Kōjeraam̧m̧an ko an juon Gospel Ejimourur

Jān Elder Gary E. Stevenson

Jān Doulul eo an Jon̄oulruo Rijilōk ro

Jān juon kōnono jān juon kadiwōjļo̧k, “Paths for Happiness,” kwaļo̧k ilo Brigham Young University–Hawaii ilo Jeptōm̧ba 19, 2017.

Juon gospel eo ejimourur ej lewaj n̄an eok alikkar eo eļap kōn wāween am̧ ļōmņak kōn mour eo am̧ m̧oktata, mijaļ būrabōļōm̧ ko, im jeļm̧ae kapo ko an juon make.

Ej juon kōjeraam̧m̧an eļap n̄an erom̧ membōr ro an Kabun̄ eo an Jisōs Kraist ilo epepen in ilo jepļaaktok in kii ko an aelōn̄ in kiin̄ eo n̄an kakūrm̧ool kanaan ekōm̧m̧an ad kam̧ool “gospel eo enaaj jabwilbwil m̧aanļo̧k n̄an jem̧ļo̧k ko an laļ, āinwōt dekā eo m̧wijiti jān toļ ko kōn ejjeļo̧k pā ko enaaj jabwilbwil m̧aanļo̧k, m̧ae an naaj kobrak aolepān laļ” (Katak im Bujen ko 65:2).

Kanaan eo, letok jen Daniel ilo Kallim̧ur Mokta im bar āliji ilo epepen in, āinwōt epād io̧lepen n̄an kakūrm̧oole ilo ad loe enan̄in 3,300 stake ko em̧ōj aer ejaak ilo Kabun̄ in rainin. Ilo 50 iiō ko rem̧ootļo̧k, membōr in Kabun̄ in eaar lōn̄ļo̧k jān 2.1 milien n̄an enan̄in 16 milien.¹

An kabwilōn̄ eō kōn m̧ōkaj an eddōkļo̧k im em̧ool an oktak kōn katak im imminene ko an gospel in rej pād wōt, ekoba wāween karōk an Anij n̄an Kabun̄ in an Jisōs Kraist. Karōk in ekōm̧m̧ane ejaak ko an stake ko, kar āje n̄an leļo̧k, “juon jikin jojomar, juon jikin likōpejn̄ak jān lan̄ eo, im jān libabne n̄e naaj lutōk leplepļo̧k ilo ejjeļo̧k kāre ioon aolepān laļ” (Katak im Bujen ko 115:6).

Ro jeiū im jatū, Irooj ej m̧ool ilo kōjeraam̧m̧an ko Ej letok n̄an kōj. Ium̧win kōjeraam̧m̧an kein rej jerbal ekkar n̄an pokake eo ad n̄an kien ko im n̄an kōjparok kien ko ej kwaļo̧k ad iakwe n̄an Irooj eļaptata n̄an ekkatak. Katak ko an gospel in rej letok n̄an kōj juon ejimourur eo eaorōk.

Menin ej letok ruo jibadbad ko ikōņaan kwaļo̧k. Ij keememej Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, m̧oktaļo̧k eaar kwaļo̧k jibadbad kein ruo n̄an rūm̧m̧an ded ro ilo 2015.

Dāpij juon Gospel Ejimourur

Būreejtōn Oaks eaar ba bwe “ejimourur ej meļeļein lo aolep m̧ool ko ilo juon jem̧doon eo ewōr tokjen, aolepen.”² Erkein jet ko komeļeļe n̄e kwoj loi ilo juon gospel ejimourur:

Kwoj ajri eo nejin Jemedwōj Ilan̄ (lale Katak im Bujen ko 76:24).
Kwoj pād ijin ioon laļ in kōn juon jibadbad, kōn maron̄ n̄an kōm̧m̧an jokālet ko (lale 2 Nipai 2:27; 10:23).
“Bwe emennin aikuj, n̄an an wōr jum̧ae ilo men otemjej” (2 Nipai 2:11).
Jisōs Kraist ej ad Rilo̧mo̧o̧r im rijojomar ippān Jemed (lale 1 Jon 2:1; Katak im Bujen ko 110:4).

Ļōmņake ta ej waļo̧k eļan̄n̄e gospel ejimourur eo am̧ ejino dikļo̧k ilo aolepān am̧ mour. Juon gospel eo ejimourur ej lewaj n̄an eok alikkar eo eļap kōn wāween am̧ ļōmņak kōn mour eo am̧ m̧oktata, mijaļ būrabōļōm̧ ko, im jeļm̧ae kapo ko an juon make. Emaron̄ lukkuun jelet aolep jibadbad eo am̧ ilo aolepen mour eo am̧ im kālet ko kwonaaj kōm̧m̧ani m̧aanļo̧k.

Kōn errem̧anļo̧k in, jej jeļā bwe Irooj ekōņaan bwe jen bōk m̧ōttan kwojkwoj eo kajjojo wiik im bwe jen ekkatak jeje ko rekwojarjar im jar n̄an E kajjojo raan. Ilo kakkobaba, jej jeļā bwe Setan enaaj kapo kōj n̄an jab ļoor ad Rilo̧mo̧o̧r ak ron̄jake im̧we ko an Jetōb Kwojarjar. Innām jenaaj maron̄ kile bwe rikapo eo ej kajjieon̄ in bōk anemkwoj eo ad im maron̄ eo n̄an jutak ņae kije ko an kōn an̄ūrļep, ekoba uno ko rekajoor im pija ko renana.

N̄an keidi, meļeļe eo an gospel in ej letok n̄an kōj juon visōn eo ealikkar kōn aorōk eo n̄an ejaake baam̧le ko—pepe n̄an m̧are im kōkajiririik ajri ro ilo jim̧we. Errelo̧k in ekōpeļļo̧k mājed n̄an lo bwe rikapo eo ekōņaan kakkure jem̧doon eo an baam̧le im kapok eddo eo an kōrā im em̧m̧aan, tōl ļo̧k n̄an an jukjukin pād eo ej kadikļo̧k aorōk eo ilo meļeļe n̄an kalōk baam̧le ko.

Dāpij juon Jetōb in Peļan

Būreejtōn Oaks eaar kwaļo̧k: “N̄e rūm̧m̧an ded ro rejimourur— aolepeer— ej menin aorōk n̄an er n̄an dāpij jetōbin peļan ilo mour ko aer. N̄an kōm̧m̧ane menin, kwoj aikuj joļo̧k jet m̧ōm̧ ko an laļ in barāinwōt im kōm̧m̧ani men ko rekkar n̄an epaakeļo̧k Rilo̧mo̧o̧r.”³

Ilo turājet eo juon, komaron̄ in kwaļo̧k menin kōnono ko im men ko an mour im̧aantata im ko, men otemjeļo̧k ko aikuji, mije, im tōl. Laajrak eo n̄an kajjojo iami emaron̄ in jidik pen pedped wōt ioon jekjek ko ami, ak ilo er naaj maron̄ lo jeļāļo̧kjeņ, jerbal, m̧are, im ājmour jim̧or ilo en̄jake im kanniōk. Aaet, apan̄ eo am̧ ej n̄an peļane aorōk in jerbal eo an mour in ņae jetōb eo am̧.

Būreejtōn Oaks ekar barāinwōt kapilōk bwe kwoj aikuj in mejmejkaruo ilo am̧ “kōjenolo̧k iien ko am̧ bwe kwon jab kōm̧m̧an bwe jetōb eo am̧ make en kwōle n̄e m̧akūtkūt ko am̧ raorōktata rej ilo men ko jet. Katak in ekōmeļeļeik unin an lukkuun aorōk n̄an rūm̧m̧an ded … n̄an ļoor kapilōk n̄an etal n̄an kweilo̧k ko an Kabūn̄, jerbal ilo Kabun̄ in, ekkatak jeje ko rekwojarjar aolep raan, im būkwelōlō im jar ippān baam̧le eo aolep raan, jerbale kūr ko ilo Kabun̄ in.”⁴

Ilo io̧lepen am̧ make iien im aikuj ko, n̄an peļane jokkon mour im apan̄ ko am̧ ilo jetōb, kwonaaj kile peļan emennin aorōk. Irooj ejjab kōņaan bwe kwon kōm̧m̧ane men otemjeļo̧k n̄e kwoban kōm̧m̧ani. Iaar ron̄ Būreejtōn Thomas S. Monson (1927–2018) ilo elōn̄ iien ko eaar kapilōk “eo Irooj ej kūri, Irooj ej kakōrbabe.”⁵ Ij ļōmņak ej iokļo̧k n̄an membōr ro an Kabun̄ in.

Āinwōt n̄an dāpij peļan in emaron̄ in, ij kallim̧ur bwe juon iaan kabwilōn̄lōn̄ ko ilo mour in am̧ enaaj maron̄ eo am̧ n̄an pukot peļan kōtaan mour in jetōb eo am̧ im jerbal ko jet raorōk ilo mour in. Menin emaron̄ bōk jikin ilo juon wāween eo me enaaj kōm̧m̧an bwe kwon baj wōt dāpij mour in jetōb eo am̧ im jerbal ko raorōk an mour in n̄an jon̄e eddōkļo̧k barāinwōt im kajoor ilo jim̧or eria kein raorōk.

Lukkuun kōttōbar eo im epidodo me Irooj ej unleplep eo n̄an rie. Em̧ool E ej unjen peļan in. Im ewōr An itok limo ko rekwojarjar ilo kwe make āinwōt juon iaan ajri ro Nejin. Ak kōttōbar in ej pedped wōt ioon mije im kijejeto n̄an bōk peļan.

Jān aō etale im en̄jake, āinwōt n̄e jej kowaan tokjen ad mour n̄an bōk eļapļo̧k ilo wāween eo juon ak eo juon. N̄an dāpij wōt peļan ilo mour ko ad ebōk ad kijejeto im kea. Kālet n̄an dāpdāp wōt.

Ekabwilōn̄lōn̄, emaron̄ etal wāween ko jim̧or. Emaron̄ in wōr iien ko kwoj lo ke kwoj aikuj in kōjerbal ke n̄an kōjparok mije eo am̧ ilo jikuuļ ak jerbal, ippān “an dedeļo̧k jerbal in jipan̄ an Kabun̄ ilo iien jerbal ko an Kabun̄.”⁶ Ijoke, keememej n̄an dāpij āinwōt am̧ rijipan̄ bwe kwon maron̄ lo mour in jetōb eo am̧ ekkar.

Irooj Enaaj Jipan̄ Eok

N̄e jej kōjparok juon gospel eo ejimourur, epidodo n̄an meļeļeiki pedped in m̧ool eo bwe Irooj enaaj jipan̄ kōj. Pedped in gospel in ej bwe jej ro nejin Jined im Jemed Ilan̄ ro rej iakwe. Em̧ool bwe Renaaj jipan̄ kōj ilo aolep wāween n̄an rooļ ļo̧k n̄an m̧weo im̧ōd ilan̄.

Ikōņaan kwaļo̧k juon waanjon̄ok an Irooj maron̄ jipan̄ kwe. Juon iaan ritōl ro aō ilo jodikdik, Thad Carlson, eaar kwaļo̧k n̄an eō elōn̄ iiō ko. Thad, eo ej kab mej, eaar im̧we eō ke ikar rūttoļo̧k. Eaar rūttoļo̧k ilo iien Great Depression eo, ratimjuon iaan ajri ro 14. Baam̧le eo an rej bōk aer mour jen jikin kallib im tāāp menin mour. Jāān eaar pen, im jeraam̧m̧an eo aer eļaptata ekar jen menin mour ko aer.

Ilo jodikdik ko an Thad, juon iaan eddo ko an ekar lale, im n̄e ekkar, menin mour ko n̄an lukkuun lale n̄e rej m̧ōn̄ā—juon jerbal eļap n̄an juon ļaddik edik. Eaar maron̄ in kōm̧m̧an menin kōn jipan̄ eo an juon kidia emāletlet eo ekar jeļā ta eo ej kōm̧m̧ane kōn jidik tōl. Kidia in kar ņaetan Old Smoky. Ak Old Smoky eaar jidik bōd: eaar jab kōņaan bwe ren jibwe. N̄e jabdewōt rej epaake, ej ko, jeļā ke rej tin bar kōjerbale.

Juon raan, ālkin kar jibwe Old Smoky, neen, ekar eddo, Thad eaar jibadōkļo̧k meļaaj eo ijo menin mour ko raar m̧ōn̄ā ie. Bwidej eaar kanooj m̧ōrā, im bar meļaaj eo, ak Thad eaar kile bwe ujooj ko ilo meļaaj eo ilo iaļ eo raar kanooj aetok im maroro. Kōn menin eaar ļōmņak enaaj kar naajdik kau ko ilo meļaaj in oror eo im kōtļo̧k bwe ren m̧ōņōņōik m̧ōn̄ā eo kijeer ilo iaļ eo.

Kōn jipan̄ eo an Old Smoky, Thad eaar naajdik menin mour ko ilo meļaaj eo, ijo raar jino etal itok m̧ōn̄ā ilo iaļ eo, ujooj. Kau ko raar lale er make, kōn menin Thad eaar to jen kidia eo an im jijet ioon neen kidia eo, m̧ōn̄ōņō ipeļaakin, ikkure im kam̧ōņōņō e make. An make kalimjōk ujooj maroro ko, ijoke, Old Smoky eaar jebwābwe, neen ko neen raar wōtļo̧k jān Thad.

Jokne im aenōm̧m̧an in eaar itok ilo juon jorrāān im ke Thad eaar ron̄ juon ainikien eļaaj jān ettoļo̧k. Eaar juon wājōļ in tūrein an itok ilo iaļ eo ijo menin mour ko an rej etetal adim̧akoko im̧aan! Eaar kile bwe jekjek eo emaron̄ in nana n̄an menin mour eo im bar n̄an baam̧le eo an eļan̄n̄e eban m̧ōkaj in ubaaki ļo̧k n̄an meļaaj eo jen an itok tūrein eo. Eaar en̄jake ke eban maron̄ in jeo̧rļo̧k an make bōd n̄an jab kakūrm̧ool lōke eo an.

Thad eaar kelo̧k im ettōrļo̧k im jibwe neen Old Smoky. Old Smoky eaar lo an Thad itok im m̧ōkaj in ko jān e, jab kōņaan bwe ren jibwe. Mōk im inepata, pijaikļo̧k an mej kau ko im an ļōmņake an baam̧le eo an būrom̧ōj, Thad eaar m̧ōkaj in jerbale.

Tokālik eaar je ta eo eaar waļo̧k: “Būraimere rūkaki eo aō eaar katakin kōm kilen jar im kar kapen katak ko kar katak jān jinō. Kōn ejjeļo̧k bar ļōmņak, Iaar būkwelōlō im jino jar kōn jipan̄ n̄an ubaaki ļo̧k kau ko jen iaļ eo.”

Thad eaar jab ron̄ juon aenikien, ak juon ļōmņak ealikkar eaar itok n̄an e: “Keememej elmen an kau ko maron̄ etetal jen Old Smoky im eban em̧akūt. Kōn menin … kiiō kwoj jubukwe, kwaļo̧k peim̧. Ikkure āinwōt n̄e kwoj juon kau im pād ioon Old Smoky.”

Thad eaar ba: “Iaar kōm̧m̧ane. Eaar jab m̧akūtkūt. Iaar jibwe neen, kōtallōn̄e ioon oror eo, kuku likin, im kōm ar aekoj in aiini kau ko n̄an meļaaj eo. Old Smoky eaar jab lukkuun peran ilo kajjojo oktak.”

Tokālik, ke Thad eaar pād ilo high school, eaar kile ke eaar bōk juon uwaak eo ealikkar kōn jar eo an ilo iien eo kar aikuji. Eaar lo, “Enjeļ ro raar kōjeraam̧m̧an Old Smoky jen aō maron̄, im baam̧le eo am̧mim eaar joor jen jerata.” Tokālik eaar ba: “Ej kab kein kajuon in elōn̄ im̧we ko me [raar] itok n̄an eō. ‘Im jabdewōt kom̧ naaj kajjitōk jān Jema ilo Eta, eo ejim̧we, im tōmak bwe kom̧ naaj bōk; lo naaj lewōj e n̄an kom̧.’ (3 Nipai 18:20).”⁷

Kōm ar aiin aolep menin mour ko jen iaļ eo m̧okta jen an tūrain eo itok. Kauwōtata ko ad rej itok ilo elōn̄ wāween im jekjekier. Jet eļapļo̧k aer kauwōtata āinwōt ko an Thad, ippān kamijak ko an mour ak kamijak ko an jetōb rejelet kōj ak ro rejitenbōro ippād.

Jekjek ko jet jej iooni remaron̄ jab jekjek ko reļļap ak ijoke eddo ilo kōļmenļo̧kjeņ im ilo būruwōd. Juon men eo em̧ool—kajjojo iaad renaaj ioon kapo im apan̄ ilo mour ko ad kōnke rej m̧ōttan mour in. Ak keememej, bwe Irooj enaaj jipan̄ kōj!

Em̧m̧an ippa naan kein loi ilo Bok in Mormon eo: “Jej lo bwe Anij ej ļōmņak kōn armej otemjeļo̧k, jabdewōt āne eo rej pād ie; aaet, E ej bwine armej ro An, im An būruōn tūriam̧o rej ioon aolepān laļ.” (Alma 26:37).

Meļeļein bwe kōj kajjojo. Ej juon inem̧m̧an n̄an jeļā bwe Irooj enaaj jipan̄ kōj.

Tōmak, kōjatdikdik, im juon Gospel Ejimourur.

Ilo kōmeļeļe, ij rōjan̄ kom̧ n̄an keememej n̄an dāpij juon gospel ejimourur. Reito-reitak ipeļaakūm̧ kōn mejen gospel eo an Jisōs Kraist.

Dāpij juon jetōb in peļan. Jej aolep ioon apan̄ ko im iien ko rem̧m̧an ilo eddo ko ad ilo mour in, im rej jerbal n̄e jej peļane kōn tōmak ilo Jisōs Kraist im ilo Pinmuur eo An.

Āliktata, bōk tōmak im kōjatdikdik bwe Irooj enaaj jipan̄ eok. Jeļā in ej ta eo ej jipan̄ jelm̧ae apan̄ ko am̧ me rej m̧ōttan mijen in am̧ ilo mour in.