Paghinulsol: Kabahin sa Akong Dalan ngadto sa Kahingpitan
“Ang paghinulsol dili makauulaw nga kasinatian, makatabang kini kanato nga mahimong sama ni Kristo.”
Misulod ko sa opisina sa bishop nga mibati nga hingpit nga walay bili.
Ang bishop mipahiyom ug mitanyag nako og lingkuranan. Gipasabut nako ngadto kaniya unsay nahitabo, mas mibati nga mas naulaw sa matag pulong. Nangutana ko nga naghilak, “Unsay akong buhaton? Unsaon nako nga mahimong hingpit nga limpyo pag-usab?”
Ang bishop mihilom makadiyot, dayon miingon, “Ikaw sigurado nga mahimong limpyo gikan niini. Apan morag wala nimo masabti ang importante nga bahin sa paghinulsol.”
“Unsay buot nimo nga ipasabut?” Nangutana ko, nasurprisa ko.
Ikaw naghunahuna sa paghinulsol sama nga ikaw nagpislit og switch gikan sa kangitngit ngadto sa kahayag,” mingon siya. “Ingon og ikaw usa ka perfect 10, ug tungod kay ikaw nakasala, ikaw karon ana na sa 8 o sa 7.”
Miyango ko og hinay.
“Sa pagkatinuod,” ang bishop mipadayon, “Walay usa nato nga anaa sa 10, gani, kita tingali mas duol sa 1 ug 2. Dili kita hingpit sa pagsugod pa. Ang paghinulsol makalimpyo nato gikan sa sala, apan makatabang usab nato nga mouswag gikan sa 2 ngadto sa 3 ug ngadto sa 4 ug uban pa hangtud nga atong maabut kanang perfect 10 sa umaabut nga adlaw. Ang paghinulsol makatabang nato nga mahimong mas Kristohanon.
Nag-ampo ang bishop uban nako ug mitambag nako sa pagtuon sa gasa sa paghinulsol.
Sa akong pagbiya sa iyang opisina, naglingkod ko sa akong sakyanan og taud-taud, naghunahuna unsay iyang gisulti.
Nakaamgo ko nga siya sakto. Naghunahuna ko sa paghinulsol nga usa lang ka paagi nga makabalik kon unsa ko kaniadto, aron mahimong “10” pag-usab. Tungod kay ako nagtuo nga ako hingpit nga limpyo kaniadto, ang kabug-at nianang “kahingpitan” nakahimo nako nga mobati nga walay bili ug dili matubos—sama sa akong gibati kanunay kon magkinahanglan ko og paghinulsol.
Apan ang paghinulsol dili usa ka negatibo o makauulaw nga kasinatian—usa kini ka sukaranang baruganan nga mahimong sama ni Kristo. Nakapahimo kini nako sa pagbiya sa akong mga sala ug nakapahimo nako nga mahimong mas maayo pa kay sa kaniadto. Ang Manluluwas dili usa ka tawo nga tig-ayo, nga motabon sa mga liki sa akong kalag, apan usa ka arkitekto, nagtukod nako ngadto sa gitas-on nga dili nako makab-ot kon wala pa Siya.
Kini nga kahibalo nakapakuha sa akong pagbati nga dili hingpit. Dili ako hingpit ug dili kinahanglan—dili pa. Ang paghinulsol kabahin sa akong dalan ngadto sa kahingpitan. Misulod ko sa akong balay uban sa nausab nga panglantaw ug mapainubsanong kasingkasing.
Akong nahinulsulan ug gibiyaan ang sala nga nakapaadto nako ngadto sa opisina sa bishop nianang adlawa, ug karon gibati nako nga limpyo. Layo gihapon ko sa kahingpitan, apan salamat sa grasya ni Kristo igo nga makaluwas. Uban Kaniya, ako mapasaylo, maayo, ug mahatagan og kalig-on sa pagbuntog sa akong mga kahuyang. Ug pinaagi sa Iyang gasa sa paghinulsol, mahimo ako ngadto sa tawo nga gusto nakong mahimo.