Puipuia e ala i Feagaiga
E alaala le tusitala i Hawai’i, ISA.
O le mana ma le puipuiga ua folafolaina mai ia i latou e ofuina ma le faamaoni le ofusa o le malumalu e le sau faamaneta; e sau mai le Atua.
O lou fiafia i le ofuina o le ofusa o le malumalu e le mafai ona faamatalaina atoatoa i upu. E ui o le ie faaletino o loo faia ai le ofusa e māmā ma tau le iloa ina ua ou masani i ai, o le mea o lo o suitulaga ai le ofusa, o faamanuiaga e oo mai ai, ma foliga vaaia i fafo o lau tautinoga faaleagaga i le Atua—ma lou alofa mo le Atua—e faia ai lou ofuina i aso uma o se aafiaga matagofie ma faaleagaga. O le filemu lea. O le malosi lea. O le toafimalie lea. O le mana lea. E paia. O se faamanuiaga i lou olaga e pei ona ou faia i ai.
I nisi taimi e mafaufau ai tagata o le ofusa ua na o se ofu i totonu, po o se fua faigofie o le tauagafau, ua faia ia faaali atu ai ia te i latou ofu e mafai ma le mafai ona ofuina—o se laina faaataata o le mea e talafeagai ma le le talafeagai. Ma e ui o le ofuina tatau o le ofusa e mautinoa lava e faamalosia ai le tauagafau (ae maise lava i tu faalelalolagi), o le ofusa o le perisitua paia e suitulaga mo mea e sili atu.
Vaaiga Mamana e Faavavau
Na ou maua lou lava faaeega paia i le 19 o tausaga ao sauniuni ai mo lau faaipoipoga faalemalumalu. Ma e ui o tulaga le maalofia na iu ai lena faaipoipoga, sa ou faamaoni pea i au feagaiga, ma o na feagaiga na ou osia ma le Alii na tumau pea. Na ou piimau atu i ai ma sa faamausaliina ai au. Sa le tuulafoaiina au i ou tofotofoga ma sa faamalosia au mo na tofotofoga.
Ua ou maua le anoanoai o faamanuiaga mo le faaauau pea ona umia se pepa faataga o le malumalu, mo le ofuina ma le tatau o le ofusa e pei ona faatonuina, ma mo le tausiaina o feagaiga na ou osia i le malumalu. E ui ina le mafai ona tolaulauina taitasi faamanuiaga uma mai lea usiusitai, o mea mataalia na ou iloaina o le mafaia lea ona faamausaliina se vaaiga faalelagi ma le faamanatu faaletino faifai pea ia faia filifiliga sao e ui ina le faia e i latou o e siomiaina au—ma e ui foi ina ou tiga ona o filifiliga a isi.
E tele mea na sese i lou olaga i le 11 tausaga ua mavae (o mea e sili ona le lelei e aofia ai le tetea ma le toalua, mafatia i faafitauli tau tupe, ma vaivaiga faatigaulu faalegaluega ma faaletagata), ae o le tumau ai ona ofuina le ofusa ma le toaga i le malumalu na fesoasoani ia te au e iloa ai e tele atu mea i lenei olaga nai lo o se tofotofoga ua ou aafia ai i lea taimi—tusa lava po o le a le faigata po o le tiga o na taimi uma.
Ona sa fesoasoani nei faamanatu e lua ia te au e tumau ai le latalata i le Agaga, sa taitaieseina au mai puapuaga faaletino e ala i uunaiga faaleagaga na ou filifili e mulimuli i ai—ma na tuuina mai foi ia te au se faamoemoe ma se vaaiga e faavavau malosi lea na taitaiina au i ou taimi pogisa ina ua ou le lagonaina le i ai o sou malosi e faia ai se isi laasaga i luma i le faalelagona pe faaletino i lau faigamalaga. O lenei filemu ua faaauau pea ona faamalosia au i le oo mai ai o luitau ma tofotofoga fou.
O faamanuiaga mai le malumalu ua ou aafia ai e amata mai faamanuiaga i lea aso ma lea aso tatou te le ano i ai i nisi taimi (e pei o le filemu i le loto ma musumusuga), e oo atu i mea e mataina, faavavau, ma mea ua iloga (e pei o le faamauina e faavavau i o tatou aiga). O aafiaga a tagata taitoatasi e uiga ese ma e patino—ae o faamanuiaga e oo mai ia i tatou i taimi uma i le taimi sao a le Alii pe a tatou tausia a tatou feagaiga (tagai Mataupu Faavae ma Feagaiga 82:10). Ma o le ofuina o le ofusa o se auala taua ma patino o le faaalia i le Alii o lo o tatou manatua pea a tatou feagaiga.
Puipuiga Faaleagaga Faifai Pea
Na faamatala mai e Peresitene Boyd K. Packer (1924–2015), le Peresitene o le Korama a Aposetolo e Toasefululua, se tasi o faamanuiaga e mafai ona tatou faamoemoe e maua pe a tatou ofuina ma le tatau le ofusa: “O le ofusa e suitulaga i feagaiga paia. E faamalosia le tauagafau ma e avea o se talipupuni ma se puipuiga i le e ofuina.”1
O lenei talipupuni e mafai ona puipuia i tatou mai mea ua taua e Nifae o “ufanafana mu a le fili” (1 Nifae15:24). Ana mafai ona tatou fuafuaina le tele o ufanafana e velo mai e Satani ia i tatou i aso taitasi uma, ou te vaai faalemafaufau o le fuainumera o le a pei o fetu o le lagi. Ua tatou ola i se lalolagi o loo taumafai malosi e faaleaga mea tatou te talitonu i ai. E siomia i tatou i soo se mea i ata ma savali le talafeagai, faapea ai ma le vevesi mai e faaaoga vailaau faataumaoi pe solia le tulafono o le ola mama. E sili atu ona masani ai o le vevesi ma le faaosoosoga e finau ma agaleaga, pe i le tino po o luga o upega tafailagi; e ulagia ai pe faamaasiasi ai isi i le faaalia o o latou manatu ma talitonuga; po o le ula i se tagata mo sina mea itiiti lava e pei o se mea sese tau tusitusi. O nei osofaiga faaleagaga, a faapea e usitaia, e faapogisaina ai o tatou mafaufauga ma faaitiitia ai lo tatou mafaia ona lagonaina lapataiga mai le Agaga Paia.
O le lisi o “ufanafana mu” o lo o velo mai e Satani ia i tatou e moni lava e le mavae ma e matautia i taimi uma lava. Na fai mai Elder Taniela B. Wakolo o le Fitugafulu, “O mea faalavefau ma faaosoosoga o le olaga e pei lava o ni ‘luko feai.’” E faapefea la ona tatou puipuia i tatou lava? Mulimuli ane i lena lava tautalaga, na ia faaopoopo ai, “Ou te folafola atu o le auai i sauniga ma le faamamaluina o feagaiga e fesootai i ai o le a aumaia ia te outou le malamalama ofoofogia ma le puipuiga i lenei lalolagi ua matua faapogisaina.”2
Afai o “ufanafana” o loo tauai mai e Satani ia te oe o ni mea maamaai moni lava e mafai ona e vaai i ai ma lagonaina, pe e te tuua se talipupuni i le fale? Pe o le a e le amanaiaina ea le malamalama o le auala e puipuia ai oe lava—po o le ala i se nofoaga malu? Pe o le a e faatuai ea ona osia ma tausia feagaiga ma le Atua ae na Ia folafola mai o na feagaiga o le a fesoasoani ia te oe e te manumalo ai?
O le Mana o Feagaiga i lo Tatou Alualu i Luma
O le puipuiga e tuuina mai e le ofusa e le oo mai i soo se ituaiga o maneta i le ofusa faaletino lava ia, e pei ona talitonu sese ai nisi. Nai lo lena, o le puipuiga ua folafolaina o le puipuiga a le Alii e tuuina mai faaletino ma faaleagaga pe a tatou tausia a tatou feagaiga ma faaalia lo tatou tuuto faamaoni ia te Ia i aso uma.
O feagaiga o le malumalu ma le ofusa e le mo tagata atoatoa. Ua fuafuaina e fesoasoani e talipupuni ma puipuia tagata le atoatoa o e o loo taumafai i le mea sili latou te mafaia ia avea ai ma tagata e sili atu. O tagata o e salamo pe a latou pauu ma agai pea i luma. O tagata e pei o oe ma a’u.
E pei lava ona tatou tagofia faaletino le faamanatuga i vaiaso taitasi ia manatua ai ma faafou a tatou feagaiga o le papatisoga, o le faia o le ofusa i aso uma e avea o se faamanatu faitino o feagaiga na tatou osia i totonu o le malumalu. O mea nei tatou te manaomia i la tatou malaga i le avea atili ai faapei o Keriso.
I tua atu o le puipuiga faalelagi, o le tausia o a tatou feagaiga ma le ofuina o ofusa o se auala lea e faaali atu ai i le Atua i aso uma le tele o lo tatou alofa ia te Ia, ma o le a tatou mulimuli i Ana poloaiga ona tatou te alolofa ia te Ia—ma o se ala lea mo i tatou e maua ai le tele o faamanuiaga e finagalo le Atua e tuuina mai ia i tatou. E alofa moni lava o Ia ia i tatou e sili atu i le mea e mafai ona tatou malamalama ai ma e finagalo o Ia ia tatou saogalemu ma ia maua le puipuiga na Ia folafola mai.
Faamanuiaina i Aso Uma
O loo tatou tau pea i aso taitasi i se taua faaleagaga, pe tatou te iloaina pe leai. O feagaiga e osia i totonu o le malumalu ma tausia i o tatou olaga i aso taitasi o le a fesoasoani ia i tatou e manumalo ai i le agasala ma Satani, ae e pule lava i tatou pe saunia—ma ona faatuatua lea.
Ou te matuai fiafia lava mo lau filifiliga e ulu atu i le malumalu—ma mo isi filifiliga na sosoo ai ua ou faia ina ia tausia au feagaiga. Ua faamanuiaina au i aso taitasi mo lau filifiliga ma mo le ofuina tatau o le ofusa, e pei ona ou osi feagaiga e fai. Ua ia faatumauina lou saogalemu. Ua ia faamanatu mai ia te au au feagaiga. Ma ua ia faaalia i le Atua ou te alofa ia te Ia e sili atu i le lalolagi ma o le a ou faia mea ua Ia tau mai ia te au e fai.