Sikis Step blong Kasem Wan Wok

I Kam long Bruno Vassel III

Hem we i raetem hemia i stap long Yuta, YSA.

Yumi no save kam blong stap dipen long yumiwan long laef long wol ia sapos yumi nidim wan wok, mo yumi no gat wan. Hemia sikis step blong kasem wan wok.

man looking up at ladders — Wetem plante defren joes blong wok long fored blong yu, ?wanem nao ol nekis step blong tekem blong kasem wok ia we i stret long yu?

?Yu yu nidim wan wok o wan wok we i gud moa? ?Yu yu save wan we i nidim hemia? Jalenj tedei blong plante pipol we oli nidim tumas blong kasem wan wok, o wan moa gud wok, i we, oli no save tumas olsem wanem blong kasem wok ia we oli wantem. Oli stap askem: “Bae mi raetem wan résumé, bae mi putum mi long Intanet, o bae mi mekem tufala tugeta, mo olsem wanem blong mekem?” “Wanem i raet wei blong ansarem ol kwestin olsem ia: ‘?Wanem nao ol samting we yu no strong long olgeta?’ mo ‘?From wanem bae mi pem yu blong mekem wok ia?’”

Atikol ia, i serem wan plan we i gat sikis step long hem, we i gat pruf blong hem, we i soemaot wanem yu mas save, mo afta, wanem blong mekem blong kasem wok ia we yu wantem. Olgeta sikis step ia oli folem sam pat blong ol risal blong wan sevei o stadi we mi bin mekem long fasin blong tekem man long wok we 760 bos blong kampani oli stap folem blong tekem ol studen blong Brigham Yang Yunivesiti i go long wok. Olgeta step ia, oli developem olgeta tu aot long infomesen we mi bin kasem long ol topman we oli stap tekem man long wok, mo aot long ova 30 yia blong wok blong karem man long wok mo oganaesem ol trening we mi bin givim long plante taosen pipol long ova 20 kantri. Laswan, waef blong mi, mo mi, i bin givim seves olsem ol senia misinari we i gat wok ia long Indipenden Laef Seves raon long Yurop. Eksperiens blong mifala i mekem mifala i biliv strong se olgeta we oli stap lukaotem wok, oli nidim spesifik help ia. I nomata se yu stap laef wea long wol, wanem nao wok skil blong yu, o wanem wok posisen yu wantem kasem, olgeta sikis step ia oli save helpem yu.

Rod ia blong kasem wok we yu wantem, i save tekem yu i go eni ples, stat long sam dei i go kasem wik o iven manis. Be gud nius, i we, rod ia i wok. Ol sikis step ia oli save helpem olgeta we oli lukaotem wok long evri level we oli fit long wan long ol tri grup ia: (1) olgeta we oli lukaotem wok blong fas taem, (2) olsem we oli wantem muv i go long wan nara wok, o go antap insaed long kampani o oganaesesen we oli stap long hem, mo (3) olgeta we oli wantem muv i go long wan posisen long wan nara oganaesesen.

Step 1. Faenemaot spesifik wok ia we yu wantem naoia.

Yu mas faenem wan wok, we i tru, yu save wokem naoia, we i fit stret long skil blong wok we yu gat, o bakgraon blong yu, ol samting we yu wokem finis, o edukesen blong yu. Taem yu disaed se wijwan, raetemdaon taetol blong wok ia. Sapos yu nidim help, i gat ol defren websaet we oli putum lis blong ol taetol blong wok mo wanem nao ol wok ia. Blong step 1, yu no nid blong faenem we i gat wan wok i open i stap o no; jes faenemaot kaen wok we yu yu kwalifae from mo yu gat intres long hem.

Tu long ol bigfala mistek blong ol kandidet we oli stap lukaotem wok, oli we oli no stap disaed long spesifik wok we oli rili wantem, o blong oli pikimap wan posisen we oli no jes kwalifae from. Sapos yu no sua se wanem spesifik wok nao yu mas lukaotem o go from, nao bae i posibol se bae yu no save kasem eni wok nomo. Blong talem samting olsem: “Mi jes nidim wan wok nomo, eni wok” bae i no help. Blong talem hemia i no save pulum tingting blong eni fiuja bos mo i spolem ol hadwok blong yu blong lukaotem wok. So yu mas jusumaot wan spesifik wok we yu save mekem naoia, mo afta, yu lukluk nomo blong kasem wok ia.

Step 2. Faenem ditel blong wok blong posisen ia we yu wantem.

Sevei we mi mekem wetem 760 kampani we oli tekem studen long Brigham Yang Yunivesiti long wok, mo ol yia blong wok eksperiens blong mi long plante kantri, i soem se olgeta we oli stap karem man long wok mo ol maneja we oli tekem man long wok, plante taem, oli lukluk long ol kandidet from wan spesifik wok, we oli gat ol skil ia blong wok, wetem ol eksperiens, ol samting we oli wokem finis, o edukesen we oli gat we i fit wetem wok ia. Hemia i tru blong ol medel mo hae level posisen. Taem oli stap lukluk gud long ol kandidet, olgeta we oli stap tekem man long wok oli yusum wan aotlaen o wan lis we oli singaotem wok ditel, blong tingbaot ol stamba skil blong wanwan wok we i open i stap. Hem we i jusum man blong wok i komperem evri kandidet wetem spesifik ditel blong posisen ia.

Yu mas faenem wok ditel blong posisen ia we yu wantem. Bae hem i helpem yu blong disaed sapos yu rili wan gudfala kandidet from wok ia. Bae i helpem yu tu blong disaed wanem blong talem o no talem abaot yu long résumé blong yu, long ol kova leta, mo long ol intaviu wetem ol bos blong kampani. Ol bos blong kampani oli putum lis blong wok ditel blong wanwan wok we i open i stap, insaed long websaet blong olgeta, long niuspepa, mo long ol websaet we oli putum ol wok. Olgeta we oli stap wok finis, we oli save long ol wok ia finis, oli save talemaot long yu abaot ol wok ditel ia mo wanem yu nidim blong wok ia.

Wok blong yu long step 2, i blong faenem ol spesifik samting we yu nid blong gat we oli stap long wok ditel from wok ia we yu wantem. Afta, bae yu yusum ki infomesen ia long ol step 3 kasem 6.

Step 3. Faenemaot ol skil blong yu, ol eksperiens, ol wok risal mo edukesen we bae i fit wetem wok ia we yu jusum.

Ples ia nao yu faenemaot ol skil blong yuwan mo ol samting we yu wokem long wok we i soem se bakgraon blong yu i go stret wetem ol stamba skil blong wok ia we yu wantem naoia, olsem we i stap long wok ditel we yu bin faenem long step 2.

Taem yu mekem lis ia blong ol skil blong wok mo risal blong wok blong yu, nao bae yu save komperem wok bakgraon blong yu wetem ol ki kwalifikesen we oli soem long wok ditel we yu bin faenem long step 2. Sapos lis blong yu i soem se ol skil blong yu oli go stret wetem ol nid blong wok ia we yu bin jusum long step 1, nao muv i go long ol step 4 kasem 6. Be, sapos ol skil mo ol wok risal blong yu we yu raetemdaon long step 3 oli no go gud wetem wok ditel we yu bin faenem long step 2, nao yu mas tingting strong blong jusum wan nara wok blong lukaotem long naoia; lukaotem wan wok we i go gud moa wetem ol skil we yu gat mo wanem yu save mekem.

Step 4. Raetem wan résumé we i go stret wetem wok ia; i mas wan o tu pej.

Stamba tingting blong résumé blong yu, we samtaem oli singaotem wan curriculum vitae, i blong kasem wan intaviu wetem wan we i stap tekem man long wok. Résumé blong yu, bae i save soem ol samting ia long huia i stap tekem man long wok; bae i soem se ol skil blong wok, eksperiens, wok risal o edukesen blong yu oli go stret wetem wok ditel blong kampani, mo i stret long wanem i moa impoten long fasin blong wan kandidet we i stret long wok ia.

Résumé ia, yu raetem i defren folem ol defren wok we oli open i stap long ol defren kampani; résumé ia, i mas defren, i folem wok ditel. Yu no nidim blong jenisim ol stamba poen we bae yu putum insaed long evri résumé blong yu, olsem histri blong wok, skul infomesen, mo stret kontak infomesen blong yu. Ol ditel ia, bae oli semmak long evri résumé blong yu. Be sapos yu stap aplae long wan wok wetem moa long wan kampani, wanwan kampani bae i gat ol defren wok ditel olgeta from wanwan wok blong olgeta. From hemia, yu mas jusum wijwan skil mo wok risal blong yu nao oli go stret wetem wanwan wok ditel. Putum olgeta samting ia long résumé blong yu wetem ol klia toktok we i talem wanem yu bin mekem, olsem: “mekem stadi,” “developem,” “prodiusum,” “manejem,” mo sam moa.

Eksampol. Sapos yu gat eksperiens long wok long saed blong salem samting mo maketing, mo yu stap aplae long tufala defren wok—wan i lukluk moa blong salem ol samting mo narawan i lukluk moa blong mekem maketing—nao bae yu raetem 2 résumé, wan we i talem moa abaot ol wok blong yu blong salem samting mo wanem yu bin kasem, mo narawan i talem moa abaot ol maketing risal mo aktiviti we yu bin mekem. (Sapos yu no gat tumas wok eksperiens yet, visitim lds.org/go/71939 blong lanem olsem wanem blong yusum ol eksperiens blong yu aot long Jos seves blong yu insaed long résumé blong yu.)

Step 5. Faenem ol kampani o man we oli stap tekem man long wok from wok ia we yu wantem naoia.

Oltaem nomo i gat sam wok i open i stap, iven long ol taem we i had tumas. Ol wokman oli finis long wok, oli jenisim ol wok, oli karem promosen, oli sakemaot olgeta o oli muv i go long nara ples. Mo oltaem nomo, i gat sam bisnis we i stap gro, mo oli nidim moa wokman. Evriwan long ol situesen ia, oli lidim yu i go long ol wok we oli open i stap, we oli nidim ol kwalifae kandidet blong kam tekem. Samtaem, hemia i hapen wetem samfala wok nomo we i open i stap, mo samtaem i gat fulap wok i open i stap. So yu no slakem tingting sapos yu no faenem wan wok yet. Jes gohed blong lukaotem wok ia we i blong yu.

Lukluk long ol websaet we oli soem ol wok we oli open i stap, blong ol kampani, blong ol wokples, long ol niuspepa, mo ol nara ples blong kasem wok ia we yu wantem. Mo tu, wan long ol bes wei blong faenem wok i tru long netwok—kontaktem plante pipol evri dei, olsem ol neba, mo ol memba blong wod, mo talem olgeta wanem stret wok nao yu stap lukaotem, mo askem sapos oli save sapos i gat wok i open samples, o sapos oli save wan we i save long kaen wok olsem. Meksua se yu givim kontak infomesen blong yu long evri pipol ia taem yu stap kontaktem netwok blong yu evri dei.

Step 6. Lan blong mekem gud intaviu blong yu bifo yu sendem ol résumé blong yu long ol kampani o oganaesesen.

Bifo yu stat blong sendem ol résumé we yu raetem gud i go long ol fiuja ples blong wok, faswan, yu mas lan gud blong go long wan intaviu. Plante pipol tumas oli stat blong sendemaot ol résumé blong olgeta kwiktaem, bifo oli rere blong save go long intaviu. Problem wetem hemia, i we, sam long olgeta ia we oli stap lukaot long wok, maet bae oli kasem invitesen kwiktaem blong go from wan intaviu. Ol kandidet ia oli gladglad tumas, oli go long intaviu bifo oli rere gud from, oli no gat wan gud intaviu, mo afta, oli no karem wok ia. Taem yu mekem hemia, yu no save gobak long kampani ia o man we i mekem intaviu mo askem wan nara intaviu mo talem se, naoia, yu lanem olsem wanem blong ansarem stret ol kwestin ia.

Wei we yu ansarem ol kwestin long intaviu, i impoten tumas blong yu gat sakses blong kasem wok ia we yu wantem. Nomata se yu mas ones oltaem, bae i stil gat raet mo rong wei blong ansarem wanwan long ol kwestin ia long wan intaviu. Bae oli askem ol kwestin olsem ia:

?Wanem nao yu strong long hem mo wanem yu no strong tumas long hem?
?Wanem problem nao yu bin gat long fasfala wok blong yu, we naoia, yu mekem i defren?
?Hamas nao yu lukluk long hem long saed blong salari?
?Wanem nao bae yu wantem mekem long faef yia taem?

Olsem wan kandidet, ansa we yu givim long evri kwestin ia we oli askem yu, bae yu mas tingting long hem faswan, mo yu mas planem ansa bifo taem. Iven wan nogud ansa i save mekem yu no karem wok ia. Lukluk moa long ol ansa blong yu blong oli sot, mo oli blong wan o tu minit we i givim eksampol we i soem bakgraon, skil mo risal blong wok blong yu, we i go stret wetem wok ditel blong olgeta. Stadi long oganaesesen bifo fas intaviu i tekples blong mekem se yu givim ansa we i go stret wetem ol nid blong olgeta.

Long en blong plante long ol intaviu ia, bae yu gat janis blong askem kwestin long huia i stap mekem intaviu. Ol bes kwestin blong yu i abaot wok ia we i open i stap. “?Wanem nao i nid blong mekem o jenis long wok ia?” Hemia bae i helpem yu long ol fiuja intaviu sapos oli askem yu blong kambak. Yu save holemtaet ol kwestin blong yu abaot ol gol blong oganaesesen, wok fasin, salari (be nomo sapos oli askem yu), aoa blong wok, mo ol benefit; yu save askem long ol nara intaviu.

Naoia, yu gat sikis step blong kasem wok ia we yu wantem. Yumi no save kam blong stap dipen long yumiwan long laef long wol ia sapos yumi nidim wan wok, mo yumi no gat wan. Sapos yu nid blong wok, wan moa gud wok, o save wan we i nidim, plis yusum mo serem ol strong tul ia blong lukaotem wok. !Oli wok! Bae Lod i blesem yu long ol hadwok blong yu blong kasem wok ia we yu wantem.