1 Ha ojehu Ñandejára oñeʼẽkuri Moisés-pe, heʼívo: Péina ápe, Che aikuaauka ndéve ko yvága ha ko yvy rehegua; ehai umi ñeʼẽ Che haʼéva. Che haʼe pe iñepyrũmby ha Ipaha, pe Tupã Ipuʼakapáva; che Unihénito rupive Che ajapovaʼekue koʼã mbaʼe; héẽ, iñepyrũme Che ajapovaʼekue yvága ha yvy reñemboʼyha ári.

2 Ha yvy isarambipa ha nandi; ha Che ajapókuri tou ypytũ pe y pypuku ape ári; ha che Espíritu oñemomýikuri upe y ape ári; Che haʼégui Tupã.

3 Ha Che, Tupã, haʼékuri: Toiko tesape; ha oikókuri tesape.

4 Ha Che, Tupã, ahecha tesape; ha iporãha pe tesape. Ha Che, Tupã, amboyke tesape umi pytũmby apytégui.

5 Ha Che, Tupã, ambohéra tesape Ára; ha umi pytũmbýpe Che ahenói Pyhare; ha kóva ajapo che pokatu ñeʼẽ rupive, ha ojejapo Che haʼe haguéicha; ha haʼevaʼekue kaʼarupytũ ha pyhareve ára peteĩháme.

6 Ha jeyve, Che Tupã, haʼékuri: Toiko peteĩ arapy pe y mbytépe; ha oiko, upe Che haʼe haguéicha; ha Che haʼékuri: Toñembojaʼo umi y ykuéragui; ha upéicha oiko;

7 Ha Che, Tupã, ajapókuri arapy ha ambojaʼo ykuéra; héẽ, umi y guasu arapy guypegua, umi y oĩvagui arapy ári; ha oiko, upe Che haʼe haguéicha.

8 Ha Che, Tupã, ambohéra pe arapy Yvága; ha haʼékuri kaʼaru ha pyhareve ára mokõiháme.

9 Ha Che, Tupã, haʼékuri: Toñembyaty peteĩ hendápe umi y oĩva yvága guýpe, ha oiko; ha Che, Tupã, haʼékuri: tojehecha umi yvy ikãva; ha oiko.

10 Ha Che, Tupã, ahenói ikãva pe Yvy; ha umi y ñembyatýpe Che ahenói Yguasu; ha Che, Tupã, ahecha opa mbaʼe Che ajapovaʼekue iporãha.

11 Ha Che, Tupã, haʼékuri: Pe yvy tomoheñói kapiʼi, ha pe kaʼavo tomeʼẽ yvaraʼỹi, pe yvyramáta hiʼáva tomeʼẽ yva, heseguáicha, ha pe yvyramáta taʼiha, ijyvaraʼỹi haʼỹiva ijehegui yvy ári; ha oiko, Che haʼe haguéicha.

12 Ha pe yvy omoheñói kapiʼi, opa kaʼavo omeʼẽva yvaraʼỹi hesegua, ha pe yvyramáta hiʼáva, yvaraʼỹi oĩtava ipype, heseguáicha; ha Che, Tupã, ahechákuri opa mbaʼe Che ajapovaʼekue iporãha.

13 Ha haʼékuri kaʼaru ha pyhareve ára mbohapyhápe.

14 Ha Che Tupã, haʼékuri: Toiko tesape yvága arapýpe, ombojaʼo hag̃ua ára pyharégui, ha tahaʼe umi techaukaha, ha umi arajere, ha arakuéra, ha añokuéra;

15 Ha tahaʼe ohesapévaramo yvága arapýpe, ohesape hag̃ua pe yvy; ha oiko.

16 Ha Che, Tupã, ajapovaʼekue mokõi tesape guasu; tesape tuichavéva oisãmbyhy hag̃ua ára, ha tesape michĩvéva oisãmbyhy hag̃ua pyhare, ha tesape tuichavéva haʼékuri kuarahy, ha tesape michĩvéva haʼékuri jasy; ha ojejapókuri avei mbyjakuéra jepe che ñeʼẽ heʼiháicha.

17 Ha Che, Tupã, amoĩkuri umíva yvága arapýpe ohesape hag̃ua yvy,

18 Kuarahy oisãmbyhy hag̃ua ára, ha jasy oisãmbyhy hag̃ua pyhare, ha oñembojaʼo hag̃ua tesape pytũmbýgui; ha Che, Tupã, ahecha opa mbaʼe Che ajapovaʼekue iporãha;

19 Ha haʼékuri kaʼaru ha pyhareve ára mbohapyhápe.

20 Ha Che, Tupã, haʼékuri: Tomoheñói ykuéra heta mymba omýiva ha oikovéva, ha guyrakuéra ovevéva yvy ári yvagagua arapy guasúpe.

21 Ha Che, Tupã, ajapókuri umi valléna tuicháva, ha opa tekove oikove ha omýiva, heseguáicha, umi ykuéra heta omoheñóiva, ha opa guyra ipepóva, heseguáicha; ha che, Tupã, ahecha opa mbaʼe Che ajapovaʼekue iporãha.

22 Ha Che, Tupã, ahovasákuri umívape, haʼévo: Penereñói ha peñemboheta, ha pemyenyhẽ yguasugua ykuéra; ha toñemboheta guyrakuéra yvy ári;

23 Ha haʼékuri kaʼaru ha pyhareve ára kíntope.

24 Ha Che, Tupã, haʼékuri: Tomoheñói yvy umi mymba oikovéva heseguáicha: mymbaʼatýva ha umi otyryýva, ha umi tymba yvy arigua, heseguáicha, ha oiko;

25 Ha Che, Tupã, ajapókuri umi tymba yvy arigua heseguáicha, ha mymbaʼaty heseguáicha, ha opa otyryrýva yvy ári, heseguáicha; ha Che, Tupã, ahecha opa koʼã mbaʼe iporãha.

26 Ha Che, Tupã, haʼékuri che Unihénitope, pe oikovaʼekue chendive iñepyrũmby guive: Jajapo kuimbaʼe ñane raʼangáicha, ñandeichagua; ha oiko. Ha Che Tupã, haʼékuri: Taipuʼaka umi pira yguasupeguáre, guyrakuéra yvytupeguáre, mymbaʼatýre, opa yvy ári ha opa mymba yvy ári otyryrývare.

27 Ha Che, Tupã, ajapókuri yvypórape che raʼangáicha, che Unihénito raʼangáicha ajapókuri chupe; kuimbaʼe ha kuña Che ajapo chupekuéra.

28 Ha Che, Tupã, ahovasa umíva ha haʼe chupekuéra: Penereñói ha peñemboheta, ha pemyenyhẽ yvy ha pemoĩ pende poguýpe; ha pende puʼaka pirakuéra ypeguáre, guyrakuéra yvytupeguáre, ha opa mbaʼe oikovéva omýiva yvy árire.

29 Ha Che, Tupã, haʼékuri yvypórape: Péina ápe, Che ameʼẽkuri ndéve opa kaʼavo omeʼẽva yvaraʼỹi, oĩva opa yvy ape ári, ha opa yvyramáta oĩtahápe upe yva omeʼẽva yvaraʼỹi; haʼéta tembiʼu ndéve g̃uarã.

30 Ha opa ñumegua mymbakuérape, ha opa guyra yvytureguápe, ha opa mymba otyryrývape yvy ári, umi Che ameʼẽvape tekove, oñemeʼẽta opa kaʼavo ipotĩva tembiʼurã; ha oiko Che amanda haguéicha jepeve.

31 Ha Che, Tupã, ahechákuri opa mbaʼe Che ajapovaʼekue, ha péina ápe, opa mbaʼe Che ajapovaʼekue iporãitereíkuri; ha haʼékuri kaʼaru ha pyhareve ára sexto-pe.