1 Ha ojehu, Che Tupã Ñandejára, amosẽ rire chupekuéra, Adán oñepyrũ oñemitỹ ha ipuʼaka opa tymba ñumeguáre, ha hoʼu imbujape isyva ryʼáire, Che, Ñandejára amanda haguéicha chupe. Ha Eva, hembireko, ombaʼapo avei hendive.

2 Ha Adán oiko hembireko Eva ndive, ha chugui heñói chupe g̃uarã taʼýra ha tajyrakuéra, ha oñepyrũ oñemboheta ha omyenyhẽ yvy.

3 Ha upe ára guive, Adán raʼy ha rajykuéra oñepyrũ oñembojaʼo mokõi mokõi yvy ári, ha oñemitỹ, ha oñangareko ovechaʼatýre ha omoheñói avei hikuái taʼýra ha tajyrakuéra.

4 Ha Adán ha hembireko, Eva, ohenói Ñandejára réra, ha ohendu hikuái Ñandejára ñeʼẽpu oñeʼẽva chupekuéra Jardín de Edén guie, ha haʼekuéra ndohechái chupe; ojepeʼágui hikuái henondégui.

5 Ha haʼe omeʼẽ chupekuéra tembiapoukapykuéra otupãitũvaʼerãha Ñandejára Itupãme, ha oikuaveʼẽvaʼerãha Ñandejárape umi ijovechaʼaty ypykue. Ha Adán iñeʼẽrendu Ñandejára rembiapoukapykuérare.

6 Ha heta ára rire, peteĩ Ñandejára ánhel ojehechauka Adán-pe heʼívo: Mbaʼére reikuaveʼẽ temikuaveʼẽ Ñandejárape? Ha Adán ombohovái chupe: Ndaikuaái, Ñandejára omandánte chéve.

7 Upérõ oñeʼẽ upe ánhel heʼívo: Kóva haʼe Túva Unihénito jehasaʼasy joguaha, henyhẽva grásia ha añeteguágui.

8 Upévare, rejapóta opa mbaʼe rejapóva upe Taʼýra rérape, ha reñearrepentíta ha rehenóita Tupãme upe Taʼýra rérape akoiete g̃uarã.

9 Ha upe árape oguejy Adán ári Espíritu Santo, omeʼẽva testimónio Túva ha Taʼýragui, heʼívo: Che haʼe pe Túva Unihénito iñepyrũmby guive, koʼág̃a guive ha akoiete g̃uarã, pe reʼa haguéicha ikatu hag̃ua reñerredimi, ha avei opa yvypóra, jepeve opa umi oipotáva.

10 Ha Adán ohovasa Tupãme upe ára ha henyhẽte, ha oñepyrũ oprofetisa opa yvy arigua rogayguáre, heʼívo: Ojehovasapyre Tupã réra, che jejapyhara rupive ajehesapeʼa, ha aguerekóta vyʼapavẽ ko tekovépe, ha che retépe che ahechajeýta Tupãme.

11 Ha Eva, hembireko, ohendu opa koʼã mbaʼe ha ovyʼa, heʼívo: Ndahahéi rire ore jejapyhara rupi, arakaʼeve ndoroguerekoivaʼeramoʼã ñemoñare, ni arakaʼeve ndoroikuaamoʼãikuri iporãva ha ivaíva, ni ore rredensiõ vyʼapavẽ, ni pe tekove ijapyraʼỹva Tupã omeʼẽva opa umi iñeʼẽrendúvape.

12 Ha Adán ha Eva ohovasa Tupã réra, ha oikuaauka opa mbaʼe itaʼýra ha itajyrakuérape.

13 Ha Satana ou ijapytepekuéra heʼívo: Che avei haʼe Tupã raʼy; ha haʼe omanda chupekuéra, heʼívo: Ani peguerovia; ha ndogueroviái hikuái, ha ohayhuve hikuái Satanáme Tupãgui. Ha upe ára guive yvyporakuéra oñepyrũ oñemeʼẽ hete oipotávape, hoʼo oipotávape ha añaguiguávape.

14 Ha Tupã Ñandejára ohenói tekovekuérape opárupi, Espíritu Santo rupive, ha omanda chupekuéra toñearrepenti hikuái;

15 Ha opavave ogueroviáva Taʼýrape ha oñearrepentíva iñangaipakuéragui, ojesalváta; ha opavave ndogueroviáiva ni noñearrepentíriva, oñekondenáta; ha umi ñeʼẽ osẽkuri Tupã jurúgui tembiapoukáramo; upévare, oñekumplíta.

16 Ha Adán ha Eva, hembireko, nombopahái Tupãme ñehenói. Ha Adán oikuaa Eva, hembirekópe, ha haʼe hyeguasu ha imemby Caín ha heʼi: Oñemeʼẽ chéve Ñandejáragui peteĩ mitãkuimbaʼe; upévare, ikatu haʼe nombotovéi iñeʼẽnguéra. Ha katu péina ápe, Caín nohendúi heʼívo: Mávapa Ñandejára, aikuaa hag̃ua che chupe?

17 Ha haʼe hyeguasu jey ha imemby Abel, ityvýra. Ha Abel ohendu Ñandejára ñeʼẽ. Ha Abel haʼe ovecha rerekua, ha katu Caín oñemitỹ yvy.

18 Ha Caín ohayhuve Satanáme Tupãgui. Ha Satana omanda chupe, heʼívo: Ejapo peteĩ kuaveʼẽmby Ñandejárape.

19 Ha ára ohasávo, ojehu Caín ogueru yvy ñemitỹnguégui peteĩ kuaveʼẽmby Ñandejárape.

20 Ha Abel avei ogueru ijovecha raʼykuéra ypykuégui, ha ikyrakuégui. Ha Ñandejára oguerohory Abel ha ikuaveʼẽmby;

21 Ha katu Caín ha iñeikuaveʼẽmby, haʼe ndoguerohorýi. Ág̃a katu, Satana oikuaákuri kóva, ha ovyʼa. Ha Caín ipochyeterei, ha hova puku.

22 Ha Ñandejára heʼi Caín-pe: Mbaʼéreiko ndepochy? Mbaʼére nde rova puku?

23 Rejapóramo oĩporãva, rejeguerohorýta; ha nderejapóiramo oĩporãva, okẽmema oĩ angaipa, ha Satana ndeipota; ha ndahaʼéirõ rejapysaka che rembiapoukapykuérare, Che romeʼẽta chupe, ha oikóta nderehe haʼe oipotaháicha. Ha nde reisãmbyhýta chupe;

24 Koʼág̃a guive tenondeve gotyo nde haʼétagui hiʼañeteguaʼỹkuéra túva; reñehenóita Ñehundi; nde avei reiméguikuri múndo mboyve.

25 Ha ojeʼéta ára oúvape—Koʼã tembiapokyʼa ouhague Caín-gui; haʼe ombotovégui ñemoñeʼẽ tuichavéva Tupãgui oúva; ha kóva haʼe peteĩ ñeʼẽngái Che amoĩtava nde ári, reñearrepentiʼỹramo.

26 Ha Caín ipochyetereíkuri, ha nohenduvéima Ñandejára ñeʼẽpu, ni Abel-pe, ikyvy, oikóva marangatúpe Ñandejára renondépe.

27 Ha Adán ha hembireko ojaheʼo Ñandejára renondépe, Caín ha ijoykeʼykuéra rupi.

28 Ha ojehu Caín ojapyhy hembirekorã peteĩ ijoykeʼykuéra rajy, ha ohayhuve hikuái Satanáme Tupãgui.

29 Ha Satana heʼi Caín-pe: Eñeʼẽmeʼẽ chéve nde ahyʼóre, ha remombeʼúramo remanóta; ha eñeʼẽmeʼẽ nde joykeʼykuérape iñakãre ha Tupã oikovévare, ani hag̃ua omombeʼu hikuái, oikuaaukáramo hikuái, añetehápe omanóta hikuái; ha kóva ani hag̃ua oikuaa nde ru; ha ko ára che amoĩta nde ryvy Abel nde pópe.

30 Ha Satana oñeʼẽmeʼẽ Caín-pe ojapotaha haʼe omandaháicha. Ha opa koʼã mbaʼe ojejapókuri ñemiháme.

31 Ha Caín heʼi: Añetehápe che haʼe Mahán, ko mbaʼeñemi guasu mboʼehára, ikatu hag̃ua aporojuka ha ahupyty mbaʼerepy. Upévare, Caín oñehenói Mboʼehára Mahán, ha haʼe oñembotuicha hekoñañáme.

32 Ha Caín osẽ ñúre, ha oñeʼẽ Abel, ityvýrandi. Ha ojehu oĩ aja hikuái ñúre, Caín oñemoĩ Abel, ityvýra rehe, ha ojuka chupe.

33 Ha oñembotuicha Caín hembiapokuére, heʼívo: Chesãsoma; katuete oiméne hoʼáta che pópe umi che ryvy ovecharaʼy.

34 Ha Ñandejára heʼi Caín-pe: Moõ oime Abel, nde ryvy? Ha haʼe ombohovái: Ndaikuaái. Chéiko che ryvy rerekua mbaʼe?

35 Ha Ñandejára heʼi chupe: Mbaʼe rejapóraʼe? Nde ryvy ruguy ñeʼẽpu osapukaiʼasy chéve yvy guie.

36 Ha koʼág̃a reñemoñeʼẽngáita pe yvy ojurupeʼavaʼekuégui omog̃uahẽ hag̃ua nde pógui nde ryvy ruguy.

37 Reñemitỹ vove nomeʼẽmoʼãi ndéve imbaretégui ko ára guive tenondeve gotyo. Kañyháme oikóva ha hogaʼỹvaramo haʼéta yvy ári.

38 Ha Caín heʼi Ñandejárape: Satana chepyʼaraʼã umi che ryvy ovechaʼaty rupi. Ha che chepochýkuri avei, ikuaveʼẽmby reguerohorýgui ha che mbaʼéva nahániri; che jehavira tuichave ikatúvagui agueropuʼaka.

39 Péina ápe, che mosẽ ko árape Ñandejára rova renondégui, ha nde rova renondégui añemokañýta; ha kañyháme aikóta ha hogaʼỹvaramo ko yvy ári; ha ojehúta oimeraẽva chejuhúva che jukáta, che rembiapovaikuéra rupi, koʼã mbaʼe noñeñomírigui Ñandejáragui.

40 Ha Che, Ñandejára, haʼe chupe: Oimeraẽva ndejukáva, siéte jeyve oñemoĩta hese ñemyengovia. Ha Che, Ñandejára, amoĩkuri Caín-re peteĩ márka, ani hag̃ua oimeraẽva ojuhúva ojuka chupe.

41 Ha Caín ojepeʼa Ñandejára renondégui, ha hembireko ha heta ijoykeʼykuérandi oiko Nod retãme, Edén kuarahyresẽ gotyo.

42 Ha Caín oiko hembirekóndi, ha haʼe hyeguasu ha imemby Enoc, ha haʼe avei omoheñói heta taʼýra ha tajýra. Ha haʼe omopuʼã peteĩ táva ha ombohéra upe táva itaʼýra rérape, Enoc.

43 Ha Enoc-pe heñói Irad ha ambue taʼýra ha tajyrakuérape. Ha Irad omoheñói Mehujael ha ambue taʼýra ha tajyrakuérape. Ha Mehujael omoheñói Metusael ha ambue taʼýra ha tajyrakuérape. Ha Metusael omoheñói Lamec-pe.

44 Ha Lamec ojapyhy ijupe g̃uarã mokõi tembireko; peteĩ héra Ada, ha ambue héra Zila.

45 Ha Ada imemby Jabal; haʼévakuri umi ogaʼaópe oiko ypyvaʼekue ru; ha koʼãva umi omongakuaáva mymbaʼaty; ha ityvýra réra Jubal, haʼéva opa umi ombopu ypyvaʼekue mbarakaguasu ha mimbyguasu ru.

46 Ha Zila imemby Tubal Caín, peteĩ oporohekomboʼéva opáichagua tembiapo bronce ha hierro-guiguáva. Ha Tubal Caín reindy hérakuri Naama.

47 Ha Lamec heʼi hembirekokuéra Ada ha Zila-pe: Pehendu che ñeʼẽpu, Lamec rembirekokuéra; che ajukágui peteĩ kuimbaʼe chembaʼevairã, ha peteĩ mitãrusúpe chembaʼevairã.

48 Caín-pe oñevengátarõ siéte jeyve, añetehápe Lamec-pe setenta y siete jeyvéta;

49 Lamec ojapóguikuri peteĩ konvénio Satanándi, Caín ojapoháicha, oikóguikuri chugui Mboʼehára Mahán, mbaʼeñemi guasu Satana omeʼẽvaʼekue Caín-pe jára; ha Irad, Enoc raʼy, oikuaávo imbaʼeñemimbykuéra, oñepyrũ oikuaauka Adán raʼykuéra apytépe.

50 Upévare Lamec, ipochyetereígui, ojuka chupe; ndahaʼéi Caín ojuka haguéicha ityvýra Abel-pe, ohupyty hag̃ua mbaʼerepy, ha katu ojuka chupe ñeʼẽmeʼẽmby rupi.

51 Caín ára guive oĩguikuri peteĩ tembiapo ñemi, ha hembiapokuéra oikókuri pytũmbýpe, ha haʼekuéra oikuaákuri peteĩteĩ ijoykeʼýpe.

52 Upévare, Ñandejára omoñeʼẽngái Lamec ha hógape, ha opa umi ojapovaʼekuépe konvénio Satanándi, noñongatúigui hikuái Tupã rembiapoukapykuéra, ha ndoguerohorýi Tupã kóva, ha haʼe noministrái chupekuéra; ha hembiapokuéra tembiapokyʼákuri ha oñepyrũ oñemosarambi opa yvypóra raʼykuéra apytépe. Ha oĩkuri yvypóra raʼykuéra apytépe.

53 Ha yvypóra rajykuéra apytépe noñeñeʼẽikuri koʼã mbaʼére, Lamec omombeʼúguikuri upe ñeʼẽñemi ikuñanguérape; ha haʼekuéra oñemoĩ hese, ha omomarandu koʼã mbaʼe opárupi, ha ndoguerokói hikuái poriahuvereko;

54 Upévare Lamec-pe ndojehayhúi ha oñemosẽkuri, ha ndohói yvypóra raʼykuéra apytépe, okyhyjégui omanotaha.

55 Ha péicha oñepyrũ oñemosarambi tembiapo pytũmbygua yvypóra raʼykuéra apytépe.

56 Ha Tupã omoñeʼẽngái yvy ñeʼẽngái vaiete reheve; ha ipochyetékuri umi iñañávandi, opa yvypóra raʼykuérandi, haʼe ojapovaʼekue;

57 Nohenduséigui hikuái iñeʼẽpu, ni ndogueroviaséi Itaʼýra Unihénitope, jepeve upe haʼe omomaranduvaʼekue outaha ára asaje mbytépe, oñembosakoʼivaʼekue múndo ojejapo mboyve.

58 Ha upéicha oñeñepyrũvaʼekue oñemboʼe Evanhélio, iñepyrũmby guive, oñemomarandúvo umi ánhel marangatúre, oñemboúva Tupã oĩhágui, ha iñeʼẽpu tee rupive, ha Espíritu Santo don rupive.

59 Ha upéicha oñekonfirma opa mbaʼe Adán-pe, peteĩ sánta ordenánsa rupi, ha oñemboʼe evanhélio, ha oñemomarandu peteĩ apoukapy, oĩtaha múndope ipahaite peve; ha upéichakuri. Amén.