1 Upéicha ojejapopákuri yvága ha yvy, ha opa hekove atykuéra.

2 Ha ára sétimope, Che, Tupã, ajapopa che rembiapo ha opa mbaʼe Che ajapovaʼekue; ha ára sétimope apytuʼúkuri opa che rembiapógui, ha opa mbaʼe Che ajapovaʼekue oñemohuʼã, ha Che, Tupã, ahechákuri umíva iporãha;

3 Ha Che, Tupã, ahovasákuri ára sétimo ha asantifika upéva; upe jave Che apytuʼuguikuri opa tembiapo, Che, Tupã amohenda ha ojapovaʼekuégui.

4 Ha koʼág̃a, péina ápe, Che haʼe ndéve, koʼãva haʼeha yvága ha yvy jejapoʼpy, koʼãva ojejapórõguare, ára, Che, Tupã Ñandejára, ajapo yvága ha yvy,

5 Ha opa kaʼavo ñu oĩ mboyve yvy ári, ha opa ñana ñumegua okakuaa mboyve. Che, Tupã Ñandejára, ajapógui opa mbaʼe, Che añeʼẽhague, espíritupe, oĩ mboyve hetépe yvy ape ári. Che, Tupã Ñandejára, namboúiguikuri ama pe yvy ape ári. Ha Che, Tupã Ñandejára, ajapovaʼekue opa yvypóra raʼykuéra; ha ndaipóri gueteri kuimbaʼe oñemitỹ hag̃ua; Che ajapóguikuri umíva yvágape, ha ndaipóri gueteri tekove yvy ári, ni ýpe ni yvytúpe;

6 Ha katu, Che, Tupã Ñandejára, añeʼẽkuri, ha ojupi yvýgui peteĩ ytimbo, ha omoheʼõ opa yvy ape.

7 Ha Che, Tupã Ñandejára ajapo yvypórape yvy timbógui, ha aipeju itĩme tekove pytu; ha oiko yvypóragui peteĩ ánga oikovéva, peteĩha tekove yvy ári, peteĩha yvypóra avei; upevére, opa mbaʼe ojejapovaʼekue upe mboyve; ha katu ojejapovaʼekue espíritupe ha ojejapovaʼekue che ñeʼẽ heʼiháicha.

8 Ha Che, Tupã Ñandejára, añotỹ peteĩ yvotyty Edén kuarahyresẽme, ha upépe Che amoĩ pe kuimbaʼe ajapovaʼekuépe.

9 Ha yvýgui, Che, Tupã Ñandejára, amongakuaa opa yvyra, imáta reheve, ombohorýva yvypóra resa; ha yvypóra ikatúkuri ohecha. Ha oiko avei chuguikuéra ánga oikovéva. Espiritual-guikuri ára Che ajaporõguare; opytágui upe tenda Che, Tupã, ajapo haguépe, héẽ, jepe opa mbaʼe Che ambosakoʼivaʼekue yvypóra jeporurã; ha yvypóra ohecha iporãha hiʼupyrã. Ha Che, Tupã Ñandejára, añotỹ avei pe yvyramáta tekove rehegua pe yvotyty mbytépe, ha upéicha avei pe kuaapy iporãva ha ivaíva rehegua yvyramáta.

10 Ha Che, Tupã Ñandejára, ajapókuri tosẽ peteĩ ysyry Edén-gui, omoheʼõ hag̃ua pe yvotyty; ha upégui oñembojaʼóva irundy ysyrýpe.

11 Ha Che, Tupã Ñandejára, ambohéra peteĩháme Pisón, ombojeréva opa Havila yvy, Che, Tupã Ñandejára, ajapo haguépe heta óro;

12 Ha upe tetãmegua óro iporãite, ha upépe oĩ ita vedélio ha ónise.

13 Ha ysyry mokõiha réra haʼékuri Gihón, ombojeréva opa Etiopía retã.

14 Ha ysyry mbohapyha réra haʼékuri Hidekel; ha kóva osyry Asiria kuarahyresẽ gotyo; ha ysyry irundyha haʼékuri Eufrates.

15 Ha Che, Tupã Ñandejára, ajapyhy kuimbaʼépe, ha amoĩ chupe Jardín de Edén-pe, oñemitỹ ha oñangareko hag̃ua hese.

16 Ha Che, Tupã Ñandejára, amandákuri yvypórape, haʼévo: Opaite yvotytygua yvyrágui ikatútante reʼu,

17 Ha katu yvyramáta kuaapy iporãva ha ivaíva reheguágui ndereʼumoʼãi, upevére, reiporavóta ndejehegui, oñemeʼẽgui ndéve; ha katu, nemanduʼáke Che ambotoveha, upévagui reʼuha árape, añetehápe remanóta.

18 Ha Che, Tupã Ñandejára, haʼevaʼekue che Unihénitope, naiporãiha kuimbaʼe oĩ haʼeño; upévare, Che ajapóta pytyvõha porã chupe g̃uarã.

19 Ha yvýgui, Che, Tupã Ñandejára, ajapovaʼekue opa ñumegua mymba, ha opa guyra yvytupegua; ha amandákuri toho hikuái Adán-pe, ohecha hag̃ua mbaʼe térapa haʼe omeʼẽta chupekuéra; ha haʼékuri avei hikuái ánga oikovéva; Che, Tupã, Ñandejára aipejúgui ipypekuéra tekove pytu; ha amanda Adán ohenoiháicha opa tekove oikovévape, upeichataha herakuéra.

20 Ha Adán ombohéra opa mymbaʼaty, ha guyra yvytupegua ha opa mymba ñu rupiguáva; ha katu Adán-pe g̃uarã, ndojejuhúi pytyvõha porã chupe g̃uarã.

21 Ha Che, Tupã Ñandejára, ajapókuri toʼa topehýi atã Adán ári; ha haʼe oke, ha Che ajapyhy peteĩ ikostílla ha amboty hendaguépe toʼo;

22 Ha upe kostílla, Che, Tupã Ñandejára aipeʼavaʼekue reheve kuimbaʼégui, ajapo peteĩ kuña, ha agueru kuimbaʼépe.

23 Ha Adán heʼi: Koʼág̃a aikuaa kóva haʼeha che kangue kanguegua ha che roʼogua roʼo; haʼe hérata Kuña, oñeguenohẽ haguére kuimbaʼégui.

24 Upévare, pe kuimbaʼe ohejavaʼerã itúva ha isy, ha ojoaju hembirekóre; ha haʼéta hikuái peteĩ toʼo.

25 Ha mokõivéva ijopívo hikuái, pe kuimbaʼe ha hembireko, ha notĩri hikuái.