Sa Unsa nga Paagi Nakat-on si Eric sa Pagsalig sa Dios
Kining young adult nga gikan sa Ghana nasayud nga bisan kon ang kinabuhi ingon og walay paglaum, makasalig kamo kanunay sa Langitnong Amahan.
Layo gikan sa panimalay, giputos ni Eric ang iyang kaugalingon sa habol gikan sa Ghana samtang siya nag-ampo. “Ang habol nagpahinumdom nako sa akong yutan-ong panimalay,” miingon si Eric, “ug ang pag-ampo nagpahinumdom nako sa akong langitnong panimalay.”
Sa dihang ang 21 anyos nga si Eric Ayala sa Techiman, Ghana, nag-edad pa og 3 anyos, siya ug ang iyang inahan diha sa baligyaanan daplin sa dalan sa dihang usa ka sakyanan ang nawad-an sa kontrol ug midasmag kanila.
“Naigo niini pag-una ang akong inahan ug nabali ang iyang tiil,” miingon si Eric. “Dayon miguyod kini nako og layo-layo sa wala pa maligid ang akong lawas ngadto sa kanal. Gipahayag ako nga patay na ug gidala ngadto sa morge. Ang mortisyan nag-andam sa akong lawas sa dihang iyang nadiskobrihan nga buhi pa ko. Gidala dayon ko sa ospital.”
Karon nga naparalisar na ang mga bitiis, si Eric nag-atubang og daghang hagit samtang nagtubo siya nga dili makagamit sa iyang mga bitiis. Nakakuha siya og mga brace sa tiil nga maoy makapatindog niya, apan sa wala madugay natuboan na kini ug dili makapalit og ikapuli. Gihatagan siya og gamay nga wheelchair, apan natuboan usab kini. Ang iyang mga bitiis migamay, ug magkurog sa bikog, ug ang iyang mga tiil nahiwi.
Sa Ghana, kadtong adunay mga kakulangan sa kasagaran giisip nga sagubangunon. Ang pamilya ni Eric wala kaayoy kwarta, dili paigo nga ibayad sa pagpatambal. Sa dihang si Eric nag-edad og 10, nagkanuka-nuka siya sa panit tungod sa kakulang sa paglihok-lihok ug sa paglingkod sa kahoy ug semento. Ang mga nuka sa panit naimpeksyon, kanunay nga mag-agos, ug lain kaayo og baho.
Ang walay bongbong nga gipuy-an ni Eric sulod sa daghang tuig anaa gihapon sa luyo sa panimalay sa pamilya.
Ang resulta, si Eric nagpuyo sa gawas, sa bangko sa usa ka silonganan. Ang iyang mama, si Lucy, ug ang iyang igsoong mga babaye modala kaniya og pagkaon, molaba sa iyang mga sinina, ug motabang kaniya sa pagligo. Sa kasagaran si Eric mabasa sa ulan ug magkurog tungod sa katugnaw sa kagabhion. Nakat-on siya nga ganahan sa sidlak sa adlaw sa kabuntagon tungod kay nakahatag kini og kainit. Pobre kaayo nga dili makaeskwela ug wala makatrabaho, gigahin niya ang katuigan diha sa silonganan, usahay mosuroy sa kasilinganan sakay sa iyang wheelchair.
Ang Sinugdanan sa Pagtuo
Imbis nga mahimong masuk-anon, “Nagsugod ko sa paghigugma ug pagtuo sa Dios,” miingon si Eric. “Walay usa nga mitudlo nako mahitungod Kaniya, apan makita nako ang Iyang mga nilalang, ug makita nako ang maayo ug dautan sa mga tawo. Usahay lisud nga motuo Kaniya kon ang kinabuhi lisud. Apan akong nakita nga dunay maayo nga moabut sa akong kinabuhi, ug ako moingon, ‘Tan-awa, ang Dios ania ug talagsaon kini.’”
Si Eric wala matudloi sa pormal nga paagi unsaon sa pag-ampo, apan nagsugod siya sa pagtawag sa Dios. Nakadawat siya og mga tubag—sa dihang nasakit siya, usa ka wala damha nga oportunidad nga makaadto sa doktor; sa dihang nangayo siya nga mahupay gikan sa mga nuka-nuka sa panit, nawala kini; sa dihang natuboan ang iyang gamay nga wheelchair, usa ka mabination nga estranghero mihatag kaniya og dako-dako. “Ang Dios mibuhat og daghang maayong mga butang sa akong kinabuhi,” miingon siya.
Sa gihapon, usahay si Eric mawad-an sa paglaum. Iyang makita ang iyang kaugalingon nga maghilak kon siya magping-it sa kasakit ug gigutom. “Nakahukom ko nga kon gusto ko nga magmalipayon, anaa ra kini nako,” nahinumdom siya. “Akong gipugos ang akong kaugalingon nga mopahiyom. Kon dili, nahadlok ko nga ako mahimong dautan.” Ilabi na, iyang nakita ang mga higala nga migamit og alkohol ug mga drugas, ug, “ang akong kasingkasing nagsulti nako nga sayop kana.”
Dayon, ingon nga usa ka milagro, sa edad nga 14, si Eric gidawat sa eskwelahan. Ang iyang mama, pinaagi sa pagluto alang sa uban, nakatigum og igong kwarta nga ipalit og uniporme alang niya ug ibayad sa mga libro ug tuition. Sa eskwelahan, “dili ko makagawas ug mag-ehersisyo kauban ang uban,” mipasabut siya, “mao nga nagpabilin ko sa sulod ug magtuon sa tanang higayon.” Iyang gipahingangha ang iyang prinsipal tungod sa pagdawat og pinakataas nga grado sa math, reading, ug writing.
Usa ka madre gikan sa ospital ang mihatag og bag-ong tricycle aron si Eric maka-pedal gamit ang iyang mga kamot, aron makapasayon niya sa pag-adto sa eskwelahan. Apan sa pagbalik-balik ni Eric, ang mga nuka naabli pag-usab. Mibalik ang impeksyon, uban sa dili maayo nga baho kon dunay mogawas sa samad. Ang mga estudyante nagbagulbol mahitungod sa mga langaw nga naglupad-lupad libut ni Eric. Nag-edad siya og 17 sa dihang ang prinsipal misulti kaniya sa pagpauli ug magpaayo, o dili na siya makabalik sa eskwelahan.
Ang amahan ni Eric adunay gamay nga uma sa probinsya. Gidala niya ang iyang pamilya aron motrabaho sa uma, apan si Eric gibilin diha sa iyang silonganan, nga nag-inusara. Sa kasamtangan, ang iyang mga nuka mihubag ngadto sa dako nga samad ug ang impeksyon nga misulod sa iyang mga bukog, usa ka makahulga sa kinabuhi nga kondisyon nga gitawag og osteomyelitis.
Nakig-istorya og usa ka Obruni
Sa dihang siya 18 na, nakakita si Eric sa iyang higala nga si Emmanuel Ofosu-hene nga nagsulti og Iningles sa usa ka obruni (puti nga tawo). Ang obruni usa ka Mormon nga misyonaryo, nga si Elder Old. “Makasulti ra ko og Twi, apan si Emmanuel mihubad alang nako: ‘masakiton kaayo ko tingali mamatay na ko. Makatabang ka ba nako unsay buhaton aron makaadto ko sa langit?’
“Si Elder Old ug ang iyang African nga kompanyon milingkod uban nako ug mitudlo nako. Sa pipila ka rason, nagsugod sila sa Pulong sa Kaalam. Nasayud ko nga nagsulti sila sa kamatuoran tungod kay nasayud na ako nga ang kape ug tabako dili maayo.” Gihatagan usab nila si Eric og brochure mahitungod sa ebanghelyo ni Jesukristo ug midapit kaniya nga mosimba.
“Sa dihang misimba ko, nakita nako nga kini nga Simbahan lahi,” miingon siya. “Dunay balaang pagtahud.” Bisan og milungtad og usa ka oras ang pagtulod sa iyang kaugalingon diha sa iyang wheelchair, giganahan si Eric sa mga miting. “Gusto ko nga moadto sa atubangan ug makig-uban sa mga tawo,” miingon siya. “Apan nagpabilin ko sa luyo tungod kay nasayud ko nga nanimaho ko.”
Gisultihan ni Eric ang mga misyonaryo, “Unsay akong nakat-unan tinuod.” Gisultihan usab niya sila nga siya gusto nga magpabunyag, apan ang mga doktor mipasidaan kaniya nga dili ipabasa sa iyang mga samad. “Isalig nako sa Dios nga mohatag sa mga tubag,” miingon siya. Misimba siya sulod sa halos usa ka tuig ug dayon nagmasakiton na kaayo siya ug luya na nga moadto sa simbahan.
Ang inahan ni Eric, si Lucy, nakigkita sa mga misyonaryo, nagtuon sa ebanghelyo, ug nabunyagan niadtong 2015. Apan tungod kay ang iyang nabali nga bitiis wala man maayo pagpahimutang, sakit alang kaniya ang paglakaw. Ang pagtambong sa mga miting usa usab ka hagit alang kaniya.
Sa katapusan, si Eric gidala pag-usab ngadto sa ospital. Didto sa Ghana, ang mga pasyente mao ang mosangkap sa ilang kaugalingon og tubig, pagkaon, higdaanan, tambal, ug mga bendahe. Kon wala silay kwarta, dili sila tambalan. Ang inahan ug mga igsoong babaye ni Eric mibuhat unsay ilang mahimo. Si Eric dili kanunay nga makadawat og pagkaon ug medikal nga pag-atiman, mao nga nagkaluya siya.
Usa ka Wala Damha nga Pagbisita
Dayon si Eric nakadawat og wala damha nga mga bisita. Ang mga misyonaryo, nga sila si Sister Peprah ug Sister Nafuna, nakakita sa iyang litrato didto sa simbahan ug miabut aron makigkita kaniya sa ospital ug nagdala og pagkaon kaniya. Usa ka tuig nga wala siya makasimba, apan gisultihan niya sila nga siya gusto nga magpabunyag.
Paglabay sa pipila ka adlaw, ang igsoong babaye ni Eric mibisita kaniya ug nakita nga luya kaayo siya. Midagan siya pauli ug gisultihan ang ilang inahan. Bisan og ang ilang inahan nag-antus og permanente nga kadaot sa iyang bitiis sa aksidente uban ni Eric, naglakaw siya ngadto sa ospital, nagping-it sa matag lakang. “Kinahanglang mouli ka,” giingnan niya si Eric. “Kon mamatay man gani ka, gusto ko nga duol ka.”
Pagkasunod buntag ang mga sister nga misyonaryo miadto sa balay. “Wala ka didto sa ospital,” miingon si Sister Peprah. “Maong mianhi mi.” Uban nila mao sila si Elder ug Sister Wood, senior nga mga misyonaryo gikan sa New Zealand. Ilang gisusi ang mga panginahanglan ug misaad nga mobalik.
Paglabay sa pipila ka adlaw, ang amahan ni Eric midala sa pamilya balik ngadto sa uma—gawas ni Eric, nga nag-inusara na usab ug walay pagkaon o tubig. Sa dihang mibalik sila si Elder ug Sister Wood ug nakita si Eric nga nag-inusara ug gigutom, gihatagan nila siya og pagkaon ug tubig. Mibalik sila pagkasunod adlaw ug nakamatikod og likido nga nag-agos sa iyang bitiis ug nakita ang dakong samad sa iyang paa. Diha-diha gidala nila og balik si Eric ngadto sa ospital.
Ang mga Wood nakahibalo sa medical humanitarian team gikan sa Estados Unidos nga moadto sa Ghana. Ang team moopera ni Eric nga walay bayad. Ang surgeon mitambal sa ulcer sa bitiis ni Eric. Apan sa dihang iyang nakita ang kagrabe sa mga samad ni Eric, ingon man usab sa osteomyelitis, nakahibalo siya nga dili niya mabuhat ang tanang gikinahanglang mga proseso diha sa Ghana. Base sa iyang rekomendasyon, ang humanitarian nga organisasyon mipasiugda og proseso nga maoy modala ni Eric ngadto sa Estados Unidos aron makadawat og dugang nga pagtambal ug permanenting masira ang iyang mga samad. Agi og dugang, usa ka kapuy-an sa Winneba, Ghana, nga gidumala sa mga miyembro sa Simbahan, miuyon nga mopuyo si Eric didto sa iyang pagbalik aron siya makaeskwela ug makakompleto sa iyang edukasyon.
Samtang didto sa Utah aron operahan, si Eric mibisita sa modan-ag nga pool duol sa Salt Lake Temple. Miingon si Eric nga ganahan siya sa kalinaw nga pagbati nga iyang nasinati sa Salt Lake Temple.
Ang Ginoo Nagsangkap
Si Elder Wood, nga usa ka enhinyero ang propesyon, miayo sa hand-pedal tricycle ni Eric. Iyang gihimo ang susamang pag-ayo sa iyang wheelchair. Nagpakigtambag usab siya sa Presidente sa Cosgrave sa Ghana Kumasi Mission, nga usa ka medikal nga doktor. Gibati nila nga si Eric mahimong bunyagan kon ang tukma nga mga pag-amping ang himoon.
Gipakita ni Eric ang iyang tricycle ngadto sa iyang inahan ug mga igsoon human ayuha sa senior nga mga misyonaryo.
“Si Elder Wood miputos sa akong lawas sa plastik, nga gibutangan og tape ang palibut sa plastik,” mipasabut si Eric. “Dayon gidala ko niya sa bunyaganan nga puno sa tubig nga gibutangan og pangontra sakagaw. Nabunyagan ko niadtong Hunyo 26, 2016.” Si Eric misalig sa Ginoo, ug ang Ginoo mihatag og paagi.
Karon, si Eric nag eskwela nga mahimong computer technician. Apan mibati usab siya nga makaimpluwensya sa uban pinaagi sa musika—ganahan siya mokanta sa Twi. Ang iyang malaumon nga mensahe naghisgot mahitungod kon giunsa siya pagluwas sa Dios. Usa sa iyang paborito nga mga kasulatan nag-ingon, “Mohangad ngadto sa Dios ug magpakabuhi” (Alma 37:47). Ug siya moingon gihapon, “Nakita nako ang Dios sa tanan.”
Midugang siya, “Dili ko gusto ni bisan kinsa nga maghunahuna sa paagi nga mipanalangin ang Langitnong Amahan nako nga pareha sa paagi nga Siya mopanalangin sa uban. Apan Siya mopanalangin niadtong kinsa mosalig Kaniya. Kon kamo nag-atubang og lisud nga mga butang, pag-ampo ug salig sa Dios.”
Naghandom si Eric og mahayag nga kaugmaon. Nag-eskwela siya aron mahimong computer technician ug mibati nga siya makadasig sa uban pinaagi sa musika.