1 Ha ojehu Enoc oñeʼẽvénte, heʼívo: Péina ápe, ñande ru Adán omboʼevaʼekue koʼã mbaʼe, ha heta ogueroviákuri ha oiko chuguikuéra umi Tupã raʼy, ha heta ndogueroviáikuri, ha omano iñangaipápe, ha kyhyje reheve ohaʼarõ, jehasaʼasyvaípe, toñeñohẽ hiʼarikuéra Tupã ñekoʼõi pochykue hendypáva.

2 Ha upe ára guive Enoc oñepyrũ oprofetisa, heʼívo tavayguakuérape: Ajeʼói aja ha aimévo tenda hérava Mahújah-pe, ajerureʼasy Ñandejárape, ha ou peteĩ ñeʼẽpu yvágagui, heʼíva—Ejevy ha ejupi Simeón yvytýpe.

3 Ha ojehu ajevy ha ajupi yvytýpe; ha aime aja upe yvytýpe, ahecha ojepeʼa yvága ha añembyaókuri glória reheve;

4 Ha ahecha Ñandejárape; ha haʼe oĩkuri che rova renondépe, ha oñeʼẽ chendive, jepeve peteĩ kuimbaʼe oñeʼẽháicha ambue ndive, ojováre; ha heʼi chéve: Emaʼẽ ha Che ahechaukáta ndéve múndo heta ñemoñareaty pukukue.

5 Ha péina ápe ojehu ahechákuri peteĩ tavayguakuéra etaite Shum yvy ipehápe, oikóva ogaʼaópe, haʼéva Shum tavayguakuéra.

6 Ha heʼi jey chéve Ñandejára: Emaʼẽ; ha amaʼẽ norte gotyo, ha ahecha Canaán tavayguakuéra, oikóva ogaʼaópe.

7 Ha Ñandejára heʼi chéve: Eprofetisa; ha che aprofetisa, haʼévo: Péina ápe, Canaán tavayguakuéra, hetaitéva, osẽta ñorairõme Shum tavayguakuérandi, ha ojukáta chupekuéra ohundipaite peve; ha Canaán tavayguakuéra oñembojaʼóta yvy ári, ha yvy naheñoimoʼãi ha ndahiʼamoʼãi, ha mavave ambue tavayguakuéra ndoikomoʼãi upépe, ndahaʼéiramo Canaán tavayguakuéra;

8 Péina ápe, Ñandejára omoñeʼẽngáitagui yvy ára aku reheve, ha iñemoheñoiʼỹ ohótante akoiete g̃uarã; ha ou peteĩ pire hũ opa Canaán-guakuéra ári, ha ndojehayhúi chupekuéra opa tavayguakuéra apytépe.

9 Ha ojehu Ñandejára heʼi chéve: Emaʼẽ; ha amaʼẽ ha ahecha Sarón retã, ha Enoc retã, ha Omner retã, ha Heni retã, ha Sem retã, ha Haner retã, ha Hannanníah retã, ha umi upépe oikóva;

10 Ha Ñandejára heʼi chéve: Tereho ko tavayguakuérape ha ere chupekuéra—Peñearrepentíke, ani Che aju ha ajopy chupekuéra peteĩ ñeʼẽngái reheve, ha omano hikuái.

11 Ha omeʼẽ chéve tembiapoukapy aporomongarai hag̃ua Túva ha Taʼýra rérape, henyhẽva grásia ha añeteguágui, ha Espíritu Santo-gui, omeʼẽva testimónio Túva ha Taʼýragui.

12 Ha ojehu Enoc ohenóinte ohóvo arrepentimiento-pe opa tavayguakuérape, ha katu Canaán tavayguakuérape nahániri;

13 Ha tuichaitére Enoc jerovia haʼe oisãmbyhy Tupã tavayguakuérape, ha ihayhuʼỹhakuéra osẽ ñorairõme hesekuéra; ha haʼe oñeʼẽkuri Ñandejára ñeʼẽ, ha oryrýi yvy, ha yvytykuéra okañy, haʼe omandaháicha jepeve; ha ysyrypegua ykuéra ojei hapégui, ha oñehendu umi leõ kororõ upe taveʼỹme; ha opa tetãnguéra tuicha okyhyje, ipuʼakapágui Enoc ñeʼẽ, ha tuichaite pe ñeʼẽ puʼaka Tupã omeʼẽvaʼekue chupe.

14 Osẽ avei peteĩ yvy pe yguasu kuágui, ha tuichaitégui Tupã tavayguakuéra rayhuʼỹha kyhyje, okañy ha oñemomombyry hikuái, ha oho hikuái pe yvy osẽvaʼekuépe yguasu kuágui.

15 Ha umi gigante yvy arigua oñemomombyry avei; ha hoʼa peteĩ ñeʼẽngái opa tavayguakuéra Tupã rehe oñorairõvaʼekue ári;

16 Ha upe ára guive oikókuri ñorairõguasu ha tuguy ñeñohẽ ijapytepekuéra; ha katu Ñandejára ou ha oiko itavayguakuérandi, ha oiko hikuái tekojojápe.

17 Ha Ñandejáragui kyhyje hoʼákuri opa tetãnguéra ári, tuichaitégui Ñandejára glória, ojahoʼíva itavayguakueraguápe. Ha Ñandejára ohovasa upe yvy, ha ojehovasa hikuái umi yvyty ári ha umi tenda ijyvatéva ári, ha oñakãrapuʼã hikuái.

18 Ha Ñandejára ohenói Sion itavayguápe, oñemopeteĩgui ikorasõ ha iñakãme, ha oiko hikuái tekojojápe; ha ndaipóri imboriahúva ijapytepekuéra.

19 Ha Enoc omboʼénte ohóvo tekojojápe Tupã tavayguakuérape. Ha ojehu umi hiʼárape, haʼe omopuʼã peteĩ táva oñehenóiva Santida Táva, haʼéva Sion.

20 Ha ojehu Enoc oñeʼẽ Ñandejárandi; ha haʼe heʼi Ñandejárape: Añetehápe Sion oikóta sãsóme mbaʼevaígui akoiete g̃uarã. Ha katu Ñandejára heʼi Enoc-pe: Che ahovasa Sion-pe, ha katu amoñeʼẽngáikuri tavayguakuéra rembyrépe.

21 Ha ojehu Ñandejára ohechauka Enoc-pe opa umi yvy ári oikóva; ha haʼe ohecha, ha péina péina ápe, ára ohasávo, Sion ojeguerahákuri yvágape. Ha Ñandejára heʼi Enoc-pe: Péina ápe che aikoha, akoiete g̃uarã.

22 Ha Enoc ohecha avei tavayguakuéra rembyre, haʼéva Adán raʼykuéra; ha haʼékuri hikuái umi Adán ñemoñaréva ñembojeheʼa, Caín ñemoñare añónte nahániri, Caín ñemoñaréva ipire hũ, ha ndaijái ijapytepekuéra.

23 Ha Sion ojehupi rire yvágape, Enoc omaʼẽ, ha péina ápe, opa yvy arigua tetãnguéra oĩ henondépe;

24 Ha peteĩ ñemoñareaty rire ou ambue ñemoñareaty; ha Enoc oñemboyvate ha ojehupi Túva ha Kuimbaʼe Raʼy ykére; ha péina ápe, Satana puʼaka oĩkuri opa yvy ape ári.

25 Ha haʼe ohechákuri anhelkuéra oguejýva yvágagui; ha ohendu peteĩ ñeʼẽpu atã heʼíva: Aina áina umi yvy ári oikovévagui!

26 Ha haʼe ohechákuri Satanáme; ha haʼe oguereko ipópe peteĩ itasã guasu, ha ojahoʼi pytũmbýpe opa yvy ape; ha haʼe omaña yvate gotyo, ha opuka, ha hiʼanhelkuéra ovyʼákuri.

27 Ha Enoc ohecha anhelkuéra yvágagui oguejýva, omeʼẽvo testimónio Túva ha Taʼýragui; ha Espíritu Santo oguejy hetavéva ári, ha ojehupi hikuái Sion-pe, yvága puʼakakuéra rupive.

28 Ha ojehu Tupã yvagagua omaʼẽkuri tavayguakuéra rembyrére, ha hasẽ; ha Enoc omeʼẽ testimónio upévagui, heʼívo: Mbaʼére umi yvága hasẽ, ha oñohẽ hesay, ama yvyty ariguáicha?

29 Ha Enoc heʼi Ñandejárape: Mbaʼéichapiko nde nerasẽta, nde ningo ne marangatu, ha ára apyraʼỹ guive ára apyraʼỹ meve?

30 Ha ikatúramo yvypóra oipapa yvy arigua mbaʼe michĩvéva, héẽ, hetaiterei kóichagua yvy, ndahaʼemoʼãi ni pe iñepyrũmby umi nde apopyre papapy; ha umi ne kortína ojepyso gueteri; ha nde reime gueteri upépe, ha neñeñangareko oĩ upépe; ha avei ndejoja; ha nderekojoja ha ndepyʼaporã akoiete g̃uarã;

31 Ha reguerahákuri Sion nde pytiʼápe, opa umi nde apopyrégui, ára apyraʼỹ guive ára apyraʼỹ meve; ha mbaʼeve, ndahaʼéiramo pyʼaguapy, hustísia ha añetegua haʼe nde apykajegua oikoha; ha poriahuvereko ohóta nde rova renondépe ha ndopamoʼãi; mbaʼéichaiko ne rasẽta?

32 Ha Ñandejára heʼi Enoc-pe: Péina koʼãva, nde joykeʼykuéra; haʼéva hikuái che po rembiapokue, ha Che ameʼẽvaʼekue chupekuéra ikuaapy, ára Che ajapórõguare chupekuéra; ha Jardín de Edén-pe ameʼẽvaʼekue yvypórape isãso oiporavo hag̃ua;

33 Ha nde joykeʼykuérape Che haʼékuri, ha avei ameʼẽkuri tembiapoukapy, ojoayhu hikuái ojupe, ha tacheporavo chéve, Itúva, ha katu péina ápe, ndoguerekói hikuái mborayhu, ha ndaijaʼéi hikuái huguy teére;

34 Ha che pochy rata hendy hesekuéra; ha che pochy vaietépe, Che amboúta umi amaguasu hiʼarikuéra, che pochy vai hendýgui hesekuéra.

35 Péina ápe, Che haʼe Tupã; Marangatu rehegua Kuimbaʼe che réra; Kuimbaʼe Oñemoñeʼẽva che réra; ha Opaveʼỹva ha Ijapyraʼỹva avei che réra.

36 Upévare, Che aipysokuaa che po ha ajoko opa umi apopyre Che ajapovaʼekue; ha che resa avei ohasakuaa umíva, ha opa che po rembiapokue apytégui, arakaʼeve ndaipóriva tuichaite tembiapoñaña nde joykeʼykuéra apytepeguáicha.

37 Ha katu péina ápe, umi iñangaipa hoʼáta ituvakuéra akã ári. Satana haʼéta itúva, ha tekoʼasy idestíno; ha opa umi yvága hasẽta hesekuéra, héẽ, opa che po rembiapokue; upévare, nahasẽmoʼãipiko yvagakuéra, ohechávo koʼãva ohasaʼasytaha?

38 Ha katu péina ápe, koʼã nde resa ohecháva omanóta upe amaguasúpe; ha péina ápe, Che ambotýta chupekuéra; peteĩ kaʼirãi Che ambosakoʼíkuri chupekuéra g̃uarã.

39 Ha pe Che aiporavovaʼekue ojerurékuri che rova renondépe. Upévare, haʼe ohasaʼasy iñangaipakuérare; oñearrepentíramo hikuái upe ára che Poravopyre oujey vove chéve, ha upe ára peve ohasaʼasyvaíta hikuái;

40 Upévare, kóva rupi yvagakuéra hasẽta, héẽ, ha opa che po rembiapokue.

41 Ha ojehu Ñandejára oñeʼẽ Enoc-pe, ha omombeʼu Enoc-pe opa yvypóra raʼykuéra rembiapokue; upévare Enoc oikuaákuri, ha ohechákuri hembiapovaikuéra, ha hekoasykuéra, ha hasẽ ha oipyso ijyva, ha ojepyso ikorasõ ára apyraʼỹ pyrusúicha; ha iporiahuvereko ipyʼápe; ha opa ára apyraʼỹ oryrýi.

42 Ha Enoc ohecha avei Noé ha hogayguakuéra; opa Noé raʼykuéra ñemoñare ojesalvataha peteĩ salvasiõ temporal reheve;

43 Upévare, Enoc ohecha Noé ojapoha peteĩ árka; ha Ñandejára oguerohoryha upéva, ha ojoko upéva ipoite reheve; ha katu ou pe amaguasu umi hekoñañáva rembyre ári ha omokõ chupekuéra.

44 Ha kóva ohechávo, Enoc oñandu hiʼángape vyʼaʼỹ, ha hasẽ ijoykeʼykuérare, ha heʼi yvagakuérape: Nañemoangapyhymoʼãi; ha katu Ñandejára heʼi Enoc-pe: Emopuʼã ne korasõ, evyʼa ha emaʼẽ.

45 Ha ojehu Enoc omaʼẽ; ha Noé guive, haʼe ohecha opa yvy arigua tavayguakuéra; ha haʼe ojerureʼasy Ñandejárape heʼívo: Arakaʼépa oúta Ñandejára ára? Arakaʼépa oñeñohẽta pe Hekojojáva ruguy, opa umi hasẽva oñesantifika ha oguereko hag̃ua hikuái tekove ijapyraʼỹva?

46 Ha Ñandejára heʼi: Haʼéta ára asaje mbytépe, umi tembiapovai ha vengánsa árape.

47 Ha péina ápe, Enoc ohechákuri upe Kuimbaʼe Raʼy jeju ára, tetépe jepe; ha ovyʼa hiʼánga, heʼívo: Oñemopuʼã pe Hekojojáva, ha ojejuka pe Cordero múndo ñepyrỹmby guive; ha jerovia rupive che aime pe Túva pytiʼápe, ha péina ápe, Sion oĩ chendive.

48 Ha ojehu Enoc omaña upe yvýre; ha ohendu ouha peteĩ ñeʼẽpu hyepýgui, heʼíva: Ai, ái chehegui, yvypóra sy; Ahasaʼasy, chekangy che membykuéra rembiapoñaña rupi. Arakaʼépa apytuʼúta ha añemopopotĩta mbaʼekyʼa chehegui osẽvaʼekuégui? Arakaʼépa che Apohare che santifikáta, apytuʼu hag̃ua, ha toiko tekojoja che rováre peteĩ ára aja?

49 Ha Enoc ohendúvo pe yvy ipyahẽha, hasẽ ha ojerureʼasy Ñandejárape: O Ñandejára, ndereiporiahuverekomoʼãipa upe yvy? Nderehovasamoʼãipa Noé raʼykuérape?

50 Ha ojehu Enoc ojerureʼasýnte ohóvo Ñandejárape, heʼívo: Ajerure Ndéve, O Ñandejára, nde Unihénito rérape, jepe Jesucristo, reiporiahuvereko hag̃ua Noé ha iñemoñarépe, anive hag̃ua arakaʼeve umi amaguasu ojahoʼi pe yvy.

51 Ha Ñandejára ndogueropuʼakái; ha haʼe ojapo konvénio Enoc ndive, ha ohura chupe huraménto reheve, haʼe ojokotaha umi amaguasu; haʼe outaha Noé raʼykuéra rendápe;

52 Ha haʼe omoĩ peteĩ apoukapy iñambuekuaaʼỹva, peteĩ iñemoñare rembyre akóinte ojejuhutaha opa tetãnguéra apytépe, pe yvy oĩ aja pukukue;

53 Ha Ñandejára heʼi: Ojehovasapyre upe iñemoñare rupive outaha pe Mesías; haʼe heʼígui—Che upe Mesías, Sion-gua Rréi, pe Yvága Itaguasu, ára apyraʼỹicha ojepysóva; upe oikéva okẽme ha ojupíva che rupive, arakaʼeve ndoʼamoʼãi; upévare, ojehovasapyre umi che añeʼẽhague, oútagui hikuái vyʼapavẽ opaveʼỹva purahéi reheve.

54 Ha ojehu Enoc ojerureʼasy Ñandejárape, heʼívo: Opytuʼútapiko yvy Kuimbaʼe Raʼy ou vove hetépe? Ajerureʼasy ndéve, ehechaukami chéve koʼã mbaʼe.

55 Ha Ñandejára heʼi Enoc-pe: Emaʼẽ, ha haʼe omaʼẽ ha ohecha upe Kuimbaʼe Raʼy oñemopuʼãvo kurusúre, yvyporakuéra ojapoháicha;

56 Ha haʼe ohendu peteĩ ñeʼẽpu atã; ha ojeʼahoʼi vélope yvagakuéra; ha opa umi Tupã apopyre ojaheʼo; ha yvy ipyahẽ; ha ojeka umi itaguasu; ha santokuéra opuʼã, ha oñekorona chupekuéra upe Kuimbaʼe Raʼy akatúape, glória koróna reheve;

57 Ha osẽ opavave espíritu oĩva kaʼirãime, ha oñemboʼy Tupã akatúape; ha ambuekuéra opyta umi pytũmby itasãme upe ára guasu huísio peve.

58 Ha Enoc hasẽ jey ha ojerureʼasy Ñandejárape, heʼívo: Arakaʼépiko opytuʼúta pe yvy?

59 Ha Enoc ohechákuri upe Kuimbaʼe Raʼy ojupívo Túva rendápe; ha haʼe ohenói Ñandejárape, heʼívo: Nderejujeymoʼãvéipa yvy ári? Nde haʼégui Tupã, ha che roikuaa, ha nde rehurákuri chéve, ha remandákuri ajerure hag̃ua nde Unihénito rérape; nde ningo cheʼapohare ha remeʼẽvaʼekue chéve derécho nde apykajeguápe, ha ndahaʼéi chejehegui, ha katu nde grásia tee rupive; upévare, che aporandu ndéve nderejujeymoʼãipa yvy ári.

60 Ha Ñandejára heʼi Enoc-pe: Che aikoveháicha, upéicha Che ajúta umi ára pahápe, umi tembiapoñaña ha vengánsa árape, akumpli hag̃ua umi huraménto Che ajapovaʼekue ndéve Noé raʼykuérare;

61 Ha oúta ára upe yvy opytuʼutaha, ha katu upe ára mboyve umi yvága iñypytũta, ha peteĩ pytũmby vélo ojahoʼíta yvy; ha yvagakuéra oryrýita, ha avei upe yvy; ha oĩta tuicha jeikoʼasy yvypóra raʼykuéra apytépe, ha katu che tavayguakuérape Che añongatúta;

62 Ha tekojoja Che amboúta yvágagui; ha añetegua Che aguenohẽta yvýgui, otestifika hag̃ua che Unihénitogui; ijeikovejeýgui omanovaʼekue apýtegui; héẽ, ha avei opa yvypóra jeikovejeýgui; ha tekojoja ha hustísia Che ajapóta tojahoʼi upe yvy peteĩ amaguasupeguáicha, ambyaty hag̃ua umi che aiporavopyréva irundy yvy rembeʼýgui, peteĩ tenda Che ambosakoʼítavape, peteĩ Táva Marangatu, che tavayguakuéra ojekuʼajokua hag̃ua, ha tohaʼarõ che jeju ára; upépe oĩtagui che tavernákulo, ha hérata Sion, peteĩ Jerusalén Pyahu.

63 Ha Ñandejára heʼi Enoc-pe: Upéicharõ nde ha opa nde táva pemog̃uahẽta ambuekuérape upépe, ha ore romog̃uahẽta chupekuéra ore ykére, ha orerecháta hikuái; ha rojeitýta ijatiʼy arikuéra, ha haʼekuéra ore atiʼy ári, ha roñohetũta;

64 Ha upépe haʼéta che aikoha, ha haʼéta Sion, osẽtava opa umi apopyre Che ajapovaʼekuégui; ha mil áño pukukue pe yvy opytuʼúta.

65 Ha ojehu Enoc ohechákuri Kuimbaʼe Raʼy jeju ára, ára pahakuérape, oiko hag̃ua tekojojápe yvy ári mil áño pukukue;

66 Ha katu upe ára mboyve haʼe ohechákuri heta jeikoʼasy umi iñañáva apytépe; ha haʼe avei ohecha okuʼeha upe yguasu, ha yvyporakuéra korasõ ikangyha, ohaʼarõ aja hikuái kyhyjépe Tupã Ipuʼakapáva husiokuéra, oútava umi iñañáva ári.

67 Ha Ñandejára ohechauka Enoc-pe opa mbaʼe, jepeve múndo paha peve; ha haʼe ohechákuri umi hekojojáva ára, ha irredensiõkuéra aravo, ha ohupyty peteĩ vyʼapavẽ paha;

68 Ha haʼékuri opa Sion ára, Enoc árape, trescientos sesenta y cinco áño.

69 Ha Enoc ha opa itavayguakuéra oguatákuri Tupãndi, ha haʼe oiko Sion mbytépe; ha ojehu Sion opákuri, Tupã oguerahágui chupe ijykére, ha upe ára guive isarambi upe ñeʼẽ, Sion Ohókuri.