me sega ni raica; ka kilai ira ena Yalo ni Kalou; sa vuqa sara na kedra iwiliwili, io sa sega ni wiliki rawa me vaka na nuku ni matasawa.

29 Ka sa raica e vuqa na vanua; ia na vanua yadua oqori sa vakatokai me vuravura, a ra sa tawani kece tu.

30 Ka sa yaco ni sa masuta na Kalou ko Mosese, ka kaya: Au sa kerei kemuni mo ni tukuna vei au na ibalebale ni veika oqo, ia ena cava ko ni sa buli ira kina.

31 Ia raica, sa tiko vei Mosese na lagilagi ni Turaga, me tu rawa kina ko Mosese ena iserau ni Kalou, ka veivosaki vata kaya e matana votu. A sa kaya vei Mosese na Turaga na Kalou: Au sa cakava na veika oqo ena noqu inaki ga vakataki au. Sai koya oqo na vuku me se tei toka mada ga vei au.

32 Ia ena vosa ni noqu kaukauwa, au sa buli ira kina, sai koya na noqu Le Duabau Ga, o koya sa sinai ena loloma soli wale kei na dina.

33 Raica au sa bulia e vuqa na vuravura sa sega ni wili rawa; kau sa buli ira talega ena noqu inaki vakataki au; ia mai vua na luvequ au sa buli ira, ko koya na noqu Le Duabau Ga.

34 Ia au sa vakatoka na imatai ni tamata ko Atama; a kena ibalebale na lewe vuqa.

35 Ia au sa tukuna wale ga vei iko e dua na itukutuku ni vuravura oqo, kei ira na lewena. Raica, e vuqa na vuravura era sa takali yani ena vosa ni noqu kaukauwa. Ka vuqa tale era sa tu oqo, ka ra sega ni wilika rawa na tamata; ia na veika kece oqo au sa kilai ira, ni ra sa noqu kau kilai ira.

36 Ka sa yaco ni sa vosa ko Mosese vua na Turaga, ka kaya: Oi kemuni na Kalou, mo ni lomana na nomuni tamata, ka tukuna mai vei au na veika e baleta na vuravura oqo, kei ira na lewena, kei na lomalagi talega, ia ena qai vakacegu na nomuni tamata.

37 Ka sa qai vosa vei Mosese na Turaga na Kalou, ka kaya: Sa vuqa tu na lomalagi, ka ra sa sega ni wilika rawa na tamata; ia au sa kilai ira kecega, ni ra sa noqu.

38 Ia ni sa takali yani e dua na vuravura, kei na kena lomalagi, sa na yaco tale ga mai vakakina e dua; ka sa sega kina ni cava na noqu cakacaka, ka sega vakakina na noqu vosa.

39 Ia raica, oqo na noqu cakacaka kei na noqu lagilagi—meu vakavuna na tawa mate rawa kei na bula tawamudu ni tamata.

40 Ia oqo, i Mosese na luvequ, au sa na tukuna vei iko na veika e baleta na vuravura ko tiko kina oqo; ia mo na vola na veika kece au na tukuna vei iko.

41 Ia ena dua na siga ni ra sa vakawalena na luve ni tamata na noqu vosa ka kauta tani e vuqa mai na ivola ko na vola, raica au na vakatubura cake e dua tale vakataki iko; ka ra na qai mai tu tale ena kedra maliwa na luve ni tamata—ena kedra maliwa ko ira kecega era na vakabauta.

42 (Oqo na vosa a tukuni vei Mosese ena ulunivanua, na yacana era na sega ni kila na luve ni tamata. Ia oqo sa tukuni vei iko. Kakua ni vakaraitaka vua e dua ia ki vei ira ga era sa vakabauti iko. Io sa vakakina. Emeni.)