Pagkaplag Kalinaw alang sa Imong Kaugalingon ug sa Uban sa Samok nga mga Panahon
Ania ang walo ka paagi aron sa pagtabang sa imong kaugalingon ug sa uban nga mobati og kalinaw kon ang kinabuhi magkalisud.
Hulagway sa likod [background] ug paghulagway gikan sa Getty Images
Usahay mabaligtad ang kinabuhi. Posibling mabalaka ka mahitungod sa mga kabalaka sa pamilya, mga problema sa panglawas, mga problema sa eskwelahan, o sa bisan unsang gidaghanon sa makaproblemang hitabo sa kalibutan karon. Unsaon nato sa pagkaplag og personal nga kalinaw diha sa samok nga kalibutan? Bisan og ang imong kakulang sa kalinaw maggikan sa mga hitabo nga dili nimo makontrolar o sa mga butang nga imong maimpluwensya ug mausab, aniay pipila ka mga ideya aron sa pagtabang nga imong makaplagan ang kalinaw sa sulod pinaagi kang Jesukristo.
4 ka Paagi sa Pagkaplag og Kalinaw sa Imong Kaugalingon
-
Magtutok sa mahangturon
Lisud ang pagbati sa kalinaw kon nakatutok ka sa mugbo nga mga kabalaka lamang. Apan kon tutokan nimo ang mas lapad nga panglantaw, sa plano sa Dios sa kalipay, makaplagan nimo ang kalinaw diha sa pagkahibalo nga kon unsay nagngutngot sa pagkakaron dili kini hangtud sa hangtud. Sama pananglit, ang templo magtabang kanato sa pagtutok sa kahangturan. Si Presidente Gordon B. Hinckley (1910–2008) miingon nga sa sulod sa templo “mobati kamo og kalinaw nga dili ninyo mabatyagan bisan asa.”1
-
Pasagdi ang butang nga dili nimo makontrolar
Kon ang butang nga dili nimo makontrolar mowagtang sa imong kalinaw, makatintal ang pagbati sa pagkawalay paglaum o kasuko. Apan walay pulos ang paghuna-huna permi sa mga butang nga dili nimo mausab. Hinoon, padul-i ang Manluluwas aron makita ang kalinaw sa kahiladman bisan og sa imong pagtuo dili patas ang pagtagad kanimo sa kinabuhi. Misaad Siya nga ipadala diha kaninyo ang Maghuhupay, ang Espiritu Santo (tan-awa sa Juan 14:26–27).
-
Pasayloa ang uban
Sa kasagaran ang pinakalisud nga butang nga kalimtan mao ang kanegatibo nga imong gibati kon dunay makahimo og sayop kanimo. Apan si Elder Dieter F. Uchtdorf sa Korum sa Napulog Duha ka mga Apostoles mitudlo nga: “Makadawat kita sa kalipay sa pagpasaylo diha sa atong kaugalingong mga kinabuhi kon kita andam nga mohatag niana nga kalipay sa gawasnong paagi ngadto sa uban. … Isip resulta, ang Espiritu sa Ginoo mopuno sa atong mga kalag uban sa hingpit nga kalipay nga nag-uban sa balaang kalinaw sa konsensya (tan-awa sa Mosiah 4:2–3).”2 Ang pagduol ngadto sa Manluluwas makatabang kanimo nga malayo sa emosyonal nga mga palas-anon ug mapuno ka sa kalinaw.
-
Paghinulsol ug salig kang Kristo
Bisan unsa pa kamaayo ang dagan sa imong kinabuhi, ang pagpas-an sa gibug-aton sa sala kanunay nga mohikaw kanimo sa kalinaw. Usahay magkinahanglan kita sa atong bishop sa pagtabang kanato alang sa hingpit nga paghinulsol. Apan kitang tanan nagkinahanglan og paghinulsol sa regular nga paagi ug, pinaagi sa Pag-ula ni Jesukristo, mahimong limpyo sa tanan nga nagpugong kanato gikan sa pagkahimong mas sama Kaniya.
4 ka mga Paagi sa Pagtabang sa Uban sa Pagkaplag og Kalinaw
-
Mopaambit sa ebanghelyo ni Jesukristo
Sama ra nga kita makakaplag og kalinaw alang sa atong kaugalingon pinaagi sa pagtutok sa Manluluwas, makadala kita sa uban ngadto Kaniya isip “ang magtutukod sa kalinaw” (Mosiah 15:18). Sama pananglit, sulayi sa pagpaambit og kasulatan o usa ka kinutlo gikan sa kinatibuk-ang komperensya nga nakatabang kanimo sa pagkat-on og dugang mahitungod ni Jesukristo.
-
Pagkahimong tigpasiugda og kalinaw
Tabangi ang imong mga higala o mga igsoon sa pagsulbad sa mga panagsungi. Sama sa mga Anti-Nephi-Lehi diha sa basahon ni Alma, pwede natong ilubong ang atong mga hinagiban sa gubat—mga hinagiban sama sa pagpanglibak, pagpanimalos, o pagkahakog—ug bayloan hinoon kini og mga instrumento sa kalinaw: pagsulti sa mabinationg paagi, pagsunod sa mga sugo sa Dios, ug pagpasaylo sa uban, (tan-awa sa Alma 24:19).
-
Pagkahimong maayo nga tigpaminaw
Usahay ang mga tawo nga nanglimbasog nagkinahanglan nga makapadayag sa ilang mga hunahuna ug pagbati imbis tagoan kini sa sulod. Dili kita angay nga mosulbad sa ilang mga problema alang kanila, apan makapaminaw kita sa ilang mga kabalaka ug makahatag og suporta, magpakita og Kristohanong gugma ug panabut.
-
Mangalagad niadtong anaa sa inyong ward ug komunidad
Pwede kang moboluntaryo sa usa ka kasilongan alang sa walay mga balay [homeless shelter], moserbisyo isip usa ka tigtudlo sa higala, o magdala og mga sinugatan ngadto sa bag-ong pamilya diha sa imong sa kasilinganan. Motabang sa mga tawo aron makakita og kalinaw sa ginagmayng mga butang. Ang pag-angkon og permanenting dapit nga kakaonan ug katulgan, usa ka kasaligan nga tigtudlo, o gamayng kasiguroan nga dunay tawo nga nagpakabana layo kaayo og maabtan.
Gipamulong ni Jesus kini nga mga pulong sa paghupay ngadto sa tanang nanglimbasog sa pagkaplag og kalinaw: “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:27). Kon madala nato ang atong mga kaugalingon ug ang uban paduol kang Jesukristo, makakaplag kita og kalinaw bisan og magkalisud ang kinabuhi.