Sapos Misin blong Yu I Finis Eli, Yu No Givap
Hem we i raet i stap long Yuta, YSA.
Valiu blong yu i no go daon from se yu aot long misin mo kambak hom eli.
Pikja i kam long David Green
Sapos yu stap ridim hemia, maet yu save se i had tumas blong kambak hom eli long misin. Ol yang adalt we oli givim seves, oli save gat kil long bodi, problem blong helt blong tingting, ol sivil imejensi, ol problem blong stap klin inaf, ol series problem wetem ol narawan, o fasin blong no stap obei long ol misin rul, we i mekem se oli aot long misin bifo deit we oli sapos blong rilis.
I nomata risen, God bae i no wantem se smol jalenj ia i mekem se eni long ol pikinini blong Hem oli handikap long saed blong spirit. So, ?olsem wanem nao ol eli riten misinari oli muv fored aot long wan jenis long laef olsem? Mo ?olsem wanem nao, ol papa mo mama, ol lida blong Jos, mo olgeta famli oli save help?
Wan Misinari long Buk blong Momon
Wan stori aot long buk blong Alma i givim wan eksampol we i save help. Alma, we i profet blong Ol Man blong Nifae, i lidim wan misin i go long Ol Man blong Soram we oli ol nogud man, mo hem i go wetem sam pipol we hem i trastem olgeta. Wan long olgeta ia, hem i Korianton, boe blong hem, we “i bin lego fogud seves ia, mo yu go long graon blong Saeron, long saed blong ol boda blong Ol Man blong Leman, blong yu biaen long woman blong rod ia Isabel” (Alma 39:3). Folem hemia, Alma i tok strong long Korianton mo i askem hem blong i sakem sin, mo i talem se: “Bae mi no gohed blong tokbaot ol sin blong yu, blong givim hadtaem long sol blong yu, sapos i no blong gud blong yu” (Alma 39:7).
Korianton i putum tingting blong hem i stap daon, mo i akseptem blong papa blong hem i stretem hem, i sakem ol sin blong hem, mo i gobak blong givim seves olsem wan misinari long medel blong Ol Man blong Soram blong “talemaot trutok ia wetem fasin blong stap ones mo no stap pleiplei” (Alma 42:31). Stori ia i gohed blong talem se, afta we Alma i bin toktok wetem ol boe blong hem, “ol boe blong Alma [tugeta, Siblon mo Korianton,] oli go aot long medel blong ol pipol, blong talemaot trutok long olgeta” (Alma 43:1).
Kambak Wetem Paoa we Yu Save Kasem
?Wanem nao yumi lanem aot long stori ia? Faswan. Wan misinari we i aot eli long misin—iven from ol risen we hem i save stap longwe long hem— save mekem yet ol bigfala samting. Korianton, maet i save mekem ol bigfala mistek, be yet, hem i gohed blong mekem wan bigfala wok. Semmak, iven ol misinari we oli gobak from ol aksen blong olgetawan nomo, oli no sapos blong filim se oli bin prapa spolem gud paoa blong olgeta long saed blong spirit. Korianton i lanem samting aot long ol mistek blong hem mo oli kam blong bildimap kingdom blong God long ol bigfala wei, mo semfala paoa ia, i stap long evriwan, i nomata se hamas oli filim se oli mestem rod.
Nambatu. Yumi lanem impoten rol we ol narawan oli plei long wan laef blong wan eli riten misinari blong kam oraet bakegen long saed blong spirit. Alma—papa blong Korianton mo wan prishud lida—i bin givim advaes long Korianton wetem strong tok, be tu, wetem tras long paoa blong Korianton blong kasem ful paoa blong hem long saed blong spirit. Long saed blong Korianton, ol risal blong fasin blong no stap obei long misin, i mas kam, be eni disiplin i mas kam wetem lav, fogivnes, mo sore (luk long Doktrin mo Ol Kavenan 121:41–44).
Kambak blong Kam Oraet Bakegen
Semfala mesej blong hop ia, i go long ol eli riten misinari tedei. Marshall, we i gobak eli from sam jalenj long helt blong hem long bodi mo tingting, samtaem, i rigret long ol problem blong helt blong hem mo from sam samting blong hemwan we i stopem hem blong i wok fulwan olsem wan misinari. Be, hem i filim se seves blong hemia, i gud inaf.
“Olsem ol misinari, mifala i no stret evriwan,” Marshall i talem. “Mifala i stap fesem temtesen yet; mifala i stap mekem sin tu. Be ol samting we oli no stret long mifala, maet oli ol samting ia nao we Setan i wantem mifala blong lukluk moa long olgeta—blong mifala i filim se ofring blong mifala, Lod i no akseptem from ol taem ia we yu no bin wan bes misinari.”
Marshall i biliv se Lod i wantem ol misinari blong oli mas save se Hem i glad tumas wetem seves we oli stap givim, iven taem we, seves ia, oli no bin mekem gud from wan i jusum olsem, o from situesen we i bin stap.
Marshall i bin lanem blong gohed wetem mo kam oraet bakegen, mo mekem evri samting we hem i save mekem blong stap kolosap long Papa long Heven mo Jisas Kraes.
Kambak blong Sakem Sin
Wan nara misinari, we i givim seves long Kolorado, YSA, oli bin sendem hem i gobak hom taem hem i stap long misin from ol disiplin risen, mo oli bin eskomuniketem hem long Jos, mo afta i kasem baptaes bakegen. “Blong kambak hom, i bin had,” hem i talem. “Mi bin filim se mi lus mo mi emti. Long samfala taem, pat we i moa had blong kambak hom, i blong faenem paoa long tingting blong gohed blong go long jos, blong ridim ol skripja, mo stap prea. Ol simpol samting nao oli bin had moa blong mekem.”
Be hem i faenem paoa long sapot blong ol fren mo famli mo blong stap wok blong stap sakem sin.
“Blong putumap ol gol, blong mit wetem bisop blong mi, mo blong stap go long tempol taem mi bin klin inaf, oli bin ol ki samting blong save kam kolosap moa long Papa blong mi long Heven,” hem i ademap. “Mi tingbaot ol taem we mi no save mit wetem bisop blong mi o blong kasem samfala gol; enemi i bin stap ia, oltaem, i stap temtem mi.”
Blong mi kam oraet bakegen i bin posibol taem “mi tingbaot oltaem se mi gat wan Papa long Heven we i lavem mo i wantem mi blong stap hapi. Taem yumi gat wan testemoni abaot Atonmen blong Sevya mo fasin blong sakem sin, yumi save, oltaem, kam kolosap moa long God, i nomata hamas yumi filim se yumi stap longwe long hem.”
“Taem mi lukluk i gobak long misin blong mi,” hem i gohed, mo stap tokbaot ol manis we hem i givim seves bifo ol samting i hapen we i mekem oli sendem hem i gobak hom, “mi stil filim olsem se hem i bin wan long ol bes eksperiens we mi bin gat. Mi bin lanem fulap samting, mo i nomata se i no finis gud olsem we mi bin plan from, mi stil save luk ol laef oli jenis from gospel ia. Mi bin mekem sam mistek, be testemoni blong mi i bin gro plante moa taem mi bin stap traehad blong sakem sin, mo gohed blong muv fored.”
Hem i wantem ol narawan we oli bin kambak eli from joes blong olgeta, blong oli mas save se “wol i no finis long ples ia. Blong kambak hom i wan fasfala step blong sakem sin. Taem yu gotru long rod ia blong sakem sin, bae yu winim fulap finis. Hevi trabol ia, yu karemaot finis long yu. I no gat wan filing we i gud moa bitim blong save se yu stap long raet ples long ae blong God.”
Stap Lavem Olgeta we Oli Kambak Eli
Tufala misinari ia we oli bin kambak eli, oli tokbaot bigwan olsem wanem i impoten blong ol fren mo ol famli blong ol eli riten misinari blong lavem mo sapotem olgeta.
“Givim spes long olgeta,” Marshall i talem. “Be mekemsua se yu stap kolosap, from se i save mekem tingting i sik. Stap fren blong olgeta.” Taem yumi lisin long Spirit, yumi save faenem ol nid blong olgeta, mo save wetaem blong toktok long olgeta, mo wetaem blong respektem praevet laef blong olgeta.
“Jes lavem olgeta,” misinari ia we i givim seves long Kolorado i talem. “Leftemap tingting blong olgeta blong oltaem tingbaot sakrifaes blong Jisas Kraes we i pem praes from ol samting ia.”
Olsem wanem ol narawan oli tritim ol eli riten misinari i save help blong mekem samting i defren bitwin olgeta we oli stap foldaon i go from oli sem, o stap muv fored wetem fet. Long taem ia, i nid blong oli akseptem olgeta mo blong oli no stap jajem olgeta.
Olsem Korianton, ol eli riten misinari oli gat paoa ia i stap blong oli kamaot long sopsop ples we oli stap long hem blong kam ol strong tul blong Lod.
Faenem Hop long Plan blong God
Elda Jeffrey R. Holland blong Kworom blong Olgeta Twelef Aposol i talem ol toktok ia blong kamfot i go long ol eli riten misinari. “Taem wan i askem yu sapos yu go long wan misin, yu talem yes,” hem i talem. “ … stap glad mo holemtaet seves ia we yu bin givim. Talem tangkyu from janis ia we yu bin gat blong testifae, blong save go aot long nem blong Lod, mo blong werem misinari baj ia. … Plis, plis, no gotru long hem bakegen; no tokbaot samting tumas; no tingting we yu yu no naf, o yu no save wokem samting.”1
Long olgeta we oli kambak eli from risal blong sin, tingbaot ol toktok ia blong Sista Joy D. Jones, Praemeri Jeneral Presiden: “Sapos yumi mekem sin, yumi no klin inaf evriwan, !be yumi gat valiu i stap!”2 Hem i talem se God bae i developem tras long yumiwan long ol tudak taem blong yumi sapos yumi tanem yumi i go long Hem.
Mesej we i kam long Buk blong Momon, we i kam long ol eli riten misinari blong tedei, mo i kam long ol lida blong Jos, i semmak: Neva givap long hop, from se God i gat sam plan yet i stap blong yu, we oli bigwan bitim we yu tingting long hem. Long ol famli blong ol misinari ia, wanem bae yufala i mekem taem oli kambak hom bae i mekem bigfala samting i defren blong helpem olgeta blong kam oraet bakegen mo blong oli kasem ful paoa blong olgeta. Tingbaot se Atonmen blong Jisas Kraes i save hilim evri kil—wetem hemia blong olgeta we oli kambak eli long misin blong olgeta.