O lo Tatou Valaauga e Auauna Atu ma Auauna mai I ai
I se tasi tau mafanafana, na maua ai lo matou aiga atoa i le vairasi o se fulu matuia. Sa na o le malolo o ou matua ma ou uso uma e toatolu i o latou moega, ua tiga ma fiva tele e oo lava i se gaioi. Na o au lava e lei lavea i le mai. O lea sa ou faia uma ai kuka, faamama, ma tausi i tagata le fiafia o lou aiga.
Seia oo ina ua tuanai ni nai aso, sa ou maua ai foi.
Sa mafai ona salalau atu le tala e leai ma se tasi o lou aiga o maua se malosi e kuka ai pe fai se faatau mo ni mea manaomia. Na faafuasei ona lofia lo matou fale i meaai mai le toatele o uso o le Aualofa i la matou uarota.
Sa faapitoa le tuuto o Sister Thompson i lana auaunaga. Sa ia aumai le ti o le taeao i le Aso Gafua, taumafataga o le aoauli i le Aso Lua, ma le taumafataga o le afiafi i le Aso Lulu ma le Aso Tofi. I le afiafi o le Aso Tofi, ina ua faatoa tuua e Sister Thompson lana supo moa ma pani i le umukuka, sa ou faalogoina se isi tuitui i le faitotoa. O loo tu ai Sister Williams, ma le ulo o le meaai e gaosi mai i le pepa ma polo feu ma le ato o falaoa e gaosi mai le saga suamalie.
Na fesili mai pe ua aai lo matou aiga ae o tilotilo atu ma le le mautonu i meaai i luga o le laulau i ou tua. Sa ou faiatu ia te ia e leai, matou te lei aai, ae sa auina mai e Sister Thompson se taumafataga mo i matou.
“Sa aumaia e ia meaai mo outou i le vaiaso atoa, e sao lea?” O le fesili lea a Sister Williams.
“Ioe, o lea lava,” na ou tali atu ai. “Ua tele lava a matou meaai.”
Sa pulatoa mai Sister Williams ma tuu ona lima i ona puimanava. “Ua lelei, o le isi taimi e te vaai ai ia Sister Thompson, fai iai e fai sana malologa ae tuu mai ia i matou uma o loo totoe e fefaasoaai foi ia faamanuiaga!”
O lana tuuto na oo mai ai le ataata i ou foliga. Sa ou maua le loto maualalo i le naunau alofa sa faia e fesoasoani ai i lo matou aiga, ma mai lena taimi sa mafai ai ona ou faafetaia moni le uiga lua o le fuaitau, “fefaasoaai faamanuiaga.”
Pe a tatou auauna atu i isi, tatou te fefaasoaai faamanuiaga ua tuuina mai e lo tatou Tama Faalelagi. Ao tatou tuuina atu le avanoa i le loto maualalo ma le agaga faafetai i isi e auauna mai ia i tatou, e mafai ona latou fefaasoaai i faamanuiaga faalelagi ua folafolaina mai e le Alii mo i latou e alolofa ma auauna atu o le tasi i le isi.
Pe o e tuuina atu le alofa (ma meaai) po o le taliaina foi, o nei faamanuiaga matagofie—ma nisi e tele—o a tatou ia e fefaasoaai atu.