Apan Unsa Kon Ako Mapakyas?
Ang akong kahadlok nga mapakyas nakapugong nako sa pagpalambo og mga talento ug pagpangita og mga oportunidad sa paglambo.
Paghulagway sa litrato pinaagi ni David Stoker
Sa dihang nag-edad ko og sais, ang akong papa midala nako ug sa akong magulang nga babaye aron magdula og basketball. Mao kadto ang akong unang higayon nga magdula sa tinuod nga gym. Ang basketball bug-at kaayo sa akong gamay nga mga kamot ug sa ring—bisan sa labing duol nga distansya—ingon og taas kaayo.
“Ayaw kabalaka, i-shot lang,” miingon ang akong papa.
Milingi ko sa akong papa. “Apan Unsa Kon Ako Mapakyas?” Nangutana ko.
Sobra sa duha ka dekada ang milabay, wala na ko kahinumdom kon naka-shot ba ko o wala. Apan nahinumduman nako ang kahadlok nga akong gibati: “Unsa kon masipyat ko? Unsa kon ang akong labing maayong mga paningkamot dili kaayo maayo? Unsay akong buhaton kon ako mapakyas?”
Nahadlok nga Mapakyas
Kanang mao nga kahadlok nga mapakyas problema gayud nako sa akong tibuok kinabuhi. Sulod sa dugayng panahon, natural ra nga ako adunay kahanas sa mga daghang kalihokan sa pagtabon sa akong kahadlok. Apan makita gihapon kini sa gagmayng mga paagi. Dili kon mosulay og usa ka sport hangtud nga makahibalo ko nga maayo ko niini. Maglikay ko sa mga subject sa eskwelahan nga dili ko makamao. Kon mosulay ko og bag-ong mga kalihokan nga dili dayon magmalampuson, ang akong solusyon mao ang paghunong dayon ug mopadayon ngadto sa butang nga ako mas makamao.
Dayon nagmisyon ko. Sa unang higayon, napugos ko sa usa ka sitwasyon diin ang akong mga kahuyang klaro kaayo ug dili ako sayon-sayon nga makasibug. Naglisud ko sa pagsugod og panag-istoryahanay. Naglisud ko sa pagtudlo gamit ang bag-ong pinulongan. Gisalikway ko sa makadaghang higayon sa usa ka adlaw. Kanunay kong napakyas—mo-shot ug masipyat—ug dihay mga adlaw nga akong gikonsiderar ang pagsunod sa akong naandan nga sumbanan sa kapakyasan: moundang ug mopauli.
Kalisud sa Paghubad
Atol niining panahona, nakadawat ko og daghang gikinahanglan nga inspirasyon ug koreksyon gikan sa istorya ni Oliver Cowdery nga misulay sa paghubad sa mga palid. Human sa pipila ka semana sa pagsulat alang ni Joseph Smith, si Oliver nagsugod sa paghunahuna kon makahubad ba usab siya sa mga palid.
Nangutana si Joseph sa Ginoo ug nakadawat og tubag nga si Oliver tugutan sa paghubad. Bisan pa niana, ang Ginoo mihatag usab ni Oliver og pipila ka pasidaan, duha niini mao nga “magmapailubon” ug “dili mahadlok” (D&P 6:19, 34).
Ang paghubad dili sayon sama sa gihunahuna ni Oliver. Kon ang mga pulong dili dayon moabut, maglagot siya ug dayon moundang.
Pagdumala sa mga Oportunidad
Samtang gitun-an nako ang istorya, akong nahibaloan nga ang problema ni Oliver susama sa akong problema. Gusto siya nga makamao dayon sa paghubad, ug sa dihang klaro na nga wala dayon siya magmalampuson—nga siya mapakyas sa makadaghang higayon samtang maningkamot siya sa pagpalambo sa gasa—mibalik sa pagka-tigsulat, butang nga komportable siya. Ang pasidaan sa Ginoo sakto: Si Oliver dili mapailubon sa iyang kaugalingon o sa Dios, ug siya nahadlok. Mao nga gikuha sa Dios ang oportunidad gikan kaniya (tan-awa sa D&P 9:3).
Nakaamgo ko kon makapila ang akong kahadlok nga mapakyas mipahunong nako. Nahadlok kaayo ko nga “masipyat” nga wala gani nako buhata o mihunong human sa pipila ka pagsulay. Sa pagpaningkamot sa paglikay og kapakyasan, nawala nako ang mga oportunidad sa umaabut nga kalampusan. Dili ko mapailubon sa akong kaugalingon o sa Dios, ug nahadlok ko.
Ang istorya ni Oliver Cowdery nakahatag usab nako og paglaum. Bisan ang Ginoo misulti ni Oliver nga siya dili makahimo sa paghubad kaniadto, Siya misaad usab, “Uban nga mga talaan Ako aduna, nga Ako mohatag nganha kanimo og gahum nga ikaw makatabang sa paghubad” (D&P 9:2). Ang oportunidad ni Oliver sa paghubad wala mawala, nalangan lang. Sa samang paagi, ang mga oportunidad nga wala nako mahimo wala mawala. Ang Ginoo mohatag pa og dugang, kon ako andam nga magpailub ug dili motugot sa kahadlok nga mapakyas nga makapugong nako sa pagsulay.
Pakyas nga Mahadlok
Misaad ko nga akong sulbaron ang akong kahadlok nga mapakyas. Bisan og ako mahadlok gihapon nga makigsulti sa mga dili kaila o magtudlo gamit ang laing pinulongan, miarang-arang na ko niining duha. Kini nga mga kahanas nakatabang nako sa akong kinabuhi, bisan human sa akong misyon.
Aduna gihapoy panahon nga ako magduha-duha sa pagsulay og butang nga bag-o o pagbuhat og butang nga dili ko maayo. Apan nakat-on ko nga mas mapailubon. Nakat-on kong mo-shot ug dili mahadlok nga masipyat.