1 At ito ay nangyari na, na ang Panginoon ay nangusap kay Moises, nagsasabing: Masdan, aking ipinahahayag sa iyo ang hinggil sa langit na ito, at sa lupang ito; isulat mo ang mga salitang aking sinasabi. Ako ang Simula at ang Katapusan, ang Pinakamakapangyarihang Diyos; sa pamamagitan ng aking Bugtong na Anak ay nilalang ko ang mga bagay na ito; oo, sa simula aking nilalang ang langit, at ang lupa kung saan ka nakatayo.

2 At ang mundo ay walang kaayusan, at walang laman; at aking pinapangyari na ang kadiliman ay mapasaibabaw ng kailaliman; at ang aking Espiritu ay sumasaibabaw ng tubig; sapagkat ako ang Diyos.

3 At ako, ang Diyos, ay nagsabing: Magkaroon ng liwanag; at nagkaroon ng liwanag.

4 At ako, ang Diyos, ay nakita ang liwanag; at ang liwanag na yaon ay mabuti. At ako, ang Diyos, ay inihiwalay ang liwanag sa kadiliman.

5 At ako, ang Diyos, ay tinawag ang liwanag na Araw; at ang kadiliman, ay aking tinawag na Gabi; at ito ay ginawa ko sa pamamagitan ng salita ng aking kapangyarihan, at ito ay natupad habang ako ay nagsasalita; at ang gabi at ang umaga ang unang araw.

6 At muli, ako, ang Diyos, ay nagsabi: Magkaroon ng isang kalawakan sa gitna ng tubig, at nagkagayon nga, gaya ng aking sinabi; at aking sinabi: Mahiwalay ang mga tubig sa kapwa mga tubig; at ito ay natupad;

7 At ako, ang Diyos, ay nilikha ang kalawakan at pinaghiwalay ang mga tubig, oo, ang malawak na mga tubig na nasa ilalim ng kalawakan mula sa mga tubig na nasa itaas ng kalawakan, at nagkagayon nga gaya ng aking sinabi.

8 At ako, ang Diyos, ay tinawag ang kalawakan na Langit; at ang gabi at ang umaga ang ikalawang araw.

9 At ako, ang Diyos, ay nagsabi: Mapisan ang mga tubig na nasa silong ng langit sa isang dako, at nagkagayon nga; at ako, ang Diyos, ay nagsabi: Magkaroon ng katuyuan; at nagkagayon nga.

10 At ako, ang Diyos, ay tinawag ang katuyuan na Lupa; at ang kapisanan ng mga tubig ay tinawag kong Dagat, at ako, ang Diyos, ay nakita na ang lahat ng bagay na aking nilikha ay mabuti.

11 At ako, ang Diyos, ay nagsabi: Sibulan ang lupa ng damo, pananim na nagkakabinhi, at punungkahoy na namumunga, ayon sa kanyang uri, at ang punungkahoy na namumunga, na taglay ang kanyang binhi sa ibabaw ng lupa, at nagkagayon nga gaya ng aking sinabi.

12 At ang lupa ay sinibulan ng damo, bawat pananim na nagkakabinhi ayon sa kanyang uri, at ng punungkahoy na namumunga, na taglay ang kanyang binhi, ayon sa kanyang uri; at ako, ang Diyos, ay nakita na ang lahat ng bagay na aking nilikha ay mabuti;

13 At ang gabi at ang umaga ang ikatlong araw.

14 At ako, ang Diyos, ay nagsabi: Magkaroon ng mga tanglaw sa kalawakan ng langit, upang paghiwalayin ang araw mula sa gabi, at maging mga pinakatanda at pinakabahagi ng mga panahon, ng mga araw, at ng mga taon;

15 At maging pinakatanglaw sa kalawakan ng langit upang tumanglaw sa lupa; at nagkagayon nga.

16 At ako, ang Diyos, ay lumikha ng dalawang malalaking tanglaw; ang malaking tanglaw upang mamayani sa araw, at ang maliit na tanglaw upang mamayani sa gabi, at ang malaking tanglaw ay araw at ang maliit na tanglaw ay buwan; at nalikha rin ang mga bituin maging ayon sa aking salita.

17 At ako, ang Diyos, ay inilagay ang mga ito sa kalawakan ng langit upang tumanglaw sa ibabaw ng lupa,

18 At ang araw upang mamayani sa araw, at ang buwan upang mamayani sa gabi, at upang mahiwalay ang liwanag mula sa kadiliman; at ako, ang Diyos, ay nakitang ang lahat ng bagay na aking nilikha ay mabuti;

19 At ang gabi at ang umaga ang ikaapat na araw.

20 At ako, ang Diyos, ay nagsabi: Bukalan nang sagana ang tubig ng mga gumagalaw na kinapal na may buhay, at magsilipad ang mga ibon sa itaas ng lupa sa luwal na kalawakan ng langit.

21 At ako, ang Diyos, ay lumalang ng malalaking balyena sa dagat, at ng bawat may buhay na kinapal na gumagalaw, na ibinukal nang sagana ng mga tubig, ayon sa kani-kanilang uri, at bawat may pakpak na mga ibon ayon sa kani-kanilang uri; at ako, ang Diyos, ay nakita na ang lahat ng bagay na aking nilikha ay mabuti.

22 At ako, ang Diyos, ay binasbasan ang mga ito, sinasabing: Kayo ay maging palaanakin at magpakarami, at inyong punuin ang mga tubig sa dagat; at magpakarami ang mga ibon sa lupa;

23 At ang gabi at ang umaga ang ikalimang araw.

24 At ako, ang Diyos, ay nagsabi: Bukalan ang lupa ng mga buhay na kinapal ayon sa kani-kanilang uri, ng hayop, at ng mga kinapal na gumagapang, at mga ganid sa lupa ayon sa kani-kanilang uri, at nagkagayon nga;

25 At ako, ang Diyos, ay lumikha ng mga ganid sa lupa ayon sa kanilang uri, at mga hayop ayon sa kanilang uri, at ng lahat ng gumagapang sa lupa ayon sa kani-kanilang uri; at ako, ang Diyos, ay nakitang ang lahat ng bagay na ito ay mabuti.

26 At ako, ang Diyos, ay nagsabi sa aking Bugtong na Anak, na kasama ko mula pa sa simula: Likhain natin ang tao sa ating larawan, ayon sa ating wangis; at nagkagayon nga. At ako, ang Diyos, ay nagsabi: Magkaroon sila ng kapangyarihan sa mga isda sa karagatan, at sa mga ibon sa himpapawid, at sa mga hayop, at sa buong lupa, at sa bawat gumagapang na nagsisigalaw sa lupa.

27 At ako, ang Diyos, ay lumalang ng tao ayon sa aking sariling larawan, ayon sa kaanyuan ng aking Bugtong na Anak ay nilalang ko siya; lalaki at babae ay nilalang ko sila.

28 At ako, ang Diyos, ay binasbasan sila at sinabi sa kanila: Kayo ay maging palaanakin, at magpakarami, at kalatan ninyo ang lupa, at supilin ito, at magkaroon kayo ng kapangyarihan sa isda sa dagat, at sa ibon sa himpapawid, at sa bawat kinapal na gumagalaw sa lupa.

29 At ako, ang Diyos, ay nagsabi sa tao: Masdan, ibinigay ko sa inyo ang bawat pananim na nagkakabinhi, na nasa ibabaw ng buong lupa, at bawat punungkahoy na may bunga ng punungkahoy na nagkakabinhi; sa inyo ito ay magiging pagkain.

30 At sa bawat hayop sa lupa, at sa bawat ibon sa himpapawid, at sa bawat gumagapang sa lupa, na binigyan ko ng buhay, ay ibinigay ko ang lahat ng pananim na sariwa na pinakapagkain; at nagkagayon nga maging gaya ng aking sinabi.

31 At ako, ang Diyos, ay nakita ang lahat ng aking nilikha, at masdan, lahat ng bagay na aking nilikha ay napakabuti; at ang gabi at umaga ang ikaanim na araw.