Ol Misinari we Oli Kambak Eli: Yufala i No Stap Yufalawan
Hem we i raetem hemia i blong Franis, mo i stap skul long Yuta, YSA.
Ol yang adalt oli stap serem olsem wanem oli faenem mining mo pis long laef afta we oli kam hom eli long misin, mo olsem wanem, yu tu, yu save mekem.
Foto i kam long Tiffany Myloan Tong
Ami blong ol fultaem misinari oli traehad blong mekem diuti blong olgeta blong “invaetem ol narafala man blong kam long Kraes”1 i tekem “ol bigfala hop mo plante glad” (Alma 56:17) long plante. Olgeta misinari ia, semmak ol strong soldia insaed long Buk blong Momon, oli faet evri dei wetem “wetem paoa blong merikel; mo wetem strong paoa” (Alma 56:56).
Be iven long medel blong ol 2060 strong soldia ia, i bin gat 200 we “ae blong olgeta i dak from we oli lusum blad” (Alma 57:25). ?Hemia i minim se oli no gat strong tingting olsem ol narawan? ?Oli no strong olsem ol narawan? ?Oli no gat strong paoa long tingting olsem ol narawan? ?Oli no impoten olsem ol narawan? I no olsem nating.
Semmak nomo, yufala ol misinari we yufala i kambak hom eli from helt long tingting o bodi, yufala i strong long tingting, strong long bodi, strong long paoa long tingting, mo impoten semmak olsem ol narawan nomo. Hadwok blong yufala blong gogohed tru long ol tes blong yufala, hem i—mo i sapos—blong i wan gudwan nomo. Yu laef i stap—maet yu gat kil, be yu laef i stap. Ol kil blong yu, nomata oli long bodi, long tingting, o long spirit, naoia, i nid blong oli tekem gud kea long ol (luk long Alma 57:28). Blong olgeta we oli kambak hom from sam risen blong fasin blong stap klin inaf, fasin blong sakem sin i wan impoten pat blong hiling blong yu.
Taem yu stretem yu blong stap long hom, meksua we yu givim inaf taem long yu blong yu kam oraet, mo oltaem tingbaot blong trastem God (luk long Alma 57:27). Hem i stap mekem yumi tingbaot: “Taem mi givim wan komanmen long eniwan long ol pikinini blong ol man blong oli mekem wan wok long nem blong mi,”—eksampol blong go long wan misin—“mo olgeta pikinini blong ol man ia oli go wetem evri strongfala paoa blong olgeta mo wetem evri samting we oli gat blong mekem wok ia, mo oli no stop blong wok strong wetem strong tingting, mo taem ol enemi blong olgeta”—long sam kes, ol sik long bodi o tingting, o ol nara kil—“oli kam agensem olgeta mo blokem olgeta blong mekem wok ia, luk, hem i stap long tingting blong mi, blong nomo askem wok ia long han blong olgeta …,be blong akseptem ofring blong olgeta.” (Doktrin mo Ol Kavenan 124:49).
Wanem kil yu bin kasem—o openem bakegen—long faet, be sapos yu givim seves wetem fasin blong stap klin inaf, o wetem fasin blong sakem sin fulwan, bae Lod i akseptem pat we yu bin givim mo Hem i bin nidim.
Ol foto oli kam long Getty Images
Taem yu stap ridim olgeta stori ia, bae i save helpem yu blong yu kam oraet mo gat stret tingting ia se yu no stap yuwan, mo taem yu serem stori blong yu, bae i save helpem ol narawan.
Luksave se Sevya I Bin Filim Sobodi blong Yu
Long rod blong plen we mi go long misin, mi stap traem blong tingting se bae homkaming blong mi bae i olsem wanem. Famli bae i singaot, famli mo fren blong mi bae oli kisim mi, mo bae mi laef afta long pis, bae mi glad long evri blesing we i kam blong kambak wetem ona long misin.
Leven manis afta, long plen we i gobak hom, evri taem mi spendem i blong mi wari we i soa abaot wanem i stap long fored. Famli blong mi i stap wet, mo nomata oli bin singsingaot mo kisim mi bifo mi luksave, mi bin stap miwan, mo mi no save nating wan samting abaot fiuja blong mi.
Sevya i bin luk ol tudak dei blong mi. Hem i bin save olsem wanem mi filim taem mi slip long bed blong tri wik, we mi stap krae mo stap slip blong no fesem ril laef. Hem i bin save se bae mi nidim paoa from se i no gat wan raon long mi i save andastanem, o iven, gohed wetem wanem mi bin stap gotru long hem. Be Hem i andastanem. Bae mi no save laef long misin blong mi, o kambak hom eli sapos Hem i no bin stap.
Ali Boaza, Kwinslan, Ostrelia
Stap Glad blong Folem Tingting blong Lod
Evri samting i bin stap go gud long misin blong mi. Mi gat ol gudfala eksperiens we bae i stap long hat blong mi blong oltaem. Be, afta eit manis, mi stat blong gat ol helt problem. Afta we mi livim kakae mo prea plante, oli sendem mi i gobak hom. Mi harem nogud bigwan. Mi ting se evri samting i fol blong mi. Mi stop blong ridim ol skripja blong mi, mo blong stap prea plante. Mi stap askem miwan se mi no bin mekem evri samting we mi sapos blong mekem blong save stap.
Be mi bin luksave se mi stap gotru long wan tes blong luk se bae mi gohed blong stap tru long Lod. Hem i bin had, be mi putum tras blong mi long Hem, mo mi gobak long misin, mo mi stat blong gat ol gudfala eksperiens bakegen.
Be afta, ol helt problem blong mi oli kambak bakegen. Be long tetaem ia, mi bin glad moa blong save folem tingting blong Papa long Heven. Mekem se mi gobak hom nambatu taem. Hem i bin had, be mi save se mi save lanem samting aot long evri samting we mi bin gotru long hem.
Iven we mi no bin givim seves blong 24 manis, mi save se mi bin givim seves wetem ona long misin. Mi save se taem we mi bin givim seves long Lod i gud inaf long mi, mo long ol pipol we mi bin helpem. Mi talem tangkyu from Sevya blong mi mo Atonmen blong Hem we i no gat en. Hem i save wanwan long ol jalenj blong yumi. Mo sapos yumi dipen long Hem wetem ful tingting, bae yumi neva stap yumiwan.
Fillipe Hoffman, Goiás, Brasil
No Westem Taem blong Askem se From Wanem
Tingting ia se bae mi gobak hom eli, i prapa spolem tingting blong mi. Stret afta we kaonsela i givim tingting ia, mi filim wan defren kaen filing we i miks: Sem. Harem Gud. Rong. Pis. Harem Nogud. Evriwan ia long sem taem.
Mi save se God i bin stap sapotem mi from se, long wan wei, mi gotru long wan gud wei long fasfala wik ia long hom. Mo afta, mi gotru wan nara wik. Mo wan narawan. Kasem taem we mi bin save filim se mi kambak gud bakegen. Papa blong mi i bin bigfala sapot blong mi, mo i tekem mi andanit long wing blong hem. Oltaem, hem i wantem storian, mo spendem taem wetem mi. I no blong askem se wanem i “bin go rong,” be blong luk se mi oraet o no.
Taem papa blong mi i pasawe, i ded long wan aksiden blong klaem long ol ston hil sam manis afta, mi bin save, we mi no gat tu tingting, se God i bin gat wan plan blong mi. Blong save stap wetem papa blong mi long ol las manis blong laef blong hem, i mekem testemoni blong mi abaot plan blong fasin blong sevem man, i kam strong moa. Mi stil no andastanem evri risen from wanem mi bin kambak hom long taem ia we mi bin kambak, be mi bin lanem tu se sapos yu stap spendem tumas taem blong stap askem yuwan se, from wanem, nao bae yu mestem evri gudfala merikel we God i stap givim long yu evri dei.
Kristen Watabe, Ohaeo, YSA
Stretem Wanem Yu Stap Ting long Hem
Taem mi kam blong mi sik tumas blong gohed long misin blong mi, mi bin save se God i wantem mi blong gohom, be hemia i no wanem we mi mi bin wantem. Mi no harem gud nating from se mi nomo gat gud helt nao, we afta, i kam stat blong wan sik we i stap kambak oltaem mo i mekem mi disebol.
Taem mi traem blong mi save gud sik blong mi, mi filim se mi nomo gat stamba samting blong laef blong mi. Mi nidim plante help, mo mi filim se mi no gat wan samting blong givim. Be mi bin save se mi nidim blong praktisim fet blong mi, mo mi gohed blong stadi, prea mo traem folem Spirit. Wan dei, taem mi stap stadi long Niu Testeman, mi kam long wan peinting blong James Tissot we nem blong hem i, Jisas I Givim Oda long Ol Aposol blong Oli Spel. Peinting ia blong Mak 6:30–31, kwiktaem i mekem mi kam sofsof. Taem mi stap luk Kraes i stap lukaotgud long ol wokman blong Hem we oli stap spel, mi bin filim hamas Hem i lavem olgeta. Mo Mi.
Long en, mi bin lanem se ol samting we mi putum se mi mas mekem, oli no wanem we God i putum blong mi mas mekem. Long sam wei, hemia blong Hem i gat moa jalenj long hem, be oli moa stret wetem ol nid blong mi. Mi tangkyu tumas from wei we Hem i stap tijim moa blong akseptem moa fulwan help blong Hem mo lav blong Hem we i stret evriwan. Fet blong Hem long mi, i givim mi hop ia se mi nid blong gogohed.
Sabrina Maxwell, Yuta, YSA
Stap long Rod blong Gospel
Mi gobak hom eli, mi aot long Filipin Sebu Is Misin. Ol tingting ia, “bae i olsem wanem sapos,” mo no fit “blong stap olsem misinari” oli mekem i had blong mi stretem mi long laef. Mi givim seves long hom kantri blong mi, mo mi gat trabol wetem tingting ia se mi letem branj blong mi daon, mo save se mi no kasem wanem oli ting se bae mi kasem. Taem mi bin stap komperem mi long ol gudfala riten misinari, i mekem mi stap luk miwan se mi no naf, o mi aotsaed evriwan.
Long en, Lod i tijim mi se wan misin i jes wan long ol plante wei blong givim seves long Hem. Hem i no weaples, o hamas taem, be hem i olsem wanem yu givim seves we i impoten. Hem i tijim mi blong gat tingting i stap daon, mo blong stap long gospel rod iven sapos ol samting oli rafraf, mo oli no ron long wei blong mi.
Jasper Gapuz, Filipin
Luk long Papa long Heven mo long Jisas Kraes
Oli singaotem mi blong givim seves long Niu Silan Welington Misin. Taem mi bin save se mi mas gobak hom eli, mi filim se mi no fetful long Papa long Heven mo long papa mo mama blong mi.
Mi lanem plante samting aot long misin blong mi mo long situesen ia. Mi neva nidim blong dipen long Papa long Heven mo Atonmen blong Sevya olsem we mi bin mekem taem mi bin kam hom eli. Mi nidim blong trastem God mo akseptem wanem Hem i bin wantem mi blong gotru long hem mo lanem. Mi no save tanem baksaed long paoa blong Atonmen mo olsem wanem mi rili kam blong save se Jisas Kraes i Sevya blong mi. Mi bin lanem se God i putum tingting blong mi i stap daon mo i stap tijim mi tru long ol wiknes mo ol hadtaem blong mi.
I nomata se mi stap wea, o sapos mi gat wan nem tag long jes blong mi, mi stil wan disaepol blong Jisas Kraes. Mi save se Lod i stap lavem mi mo i stap wetem mi, mo Hem i wantem mi blong gohed blong givim seves long ol narawan. Mo i nomata se mi stap hom, mi save se mi mi no mestem rod from se hem i bin helpem mi blong kam wan we i gud moa tru long eksperiens ia.
Natasha Krisanalome, Taelan
Mekem Rilesensip blong Yu Wetem Sevya I Kam Strong Moa
Mi gat bigfala janis ia blong mekem misin blong mi long Ankorej, Alaska, YSA. I brekem hat blong mi se mi mas kambak hom eli from mi gat problem long tufala angkel mo leg blong mi. I tru, i no bin isi, be mi bin gat plante eksperiens we oli bin tijim mi ol impoten lesen blong laef. Mi bin lanem se Papa long Heven i gat stamba tingting from evri samting we i stap hapen insaed long laef blong yumi. Mi lanem tu olsem wanem blong go tru long ol tes wetem wan lukluk we i gud moa. Rilesensip blong mi wetem Sevya, i kam strong moa bitim bifo from se mi bin lanem olsem wanem mi save yusum hiling paoa blong Atonmen blong Hem.
Papa long Heven i helpem mi tru, long hadtaem ia. Iven we mi stap traehad smol long sam taem, mi save se Papa long Heven i stap kontrolem ol samting, mo Hem i save wanem mi nidim long laef blong mi, i bitim we mi stap mekem.
Amber Bangerter, Yuta, YSA
Yu Mas Save se Misinari Wok I Stap Gohed long Weaples Yu Stap long Hem
Mi givim seves long Hangari Budapes Misin. Taem mi bin gobak hom eli, i bin had from se evri kompanion blong mi oli stap yet long misin blong olgeta, mo mi misim blong stap olsem wan misinari. Mi bin fraet tu se ol nara memba blong Jos bae oli jajem mi, be laki, evriwan i bin tritim gud mi wetem lav mo oli bin andastanem situesen blong mi.
Taem i mas, mo mi harem gud moa. Mi bin ridim wan atikol long Liahona abaot ol eli riten misinari we oli bin helpem mi blong filim gud moa from se mi bin filim se mi no stap miwan (luk long Destiny Yarbro, “Home Earlier Than Planned,” Liahona, Jan. 2018, 44–47). Mo tu, mi tekem long hat blong mi wanem we anti blong mi i bin talem: “Misinari wok i stap gohed long eni ples yumi stap long hem.”
Lucas Ludwig Saito, São Paolo, Brasil
Raonem Yu wetem Gud Fasin
Mi neva ting se bae mi gohom eli long misin blong mi, mo mi sem mo tingting i fasfas blong stap fesem evriwan. I nomata se i bin wan long ol had taem insaed long laef blong mi, mi bin gro tu tru long eksperiens ia. I sepem mi i kam wan moa gud man.
Mi gobak hom blong gotru long rod blong sakem sin. Sam long ol joes blong mi we mi sapos blong mekem bifo mi aot long misin blong mi, oli no bin stret wetem ol tijing mo komanmen blong gospel. From se mi sem, mo mi wantem holemtaet gud nem blong mi insaed long Jos, mi no bin gotru long rod blong sakem sin wetem bisop blong mi bifo. Be long ol fas manis nomo, mi bin filim nid ia blong gobak hom blong sakem sin blong mekem se mi save givim seves wetem ona mo fasin blong stap tru mo strong.
Ol samting we oli leftemap tingting blong mi taem mi bin gobak hom oli blong tekpat long ol aktiviti we oli leftemap mi long saed blong spirit, blong go long ol miting blong Jos, ol seves projek, mo tempol, taem mi bin save gobak. Wanem i bin helpem mi plante, oli ol pipol raon long mi—famli, samfala fren, mo iven ol pipol we mi neva mitim bifo, oli bin soem lav mo fasin we i kaen long mi.
Long evri samting, wetem help blong Lod mo ol eksampol olsem hemia blong Kraes raon long mi, mi bin save gobak long Florida blong finisim misin blong mi. Hop blong mi, i we, yumi evriwan i stap traehad blong stap olsem Kraes wetem ol narawan, nomata oli kambak hom eli, o taem oli stap long nid.
Caigen Stuart, Yuta, YSA
Dipen long Sevya
Mi kasem misin koling blong mi blong go long Sambia Lusaka Misin. Wan long ol had samting blong kambak hom eli, i ol memba we oli no andastanem ol eli riten misinari.
Taem mi kambak, mi mas slip long hospital blong tri wik, mo i no gat wan memba blong Jos i ring o i kam visit. Olgeta pipol we oli kam oli grup lida mo ol misinari blong pasem sakramen long mi evri Sandei—mo hemia i hapen nomo from se mi bin askem olgeta. Mi bin nidim help blong ol memba blong bildimap paoa blong mi mo fet blong mi long Jisas Kraes long ol fasfala wik ia we mi kambak hom, be mi mas mekem hemia miwan nomo.
Lod i stap gohed blong tijim mi, evri dei abaot from wanem mi kambak hom eli, we mi no ting long hem, iven we i had yet blong andastanem hemia samtaem. Naoia, mi luksave se blong kambak hom eli i letem mi faenem papa blong mi mo famli blong hem, mo bildimap wan rilesensip wetem olgeta. I letem mi blong faenem se mi gat wan sik we i gohed blong i pat blong laef blong mi. Mo mi lanem wanem nao oli paoa blong mi mo ol wiknes blong mi—eksampol, olsem wanem blong talem “no.” Bifo, i had tumas long mi blong talem no long eni samting o eniwan. Oltaem mi glad blong mekem ol samting, mo putum ol narawan oli kam faswan, i nomata se mi taed hamas, o mi bisi hamas—we i no rong, be, from tes ia, mi bin lanem se, samtaem, mi nidim blong putum mi i kam faswan.
Mi stap gohed yet blong faenemaot ol niu samting abaot Lod mo from wanem mi mas kambak hom eli. Be, plante long ol blesing ia oli kam long rod blong mi, mo mi dipen long Lod evri dei. Iven we i had samtaem, mo ol pipol oli no andastanem gud samting, mi save se Sevya i andastanem. Mo mi gohed blong dipen long Hem mo long Atonmen blong Hem we i no gat en.
Lindi Chibase, Gauteng, Saot Afrika
Promes we yu faenem long misinari koling leta blong yu, i mekem yu luk se taem yu go fored long wok ia, bae ol samting ia oli kam blong hapen: “Lod bae i givim praes long yu blong gud fasin blong laef blong yu.” Sapos oli lukaot gud mo stap kea, ol kil ia oli save kam oraet bakegen, mo oli save kam wan tul blong yu save helpem ol narawan oli kam long Kraes. Hemia nao, long en, i diuti blong ol misinari.