1 Ha Che, Tupã Ñandejára, añeʼẽkuri Moisés-pe, haʼévo: Pe Satana, nde remandavaʼekuépe che Unihénito rérape, haʼe pe oĩvaʼekue iñepyrũmby guive, ha ouvaʼekue che renondépe heʼívo—Péina ápe, kóina aime Che, chemondo chéve, che haʼéta nde raʼy, ha arredimíta opa yvypórape, ha noñehundimoʼãi ni peteĩ ánga, ha katuete ajapóta; upévare emeʼẽ chéve ndererakuãporã.

2 Ha katu, péina ápe, che Raʼy Ahayhuetéva, haʼéva che Ahayhuetéva ha Aiporavovaʼekue iñepyrũmby guive, heʼi chéve: Túva, tojejapo ne rembipota, ha tanembaʼe upe glória akoiete g̃uarã.

3 Upévare, Satana oñemoĩ rupi cherehe, ha ohundise yvypóra sãso oiporavo hag̃ua, Che, Tupã Ñandejára, ameʼẽvaʼekue chupe, ha avei oipota ameʼẽ chupe che pokatu tee; Che aityukákuri chupe iguýpe, che Unihénito pokatu rupive;

4 Ha oiko chugui Satana, héẽ, jepeve upe aña, opa japu moñepyrũhare, ombotavyy ha ombohechaʼỹ hag̃ua yvypórape, ha ogueraha hag̃ua chupekuéra ñeñapytĩmby haʼe oipotaháicha, jepeve opa umi nohenduséivape che ñeʼẽpu.

5 Ha koʼág̃a, pe mbói haʼevevékuri oimeraẽ mymba ñumeguágui, Che, Tupã Ñandejára ajapovaʼekuégui.

6 Ha Satana omoĩkuri upéva pe mbói korasõme, (hetápe haʼe ogueraháguikuri hapykuéri), ha oñehaʼã avei ombotavy Eva-pe, haʼe ndoikuaáigui Tupã akãmegua, upévare oñehaʼã ohundi múndo.

7 Ha haʼe heʼi upe kuñáme: Héẽ, Tupã heʼiraʼe—Ndereʼumoʼãi opa yvotytygua yvyramátagui? (Ha haʼe oñeʼẽkuri pe mbói juru rupive).

8 Ha pe kuña heʼi mbóipe: Ikatu roʼu umi yvyramataʼa yvotytypeguágui;

9 Ha katu pe yvyramataʼa rehechávare yvotyty mbytépe, Tupã heʼivaʼekue: Ndereʼumoʼãi kóvagui, ni nderepokomoʼãi hese, ani mbaʼe pemano.

10 Ha mbói heʼi kuñáme: Añetehápe neremanomoʼãi;

11 Tupã oikuaágui ára peʼu vove upévagui, pejehesapeʼáta, ha haʼéta umi tupãicha, peikuaávo iporãva ha ivaíva.

12 Ha kuña ohechávo pe yvyramáta iporãha ojeʼu hag̃ua, ha ombovyʼaha umi tesa, ha peteĩ yvyramáta ipotapýva omoarandu hag̃ua chupe, ojapyhy hiʼágui ha hoʼu, ha omeʼẽ avei iménape, ha haʼe hoʼu hendive.

13 Ha mokõivéva ojesapeʼa, ha ohechakuaa hikuái ijopivoha hikuái. Ha ombovyvy hikuái igéra rogue ha ojapo aotenondegua ijupe g̃uarã.

14 Ha ohendu hikuái Tupã Ñandejára ñeʼẽpu, oguatávo hikuái yvotytýre ára piroʼýpe; ha Adán ha hembireko oho okañy Tupã Ñandejára renondégui umi yvyramáta yvotytygua apytépe.

15 Ha Che, Tupã Ñandejára, ahenói Adán-pe ha haʼe chupe: Moõ reho?

16 Ha haʼe heʼi: Ahendu ne ñeʼẽpu yvotytýpe ha akyhyje, ahechágui che opivoha, ha akañy.

17 Ha Che, Tupã Ñandejára, haʼe Adán-pe: Máva heʼi ndéve ndeopivoha? Reʼúparaʼe yvyramáta Che amandavaʼekuégui ndereʼuivaʼerãha, upéicharamo katuete remanotaha?

18 Ha pe kuimbaʼe heʼi: Pe kuña nde remeʼẽvaʼekue chéve, ha remandavaʼekue opytavaʼerãha chendive, omeʼẽ chéve pe yvyramataʼa ha che haʼu.

19 Ha Che, Tupã Ñandejára, haʼékuri kuñáme: Mbaʼépa ko mbaʼe rejapovaʼekue? Ha kuña ombohovái: Mbói chembotavy, ha che haʼu.

20 Ha Che, Tupã Ñandejára, haʼe mbóipe: Kóva rejapo haguére, neñeʼẽngáita opa mymbaʼaty ha opa ñumegua mymba ári; nde rye ári retyryrýta ha yvytimbo reʼúta opa nde rekove aja;

21 Ha Che amoĩta jejaʼeʼỹ nde ha kuña mbytépe, ne ñemoñare ha iñemoñare mbytépe; ha haʼe ne akã jopýta ha nde rejopýta ipyta.

22 Kuñáme, Che, Tupã Ñandejára, haʼe: Tuicha ambohetáta ne mbaʼerasy nememby hag̃ua. Tasýpe nemembýta umi mitã, ha ndepotapy haʼéta ne ménape g̃uarã, ha haʼe neisãmbyhýta;

23 Ha Adán-pe, Che, Tupã Ñandejára, haʼe: Rehendu haguére ne rembireko ñeʼẽpu, ha reʼúgui upe yvyramataʼa Che amandavaʼekuégui ndéve, haʼévo—kóvagui ndereʼumoʼãi, nde rupi oñemoñeʼẽngáita yvy; ñembyasýpe reʼúta chugui opa reikove aja pukukue.

24 Umi ñuatĩ avei, ha karaguata omoheñóita ndéve, ha reʼúta ñumegua kaʼavo.

25 Nde syva ryʼáire reʼúta pe mbujape, rejevy jey peve yvýpe—añetehápe remanótagui—ichugui ningo reñeguenohẽvaʼekue: yvytimbóguikuri nde, ha yvytimbópe reho jeýta.

26 Ha Adán ohenói Eva hembirekópe, haʼégui haʼe opa oikovéva sy; upéicha Che, Tupã Ñandejára, ahenoivaʼekue opa kuña motenonondeha, hetáva hikuái.

27 Adán-pe g̃uarã ha avei hembirekópe g̃uarã, Che, Tupã Ñandejára, ajapókuri mymba pirekuégui ijaorã, ha amonde chupekuéra.

28 Ha Che, Tupã Ñandejára, haʼékuri che Unihénitope: Péina ápe, pe kuimbaʼe ñandeichaguáma, oikuaávo iporãva ha ivaíva; ha koʼág̃a, anítei oipyso ijyva ha hoʼu avei upe tekove yvyramátagui, ha hoʼu ha oikove akoiete g̃uarã,

29 Upévare, Che, Tupã Ñandejára, aguenohẽta chupe Jardín de Edén-gui, oñemitỹ hag̃ua yvy haʼe oñeguenohẽ haguégui;

30 Che aikoveháicha, heʼi Tupã Ñandejára, jepeve umi che ñeʼẽ ndopareimoʼãi, osẽháicha umíva che jurúgui, oñekumplivaʼerã.

31 Upéicha Che amosẽ yvypórape, ha amoĩ Jardín de Edén kuarahyresẽme, keruvĩ ha peteĩ kysepuku hendypáva, ojeréva opárupi, oñongatu hag̃ua tekove yvyramáta rape.

32 (Ha koʼãva haʼe umi ñeʼẽ Che haʼevaʼekue che rembiguái Moisés-pe, ha koʼãva añetegua, jepeve Che aipotaháicha; ha Che haʼékuri ndéve. Emaʼẽke ani rehechauka mavavépe, ndahaʼéirõ umi oguereviávape, Che amanda peve ndéve. Amén).