Gilalang sumala sa Iyang Hitsura
Ang atong mga lawas wala ilalang aron ipasundayag o daygon o hukman pinaagi sa dili makiangayon nga mga sumbanan sa pagkamadanihon. Kini gilalang aron kita makabaton og kinabuhing dayon.
Mga litrato gikan sa Getty Images
Sa digital nga panahon, kita kanunay gipakita og mga mensahe nga ang atong lawas dili kaayo maayo gawas kon kini anaa sa saktong gidak-on ug porma. Ang pipila ka gipamutang sa social media ingon og nagpasabut nga kita kinahanglang mokaon lamang og mga berde nga mga smoothy nga hinimo gikan sa organic nga mga sagol ug modagan og 10 ka milya (16 km) sa usa ka adlaw aron makab-ot ang “perpekto” nga lawas ug sa ingon daygon sa mga higala, pamilya, ug sa mga estranghero.
Daghan kanato maulaw mahitungod sa unsay atong nahibaloan nga dili perpekto sa atong mga lawas. Kita mobati nga tungod kay kita dili mahimong perpekto—tungod kay kita dili sama tan-awon sa mga litrato sa Instagram—kita dili angay nga higugmaon ug dawaton.
Apan walay butang nga mas sayop. Ang atong mga lawas mga gasa gikan sa Dios. Wala kini gilalang aron ipasundayag o hukman pinaagi sa dili makiangayon nga mga sumbanan sa pagkamadanihon. Kini gilalang aron kita makabaton og kinabuhing dayon.
Balaan nga mga Kamatuoran
Sa premortal nga kinabuhi, ang Langitnong Amahan mipresentar sa Iyang plano sa kaluwasan ngadto sa mga espiritu sa langit. Isip kabahin sa Iyang plano, kita makadawat og lawas aron makasinati sa pagkamortal dinhi sa yuta. Sa atong pisikal nga lawas, atong gamiton ang atong kabubut-on sa pagkat-on sa ebanghelyo ug modawat sa mga ordinansa nga motugot nato nga makabalik aron mopuyo uban Kaniya isip nabanhaw nga mga binuhat.
Mao nga, sa pagpatuman sa plano, “Ug gibuhat sa Dios ang tawo sa iyang kaugalingong dagway, sa dagway sa Dios gibuhat niya sila; lalaki ug babaye iyang gibuhat sila” (Genesis 1:27). Tungod kay ang atong Langitnong Amahan adunay lawas sa unod ug bukog (tan-awa sa Doktrina ug mga Pakigsaad 130:22), ang pagdawat sa inyong kaugalingong lawas nagtugot kaninyo sa potensyal nga mahimong sama Kaniya. Ang pisikal nga mga lawas dili lamang dili komportable nga sudlanan sa atong mga espiritu—kini gikinahanglan alang sa atong kaluwasan ug kahimayaan.
Kita wala tawaga sa pagmintenar og piho nga timbang o sa pagpahiuyon sa mga sumbanan sa katahum sa usa ka piho nga katilingban. Kita gitawag sa pag-alagad sa Dios ug aron mas mahimong sama ni Jesukristo. Kita gitawag sa pagpahayag sa ebanghelyo, sa pagmatuto og matarung nga mga pamilya ngadto sa Ginoo, ug sa pagsunod sa dalan sa pakigsaad sa pagbalik ngadto sa atong Amahan sa Langit.
Ang mga Bakak ni Satanas
Kon ang pagbaton og lawas usa ka dako nga panalangin, ngano nga daghan kaayong mga tawo nagkaproblema sa negatibo nga mga hunahuna sa ilang mga lawas o nalinga sa ilang pisikal nga panagway? Ngano nga daghan kaayong mga tawo motan-aw sa ilang lawas uban ang kasuko imbis uban sa gugma ug pag-atiman diin sila tuyo nga gilalang?
Ang atong mga lawas usa ka pribilehiyo ug usa ka gasa. Tingali ang usa ka rason nga si Satanas moimpluwensya kanato sa pagpakigbisog sa paghigugma o pagpasalamat sa atong mga lawas mao nga siya walay lawas. Gisalikway niya ang plano sa kaluwasan ug gisalikway gikan sa langit, dili gayud makasinati sa daghang kalipay ug daghang kasakit sa pagkamortal. Siya makatintal nato sa paghunahuna nga ang atong lawas dili kaayo maayo, nga kita kinahanglan nga mohimo sa makuyaw o dili maayo nga mga butang aron matagbaw ang mga sumbanan sa kalibutan sa “katahum.” Kon kita motuo nga kita kinahanglan nga hingpit nga madanihon aron takus nga higugmaon, ang atong panglantaw dili balanse, ug ang kaaway makahunghong og mga hunahuna sa kakulangan, ka walay bili, ug pagdumot sa kaugalingon diha sa atong mga hunahuna.
Si Satanas gusto nga kita makalimot nga kita gilalang subay sa hitsura sa atong Langitnong mga Ginikanan ug nga ang atong mahangturong bili wala magdepende sa unsay atong hitsura. Ang kaaway nasayud nga ang pagtutok sa atong lawas usa ka makabalda gikan sa mas importante nga mga butang: ang atong mga mithi, ang atong mga relasyon sa ubang mga tawo, ug ang atong relasyon sa Dios. Ang kaaway gusto nga kita mabalaka pag-ayo sa atong hitsura o sa atong gibug-aton aron kita makalimot sa paghimo sa buhat nga kita gitawag sa pagpadayon sa plano sa kalipay.
Gitugahan sa Gahum
Ang atong mga lawas mao ang mga gasa gikan sa Dios, ug kini importante samtang kita maningkamot nga mouswag diha sa dalan sa pakigsaad. Ang pagsabut nga ang pagbaton og usa ka lawas usa ka pribilehiyo nga wala ihatag ngadto niadtong kinsa mipili sa pagsunod sa plano ni Lucifer imbis mosunod sa Langitnong Amahan ug ni Jesukristo talagsaon kaayo nga pagtugot. Nagkinahanglan kita sa atong lawas nga modawat sa mga ordinansa sa templo, diin kita makakat-on usab sa maanindot nga mga plano mahitungod sa katuyoan ug potensyal sa atong lawas. Ang atong pisikal nga pag-apil sa mga ordinansa sa pagkapari gikinahanglan aron sa pag-andam nato alang sa kinabuhing dayon. Mao nga kita kinahanglan nga mopahigayon sa buhat sa templo alang sa mga patay, kansang mga espiritu karon nabulag gikan sa ilang lawas—dili sila makahimo niini sa ilang kaugalingon.
Ang pagkaamgo unsa ang tinuod nga pribilehiyo sa pagbaton og usa ka lawas makapagamay sa inyong bisan unsa nga mga kahadlok mahitungod sa inyong lawas ug pulihan kadtong mga kahadlok uban sa pasalamat.
Usa ka Malipayon nga Panag-abut
Sa umaabut nga adlaw, ang matag usa kanato mamatay. Ang atong mga lawas temporaryong mabulag gikan sa atong espiritu hangtud kita mabanhaw. Kon kita mabanhaw, ang matag bahin sa lawas, lutahan, ug buhok sa atong pisikal nga pagkatawo “ipahiuli ngadto sa ilang tukma ug hingpit nga bayanan” (Alma 40:23). Kini akong gihanduraw nga usa ka malipayon nga panag-abut samtang kita mohikap, motilaw, mosimhot, makadungog, ug makakita uban sa gibag-o nga kusog ug kalagsik. Naghanduraw ko nga moduol sa mga sakop sa akong pamilya nga pinatuyhad ang mga bukton sa paggakus kanila. Ako wala maghanduraw nga mabalaka mahitungod sa mga marka sa panit nga miinat nga migawas o sa dugang katambok libut sa akong tiyan. Kadtong mga butang mawala. Naghanduraw ko nga kita makakita sa atong kaugalingon ug sa usag usa sa paagi nga kita gitan-aw sa Manluluwas, ug sa atong mga lawas kita pagahiusahon uban sa Dios (tan-awa sa 2 Nephi 9:4).
Ang mga lawas gihatag kanato aron kita mopuno sa sukod sa atong pagkalalang ug modawat sa korona sa himaya diha sa presensya sa Dios nga Amahan (tan-awa sa Doktrina ug mga Pakigsaad 88:19). Kining tanan nahimong posible tungod sa Pag-ula ug Pagkabanhaw ni Jesukristo, kinsa mitubos kanato gikan sa kamatayon ug sala. Kon kita mogamit sa atong mga lawas sa pagpahigayon sa buhat nga kita gitawag nga atong buhaton kay sa pagtutok sa paagi nga tan-awon ang atong mga lawas, kita mas makahimo sa pagkab-ot sa atong hingpit nga potensyal niini nga kinabuhi ug sa sunod.