O Lau Malaga e le Mailoa i le Olaga Faitino
Saunia e Elder Dieter F. Uchtdorf
O Le Korama a Aposetolo e Toasefululua
Mai se faigalotu i le lalolagi mo talavou matutua, “O Lau Malaga e le Mailoa i le Olaga Faitino,” na tuuina atu e Elder Dieter F. Uchtdorf ma Sister Harriet Uchtdorf i le Nofoaga Autu mo Konafesi i le aso 14 o Ianuari, 2018.
Talitonu—ma o le a faatasi le Atua ma oe. Ia ua’i atu lou loto ia te Ia—ma o le a Ia taiala oe i lau faigamalaga.
E lelei le i ai ma outou i le aso ma lagona lo outou agaga, la outou malosi, la outou naunautai. Ua ou fiafia ua tatou maua se avanoa e faalogologo atu ai ia Sister Uchtdorf. O Harriet o le lasusulu o lo’u olaga. Ua silafia uma e tagata o ia, ma alolofa ia te ia. O ia le ituaiga o tagata na te faaleleia ma faafiafiaina atili i latou o siomiaina o ia. O ia moni lava o le faatosinaga ia te au.
O lea faatoa uma ona faamanatu le 55 tausaga o le ma faaipoipoga. A ma vaavaai atu i le ma fanau e toalua ma o la taitoalua, a ma fanau a fanau e toaono ma o latou aiga, ma le ma fanau a fanau a fanau e toafa, ma te maofa lava i le maoae tele o le malaga o la ma olaga.
O Le Vaitau o Tali Vave
Sa oo mai se manatu mata’ina ia te au a o ou saunia mo lenei faasalalauga. Ioe, e moni, o tausaga a o 18 i le 30 ou tausaga sa seasea iloa atu i le faaata i tua ae e ui i lo’u matua o i ai nei, o loo ou lagonaina pea le talavou i totonu. O le mea moni, o le toatele o i tatou o tagata matutua e manatu ia i tatou lava o ni tagata talavou ua leva ona ola mo se taimi umi.
A outou vaavaai mai ia i matou, o le “tupulaga matutua,” e mafai ona e maofa i le tele o mea tatou te tutusa ai ma la outou tupulaga nai lo le mea e te ono manatu i ai. Ou te talitonu o eseesega i le va o fanau a le Tama Faalelagi, po o le a lava lo latou matutua, e itiiti lava e faatusatusa i tulaga e tutusa ai. Mo se faataitaiga, e toatele outou o loo i ai fesili e uiga i le Atua ma oe lava ia—fesili loloto, ma taua ia e talitutusa ma fesili na fesili ai tagata e matutua atu ia te outou:
“O i ai moni ea se Atua? E alofa ea o Ia?”
“Pe o ou i ai ea i luga o le ala sao?”
“Aisea ou te lagona ai i nisi taimi le leai o se faamoemoe, lofituina, le amanaiaina, po o le tuuatoatasi?”
“Aisea e le o faatosinaina ai e le Atua lo’u olaga?”
Aisea na le tali mai ai o Ia i se tatalo?”
“Aisea na Ia faatagaina ai au ia oo i lenei faanoanoa, ma’i, po o se faalavelave?”
E mafai ona avea nei fesili ma ni fesili e faigata ona taliina.
I lenei vaitau o tali vave—lea ua faigofie ai lava ona maua se malamalama maoti ma lē mailoa i le Google—tatou te le fiafia ai i nisi taimi pe a tuai ona maua mai ni tali i a tatou fesili e sili ona patino, taua, ma faananati. Tatou te sii ae o tatou loto i le lagi ae na o le pau le mea e foliga mai o tatou maua o se “faailo (cursor) faatalitali” faaitatagata o loo taavilivili pea.
Tatou te le fia faatalitali.
A tatou faatalitali e sili atu ma ni nai sekone mo se sailiga i le initoneti e tali mai, tatou te ono manatu ua faaletonu pe ua motusia foi le fesootaiga. I lo tatou le fiafia, e ono tatou lafoaia ai lava le sailiga. Ae a oo mai i fesili e faavavau, o mataupu tau i le agaga, e tatau ona tatou onosai atili.
E le o tali uma e tutusa le taua. O tali e oo mai le poto faalelalolagi po o manatu taatele e faigofie ona oo mai, ae e vave lava ona mou atu lo latou taua pe a oso mai ni teori po o ni faiga fou. O tali faalelagi—tali e faavavau—e le mafaatauina. O le mauaina o nei tali e tele ina manaomia ai le ositaulaga, galue, ma le onosai.
O nei tali e aoga ai le faatalitali.
O lo’u faamoemoega i le asō o le ofo atu lea o la’u molimau mautinoa e silafia outou e lo outou Tama i le Lagi, e faafofoga mai o Ia ia te outou, ma o le a le tuulafoaiina lava outou. A gauai atu o outou loto ia te Ia ma taumafai e mulimuli i Ona ala, o le a i ai o Ia i o outou olaga ma taitai o outou ala a o outou faimalaga ai i lenei malaga e le mailoa maoae ma faafiafiaina o le olaga faaletino.
Faafesootaiina o Vaega Togitogi o le Olaga
O se tasi o tagata fatufatua’imea maoae o o tatou taimi, o Steve Jobs o le Apple, sa i ai le manatu lenei: “E le mafai ona e malamalama i mea o le a tutupu ia te oe i le lumanai; e faatoa e malamalama lava i ai pe a vaai i tua ina ua mavae. O lea la e tatau ona e faatuatuaina o mea o le a tutupu [togitogi] ia te oe i le lumanai o le a e malamalama i ai.”1
O le a le uiga o lana saunoaga? I le faaiuga o le seneturi lona 19, na amata ai e tusiata e pei o Georges Seurat ma Paul Signac ona valiina ata i se sitaili fou na iu ina lauiloa o le neo-impressionism [ata togitogi]. O le la metotia sa i ai le togitogiga o atavali i ni togitogi ninii o lanu. A lata mai, e foliga mai ai nei togitogi e le fesootai ma salalau solo. Ae a e tagai i le atavali atoa, e mafai ona e vaai i togitogiga ua taatitia lelei i ni lanu ma le auala o le a fatu mulimuli ane ai ia lanu ma faaali mai ai se mamanu matagofie. O le mea sa foliga muamua mai sa salalau solo ma fenumiai ua amata ona malamalama i ai.
O Le Papal Palace i Avignon, saunia e Paul Signac, mai le Getty Images
O nisi taimi e pei ai o tatou olaga o se atavali togitogi. O togitogi o lanu ia e fatu ai mea e tutupu ma taimi patino i o tatou aso e mafai ona vaaia le le fesootai ma le fenumiai i nisi taimi. Ua le mafai ai ona tatou vaaia se faatulagaga i na mea. Ua le mafai ai ona tatou mafaufauina pe o i ai so latou faamoemoega.
Peitai, a tatou toe laa i tua ma vaai atu i se vaaiga e faavavau, a tatou vaai i o tatou olaga i le faavaa o le talalelei a Iesu Keriso, e mafai ona tatou amata vaaia le auala e fesootai solo ai togitogi eseese i o tatou olaga. Atonu e le mafai ona tatou vaaia le ata atoa i lenei taimi, ae o le a lava mea tatou te vaaia e faatuatuaina ai o loo i ai se mamanu matagofie ma silisili. Ma a o tatou tauivi e faalagolago i le Atua ma Lona Alo, o Iesu Keriso, o le a i ai se aso o le a tatou vaaia ai le fua faaiu, ma o le a tatou iloa ai sa taitaiina ma taialaina lava e le aao o le Atua a tatou laasaga.
O le a tatou iloa o le Agai o Tupu (Tufuga Sili) sa i ai se fuafuaga mo na togitogi salalau solo i le taimi atoa lava. O le a tatou iloa ai na Ia faalauteleina a tatou taleni, saunia avanoa, ma faailoa atu i tatou i avanoa e sili atu le mamalu nai lo mea sa tatou mafaufauina pe ausiaina e i tatou lava ia. Ua ou vaaia moni nei mea i lo’u lava ia olaga.
O La’u Malaga e le Mailoa o le Olaga Faaitino
A o ou laitiiti lava, sa faalua ona faamalosia i matou e sosolaese mai lo matou aiga ma tiai ai mea uma. I solaaga uma e lua, sa manino lava o tagata sa i o matou nofoaga fou sa manatu ia i matou o ni tagata “faatauvaa” i lo i latou. I tamaiti o la’u tupulaga, o la’u gagana tautala sa faailogaina ai au o se tagata mai fafo, ma o se mea tele lea mo latou e faatauemu ma toē i ai.
O le le fiafia ma le atuatuvale ona o feoaiga i nofoaga fou na mafua ai ona faaletonu la’u aoga ma maumau ai le tausaga a’oga atoa e tasi. I Siamani i Sasae, sa ou aoao ai le FaaRusia o se gagana lona lua. Sa faigata, ae sa ou gafataulimaina lava. Ae, i Siamani Sisifo, sa manaomia ona ou aoaoina le Igilisi.
Sa foliga mai e le mafaia lea mea ia te au! Sa ou talitonu sa le’i faia tonu lo’u gutu mo le gagana Igilisi.
I le vaitaimi o o’u tausaga talavou, sa ou faananau ai lava i se teineitiiti e sili ona ofoofogia ma ona mata eena lapopoa aulelei. Ae paga lea, sa foliga mai sa leai ma sina fiafia mai o ia ia te a’u.
O lea la, o au o se alii talavou sa le taua ma tauivi sa ola i Siamani i le mavae o le taua ma o le sa lei foliga mai sa tele se avanoa e faamanuiaina ai i le olaga.
Peitai, sa i ai ni nai mea lelei sa i ai mo au. Sa ou iloa sa alolofa lo’u aiga ia te a’u. I le aoga ma le lotu, sa i ai ni faiaoga sa uunaia au ia seti pea ni a’u sini maualuluga. Ou te manatua pea le taimi na aoao mai ai e se faifeautalai talavou Amerika le mataupu faavae lenei mai tusitusiga paia: “Afai o le Atua e mo [oe], o ai la e faasagatau atu ia te [oe]?”2
Sa i ai se mea e uiga i lea manatu na taiaina au i se mana malosi. “Afai o le tulaga lena,” sa ou manatu ai, “aisea ea la ou te fefe ai?”
O lea sa ou talitonu ai. Ma sa ou faatuatuaina le Atua.
Mo se taimi, sa ou i ai i se polokalama o se galuega faataitai. Sa lu’iina au e se tasi o a’u faiaoga ina ia taulai maualuga atu ma auai i aoga po e suesue le faaenisinia o afi. Sa matua tele se galuega faaopoopo na faia ai, ae sa taitai atu ai au e mauaina lo’u fiafia tele i mea tauvaalele! Sa faateia a’u ina ua ou iloaina ina ia avea ma se pailate sa manaomia ona ou iloa le Igilisi. Ae sa ou manao ia avea ma se pailate, ma sa pei o se vavega le suia o lo’u gutu, ma sa lei toe avea ai le Igilisi ma se gagana faigata.
Faatasi ai ma se uunaiga fou, o se tautinoga fou e galue malosi, ma le faalagolago i le Tama Faalelagi, sa ou faia ai ni laasaga iti ia na fesoasoani ia te au e atiae le talitonuga e mafai ona ou faia. Ioe, sa lei faapea la na sologa lelei ai pea mea i taimi uma.
A o 19 ou tausaga, sa ou malaga atu ai i San Antonio, Texas, e amata la’u aoaoga faapailate i le ea fosi. I luga o le vaalele, sa ou saofai ai i autafa o se alii sa tautala i se gagana malosi Faa-Texas. Sa ou iloa ai ma lo’u fefe o le Igilisi lea sa ou matua galue malosi e aoao sa le i tutusa ma le Igilisi sa latou tautatala ai i Texas!
I le a’oga faapailate, sa faigata foi. O se polokalama na matua fefeu, faatasi ma tagata uma sa tauva mo le tulaga sili i le faauuga. Sa ou iloaina vave ua ou i ai i se tulaga le lelei ona o le toatele o tagata o la’u vasega o le latou gagana tautatala i le Igilisi.
Sa lapataia au e a’u faiaoga e uiga i se isi tulaga le lelei e ono tupu—sa ou faaaluina le tele o le taimi i le lotu. Sa talileleia a’u e tagata o le ekalesia i le lotoifale i le latou paranesi ma i o latou aiga, ma sa matou fausiaina faatasi foi se falesa i Big Spring, Texas. Sa popole a’u faiaoga i na gaoioiga ina nei faaletonu ai lo’u avanoa i se tulaga maualuga. Ou te lei manatu faapena. O lea sa ou faatuatuaina ai le Atua ma faia le mea sili na ou mafaia.
Mulimuli ane, sa ou aoaoina le Igilisi e ui o loo ou galue ai pea i le aso. Sa ou faamaeaina la’u a’oga faapailate—ma faaiu i le sili i la’u vasega. Sa avea a’u ma se pailate o vaalele tau ma mulimuli ane o se kapeteni o vaalele laupasese. Ma o lena teineitiiti aulelei mata enaena o a’u miti na avea ma au ava.
Fai ma le Atoatoa Mea Iti
Pe o i ai se lesona i lenei mea? Ou te manatu e tele!
O le tasi atonu o lenei: Aua nei lofituina i le tele o galuega tetele ma faigata o le olaga. Afai e te tuuto atu e fai ni mea “faigofie”—mea “iti” ia ua talosagaina oe e le Atua e fai—ma e te faia ma le atoatoa i le mea e te mafaia, o le a mulimuli mai mea tetele.
O nisi o nei mea iti ma faigofie e mafai ona e faia ma le atoatoa e i ai le suesueina o tusitusiga paia, ola i le Upu o le Poto, auai i le lotu, tatalo ma le faamoemoega moni, ma le totogiina o sefuluai ma taulaga.
Ia faia nei mea e tusa lava pe e te le fia manao e fai. O nei “osigataulaga” atonu e foliga mai e itiiti, ae e taua tele, aua “o osigataulaga e aumaia faamanuiaga o le lagi.”3
I se lagona, o au osigataulaga itiiti ma faatauvaa o togitogi ia o le olaga o aso taitasi ia e maua ai le atavali silisili o lou olaga. Atonu e te le vaaia le auala e fesootai ai togitogi i le taimi nei, ma e te le manaomia ona vaai i ai i le taimi nei. Tau lava ina ia i ai le faatuatua ia lava mo le taimi patino o loo e ola ai i le taimi nei. Faalagolago i le Atua, ma “o mea iti [o le a] tutupu mai ai mea tetele.”4
Talitonu i le Atua
Ia, atonu tou te manatu, ”Ioe, Elder Uchtdorf, ua lelei uma na mea mo oe. Ae o oe o se Aposetolo. Ua na o au o se tagata masani o le Ekalesia. E le o taliina a’u tatalo. E le o taitaia lo’u olaga. Afai o i ai se fuafuaga mo au, ua na o se kopi o lau fuafuaga. O se fuafuaga tuufaasolo mai lalo. O se fuafuaga e iloa ai o loo silafia oe e le Atua ma ia tau lava ina faamalieina i mea ua maua.”
Au uo pele, o outou o fanau a le Atua soifua, o le Atua o le atulaulau. E alofa o Ia ia te outou, e finagalo o Ia ia outou manuia, e i ai Sana fuafuaga ua saunia mo lo outou manuia, manatua le tala a Steve Jobs: “E le mafai ona e faafesootaiina vaega togitogi ao taulai atu i luma; e mafai ona e faafesootaiina i latou i le toe tagai i tua.”
A o ou pei o outou, sa leai ma so’u iloa i mea o le a ave i ai a’u e lo’u olaga. Sa ou lei vaaia le fesootaiina o togitogi i o’u luma.
Ae sa ou faalagolago i le Atua. Sa ou faalogo i le fautuaga a se aiga alofa ma uo atamamai, ma faia ni nai laasaga laiti o le faatuatua, sa talitonu afai ou te faia le mea sili ou te mafaia i lea taimi, o le a taulimaina e le Atua le ata e tele atu.
Ioe, sa Ia faia.
Sa Ia silafia le taunuuga mai le amataga i le taimi sa ou le iloaina ai.
Sa le mafai ona ou vaaia le lumanai, ae sa Ia silafiaina.
E oo lava i na taimi o faigata sa ou manatu ai na tuulafoaiina au, sa faatasi o Ia ma a’u—ua ou vaaia nei lena mea.
I le Faataoto, tatou te maua ai le folafolaga maoae lenei: “Ia e faatuatua ia Ieova ma lou loto atoa; a e aua le faalagolago i lou lava atamai.
Ia e manatua o ia i ou ala uma, ona faatonuina ai lea e ia lava ou ala.”5
Ou te le talitonu o loo i ai se faailoga fesili i le faaiuga o lena fuaiupu. Leai, ou te manatu e tatau ona i ai se faailoga ofo!
E ao la ona e fesili ifo ia te oe lava ia, “O lava ea lo’u faatuatua e talitonu ai i le Atua? O o’u loto ea e faatuatuaina e alofa o Ia ia te a’u ma finagalo e faatonu lo’u ala?”
O le mea moni, atonu e sologa lelei lou olaga na o oe i le tele o mea. Ae ou te augani atu ia e talitonu o le a lelei atu lou olaga pe a e faalagolago i le Atua e taiala ou laasaga. Na te silafia mea e le mafai lava ona e iloaina, ma ua ia te Ia se lumanai ua saunia mo oe e le o mafai ona e mafaufauina. Sa molimau mai le Aposetolo maoae o Paulo, “O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou e alofa ia te ia.”6
E te manao i lou Tama Faalelagi e taiala oe, faamanuia oe, ma tausia oe?
Ia talitonu la.
Alofa ia te Ia.
Saili atu ia te Ia ma lou loto atoa.
Savali i Ona ala—o lona uiga, tausi i poloaiga, faamamalu i au feagaiga, mulimuli i aoaoga a perofeta, ma faalogo i uunaiga a le Agaga.
Ia fai le mea lenei ma o le Atua o le a “faatoaafeina le faatoateleina o outou ma faamanuia outou e pei ona ia folafola mai!”7
Ou te malamalama mo nisi e foliga mai e faigofie lava ona faalele ae faigata ona faatino. Ou te ioe e te le tau alu mamao i le aganuu o nei aso e faalogo ai i leo feteenai ia e faalotovaivaia pe oo foi ina faifai faalauaitele i talitonuga i le Atua, ma i le tatou tapuaiga patino lava.
O ia leo ua faateteleina i o tatou aso e ala i avanoa tulagaese i fesootaiga. O lou luitau lea, ae o lou manuia foi lea.
Ou te talitonu o le a outou maua ni auala e taulimaina ai i le ala a le Alii! O le vaega lena o lau malaga e le mailoa i le olaga faitino. O le auala e te faia ai o le a matua faatosinaina ai lou lumanai ma le vaega e te faia i le galuega a le Atua iinei i le lalolagi.
Ae ui i lea, o mea o loo e oo i ai i le olaga e le o ni mea tulagaese uma. O la outou tupulaga e le na o le pau lea o se tupulaga ua luitauina ma tauemuina lo latou faatuatua i le Atua. O le mea moni, e foliga mai o lenei mea o se vaega lava o le tofotofoga faaletino mo fanau uma a le Atua.
“Afai o ni tagata o le lalolagi outou,” sa fetalai atu ai Iesu i Ona soo, “po ua alofa mai le lalolagi i ona tagata; ae le ni ō le lalolagi outou, a ua ou filifilia outou nai le lalolagi, o le mea lea e inoino ai le lalolagi ia te outou.”8
Pau lava la le mea o lou taliaina lea o le tulaga e faapea, o le taimi lava e te faia ai le tautinoga e mulimuli i le Faaola, o le a le fiafia mai i latou o e nonofo i totonu o le fale tele ma le ateatea—fai lava si leotetele i nisi taimi.9 Atonu latou te taumafai foi e faapalopalo ma faamaasiasi outou.
Ae ia manatua tou te le tali atu ia i latou. Tou te tali atu i le Atua. E i ai le aso o le a e tu ai i Ona luma ma tali atu mo lou olaga.
O le a Ia fesili atu po o a au mea na fai na faatoilalo ai faaosoosoga o le lalolagi ma mulimuli i le ala o le amiotonu. O le a Ia fesili atu pe na e mulimuli i le Faaola, pe na e alofa i lou tuaoi, pe na e taumafai ma le naunautai e tumau i luga o le ala o le avea ma soo.
Manatua, e le mafai ona e mauaina i ala uma e lua. E le mafai ona tatou mauaina ni faamanuiaga le mafaatusalia o le avea ma soo ae i le taimi lava e tasi o loo i ai ou pepa faamaumau i le Uarota Muamua a Papelonia. Uo pele, o le taimi lenei e tuuto atu ai ia Keriso ma mulimuli i Ona ala.
E i ai se aso o le a iloa ai e fanau uma a le Atua le mea sa’o—e aofia ai i latou o loo faatauemu nei i le upumoni. O le a latou tootutuli ma tautau atu o Iesu o le Keriso, le Togiola, le Faaola o le lalolagi.10 O le a latou iloa na maliu o Ia mo i latou.
I lena aso, o le a manino lava o Lona siufofoga ua na o le pau lea o le siufofoga e taua moni lava.
O le a e iloa ai ma le mautinoa le faamanuiaina o oe ona sa e tausisi i le faatuatua, tausi i poloaiga a le Atua, auauna atu i uso a tagata, ma fausia le malo o le Atua iinei i le lalolagi. Au uo pele e, ia talitonu—ma o le a faatasi le Atua ma outou. Ia ua’i atu lou loto ia te Ia—ma o le a Ia taiala oe i lau faigamalaga i lenei malaga maoae ma le faagaeetia o le olaga faaletino.
“E Le Afaina”
A tatou talanoa e uiga i le tuu atu i le Atua e taiala o tatou olaga, ou te fia faamaninoina se mea se tasi. Atonu tou te le fiafia i mea o le a ou tau atua ia te outou. A e ole atu i le Atua po o le a le mea e fai e uiga i faaiuga i lou olaga—e oo lava i nisi o faaiuga taua—atonu Na te le avatua ia te oe se tali manino. O le mea moni o nisi taimi e le afaina le mea ua e filifilia, pau lava le mea o lou tumau i totonu o feagaiga ma mataupu faavae autu o le talalelei.
I le tele o tulaga, o faaiuga tou te faia atonu e le taua e pei o le mea e te faia pe a uma ona faia le faaiuga.
Mo se faataitaiga, atonu e filifili se ulugalii e faaipoipo e ui e manatu nisi o o laua lava aiga e le o i laua o se paaga tutusa atoatoa. Peitai, e maoae lo’u faamoemoe mo se ulugalii faapea, pe afai e maea ona faia le faaiuga, la te tumau ona tuuto i le tasi ma le isi ma i le Alii ma o la loto ma mafaufau atoa. E ala i le taulimaina o le tasi ma le isi i le alofa ma le agalelei ma taulai atu i manaoga faalelagona, faaleagaga, ma faaletino o le tasi ma le isi—e ala i le faia pea o mea iti—e oo ina avea i laua ma paaga tutusa atoatoa.
I se eseesega ma se ulugalii e manatu na la pikiina le tagata “atoatoa” ona manatu lea ua tuanai atu avega mamafa [o faaiuga]. Afai la te le toe tafafao faamasani ma le tasi ma le isi, le toe fesootai le tasi i le isi, ma see atu i tua i le faamaualuga ma le manatu faapito—o lenei ulugalii ua i ai i luga o se ala e tau atu i le faanoanoa ma le lotofaavauvau.
E faatatau le mataupu faavae lava lea e tasi i filifiliga o matata eseese. E maoae lo’u faamoemoe mo i latou e pikiina se galuega e itiiti se taua ae latou te faia le mea sili latou te mafaia e saili ai auala e fiafia ai ma luitauina ai la latou galuega.
E itiiti so’u faamoemoe mo i latou e filifilia ni galuega faagaeetia ae i le aluga o le ala e mouese lo latou fiafia e manaomia e faamanuiaina ai i latou i la latou galuega. O le mea moni, o le fetuunai ma le manuia i suiga i falefaigaluega o le a avea lea ma se tasi o uiga autu e ao ona atiaeina e la outou tupulaga i le lumanai.
E faapefea la ona finagalo le Alii ia te oe e taulima ni faaiuga autu?
O Ana faatonuga ia Oliva Kaotui ma Iosefa Samita ua matua aoga ia te au. Na tau atu e le Alii ia i laua, “E ao ina e suesue i ai i lou mafaufau; ona ao lea ona e ole mai ia te au pe ua sao.”11
Ua tuuina atu e le Tama Faalelagi ia te oe se faiai ma se loto. A e faalagolago ia te Ia, o le a Ia fesoasoani atu ia te oe e faaaoga uma [le faiai ma le loto] ma le tatau i au faaiuga fai.
Mo le tele o faaiuga, e sili atu ma le tasi sau filifiliga lelei e te filifili mai i ai. Ina ua tupu lenei mea ia Iosefa ma ana soa, sa faaaoga e le Alii se fasifuaitau mata’ina a o latou saili atu i Lana taitaiga.“Ua le afaina.”12
Ae sa vave ona faaopoopo atu le Alii, “Tau ina ia faamaoni.”13
O lau galuega o le faia lea o faaiuga silisili e te mafaia e fua i faamatalaga o loo e mauaina ma ia faamauaaina i tulaga faatauaina ma mataupu faavae o le talalelei. Ona tauivi lea ma lou malosi ia faamanuiaina i mea o loo e faia—ma ia faamaoni.
Fai le mea lena ona fesootai lea o togitogi.
Masalo e fai si le fiafia i le faalogo atu e le avatua tonu e le Atua ia te oe se faamatalaga auiliili mo lau malaga i le olaga. Ae e te manao moni ea i faatonuga i vaega patino uma o lou olaga? E te manao moni ea i se tasi e avatu ia te oe ni auala ‘alo i le olaga ae e te lei mauaina se avanoa e fuafua ai mea mo oe lava ia? O le a le ituaiga malaga e le mailoa o le a i ai lena malaga?
Au uo talavou pele, e na o le faatasi lava ona e pasia le malaga o le olaga faaletino. Pe le aveesea ea e se faamalamalamaga ua mamanuina patino ua aofia ai faamatalaga o mea o le a tutupu ma tali i fesili maoae uma o le olaga, lou lagona maoae o le ausiaina o mea ma le faateleina o lou talitonuga i le Alii ma oe lava ia?14
Ona ua foai atu e le Atua ia te oe lou faitalia, e tele itu e mafai ona e filifili e te alu ai ae maua ai pea se olaga faamalieina. O le olaga faaletino o se malaga faifai pea, filifili-sau-oe lava ia tala o le malaga e le mailoa. Ua ia te oe poloaiga, ua ia te oe feagaiga, ua ia te oe fautuaga musuia faaperofeta, ma ua ia te oe le meaalofa o le Agaga Paia. Ua matua lava lea e taitai atu ai oe i le fiafia faaletino ma le olioli e faavavau. E ese mai lena, aua nei e faanoanoa pe a e faia ni faaiuga e le atoatoa. O le auala lena e te aoao ai. O le vaega lena o lau malaga e le mailoa.
Leai, e le sologa lelei pea malaga mai le amataga i le faaiuga, ae afai tatou te faamaoni, e mafai ona faamautinoa mai ia i tatou se taunuuga fiafia. Mafaufau i le faataitaiga a Iosefa o Aikupito. I le tele o ala, sa pagatia ai lona olaga. Sa faatau atu o ia e ona uso e fai ma pologa. Sa lafo o ia i le falepuipui mo se solitulafono na te lei solia. E ui i tulaga pagatia uma sa faifaamalosi ia te ia, ae sa ia tausisi pea i lona faatuatua. Sa ia faalagolago i le Atua. Ma sa ia maua mai ai se mea silisili ona lelei. I lea tausaga ma lea tausaga—e ui lava ina foliga mai sa le amanaiaina o ia ma tuulafoaiina—ae sa ia talitonu [pea]. Sa ua’i atu pea e Iosefa lona loto i le Atua. Ma sa faaali mai ai e le Atua e mafai ona Ia liua mea le lelei i mea lelei.15
I aso nei, pe tusa ma le 4,000 tausaga mulimuli ane, o loo tatou maua pea uunaiga mai le tala a Iosefa.
O lau malaga atonu e le fai si pagatia, ae o le a i ai pea lugā ma lalō. O lea, manatua le faataitaiga a Iosefa: Tumau i le faamaoni. Tumau i le Faatuatua Talitonu. Ia faamaoni. Aua le lotoita. Aua le faapalopalo i isi. Alofa i le Atua. Alolofa i o outou aiga. Faalagolago i le Alii, e tusa lava pe foliga mai e faavaivailoto.
Atonu e le mafai ona e vaai i ai seia oo i se taimi mulimuli ane, ae o le a e tepa i tua ma iloa, e moni sa faatonu ma taitaia lava e le Alii lou ala.
Sa fesootai lava togitogi.
O Mea e Lima ia Manatua
Seia oo i lena taimi, e mafai ona ou fai atu ia te oe e manatua ni mea e lima?
Muamua, ia iloa o tali a le Atua i au fesili aupito sili ona loloto e ono umi se taimi e faatali ai ma e oo mai i ni auala e te lei faamoemoeina. O tali a le Atua e i ai le taua e faavavau. E taua le faatalitali i ai.
Lua, ia i ai sina faatuatua. Ua’i atu o outou loto i le Atua. Ia talitonu e taua oe i le Atua, ma faalagolago o le a Ia faalauteleina oe nai lo le mea e mafai ona e faia mo oe lava ia. Aoao e uiga ia te Ia. Alofa ia te Ia. Talitonu ia te Ia. Talanoa ma le naunautai ia te Ia e le aunoa. Faalogo mo Lona siufofoga.
Tolu, savali i le mea sili e te mafaia i luga o le ala o le avea ma soo. Aua nei lofituina. Tau lava o le fai o mea iti i le atoatoa e te mafaia ai, ma o le a tulaga lelei ai mea tetele.
Fa, aua nei faatagaina leo faalotovaivai e faavaivaia oe mai lau malaga o le faatuatua. Manatua, e te le tali atu i e faitio mai ia te oe. E te tali atu i lou Tama Faalelagi. O Ana tulaga faatauaina e taulia.
Lima, fai le faaiuga sili ona lelei e te mafaia e ala i le mulimuli i musumusuga e oo mai i lou loto ma le mafaufau. Ia tuu i ai au taumafaiga silisili e mulimulitaia ai. Ia faatuatua, ma o le a faapaiaina e le Atua au taumafaiga faamaoni mo lou lelei e faavavau.16
Fai le mea lenei, i le faaiuga, o le a lelei mea uma.
A outou saili e mulimuli i lo outou Faaola, o le a faatuputeleina lo outou talitonuga.17 Ma a outou savavali i le faatuatua ma tatala atu o outou loto i le Malamalama o Keriso, o le a faamatuaina lo outou alofa mo le Atua ma o le a faaleleia lo outou tomai e alolofa ai i o outou tuaoi.
Ma o nei mea uma o le a aumaia ia te outou le fiafia ma le olioli.
O le a aumaia ia te outou le filemu.
I se aso, o le a aumaia ia te outou le mamalu e faavavau.
I lena aso i le lumanai, o le a outou toe tepa ai i tua i lenei malaga e le mailoa faapelepele ma faafiafiaina o le olaga faaletino, ma o le a outou malamalama ai. O le a outou vaaia ai sa fesootai moni lava togitogi i se mamanu matagofie, sili atu ona matagofie nai lo se mea sa e mafaufauina.
Faatasi ai ma se lotofaafetai lemafaamatalaina, o le a outou vaaia o le Atua lava Ia, i Lona alofa, alofatunoa, ma le alofa mutimutivale naua, sa i ai pea iina i taimi uma e leoleo outou, faamanuia outou, ma taiala o outou laasaga a o outou savavali ai agai atu ia te Ia.