Pagbati nga “Eksakto Ra Gyud”: 3 ka Paagi sa Pagbuntog sa Negatibo nga Pagtan-aw sa Kaugalingon
Ang tagsulat nagpuyo sa Utah, USA.
Ang depresyon ug kabalaka maoy nakaingon nga ako adunay dili maayong panglawas ug gani grabe nga dili maayong pagtan-aw sa kaugalingon. Apan tulo ka butang nakatabang nako nga higugmaon pag-usab ang akong kaugalingon.
“Ikaw dili maayo.”
Mao kadto ang mga pulong nga nagbitay sa bong-bong sa akong basement. Adunay gamay nga kwarto diin didto ako mag-ehersisyo, ug kon ang negatibo nga mga butang mosulod sa akong hunahuna, isulat kini nako ug ibutang diha sa pisara. Pahinumdom kini sa mga pakigbisog nga akong giatubang ug ang daang kaugalingon nga akong biyaan.
Sulod sa taas nga panahon akong giingnan ang akong kaugalingon nga ako dili maayo kaayo. Gibati nako nga nabug-atan na sa depresyon ug kabalaka, nga misangpot ngadto sa dili maayong kahimsog sa panglawas. Dili nako makakontrol sa akong kaugalingon. Gibati nako nga walay mahimo. Gibati nako nga wala nay paglaum. Nagtuo ko nga ako dili takus sa gugma sa Dios o ni bisan kinsa.
Isip batan-ong mga hamtong, daghan namo tingali nakasinati og mga higayon nga kami mobati nga dili maayo kaayo, kabahin man sa among kinaiya, mga talento, o sa akong bahin, pagtan-aw sa kaugalingong imahe. Karong bag-o, akong gihagit ang akong kaugalingon nga magmatinuoron sa akong kaugalingon mahitungod sa akong kinabuhi. Atol sa akong pagsuhid, akong nakaplagan ang pipila ka butang nga nakaingon sa negatibo nga personal nga imahe nga akong gitipigan sulod sa dugay nga panahon. Apan nadiskobrehan usab nako kining tulo ka butang sa pagbuntog niini.
1. Paghunong sa Pagpakigtandi
Makausa nakabasa ko sa kinutlo ni Theodore Roosevelt nga miingon, “Ang pagtandi mao ang kawatan sa kalipay.” Sa usa ka kalibutan diin ang kinabuhi sa tanan nakasinati og gawasnong pagpakigbahin pinaagi sa social media, gibati nako kanunay nga nadasig sa dili tinuod nga mga pagtandi ngadto sa mga higala, pamilya, ug inila nga mga tawo sa katilingban. Ang akong labing dakong kahuyang gitaparan sa labing dako nga kalampusan sa uban, ug ako sa kasagaran mobati nga daghang kulang. Niining higayona sa negatibo nga pag-aninaw sa kaugalingon, nakaamgo ko nga ako nagkinahanglan nga mousab sa akong hunahuna.
Mihunog ko sa tanang matang sa social media ug nagsugod sa pagpaningkamot sa personal nga pagkapositibo ug nagtan-aw sa labing maayo sa uban. Sa mubo nga higayon, ang akong mga hunahuna nagsugod sa pagkausab. Gihunong dayon nako ang pagtandi sa akong mga negatibo ngadto sa mga positibo sa uban sama sa akong gibuhat kanunay kaniadto. Gani, nagsugod ko sa pagsaulog sa sekretong paagi sa mga kalampusan sa uban! Kini nga binuhatan dali nga nakapawala sa mga problema ug kasina nga akong gihambin sa taas nga panahon. Unsay misunod mao ang klaro nga hunahuna ug abilidad sa pagtan-aw sa mga butang gikan sa mahangturong panglantaw.
2. Pagsubay sa Kabubut-on sa Dios
Ang atong kasinatian dinhi sa yuta usahay ingon og dili kaayo importante tungod sa kahibalo nga kita dili hingpit nga mortal nga mga binuhat. Sa katapusan ang negatibo nga paagi sa pagtan-aw sa akong kaugalingon ug sa akong lawas mihurot sa tanang bahin sa akong kinabuhi. Sa dihang akong gibati nga nagtubo ang kabug-at sa akong pagkadili hingpit, ako mohimo sa makadaot nga mga kinaiya imbis ngadto sa Ginoo. Kini nga mga kinaiya nakahimo og pagbati sa pagkadili hingpit nga bug-at kaayo usahay nga ako mibati sa kinabuhi nga dili takus nga puy-an. Sa katapusan ang bugtong dapit nga akong kaduolan mao ang Ginoo. Pinaagi sa pagpaubos ug paghinulsol, naningkamot ko nga mas makanunayon sa pagbasa sa mga pulong sa mga propeta uban sa usa ka katuyoan ug mag-ampo aron makasabut sa atong palibut uban sa langitnong mga mata.
Walay pagsulay nga dako kaayo kon kita moduol ngadto sa Ginoo ug modawat sa Iyang kabubut-on, bisan unsa pa ang sangputanan. Sukwahi, ang mga pagsulay ingon og mabati nga bug-at kon kita mosulay sa pagpugos sa atong kabubut-on kay sa Iyang kabubut-on. Pinaagi sa pagdawat sa Iyang kabubut-on, akong nakaplagan ang mas taas nga lebel nga katin-awan, ug ako nagsugod sa pagkakita sa bili sa akong pagkatawo imbis sa kanunay nga magpuyo sa usa ka kahimtang sa kakulang.
3. Pagpalambo og Hingpit nga Gugma
Sa Moroni 8:16 kita giingnan nga “ang hingpit nga gugma mosalikway sa tanan nga kahadlok.” Ang hingpit nga gugma mao ang labing gamhanan nga himan nga atong magamit kon kita mag-atubang sa atong kaugalingon sa salamin ug makasabut sa mahangturong bili sa atong kaugalingon ug sa tanan nga naglibut kanato. Sa pagkakita sa atong kaugalingon kon kinsa kita imbis sa pagtutok sa atong mga sayop. Dili kini mag-agad sa dayag nga panagway. Ang pagpasaylo sa atong kaugalingon ug sa uban sa miaging mga sayop ug pagpadayon samtang magtutok sa mahangturong himaya.
Akong nakaplagan nga ako dili yanong makasulay sa paghigugma; kinahanglan nga ako motugot nga kini moimpluwensya kanako ug mahimong kabahin kon kinsa ako. Pinaagi sa pagsabut sa hingpit nga gugma kita makakita sa tinuod nga kinaiya sa Dios—ug pinaagi sa pagpalugway sa atong kaugalingong balaan nga kinaiya—ug sa dalan nga Iyang gihimo alang kanato.
Ang akong panaw ngadto sa mas maayo nga mental, pisikal ug espiritwal nga kahimsog nakapalig-on sa akong pagtuo sa gitakda nga panahon sa Dios ug sa Iyang mahangturong gugma alang kanako. Usahay ako maguol pag-ayo, apan kon ako mohunong sa pagtandi sa akong kaugalingon ngadto sa uban, ipahiuyon ang akong kabubut-on sa kabubut-on sa Dios, ug magkat-on sa tinuod nga paghigugma sa akong kaugalingon, motutok sa imahe sa akong mahangturong kapalaran ug ako makakaplag og kalinaw. Ang gugma sa Dios walay kinutuban nga gamhanan. Kon kita mopahinay ug mogahin og panahon sa pagdiskobre niini, Siya motabang kanato nga makakita nga kita eksakto ra gyud, bisan sa atong labing huyang nga mga gutlo.