Toe Vaai agai i le Malumalu Paia
E alaala le tusitala i Andhra Pradesh, Initia.
Na ou iloaina ou te manaomia le toe foi i le malumalu ia malamalama atili ma manatua feagaiga na ou osia.
I le fa tausaga talu ai, na fai atu ai Uso Suresh Natrajan, o lou faiaoga o le inisitituti, i le vasega, “E toafia outou ua o i le malumalu?” Ona o au ma lou toalua, o Anantha, na faia se malaga e 10 itula i le Malumalu o Hong Kong Saina mo le taimi muamua i le tausaga talu ai, na ou sii i luga lou lima ma le mitamita. Ona ia fai mai lea o se isi fesili: “Tou te manatua feagaiga na outou osia i le malumalu?”
O lana fesili na loloto. Na matuai tele naua mea e manatua i lou taimi muamua i le malumalu. Ao ou taumafai e mafaufau, i le mavae ai o lena taimi atoa lava, na ou iloaina ua galo ia te au feagaiga na ou osia i le malumalu. I le taimi lava lena, na ou faia ai le filifiliga e toe foi i le malumalu mo le taimi lona lua ma o le taimi lea ia taulai atu ma manatua feagaiga na ou osia ma isi mea e taua mo lou faaolataga.
Ua mavae se taimi. Ua ou feagai ma ni tofotofoga matautia i lo’u lava olaga. Ae sa ou lesitala i se vasega inisitituti, ma i se tasi aso na fai ai se matou lesona i le perofeta o Iona. E lei manao Iona e fai le mea na poloaiina ai o ia e le Alii e fai. O se tasi o fuaiupu na taia ai lou mafaufau o le Iona 2:4: “Ona ou faapea ai lea, ua lafoaiina au ai luma o ou fofoga; a ou te toe faasaga atu i lou malumalu paia.”
Na ootia lou loto i lenei mau, ma na ou tatalo i le Tama Faalelagi e tuu mai ia te au ma lou toalua se avanoa e asiasi ai i le malumalu.
I le mavae ai o le fa tausaga, na faamanuiaina i maua e le Tama Faalelagi e toe ulu atu i Lona maota, o le taimi lea i le Malumalu o Taipei Taiuani.
Mahesh ma Anantha Vedurupaka i luma o le Malumalu o Taipei Taiuani.
A o i ai iina, sa ou maua le avanoa e fai ai ni sauniga mo le uso o lou tama na maliu i le kanesa. Ao papatisoina au mo ia, na ou mafaufau i faamanuiaga o le a ia maua e ala i lenei sauniga o le malumalu. Sa ou matuai fiafia lava, ma na ou iloaina le mea na tau mai e le peresitene o le malumalu ia te au ina ua ou sau i le malumalu mo le taimi muamua lava ae na fai si le mautonu. Na ia tau mai ia te au, “Uso, atonu e te le malamalama i mea uma o loo e faia i le taimi nei, ae o le a oo mai le aso o le a e lagona ai na e faia ni mea maoae iinei.”
Ua ou maua lau tali. Na fa tausaga mo au e malamalama ai e ala i le asiasi atu i le malumalu mo le taimi lona lua.
O lenei la, ao tago atu i le faamanatuga i vaiaso taitasi, ou te manatua le mamana tele o le Togiola a Iesu Keriso ma le paia tele o feagaiga na ou osia i totonu o le malumalu.
O le tausaga lenei o le lona 10 lea o tausaga o lau faaipoipoga ma lou toalua. Ou te manao e faamanatu i le malumalu ma faia sauniga faamau mo ou tuaa. Ina ia faia lenei mea, ua ou faigaluega i se galuega lona lua mai lau galuega masani, se galuega e le afaina ai lou taimi ma lou aiga.
Ou te iloa ma ou te lagonaina o galuega faalemalumalu e moni. E leai se isi mea e mafai ona suitulaga ai, ma e matuai aoga ai lava soo se osigataulaga ina ia auai i le malumalu ma faia le galuega a le Tama Faalelagi mo i tatou lava ma mo agaga o loo i le isi itu o le veli.