1 Ha Adán ohendúkuri Tupã ñeʼẽpu, ha ojerure taʼyrakuérape oñearrepenti hag̃ua.

2 Ha Adán oiko jey hembirekóndi, ha haʼe imemby peteĩ mitãkuimbaʼe, ha ombohéra Set. Ha adán oglorifikákuri Tupã réra; haʼe heʼígui: Tupã omeʼẽ chéve ambue ñemoñare, Abel rãngue, Caín ojukavaʼekue.

3 Ha Tupã ojehechauka Set-pe, ha haʼe ndahekoñemoĩri, ha katu oikuaveʼẽ peteĩ temikuãveʼẽ ijojáva, itykeʼýra Abel-cha. Ha chupe avei heñói peteĩ taʼýra, ha ombohéra chupe Enos.

4 Ha upérõ koʼã kuimbaʼe oñepyrũ ohenói Ñandejára réra, ha Ñandejára ohovasa chupekuéra;

5 Ha ojegueraha peteĩ manduʼa rehegua kuatiañeʼẽ, ojehaihápe Adán ñeʼẽme, opavave ohenóiva Tupãme oñemeʼẽguikuri ohai hag̃ua ispirasiõ espíritu rupive;

6 Ha haʼekuéra rupive oñemboʼe itaʼyrakuérape omoñeʼẽ ha ohai hag̃ua, oguerekóvo peteĩ ñeʼẽ potĩ ha ojoparaʼỹva.

7 Koʼág̃a, ko Sacerdocio oĩvaʼekue iñepyrũmbýpe, oĩta avei múndo pahápe.

8 Koʼág̃a, ko profesía Adán oñeʼẽvaʼekue oñeispirávo Espíritu Santo-re, ha oñeñongatu jepi peteĩ Tupã raʼykuéra genealogía. Ha kóva haʼékuri Adán ñemoñareaty kuatiañeʼẽ, heʼivaʼekue: Ára Tupã ojaporamoguare yvypóra, Tupã raʼangáicha ojapovaʼekue;

9 Hete raʼangáicha, kuimbaʼe ha kuña ojapovaʼekue chupekuéra, ha ohovasa ha ombohéra chupekuéra Adán, ára ojejapo haguépe hikuái, ha oiko chuguikuéra ánga oikovéva, pe yvy Tupã ñemopyenda ári.

10 Ha Adán oikove ciento treinta áño, ha omoheñói peteĩ taʼýra haʼeichagua ha haʼangáicha, ha ombohéra Set.

11 Ha Adán ára, omoheñói rire Set-pe, haʼékuri ochosiénto áño, ha omoheñói heta taʼýra ha tajýra;

12 Ha opa ára Adán oikohague haʼékuri novesiénto treinta áño, ha omano.

13 Set oikove ciento cinco áño ha omoheñói Enós-pe, ha oprofetisa opa hiʼára aja, ha omboʼe itaʼýra Enós-pe Tupã rapére; upévare, Enós oprofetisavaʼekue avei.

14 Ha oikove Set, omoheñói rire Enós-pe, ochocientos siéte áño, ha omoheñói heta taʼýra ha tajyrakuéra.

15 Ha yvypóra raʼykuéra hetave opa yvy ape ári. Ha umi árape Satana tuicha ipuʼaka tekovekuéra apytépe, ha omoñekoʼõi pochyrã ikorasõkuéra; ha upe guive oĩvaʼekue ñorairõguasu ha tuguy ñeñohẽ; ha peteĩ kuimbaʼe ohupi ipo ijoykeʼy tee rehe, ojuka hag̃ua chupe, umi tembiapo ñemi rupi, ohekakuévo puʼaka.

16 Ha opa Set ára novecientos doce áñokuri, ha omano.

17 Ha Enós oikove novénta áño, ha omoheñói Cainán-pe. Ha Enós ha Tupã tavayguakuéra rembyre osẽ upe tetã hérava Shulón-gui, ha oiko peteĩ yvy ñeʼẽmeʼẽnguépe, haʼe omboheravaʼekue taʼýra teéicha, pe ohenoivaʼekue Cainán.

18 Ha Enós oikove, omoheñói rire Cainán-pe, ochocientos quince áño, ha omoheñói heta taʼýra ha tajyrakuéra. Ha opa Enós ára novecientos cinco áñokuri, ha omano.

19 Cainán oikove seténta áño, ha omoheñói Mahalaleel-pe; ha Cainán oikove, omoheñói rire Mahalaleel-pe, ochocientos cuarenta áño, ha omoheñói taʼýra ha tajyrakuéra. Ha opa Cainán ára novecientos diez áñokuri, ha omano.

20 Ha Mahalaleel oikove setenta y cinco áño, ha omoheñói Jared-pe, ha Mahalaleel oikove, omoheñói rire Jared-pe, ochocientos treinta áño, ha omoheñói taʼýra ha tajyrakuéra. Ha opa Mahalaleel ára ochocientos noventa y cinco áñokuri, ha omano.

21 Ha Jared oikove ciento sesenta y dos áño, ha omoheñói Enoc-pe; ha Jared oikove, omoheñói rire Enoc-pe, ochosiénto áño, ha omoheñói taʼýra ha tajyrakuéra. Ha Jared omboʼe Enoc-pe opa Tupã rapére.

22 Ha kóva haʼe Adán raʼykuéra genealogía, haʼéva Tupã raʼy, upe oñeʼẽvaʼekuéndi Tupãite voi.

23 Ha haʼékuri hikuái tekojoja mboʼehára; ha oñeʼẽ, oprofetisa ha ojerurevaʼekue opa yvypórape, opa hendápe, oñearrepenti hag̃ua; ha oñemboʼe pe jerovia yvypóra raʼykuérape.

24 Ha ojehu opa Jared ára novecientos sesenta y dos áñokuri, ha omano.

25 Ha Enoc oikove sesenta y cinco áño ha omoheñói Matusalén-pe.

26 Ha ojehu Enoc ojeʼóikuri yvy ári, tavayguakuéra apytépe; ha haʼe ojeʼói aja, Tupã Espíritu oguejy yvágagui ha opyta hiʼári.

27 Ha haʼe ohendu peteĩ ñeʼẽpu yvágagui, heʼíva: Enoc, che raʼy, eprofetisa ko tavayguakuérape, ha ere chupekuéra—Peñearrepentíke, péicha heʼígui Ñandejára: Che pochy ko tavayguakuérandi, ha che pochy hendy vai hesekuéra; omohatãgui hikuái ikorasõ, ha ijapysakuéra oñemboty, ha umi hesa ndaikatúi ohecha puku;

28 Ha koʼã heta ñemoñareaty pukukue, pe ára Che ajapo rire chupekuéra, ojavýkuri hikuái hape, ha chenega ha ohekákuri iñemoñeʼẽ tee pytũmbýpe; ha umi hembiapokyʼápe omoakãngeta hikuái jejuka, ha noñongatúi tembiapoukapykuéra, Che ameʼẽvaʼekue itúva Adán-pe.

29 Upévare, oñeʼẽmeʼẽ hikuái ojupe, ha umi iñeʼẽmeʼẽnguéra rupi, oguerúkuri hikuái ñemano hiʼarikuéra; ha peteĩ añaretã Che ambosakoʼi chupekuéra g̃uarã, noñearrentíramo hikuái.

30 Ha kóva haʼe peteĩ apoukapy Che ambouvaʼekue, che juruete rupi, múndo ñepyrũmby guive, kóva oñemoĩʼypy guive, ha Che amboguapyvaʼekue, che rembiguaikuéra juru rupive, pende rukuéra, pe oñemboutaháicha múndope jepe, hembeʼy paha peve.

31 Ha Enoc ohendúvo koʼã ñeʼẽ, oñakãity yvýre Ñandejára renondépe, ha oñeʼẽ henondépe, heʼívo: Mbaʼére ajuhu aime porãha nde resa renondépe, chéngo peteĩ mitãsurúnte, ha opa tavayguakuéra ndaijaʼéi cherehe, nañeʼẽporãigui; mbaʼére che ne rembiguái?

32 Ha Ñandejára heʼi Enoc-pe: Tereho ha ejapo upe Che amandavaʼekue ndéve, ha avave nandekutumoʼãi. Ejejurupeʼa ha henyhẽta, ha Che ameʼẽta ndéve katupyry reñeʼẽ hag̃ua, opa yvypóra oĩgui che pópe, ha Che ajapóta iporãháicha chéve.

33 Ere ko tavayguakuérape: Peiporavo ko ára, peservi hag̃ua Tupã Ñandejára pende apoharépe.

34 Péina ápe, che Espíritu oĩ nde ári; upévare, Che ahustifikáta opa ne ñeʼẽ; ha yvytykuéra oñaníta ne renonderãgui, ha umi ysyry osẽta hapégui; ha nde repytáta chepype, ha che ndepype; upévare, eiko chendive.

35 Ha Ñandejára oñeʼẽkuri Enoc-pe, ha heʼi chupe: Emona nde resáre tuju, ha ejohéi, ha rehecháta. Ha haʼe ojapo.

36 Ha haʼe ohecha umi espíritu Tupã ojapovaʼekue; ha ohecha avei umi mbaʼe tesa rekoite ndohecháiva; ha upe guive isarambi yvy ári ko ñeʼẽ: Ñandejára omopuʼãkuri peteĩ techapahára itavayguakuérape.

37 Ha ojehu Enoc oho upe tetãre, tavayguakuéra apytépe, ha oñemboʼy umi yvytyʼi ha yvypuʼã ári ha omomarandu sapukáipe, otestifikávo hembiapokuéra rehe; ha opa tekove oñemyrõkuri hese rupi.

38 Ha osẽ hikuái ohendu hag̃ua chupe, umi tenda yvatépe, ha heʼími umi ogaʼao ñongatuhárape: Pepyta koʼápe ha peñangareko koʼã ogaʼaóre, roho aja amo rohecha hag̃ua pe techapahára, haʼe oprofetiságui, ha oĩ peteĩ mbaʼe tapiaguaʼỹva ko tetãme; ou peteĩ itavyraíva ñande apytépe.

39 Ha ojehu ohendúvo hikuái chupe, mavave nomoĩri ipo hiʼári, oúgui kyhyje opa umi chupe ohendúvape; haʼe oikóguikuri Tupãndi.

40 Ha ou hendápe peteĩ kuimbaʼe hérava Mahíjah, ha heʼi chupe: Ere porã oréve mávapa nde, ha moõguipa reju?

41 Ha haʼe ombohovái chupekuéra: Che aju Cainán retãgui, umi che ru retã, peteĩ tekojoja retã ko ára peve. Che ru cherekomboʼe opa Tupã rapépe;

42 Ha ojehu ajúvo Cainán retãgui, yguasu oriénte rupive, ahecha peteĩ visiõ; ha péina ápe, ahecha umi yvága ha Ñandejára oñeʼẽ chendive, ha omeʼẽ chéve tembiapoukapy; upévare, kóva rupi, añongatu hag̃ua pe tembiapoukapy, che haʼe koʼã ñeʼẽ.

43 Ha Enoc oñeʼẽvénte, heʼívo: Upe Ñandejára oñeʼẽvaʼekue chendive, haʼe Tupã yvagagua, ha haʼe che Tupã ha pende Tupã, ha peẽ haʼe che joykeʼykuéra, ha mbaʼére peñemoñeʼẽ ojupe ha penega Tupã yvagaguápe?

44 Haʼe ojapovaʼekue umi yvága; upe yvy haʼe ipyenda; ha imbaʼe pe oñemboguapyha. Péina ápe, haʼe imoĩhare ha ogueruvaʼekue peteĩ tekove aty hiʼári.

45 Ha oúkuri ñemano ñande rukuéra ári; upevére, jaikuaa chupekuéra, ha ndaikatúi ñanega, ha jaikuaa upe peteĩha opavave apytéguipe, héẽ, Adán-pe.

46 Jahahígui peteĩ manduʼa rehegua kuatiañeʼẽ ñande apytépe, pe modélo Tupã kuã omeʼẽ haguéicha; ha oñemeʼẽkuri ñane ñeʼẽ teépe.

47 Ha oñeʼẽvo Enoc Tupã ñeʼẽnguéra, oryrýi tavayguakuéra, ha ndaikatúi opyta hikuái hovake.

48 Ha haʼe heʼi chupekuéra: Adán hoʼágui, ñande jaikove; ha ijeʼa rupi ou ñemano; ha ñande jahupyty tekoasy ha tembiasy.

49 Péina ápe, Satana ou yvypóra raʼykuéra apytépe, ha oipyʼaraʼã chupekuéra otupãitũ hag̃ua chupe; ha yvypóragui oiko oñemeʼẽva hete oipotávape, hoʼo oipotávape ha añáme, ha ojepeʼa Tupã rovakégui.

50 Ha Tupã katu oikuaauka ñande rukuérape tekotevẽha opa tekove oñearrepenti.

51 Ha ohenói ñande ru Adán-pe iñeʼẽpu tee rupive, heʼívo: Che haʼe Tupã; Che ajapovaʼekue múndo, ha yvypóra oiko mboyve hetépe hikuái.

52 Ha heʼi avei chupe: Rejeréramo che rendápe, ha rehendu che ñeʼẽpu, ha reguerovia, ha reñearrepenti opa ne rembiapovaígui, ha reñemongarai ýpe jepeve, che Raʼy Unihénito rérape, henyhẽva grásia ha añeteguágui, haʼéva Jesucristo, peteĩete téra oñemeʼẽtava yvága guýpe, outaha rupi salvasiõ yvypóra raʼykuérape, rehupytýta upe Espíritu Santo don, rejerurévo opa mbaʼe hérape, ha oimeraẽ mbaʼe rejeruréva, oñemeʼẽta ndéve.

53 Ha ñande ru Adán oñeʼẽkuri Ñandejárape, ha heʼi: Mbaʼére yvypóra oñearrepenti ha oñemongaraivaʼerã ýpe? Ha Ñandejára heʼi Adán-pe: Péina ápe, Che roperdonákuri nde jejapyhara Jardín de Edén-pe.

54 Upe rire isarambi upe ñeʼẽ tavayguakuéra apytépe, pe Tupã Raʼy oexpiahague pe angaipa ypykue, umi túva angaipakuéra ndaikatúigui hoʼávo mitãnguéra akã ári, ipotĩgui hikuái múndo ñepyrỹmby guive.

55 Ha Ñandejara oñeʼẽ Adán-pe, heʼívo: Heñóigui angaipápe ne mitãnguéra, upéicha avei, oñepyrũvo okakuaa hikuái, pe angaipa heñói ikorasõkuérape, ha otantea pe iróva, omombaʼekuaa hag̃ua hikuái pe iporãva.

56 Ha oñemeʼẽ chupekuéra tohechakuaa iporãva ivaívagui; upévare, isãso hikuái ijehegui, ha Che ameʼẽkuri ndéve ambue léi ha tembiapoukapy.

57 Upévare, emboʼe nde raʼykuérape, opa tekove, opárupi, oñearrepentivaʼerãha, térã mbaʼevéicharõ ndohupytymoʼãi hikuái Tupã rréino, mbaʼe ipotĩʼỹva ndaikatúigui oiko upépe, térã oiko hendive; Adán ñeʼẽme, héra haʼéva Marangatu rehegua Kuimbaʼe, ha Iñunihénito réra haʼe Kuimbaʼe Raʼy, jepeve Jesucristo, peteĩ Hue hekojojáva oútava ára asaje mbytépe.

58 Upévare, Che ameʼẽ ndéve peteĩ tembipoukapy, sãsome remboʼe hag̃ua koʼã mbaʼe nde raʼykuérape, erévo:

59 Jejapyhara rupive ouha jeʼa, pe oguerúva ñemano; ha penereñói haguére múndope y rupive, ha tuguy, ha espíritu, Che ajapovaʼekue rupive, ha upéicha yvytimbógui oiko pendehegui ánga oikovéva, upéicha avei penereñói jeyvaʼerã yvága rréinope, y ha espíritugui, ha peñemopotĩ tuguy rupive, jepe che Unihénito ruguy, peñesantifika hag̃ua opa angaipágui ha perovyʼa hag̃ua umi teko ijapyraʼỹva ñeʼẽ ko múndope, ha pe tekove ijapyraʼỹva múndo oútavape, jepeve glória omanokuaaʼỹva;

60 Pe y rupive peñongatúgui tembiapukapy; Espíritu rupive pejehustifika, ha tuguy rupive peñesantifika;

61 Upévare oñemeʼẽ peẽme opyta hag̃ua pendepype; yvagagua testimónio; pe Moangapyhyhára; umi mbaʼe ñanembopyʼaguapýva glória omanokuaaʼỹvapegua; opa mbaʼe añetegua; opa mbaʼe omoingovéva; oikuaapáva opa mbaʼe, ha oguerekóva opa pokatu, arandu heʼiháicha, poriahuvereko, añetegua, hustísia ha huísiope oĩháicha.

62 Ha koʼág̃a, péina ápe, Che haʼe ndéve: Kóva haʼe salvasiõ rehegua plan opa yvypórape g̃uarã, che Unihénito ruguy rupive, pe oútava ára asaje mbytépe.

63 Ha péina ápe, opa mbaʼe oguereko haʼanga joguaha, ha opa mbaʼe ojejapókuri ha ojejapovaʼekue otestifika hag̃ua chehegui, umi mbaʼe temporal-va, ha umi mbaʼe espiritual-va; umi mbaʼe oĩva yvate yvágape, ha umi mbaʼe oĩva yvy ári, ha umi mbaʼe oĩva yvýpe, ha umi mbaʼe oĩva yvy guýpe, yvate iguypeguáicha; opa mbaʼe otestika cherehe.

64 Ha ojehu, oñeʼẽvo Ñandejára ndive Adán, ñande ru, Adán ojerureʼasy Ñandejárape, ha ojehupi chupe Ñandejára Espíritu rupive, ha ojegueraha ýpe, ha oñemoñapymi ýpe, ha oñeguenohẽ ýgui.

65 Ha péicha haʼe oñemongarai, ha Tupã Espíritu oguejy hiʼári, ha péicha heñói haʼe Espíritu-gui, ha oñemoingove upe kuimbaʼe hyepypeguápe.

66 Ha haʼe ohendu peteĩ ñeʼẽpu yvágagui heʼíva: Reñemongarai tata ha Espíritu Santo reheve. Kóva haʼe Túva ha Taʼýra testimónio, koʼág̃a guive ha akoiete g̃uarã;

67 Ha nde haʼe pe ndoguerekoivaʼekue ára ñepyrũmby ni ára paha orden-peguáicha, ára apyraʼỹ guive ára apyraʼỹ meve.

68 Péina ápe, nde haʼe peteĩ chepype, peteĩ Tupã raʼy; ha péicha opavavégui oikokuaa che raʼykuéra. Amén.